Daviess County, e Missouri

14–20 ni June.

Vunau kei na Veiyalayalati 64-66

“Sa Gadreva na Turaga na Yalo kei na Vakasama sa Vakarau Tu”

Ena gauna ni nomu vuli ena macawa oqo, vakasamataka ena masumasu na ivakavuvuli cava mai na Vunau kei na Veiyalayalati 64 – 66 ena vakalevutaka cake na vakabauta kei na kila-ka vei ira na lewe ni nomu kalasi.

Vola na Veika o Vakauqeti Kina

Sureta na Veiwasei

Me ra vakayaloqaqataki na lewe ni kalasi mera wasea na veika era raica ni vakaibalebale kina ena nodra vulica na ivolanikalou ena macawa oqo, sa rawa mo kerei ira mera vakasamataka vakatitobu na veibolebole eda sotava tiko nikua. Mo qai sureti ira me ra wasea e dua na tikina mai na Vunau kei na Veiyalayalati 64 – 66 era nanuma ena rawa ni veivuke ena dua na bolebole oqori.

Vakavulica na iVunau

Vunau kei na Veiyalayalati 64:1–11

Sa gadrevi meda vosota na tamata kecega.

• E rairai na vakacokotaki kina na lewe ni kalasi ena kena veivosakitaki na vuna e dau dredre sara meda vosoti ira na tamata— kei na sala era sa vorata rawa kina na dredre oqori. E rawa ni ra vakasaqara ena Vunau kei na Veiyalayalati 64:1–11 na ivakavuvuli kei na dina sa vakauqeti ira me ra dau veivosoti vakalevu cake. Na cava eda sa vulica baleta na iVakabula mai na veitikina oqo? Me veivuke ena kena matanataki na veivakalougatataki ni veivosoti, sa rawa mo wasea na italanoa kei Morrell Bowen mai na vosa nei Elder Jeffrey R. Holland “Na Veiqaravi ni Veivakaduavatataki” (Ensign se Liaona, Nove. 2018, 77 – 79) se na vidio “Forgiveness: My Burden Was Made Light” (ChurchofJesusChrist.org). Se rawa vua e dua na lewe ni kalasi sa tu vakarau me wasea e dua na italanoa ni nona veivosoti se ciqoma na veivosoti. Era a vakalougatataki vakacava na tamata ena ivakaraitaki oqo ena kaukauwa ni veivosoti?

Vunau kei na Veiyalayalati 64:31–34

Na Turaga e vinakata vei keda na “yalo kei na vakasama sa vakarau tu.”

• E sega ni vinakata na Turaga vei keda meda “oca”; ia, sa matau vei ira era saga tiko na nodra vinaka taucoko — oka beka kina, eso ena nomu kalasi — me ra “kakua kina ni oca ena cakacaka vinaka.” Na cava e yaco kina na oca vakaoqo? Na ivakasala cava eda kunea ena Vunau kei na Veiyalayalati 64:31–34 e rawa ni vukei keda ni vakaogai vakaoqo na yaloda?

• Me bulabula cake na nomuni veivosaki, sa rawa mo vakaraitaka na iyaloyalo ni dua na ka levu ka vakasakiti a tara ena dua na gauna balavu mai na “veika lalai” — me vaka na valevatutaliva se buloko levu. Na cava soti eso na ivakaraitaki ni “cakacaka cecere” sa solia vei keda na Turaga? Na veika lalai cava e rawa ni da cakava oqo me tura kina na yavu ni cakacaka o ya?

