Tzuul Spring, Condado Daviess, Missouri, xb’aan laj Garth Robinson Oborn

7–13 junio

Tzolʼlebʼ ut Sumwank 63

“Li k’a’ru nachal chaq taqe’q loq’ ”

Tz’iib’a li musiq’ejil na’leb’ taak’ul naq yooqat chixtzolb’al Tzol’leb’ ut Sumwank 63. Eb’ li musiq’ejil na’leb’ maare chanchan naq kok’eb’, a’b’an jo’eb’ li iyaj, naru neke’wulak chi nimank ut chi uuchink naq ink’a’ nakakanab’ xsik’b’aleb’ ut xtz’ilb’aleb’ rix.

Tz’iib’a li nakak’oxla

Xkanab’ankileb’ chi wotzok

Re xjayalinkil li aatinak chirixeb’ li raqal neke’xtaw wi’ xyaalal li komon, naru taakanab’eb’ chixtz’iib’ankil chiru kok’ setel hu junjunqeb’ li raqal re li tasal 63 li neke’raj wi’ aatinak. Chirix a’an ch’utub’eb’ li kok’ hu ut aatinanqex chirixeb’ li raqal xe’xtz’iib’a li komon. Kanab’eb’ chixyeeb’al k’a’ut naq xe’xsik’ ruheb’ li raqal a’an.

Xk’utb’al li tzolʼlebʼ

Tzol’leb’ ut Sumwank 63:7–12

Eb’ li eetalil neke’chal xb’aan li paab’aal ut xb’aan li rajom li Dios.

• Re xtikib’ankil aatinak chirix li na’leb’ nak’utman sa’ Tzol’leb’ ut Sumwank 63:7–12, maare us raj rilb’aleb’ ru junjunqeb’ li raqal sa’eb’ li loq’laj hu chirixeb’ kristiaan li ke’ril eetalil malaj sachb’a-ch’oolej. Kanab’eb’ li komon chixk’oxlankileb’ resileb’ kristiaan kikawu xpaab’aaleb’ xb’aan junaq eetalil (chi’ilmanq Lukas 1:5–20, 59–64), malaj resileb’ kristiaan li kiwiib’an rix xch’ooleb’ chirix rilb’al junaq eetalil (chi’ilmanq, 1 Nefi 3:27–31; Alma 30:43–56). Chirix a’an, eb’ li komon naru neke’roksi li neke’xtzol sa’ Tzol’leb’ ut Sumwank 63:7–12 re xch’olob’ankil li k’a’ru nak’ulman rik’ineb’ li kristiaan a’an chirixeb’ li eetalil. Malaj ut, naru te’ril ru jalaneb’ chik raqal sa’eb’ li loq’laj hu chirixeb’ li eetalil, jo’ li neke’tawman sa’ “Eetalil” sa’ li K’utul Raqal reheb’ li Loq’laj Hu. Chan ru naru naqak’e reetal naq ink’a’ yooko chixsik’b’al chi moko chixchapb’al qib’ rik’ineb’ li eetalil jo’ xxe’ li qapaab’aal?

Tzol’leb’ ut Sumwank 63:13–16

Li saq ru ch’oolej naraj naxye wank chi saq ru li qak’oxlahom ut li qab’aanuhom.

• Us ta lix k’ihal Tzol’leb’ ut Sumwank 63:13–16 na’aatinak chirix li muxuk sumsu, eb’ li na’leb’ neke’k’utman naru te’k’anjelaq choq’ re a’ yaal xmuxb’al ru li saq ru ch’oolej. Kanab’eb’ li komon chixsik’b’al li rahilal naru nachal li ch’olob’anb’il sa’ Tzol’leb’ ut Sumwank 63:13–16. Naru ajwi’ “neke’ril rib’ ” (raqal 15) malaj neke’xk’e reetaleb’ li rahilal naru neke’chal. Naru ajwi’ neke’aatinak chirix k’a’ru xyaalalileb’ li rahilal naru neke’chal. Qayehaq, k’a’ut naq xq’etb’al li chaq’rab’ re li saq ru ch’oolej nak’amok sa’ jun raqb’a-aatin li taachalq sa’ xb’een anihaq “jo’ jun ra’al” (raqal 15)? K’a’ut naq naxpatz’ qe li Qaawa’ “chixjalb’al qak’a’uxl sa’ junpaat” (raqal 15) chirix li maak re tz’ejwalej? (chi’ilmanq li raatin li Hermana Linda S. Reeves sa’ “Xkomon chik li k’anjeleb’aal”).

