21–27 ni June.

Vunau kei na Veiyalayalati 67–70

“Yaga … na iYau kei Vuravura Taucoko”

Na vakavakarau ki na veivakavulici e kena ibalebale me levu cake mai na nomu vakasamataka tu ga na veika mo tukuna ka cakava vaka-qasenivuli. Me oka talega kina nomu raica na cava e rawa ni ra cakava na vuli tiko mera veivakavulici vakai ira. O na sureti ira vakacava na kalasi mera wasea na veika era sa sotava se nodra vakararamataki ni ra wilika na ivolanikalou oqo?

Vola na Veika o Vakauqeti Kina

Sureta na Veiwasei

Sa rawa mo vola ena papa ni volavola Ena macawa oqo a vakavulici au na Turaga … ka sureti ira na lewe ni kalasi mera vakacavara na yatuvosa ena dua na ka era sa vulica.

Vakavulica na iVunau

Vunau kei na Veiyalayalati 67:1–9

Na ivakatakila sa soli mai vei Josefa Simici era sa ka dina ka sa mai vua na Kalou.

• Na kena kilai vinaka na itukutuku yavutaki ni Vunau kei na Veiyalayalati 67 ena rawa ni veivuke ki na veivosakitaki na iwasewase oqo. Ena rawa beka ni vakalekalekataka na ituvaki e veimuataki ki na ivakatakila oqo e dua na lewe ni kalasi (raica na Vunau kei na Veiyalayalati 67, ulutaga ni iwase; Yalododonu, 1: 140 – 43). Kevaka eda a tiko ena soqoni me veivosakitaki kina na tabaki ni ivakatakila, na cava na vuna meda na vakadonuya kina na vakasama o ya? Na cava eda rawa ni kaya vei ira na tamata ka ra a kauwaitaka na malumalumu ni kila-ka vakavosa nei Josefa Simici? Na cava e vakavulica vei keda na wase 67 me baleti ira na parofita kei na ivakatakila? Sa rawa vei ira na lewe ni kalasi mera wasea talega na sala era sa mai kila kina vakai ira ni dina na veivakatakila oqo.

Vunau kei na Veiyalayalati 68:1–6

Na nodra veivosa veivakauqeti na italai ni Turaga era sa vosa ni Turaga.

• Me vukei ira na lewe ni kalasi mera veivosakitaka na Vunau kei na Veiyalayalati 68:1–6, sa rawa mo sureti ira me ra wilika na veitikina oqo vakailawalawa lalai ka veiwaseitaka vakai ira na dina era sa vulica me baleta na nodra ivakavuvuli na italai ni Turaga. Sureti ira na ilawalawa me ra veiwaseitaka vakai ira na sala era sa mai kila kina ni ivakavuvuli e vakavulici tiko ena tikina e 4 sa ka dina. Sa rawa vei ira na lewe ni kalasi mera wasea na veigauna eso era a vosa se veivakavulici ni “ra sa vakayavalati ena Yalo Tabu” (tikina e 3) kei na gauna a tiko ka tu raviti ira kina na Turaga (raica na tikina e 6).

• Kevaka o ni via veivosakitaka na kena vakayagataki vakacava na veitikina oqo ki na nodra ivakavuvuli na italai ni Turaga ena koniferedi raraba, ena rawa me veivuke na vosa nei Elder Jeffrey R. Holland ena “iKuri ni iVurevure.” Sa rawa mera wasea talega na lewe ni kalasi na vosa mai na koniferedi sa oti e vaqaqacotaka na nodra vakabauta na ivunau e kunei ena veitikina oqo.

Vunau kei na Veiyalayalati 68:25–31

Sa nodra itavi na itubutubu me ra vakavulici ira na luvedra.

• Era tiko beka na itubutubu ena nomu kalasi—se mera na itubutubu mai muri? Ena rairai yaga sara vei ira me veivosakitaki na ivakasala ni Turaga vei ira na itubutubu ena wase 68. Me ivakaraitaki, de eso na itubutubu era lewe ni kalasi mera digia e dua na ivakavuvuli mai na tikina e 25 – 28. ka tukuna na sala mera saga kina na kena vakavulici na veika oqo vei luvedra (na tikina 29 – 31 e tiko talega kina eso na ivakavuvuli bibi). Se rawa ki na lewe ni kalasi mera veivosakitaka na sala era sa vakavulica tiko vei ira na nodra itubutubu na ivakavuvuli ni kosipeli.

  Na cava na vuna sa vanua vinaka duadua kina na vuvale vei ira na gonelalai mera vulica kina na kosipeli? Na cava eda na kaya vei ira na itubutubu era nanuma ni ra takiveiyaga se icolacola levu vei ira mera vakavulici ira na luvedra?

  

  Sa solia na Kalou vei ira na itubutubu na itavi mera vakatavulici ira na luvedra.

Vunau kei na Veiyalayalati 70:1–4

Eda na soli itukutuku ki na ivakatakila sa solia vei keda na Turaga.

• Sa solia na Turaga ki na so na veitacini mera ivakatawa ni ivakatakila ka mera kauta ki Misuri ka raica mera na tabaki. Ena vakasama cava eda sa raici keda kina ni da sa ivakatawa ni ivakatakila? Na ivakavuvuli cava tale eso mai na wase oqo me baleta na cakacaka ni ivakatawa e rawa ni da vakayagataka?

iKuri ni iVurevure

Na Kalou sa vosa vei keda nikua.

E wasea o Elder Jeffrey R. Holland na sala ni kena taurivaki na ivakavuvuli ena Vunau kei na Veiyalayalati 68:4 ki na koniferedi raraba: “Au sa kerei kemuni mo ni rai yani ki liu, sega walega ena itukutuku ko ni sa mai rogoca ia ki na kena talei veivakurabuitaki na koniferedi raraba vakai koya—o ya na veika eda vakabauta na Yalododonu Edaidai me baleta na koniferedi vakaoqo kei na veika eda sureti vuravura kina mera rogoca ka kila mai kina. Keimami sa vakadinadinataka ki na veimatanitu kecega, kawatamata, duivosavosa, kei na tamata ni sega walega ni bula tiko na Kalou ia e vosa tale tikoga, ni noda gauna oqo kei na noda siga edai na ivakasala ko ni sa mai rogoca, sa yaco tiko ena veidusimaki ni Yalo Tabu, ni ‘sa loma ni Turaga, … sa vosa ni Turaga, … sa domo ni Turaga, ka sa kaukauwa ni Kalou me ia kina na veivakabulai.’ [Vunau kei na Veiyalayalati 68:4]” (“Drotini ki na Veimatanitu,” Ensign se Liaona, Me 2011, 111).

Vakatorocaketaki Noda Veivakavulici

Vukei ira na vuli voli mera veilaveti vakai ira. “O ira yadua ena nomu kalasi era ivurevure bulabula ni ivakadinadina, raititobu, kei na veika sotavi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula,5).