Talei Vua na iVakatawa, mai vei Simon Dewey

28 ni Jiune–4 ni Jiulai

Vunau kei na Veiyalayalati 71–75

“Ena Sega ni Rawata E Dua na Ka na iYaragi Kecega Sa Caka me saqati Kemudrau”

Ni ko wilika na Vunau kei na Veiyalayalati 71–75, vakasamataki ira o vakavulica. Na cava o kila me baleti ira? Na cava era gadreva?

Vola na Veika o Vakauqeti Kina

Sureta na Veiwasei

Sureti ira na lewe ni kalasi mera wasea eso na veika dina era raica ena nodra vulica na Vunau kei na Veiyalayalati 71–75. Na veika cava so era sa sotava oti ena dina eso oqo?

Vakavulica na iVunau

Vunau kei na Veiyalayalati 71

Eda rawa ni muria na veidusimaki ni Yalo Tabu ni da taqomaka na noda vakabauta.

• Eda sa bau vakila li na rere se taqaya me baleta na taqomaki ni noda vakabauta? Ena rawa ni o sureti ira na lewe ni kalasi mera vola ena vava ni volavola na vosa se malanivosa eso era kunea ena Vunau kei na Veiyalayalati 71 e vakamacalataka na sala a kerei Josefa kei Sidini kina na Turaga me rau sauma na vakalelewa nei Esera Buci kei na so tale. Mera qai veivosakitaka vakailawalawa lalai na lewe ni kalasi na ibalebale ni ivakasala oqo me baleti keda nikua. Na cava e bibi kina me da cakacaka “me vaka na tiki ni Yalo” e solia vei keda na Turaga? (tikina e 1).

  E rawa talega ni veivuke mera sarava na vidio “Everyday Example: When Beliefs Are Questioned” (ChurchofJesusChrist.org). E rawa mera vakasaqara na lewe ni kalasi na sala eso era vakaraitaki kina na dina eso e tiko ena wase 71 ena vidio. E rawa talega mera na wasea na ivakaraitaki eso ni sala a sauma kina na iVakabula vei ira era vakalewai Koya (me ivakaraitaki, raica na Maciu 22:15–22; 26:59–64; Joni 10:37–38).

Vunau kei na Veiyalayalati 72:8–16

Era sa dauveiqaravi na bisopi ena veika vakayalo ka vakayago ena matanitu ni Turaga.

• Ena vukei ira vakacava o vakavulica mera taleitaka na bisopi ka ra sa kacivi me qaravi ira, me vaka na ivakaro ni Turaga vei Niueli K. Witini, ni a kacivi me bisopi e Katiladi? E rawa ni o kerei ira na lewe ni kalasi mera vakasaqaqara ena Vunau kei na Veiyalayalati 72:8–16, ka vakaraica eso na itavi nei Bisopi Witini ka qai vakatauvatana ki na nodra itavi na bisopi nikua (raica na ivakamacala nei Peresitedi Gordon B. Hinckley ena itavi ni bisopi ena “iKuri ni iVurevure” se na kena vidio veisemati, “The Office of Bishop” [ChurchofJesusChrist.org]). De rawa mera wasea na lewe ni kalasi na sala era sa vakalougatataki kina mai na veiqaravi ni dua na bisopi. Na cava e rawa ni da cakava me tokoni ira vakavinaka cake na noda bisopi?

  

  Na bisopi e vukei ira na lewenilotu me sotavi na nodra gagadre vakayago.

Vunau kei na Veiyalayalati 73

E rawa ni da vakasaqara na madigi eso me wasea kina na kosipeli.

• Na Turaga a tukuna vei Josefa Simici kei Sidini Rikitoni me rau vunautaka yani na kosipeli “ena veigauna kecega e rawa kina” (Vunau kei na Veiyalayalati 73:4) ni rau cakacaka tale tikoga ena kena vakadewataki na iVolatabu. Era na rawa beka ni wasea na lewe ni kalasi eso na sala era sa kunea ni sa “rawa kina”—se ka dina—me wasea na kosipeli ena maliwa ni nodra itavi tale eso. Era na kunea beka eso na ivakasala yaga ena itukutuku nei Elder Dieter F. Uchtdorf “Na Cakacaka ni Kaulotu: Wasea na Veika e Tu e Yalomu” (Ensign se Liaona, Me 2019, 15–18).

Vunau kei na Veiyalayalati 75:2–16

E vinakata na Kalou meda “cakacaka vagumatua sara.”

• Na ivakaro ni Turaga vei ira na italatala qase me baleta na ivakarau mera wasea kina na kosipeli ena rawa ni vakauqeti ira na lewe ni kalasi mera wasea na kosipeli vagumatua cake. E rawa mo vola ena vava ni volavola Mo cakacaka vagumatua sara ka kerei ira na lewe ni kalasi mera vola na vosa kei na malanivosa eso e votu mai nodra vakasama ni ra vakananuma e dua e cakacaka ena nona igu ena kena wasei na kosipeli. Era rawa ni veivosakitaka talega na kena ibalebale mo “lokuyara” se “vakawelewele” ena kena wasei na kosipeli. Na cava e vakavulica vei keda na Vunau kei na Veiyalayalati 75:2–16 me baleta na sala e tokoni ira kina era qaravi Koya ena yalodina na iVakabula?

iKuri ni iVurevure

Itavi ni dua na bisopi.

E vakavulica oqo o Peresitedi Gordon B. Hinckley:

“Au dau kauta voli e lomaqu e dua na vakavinavinaka titobu baleti ira na noda bisopi. Au sa vakavinavinaka cecekia ki na ivakatakila mai vua sa Cecere sara ena kena buli na itutu oqo kei na kena cakacaka. …

“… Keitou namaki iko mo tu vaka bete levu vakatulewa ena tabanalevu, mo dua na daunivakasala vei ira na tamata, na dauveitaqomaki ka dauveivukei vei ira era leqa tu, na dauveivakacegui vei ira na rarawa, na dauveivakarautaki vei ira era gadreva tu na veivuke. Keitou namaki iko mo tu vaka e dua na ivakatawa ka dauveitaqomaki ni ivunau e vakavulici ena nomu tabanalevu, kei na ivakatagedegede ni veivakavulici, kei na vakatawani ni ilesilesi e vuqa e bibi sara. …

“… Mo na raica ni sega ni dua e walokai ena viakana se sega ni vakaisulu se vakarurugi. E dodonu mo kila na kedra ituvaki o ira kece o vakatulewa vei ira.

“E dodonu mo dauveivakacegui ka idusidusi vei ira na nomu tamata. Na nomu katuba e dodonu me dau tadola tu ga ki na dua ga na tagi ni leqa. Na dakumu e dodonu me kaukauwa mo wasea na nodra icolacola. E dodonu mo dodoliga yani ena loloma vei ira sara mada ga na daucakacala” (“The Shepherds of the Flock,” Ensign, May 1999, 52–53).

Vakatorocaketaki Noda Veivakavulici

Mo yaco me dua na qasenivuli Vakarisito vakalevu cake. Nanuma mo vakayagataka na veitaro ni vakadidike ni tamata yadua ena tabana e 37 ni Veituberi ena iVakarau ni iVakabula me vukei iko mo kila na sala o rawa ni veivakatavulici kina vakalevu cake me vaka na iVakabula.