Springhill, na Yasayasa o Deviesi, Misuri, maivei Robinson Oborn

7–13 ni June.

Vunau kei na Veiyalayalati 63

“Ni Sa ka Tabu Na Veika Mai Cake”

Vola na veivakauqeti o sa ciqoma ni ko vulica tiko na Vunau kei na Veiyalayalati 63. Na veivakauqeti ena rairai ka lailai, ia me vaka na sorenikau, e rawa ni tubu ki na kena e vakaibalebale ka vuavuai vinaka ni ko vakasaqara tikoga ka vakasamataka vakatitobu.

Vola na Veika o Vakauqeti Kina

Sureta na Veiwasei

Me vukei me vakanamata na nomuni veivosaki ena veitikina era raica na lewe ni kalasi e vakaibalebale levu cake duadua, sa rawa mo sureti ira me ra vola ena veitiki ni pepa eso na tikina mai na wase 63 era gadreva mera na veivosakitaka. Oti mo qai kumuna mai na pepa ka veivosakitaki sara na veitikina a vakatura mai e vica na lewe ni kalasi. Kerei ira mera wasea na vuna era sa digitaka kina na veitikina oqori.

Vakavulica na iVunau

Vunau kei na Veiyalayalati 63:7–12

Ena yaco mai na ivakatakilakila ena vakabauta kei na loma ni Kalou.

• Me tekivutaki kina e dua na veivosaki ena ivakavuvuli e vakatavuvulitaki ena Vunau kei na Veiyalayalati 63:7–12, ena rawa ni veivuke me ra taleva lesu kina e vica na ivakaraitaki mai na ivolanikalou baleti ira na tamata era a vakadinadinataka na ivakatakilakila se na caka mana. De rawa vei ira na lewe ni kalasi mera vakasamataka eso na ivakaraitaki ni nodra vakabauta eso a vaqaqacotaki ena dua na ivakatakilakila (raica, na ivakaraitaki ena, Luke 1:5–20, 59 – 64) se o ira era sa vukitani dina ga ni oti nodra raica e dua na ivakatakilakila (raica, me vakataka na, 1 Nifai 3:27 – 31; Alama 30:43 – 56). Mera na qai vakayagataka na lewe ni kalasi na veika era sa vulica ena Vunau kei na Veiyalayalati 63:7– 12 mera vakamacalataka na imoimoi duidui me baleta na ivakatakilakila. Se rawa mo railesuva na tiki tale eso ni ivolanikalou me baleta na ivakatakilakila, me vakataka na kena sa volai tu ena “iVakatakilakila” ena iDusidusi ki na iVolanikalou (scriptures. ChurchofJesusChrist.org). Eda na vakadeitaka vakacava ni da sega tiko ni vakasaqara se vakararavi tikoga ki na ivakatakilakila me yavu ni noda vakabauta?

Vunau kei na Veiyalayalati 63:13–16

Na ibalebale ni tiko savasava o ya meda maroroya na noda vakanananu kei na noda ivalavala me savasava.

• E dina ga ni vuqa na vosa ena Vunau kei na Veiyalayalati 63: 13 – 16 e tukuna vakatabakidua tiko na dodomo e tautuba, na kena ivakavuvuli sa vakavulici tiko e rawa ni okati kina na kena voroki e dua na lawa ni tiko savasava. Sa rawa mo sureta na lewe ni kalasi mera raica na revurevu e vakamacalataki tiko ena Vunau kei na Veiyalayalati 63: 13–16. Sa rawa mada ga mera raica na “liaci ira” (tikina e 15) se ivakatakilakila ni qaqarauni e vakasalataka tiko na revurevu oqo. Sa rawa talega mera veivosakitaka na nodra nanuma baleta na ibalebale ni revurevu oqo. Me vakataka, na cava na vuna na voroki ni lawa ni tiko savasava e yaco kina na veilewai vua e dua “me vaka na icori” (tikina e 15)? Na cava na vuna e vakasalataki keda kina na Turaga meda “veivutuni kusarawa” (tikina e 15) mai na ivalavala ca ni veiyacovi? (raica na vosa nei Sister Linda S. Reeves ena “iKuri ni iVurevure”).

