Saʼ raam laj Ilol Karneer, xb’aan laj Simon Dewey

28 junio─4 julio

Tzolʼlebʼ ut Sumwank 71–75

“Maajun k’anjeleb’aal li yiib’anb’il re eepleetinkil taa’usaaq”

Naq nakawil ru Tzol’leb’ ut Sumwank 71–75, k’oxlaheb’ li ani nakatzoleb’. K’a’ru nakanaw chirixeb’? K’a’ru neke’raj ru?

Tz’iib’a li nakak’oxla

Xkanab’ankileb’ chi wotzok

Kanab’eb’ li komon chixwotzb’al junjunqeb’ li yaal neke’xtaw naq neke’xtzol Tzol’leb’ ut Sumwank 71–75. K’a’ru xe’xk’ul rik’ineb’ li yaalil na’leb’ a’in?

Xk’utb’al li tzolʼlebʼ

Tzolʼlebʼ ut Sumwank 71

Naru naqataaqe lix b’eresihom li Santil Musiq’ej naq naqakol rix li k’a’ru naqapaab’.

• Ma qeek’ahom jun sutaq qaxiw malaj qaxutaan chixkolb’al rix li k’a’ru naqapaab’? Maare naru taakanab’eb’ li komon chixtz’iib’ankileb’ chiru li pizarron li aatin malaj ch’ol aatin te’xtaw sa’ Tzol’leb’ ut Sumwank 71 li neke’xch’olob’ chan ru naq li Qaawa’ kixpatz’ re laj Jose ut laj Sidney naq te’xsume lix wech’om laj Ezra Booth ut wankeb’ chik xkomon li kristiaan. Chirix a’an, naru neke’aatinak sa’ kok’ ch’uut chirix k’a’ru naraj neke’xye li ch’olob’ank a’an sa’eb’ li kutan a’in. K’a’ut naq aajel ru naq took’anjelaq “jo’ chanru li jun raqal re li Musiq’ej” li naxk’e qe li Qaawa’? (raqal 1).

  Maare us raj rilb’al li video “Everyday Example: When Beliefs Are Questioned” (ChurchofJesusChrist.org). Eb’ li komon sa’ li tzoleb’aal taaruuq te’xk’e reetal chan ru naq eb’ li yaalil na’leb’ sa’ li tasal 71 wankeb’ chi k’anjelanb’il sa’ li video. Maare naru neke’xwotz reetalil chan ru naq li Kolonel naxsumeheb’ li neke’wech’ink (qayehaq, chi’ilmanq Mateo 22:15–22; 26:59–64; Jwan 10:37–38).

Tzol’leb’ ut Sumwank 72:8–16

Eb’ li obiisp a’aneb’ mertoom reheb’ li k’a’aq re ru re li musiq’ej ut re li yu’am a’in sa’ li rawa’b’ejihom li Qaawa’.

• Chan ru naq eb’ li ch’olob’ank kixk’e li Qaawa’ re laj Newel K. Whitney naq kib’oqe’ jo’ obiisp aran Kirtland naru naxtenq’aheb’ li komon re te’xk’e xloq’al li obiisp b’oqb’il re xtenq’ankileb’? Naru taakanab’eb’ li komon chirilb’al ru Tzol’leb’ ut Sumwank 72:8–16 re xsik’b’al junjunq li teneb’ank choq’ re li Obiisp Whitney, re naq te’xjuntaq’eeta rik’ineb’ lix teneb’ankil li obiisp sa’eb’ li kutan a’in (chi’ilmanq lix ch’olob’ahom li Awa’b’ej Godon B. Hinckley chirix lix teneb’ankileb’ li obiisp sa’ “Xkomon chik li k’anjeleb’aal” malaj li video: “El oficio de obispo” [ChurchofJesusChrist.org]). Eb’ li komon naru te’xwotz chan ru naq xe’osob’tesiik xb’aan lix k’anjel junaq obiisp. K’a’ru naru naqab’aanu re xxaqab’ankil xwankil li qa’obiisp?

  

  Eb’ li obiisp neke’tenq’an chixtz’aqob’resinkil li k’a’aq re ru aajel ru choq’ reheb’ li komon.