• Rilb’al ru Tzol’leb’ ut Sumwank 63:16 naru natenq’an re xtikib’ankil li aatinak chirix lix metz’ew li pornografia sa’ li qayanq. Chan ru naq eb’ li q’usum neke’tawman sa’ li raqal 16 wankeb’ rilom rik’in li ch’a’ajkilal a’an? (Us ta li k’utb’esinb’il na’leb’ na’aatinak chirix li winq neke’rataw ru li ixq, eb’ li q’usum a’an neke’k’anjelak choq’ reheb’ chixjunileb’ li kristiaan). K’a’ru naru naqab’aanu re xkolb’al qib’ qajunes qib’ ut eb’ li raarookeb’ qab’aan chiru li pornografia? Eb’ li komon maare te’raj xk’eeb’aleb’ xna’leb’ chirib’ileb’ rib’. Li sitio web AddressingPornography.ChurchofJesusChrist.org naxk’e jun oyb’enihom ut tenq’ choq’ re yalaq ani li wan xch’a’ajkilal rik’in li pornografia.

  

  Naq naqapaab’ li chaq’rab’ re saq ru ch’oolej, noko’osob’tesiik.

Tzol’leb’ ut Sumwank 63:58–64

Li k’a’ru loq’ tento taa’ilmanq rik’in oxloq’.

• Naru tex’aatinak chirix Tzol’leb’ ut Sumwank 63:58–64 jo’ jun q’usum choq’ reheb’ li ani neke’roksi xk’ab’a’ li Qaawa’ chi maak’a’ xyaalal, ut junjunqeb’ li raqal chirix li na’leb’ sa’ “Yib’ ruhil aatin” sa’ li K’utul Raqal reheb’ li Loq’laj Hu naru neke’xchaab’ilob’resi li aatinak. Naru ajwi’ taatenq’aheb’ li komon chiroksinkileb’ li raqal a’an chi nim wi’chik ru. Qayehaq, naru tex’aatinaq chirix k’a’ru naxtz’aqob’resi ru li ch’ol aatin “chi moko k’eeb’il ta xwankileb’ ” (raqal 62) sa’ xtawb’al ru li raqal. Eb’ li komon naru te’xye jalaneb’ chik k’a’aq re ru loq’ li neke’chal chaq “taqe’q,” malaj rik’in li Dios. K’a’ru naraj naxye li aatinak chirixeb’ li k’a’aq re ru a’an “chi k’eeb’il reetal”? (raqal 64).

Xkomon chik li k’anjeleb’aal

Li saq ru ch’oolej naxk’e qak’ulub’ chixk’ulb’al rochb’eenihom li Santil Musiq’ej.

Li Hermana Linda S. Reeves, li kiwan choq’ komon sa’ li Jolomil Awa’b’ejil re li Komonil re Tenq’ank, kixk’ut:

“Maak’a’aq chik xnimal xwankil, jo’ nawb’il inb’aan laa’in, chiru li saq ruhil na’leb’ re xk’eeb’al qak’ulub’ re naq junelik taawanq li Santil Musiq’ej qik’in. …

“Naq noko’oken sa’ rilb’al sa’ kaxmu, rilb’al ru sa’ hu, malaj xnumsinkil yalaq k’a’ru chi na’leb’ li kub’enaq ru chiru li naraj li qaChoxahil Yuwa’, a’an nokoxq’unob’resi. Us ta saajo malaj tiixo, wi li naqil, li naqab’i, malaj li naqasik’ ru xb’aanunkil moko naxk’ul ta rib’ rik’in li naxpatz’ li Qaawa’ sa’ li hu Choq’ re Xkawilaleb’ li Saaj, chechup, chepej, chekut chaq, ut chetz’ap chi kaw li okeb’aal. …

“Ninnaw naq wi chi rajlal tooruuq raj chixjultikankil ut chixk’eeb’al reetal xchamal lix rahom li qaChoxahil Yuwa’ ut li qaKolonel choq’ qe, taawanq raj qach’ool chixb’aanunkil yalaq k’a’ru re toosutq’iiq wi’chik sa’ rilob’aal, chi sutb’ilaqo chi junelik xb’aan lix rahom a’an” (“K’ulub’ejo choq’ re li qayeechi’inb’il osob’tesihom,” Jolomil ch’utub’aj-ib’ re octubre 2015).

Xchaab’ilob’resinkil li qak’utum

Oksi li b’ich namusiq’an. Eb’ li esil neke’tawman sa’ xhuhileb’ li b’ich, ut sa’ li B’ichleb’aal choq’ reheb’ li Kok’al naru neke’xch’olob’ li tzol’leb’ teetzoleb’ sa’eb’ li loq’laj hu. Qayehaq, xb’ichankil junaq li b’ich chirix xloq’oninkil xk’ab’a’ li Dios, jo’ “Nim li Qaawa’ tz’aqal” (Eb’ li B’ich, 36), naru naxch’olob’ li esil k’eeb’il sa’ Tzol’leb’ ut Sumwank 63:58–64.