• Ni wiliki na Vunau kei na Veiyalayalati 63: 16 ena rawa ni yaco kina e dua na veivosaki me baleta na veivakauqeti ni iyaloyalo vakasisila ena noda itikotiko raraba. E semati vakacava na ivakasala e tiko ena tikina e 16 ki na leqa oqo? (E dina ga ni vakaibalebaletaki vakatabakidua vei ira na tagane ni ra domoni ira na marama, na ivakatakila oqo sa baleti keda kece.) Na cava eda rawa ni cakava meda taqomaki keda kina kei ira na noda daulomani mai na iyaloyalo vakasisila? Sa rawa vei ira na lewe ni kalasi me ra veivakasalataki vakai ira. Na mataveilawa ni AddressingPornography.ChurchofJesusChrist.org e rawa ni solia na vakanuinui ka vukei e dua ka rawa me vakaleqai tiko ena iyaloyalo vakasisila.

  

  Eda na vakalougatataki ni da maroroya na lawa ni tiko savasava.

Vunau kei na Veiyalayalati 63:58–64

Na veika tabu e dodonu me ra raici ena vakarokoroko.

• Sa rawa mo dou veivosakitaka vakalasi na Vunau kei na Veiyalayalati 63: 58 – 64 me ivakasala me kakua ni cavuti wale na yaca ni Turaga, kei na ivurevure eso ena Ulutaga Vakosipeli ena ulutaga “Veivakacacani” (topics. ChurchofJesusChrist.org) me vakabulabulataka kina na veivosaki. Sa rawa talega mo vukei ira na lewe ni kalasi mera vakayagataka vakarabailevu na veitikina oqo. Me ivakaraitaki, ni rawa mo veivosakitaka na malanivosa “na kena dodonu” (tikina e 62) me vakaikuritaka na noda kila na tikina. Sa rawa mera vola talega na lewe ni kalasi na veika tabu tale eso era lako “mai cake,” se mai vua na Kalou. Na cava na kena ibalebale “me qarauni” noda cavuta na veika oqo? (tikina e 64).

iKuri ni iVurevure

Ni da tiko savasava eda sa vakadonui kina meda itokani kei na Yalo Tabu.

E vakavulica o Sister Linda S. Reeves, lewe taumada ni Mataveiliutaki Raraba ni iSoqosoqo ni Veivukei:

“Au sega ni kila e dua na ka meda na rawata kina na veitokani tudei kei na Yalo Tabu me vakataka na bula dodonu. …

“Ni da okati keda ena saravi, wiliki, se cakava na veika e torosobu mai na ivakatagedegede nei Tamada Vakalomalagi, oqori ena vakamalumalumutaki keda. Se cava ga na noda yabaki ni bula, kevaka eda raica, wilika, vakarogoca, se digitaka meda cakava na veika e sega ni salavata kei na ivakatagedegede ni Turaga e tiko ena Me iSakisaki ni iTabagone, mo sogota, dresulaka, kolotaka laivi, ka sogota na katuba. …

“… Au vakabauta kevaka meda nanuma ka kila tiko ena veisiga yadua na titobu ni nodrau lomani keda na Tamada Vakalomalagi kei na noda iVakabula, eda na vakaio meda cakava na veika kecega meda lesu rawa tale ki na Nodrau iserau, ka solegi ena Nodrau loloma tawamudu.”(“Bula Kilikili ki na Noda Veivakalougatataki Yalataki,” Ensign se Liaona, Nove. 2015, 10–11).

Vakatorocaketaki Noda Veivakavulici

Vakayagataka na sereivakatagi vakalou. Na itukutuku e tiko ena serenilotu kei na sere mai na iVolanisere ni Lalai e rawa ni vaqaqacotaka na ivunau o ni vulica tiko ena ivolanikalou. Ena gauna, e lagati kina e dua na sere e vakalagilagia na yaca ni Kalou, me vakataka na “Me Lagilagi Tu” (Serenilotu, naba 34), ena rawa me vaqaqacotaka na itukutuku e tiko ena Vunau kei na Veiyalayalati 63:58–64.