• Me vukei ira na lewe ni kalasi mera vakananuma vakatitobu na Vunau kei na Veiyalayalati 64: 34, e rawa mo vola Yalo kei na Vakasama sa Vakarau tu ena papa ni volavola. Sa rawa ki na kalasi mera vola ena ruku ni ulutaga oqo na nodra nanuma ni ibalebale ni noda solia na yaloda kei na vakasama sa vakarau tu vua na Turaga. Me baleta e dua na ivakamacala ni veimalanivosa oqo, raica na vosa nei Elder Donald L. Hallstrom ena “iKuri ni iVurevure” Sa rawa ki na ivolanikalou me vakataki ira oqo mera vakarautaka talega eso na veivakararamataki: Mosaia 7:33; Ica 4:15; Vunau kei na Veiyalayalati 43: 34; Mosese 7:18; Na Josefa Simici—Ai Tukutuku 1:19.

Vunau kei na Veiyalayalati 65

Na matanitu ni Kalou e vuravura ena vakarautaka na vuravura me baleta na lesu mai ni iVakabula.

• Vunau kei na Veiyalayalati 65 ena solia e dua na ivakamacala veivakauqeti ni tabana ni kaulotu na Lotu ni Turaga ena iotioti ni gauna. Me vukei ira na lewe ni kalasi mera raica na nodra itavi ena ilesilesi oqo, sa rawa mo sureti ira mera vakasaqara ena wase 65 na isau ni taro vakaoqo: Na cava e vinakata na Turaga ki na Nona matanitu me rawata ena vuravura oqo? Na cava e vinakata o Koya meu cakava meu veivuke kina? Sa rawa talega mo ni sarava na vidio “Prepare Today for the Second Coming” (ChurchofJesusChrist.org) se raica na itukutuku nei Peresitedi Dallin H. Oaks ena “iKuri ni iVurevure.” Sa rawa ni ra wasea na lewe ni kalasi mera na sauma vakacava na taro nei Peresitedi Oaks.

iKuri ni iVurevure

“Na yalo kei na vakasama sa vakarau tu.”

E kaya o Elder Donald L. Hallstrom ni oqo e rawa ni ibalebale ni malanivosa “na yalo kei na vakasama sa vakarau tu.”

“Na yalo sa ivakatakarakara ni loloma kei na yalayala. Eda solibula ka colata na icolacola baleti ira eda lomana ka da na sega ni gumatua kina ena dua tale na vuna. Kevaka e sega ni tiko na loloma, ena malumalumu na noda yalayala. …

Ni “tiko ‘na vakasama sa vakarau tu’ sa na muataki keda meda solia noda igu vinaka duadua kei na vakasama savasava sara meda vakasaqara na vuku ni Kalou. Sa tukuna tiko ni noda vuli yalodina duadua e dodonu me na veika e tawamudu na kena ituvaki. Sa kena ibalebale ni dodonu me tiko e dua na veimaliwai sega ni tagutuvi rawa ena kena rogoci na vosa ni Kalou ka talairawarawa kina” (“The Heart and a Willing Mind,” Ensign, June 2011, 31–32).

Vakavakarau ki na iKarua ni Lesu mai.

“Vakacava beka ke sa siga ni Nona lako mai o [Jisu Karisito] e ni mataka? Kevaka eda sa kila tiko ni da na sota kei na Turaga ena mataka—ena noda mate dole se ena Nona lako mai sega ni namaki—na cava eda na cakava nikua? Na vakatutusa cava beka eda na cakava? Na ivalavala cava beka eda sa na muduka? Na veivakameautaki cava beka eda na cakava? Na veivosoti cava beka eda na vakayacora? Na ivakadinadina cava beka eda na wasea?” (Dallin H. Oaks, “Vakavakarau ki na iKarua ni Lesu Mai,” Ensign se Liaona, Me 2004, 9).

Vakatorocaketaki ni Noda Veivakavulici

Vakaukauwataki mai vua na iVakabula. “Ni ko sasagataka tiko mo bula ka veivakavulici vakataka na iVakabula, ena dau yaco mo guce ena so na gauna. Kakua ni yalolailai; ia, me muataki iko na nomu caka cala kei na malumalumu oqo ki vua na Tamada Vakalomalagi kei na iVakabula” (Veivakavulici ena iVakarau ni iVakabula,14).