Yasanibuka ena na Misuri, mai vei Bryan Mark Taylor

31 ni Me–6 ni Jiune

Vunau kei na Veiyalayalati 60–62

“Sa Tu Ena Qeteqete ni Ligaqu Na Bula ni Tamata Kecega”

A kaya o Elder Ronald A. Rasband: “E dodonu meda dui vaqaqacotaki keda mada vakayalo ka qai laki vaqaqacotaki ira era tiko voliti keda. Vakasamataka vakatitobu e veisiga na ivolanikalou, ka nanuma tiko na veika o nanuma ka vakila ni ko wiliwili tiko” (“De Ko ni Guilecava,” Ensign se Liaona, Nove. 2016, 114).

Vola na Veika o Vakauqeti Kina

Sureta na Veiwasei

O na rawa ni vakauqeta e dua na veivosaki vakaibalebale ena nomu sureti ira na lewe ni kalasi mera sauma e dua na taro se vakasama bibi e veisemati ki na ivolanikalou eso era sa wilika mai vale. Me ivakaraitaki, e rawa ni o sureti ira mera wasea e dua na ka era a vulica ena macawa oqo me baleta na Tamada Vakalomalagi se o Jisu Karisito.

Vakavulica na iVunau

Vunau kei na Veiyalayalati 60:2–3, 7, 13–14; 62:3, 9

E marautaka na Turaga ni da dolava na gusuda me da wasea na kosipeli.

• Ni da sa lewe ni Lotu, eda kila ni kosipeli vakalesui mai e sa dua na iyau talei e vakalougatataka na nodra bula na luve ni Kalou. Ia na cava ga eda dau lomalomarua kina ena so na gauna me wasea na noda ivakadinadina vei ira na tani? Vakasamataka mo sureti ira na lewe ni kalasi mera tuva ena vava ni volavola na vuna eso eda dau sega kina ni dolava na gusuda meda wasea na kosipeli. Mera qai wilika na lewe ni kalasi na Vunau kei na Veiyalayalati 60:2–3, 7, 13–14; 62:3, 9, ka vakaraica na veivosa se malanivosa e vakauqeti ira mera wasea na kosipeli. Sa rawa mera vola ena vava ni volavola na veika era sa kunea. Eso beka na lewe ni kalasi e rawa ni wasea na gauna era a vorata rawa kina na nodra rere ka wasea na kosipeli vata kei na dua.

• Ena loma kece ni Vunau kei na Veiyalayalati 60–62, e tu kina na ivakavuvuli, e cavuti ka vakaibalebaletaki, me baleta na wasei ni kosipeli. Me vukei ira na lewe ni kalasi mera raica rawa na ivakavuvuli oqo, sa rawa mo tarogi ira yadua me railesuva e dua na iwase oqori ka wasea na veika era sa kunea e vakavulica vei ira me baleta na wasei ni kosipeli. Ena rawa beka ni vukea na kena veivosakitaki oya me wiliki me baleta na nodra ivakaraitaki vinaka na daukaulotu ena veivanua tale eso mai na ivolanikalou (raica, me ivakaraitaki, Cakacaka 8:27–40; Alama 19:16–17) ka veivosakitaka na veika eda vulica mai vei ira. Na ivakaraitaki cava so e rawa ni da wasea mai na noda dui bula? Eso beka na lewe ni kalasi e rawa ni wasea na sala era a vakaveikilaitaki kina ki na kosipeli kei na cava era a vakila me baleti ira na tamata ka ra vakavulici ira? Ena yaga beka ki na nomu kalasi na kena dramataki na sala eso eda rawa kina me “dolava na gusu[da]” ka wasea na kosipeli.

  

  E vinakata na Kalou meda wasea na kosipeli vei ira tale eso.

Ni Vunau kei na Veiyalayalati 60:2–4; 61:1–2, 20, 36–38; 62:1, 6

Na ivolanikalou e vakavulici keda me baleti Jisu Karisito.

• Sureti ira na lewe ni kalasi mera vola ena vava ni volavola e dua ga na ka era sa vulica me baleta na iVakabula ena macawa oqo ena nodra vulica tiko na wase 60–62, vata kei na tikina veisemati eso. Se e rawa ni ra vakasaqara ena Vunau kei na Veiyalayalati 60:2–4; 61:1–2, 20, 36–38; 62:1, 6 mera raica na veika era vakatavulica me baleta na iVakabula. Na italanoa cava soti mai na ivolanikalou se na noda dui bula e vakaraitaka na itavi kei na itovodei ni iVakabula ka da sa vulica? (me ivakaraitaki, Joni 8:1–11; Ica 2:14–15). Ena rawa mo sureti ira na lewe ni kalasi mera wasea na nodra ivakadinadina baleti Jisu Karisito se mera vakasamataki Koya vakatitobu vakai ira yadua.

Vunau kei na Veiyalayalati 60:5; 61:22; 62:5–8

E vinakata na Turaga me da vakayacora eso na vakatulewa ka “lewa ga na ka [meda] kitaka.”

• Vakasamataka mo sureti ira na lewe ni kalasi mera wilika na Vunau kei na Veiyalayalati 60:5; 61:22; 62:5–8 yarurua se ilawalawa lalai ka wasea na veika era vakila me sa itukutuku ni Turaga vei keda. Na gauna cava beka era a vakila ni dodonu mera dau vakayagataka na nodra dui vakatulewa ga ena kena vakatauci e dua na lewa? Sa rawa mo wasea na itukutuku nei Peresitedi Dallin H. Oaks ena “iKuri ni iVurevure” me tiki ni veivosaki. Era na vukei ira vakacava na luvedra na itubutubu mera vulica na ivakavuvuli bibi oqo?

iKuri ni iVurevure

Na cakacakataki ni noda vakatulewa vinaka duadua.

A vakavulica o Peresitedi Dallin H. Oaks:

“E dua na gagadre meda liutaki mai vua na Turaga o ya e dua na kaukauwa, ia e dodonu me salavata kei na kena kilai ni Tamada Vakalomalagi e dau biuta tu e vuqa na vakatulewa ki na noda digidigi yadua. Na vakatulewa ni tamata yadua e sa dua na ivurevure ni tubu e nakiti me da sotava ena bula oqo. O ira era tovolea me vagolea vua na Turaga na vakatulewa kecega ka kerea na ivakatakila ena vei digidigi kece era na sotava na ituvaki eso era na sega ni ciqoma rawa na ka era masuta mera dusimaki kina. Me kena ivakaraitaki, oqo e rawa ni dau yaco ena vei ituvaki eso e sega ni bibi sara na digidigi se donu na digidigi ruarua.

“E dodonu meda dikeva taumada ena noda vakasama, ni da vakayagataka na kaukauwa ni noda rawa ni vakadeuca na ka, ka sa vakatikora oti tu e lomada na noda Dauveibuli. Meda qai masuta na veidusimaki ka cakacakataka kevaka eda sa ciqoma. Kevaka eda sa sega ni ciqoma na veidusimaki, e dodonu meda na vakatulewa vakadodonu sara” (Our Strengths Can Become Our Downfall,”,” Ensign, Oct. 1994, 13–14).

Vakatorocaketaki Noda Veivakatavulici

Mo kilai ira era sotava na dredre. E sega ni rawarawa na kilai ni dredre era sotava tiko o ira o vakavulica. Ia ena veivuke ni Yalo kei ira nomu iliuliu, sa rawa mo kila na sala vinaka duadua mo dodoliga yani kina vei ira yadua oqori. (Raica na Veivakavulici ena iVakarau ni iVakabula, 8–9.)