Tzolʼlebʼ ut Sumwank 73

Naru naqasik’ qahoonal re xwotzb’al li evangelio.

• Li Qaawa’ kixtaqla laj Jose Smith ut laj Sidney Rigdon chixjultikankil li evangelio “a’ yaal jo’ naruhan” (Tzol’leb’ ut Sumwank 73:4) naq yookeb’ ajwi’ chaq chixjaltesinkil ru li Santil Hu. Eb’ li komon maare naru te’xch’olob’ junjunq na’leb’ re xwotzb’al li evangelio “jo’ chanru naruhan” sa’ xyanqeb’ xkomon xteneb’ankileb’. Maare naru te’xtaw xna’leb’eb’ sa’ li raatin li Elder Dieter F. Uchtdorf, “Li misioneerik: xwotzb’al li wan sa’ laa ch’ool” (Jolomil ch’utub’aj-ib’ re abril 2019).

Tzol’leb’ ut Sumwank 75:2–16

Li Dios naraj naq “took’anjelaq rik’in xnimal qametz’ew.”

• Lix ch’olob’ahom li Qaawa’ choq’ reheb’ junjunq misioneer chirix chan ru xwotzb’al li evangelio naru naxmusiq’aheb’ li komon chixwotzb’al li evangelio chi yalb’ileb’ xq’e. Naru taatz’iib’a chiru li pizarron K’anjelak rik’in laa metz’ew ut kanab’eb’ li komon chixyeeb’aleb’ aatin malaj ch’ol aatin li nachal sa’ xk’a’uxleb’ naq neke’xjultika anihaq li nak’anjelak rik’in xmetz’ew re xwotzb’al li evangelio. Naru ajwi’ te’aatinaq chirix k’a’ru naraj naxye “b’ayok-ib’ ” malaj “wank xq’emal” sa’ xwotzb’al li evangelio.” K’a’ru naxk’ut chiqu Tzol’leb’ ut Sumwank 75:2–16 chirix chan ru naq li Kolonel naxtenq’aheb’ li ani tiikeb’ chi k’anjelak chiru?

Xkomon chik li k’anjeleb’aal

Lix teneb’ankil li obiisp.

Li Awaʼbʼej Gordon B. Hinckley kixye:

“K’a’jo xnimal li rahom naweek’a choq’ reheb’ li qa’obiisp. Ninb’antioxi tz’aqal lix k’utb’esinb’il na’leb’ li Nimajwal li kiyo’ob’tesiik wi’ ut li nak’anjelak wi’ li opiis a’in. …

“… Naqoyb’eni naq texxaqliiq jo’ jolomil taqenaqil aj tij sa’ li teep, aj k’ehol xna’leb’eb’ li kristiaan, aj kolol rix ut aj tenq’anel reheb’ li wankeb’ xch’a’ajkilal, aj k’ojob’anel reheb’ li raheb’ xch’ool, ut aj ilol reheb’ li wankeb’ rajom ru. Naqoyb’eni naq laa’aqex laj k’aak’alenel ut aj kolol rix li tzol’leb’ li nak’utman sa’ lee teep, lix chaab’ilal li k’utuk nab’aanuman, naq te’tz’aqob’resiiq ru li jalan jalanq opiis aajeleb’ ru. …

“… Laa’ex tento teek’e reetal naq maa’ani tixnumsi tz’okaak, naq maa’ani taapalto’q xt’ikr malaj xmuheb’aal. Tento teenaw chan ru wankeb’ chixjunileb’ li komon li nekeb’eresiheb’.

“Tento naq laa’aqex aj k’ojob’anel ch’oolej ut aj b’eresinel choq’ reheb’ li komon. Lee okeb’aal tento junelik teetooq re xtenq’ankileb’ li neke’xsik’ xtenq’. Tento kawaqex re xtenq’ankileb’ li kristiaan chixk’amb’aleb’ li riiq. Chixjunil tento teeraheb’, eb’ ajwi’ li neke’xb’aanu li ink’a’ us” (Los pastores del rebaño,” Liahona, julio de 1999, 61, 62, 67).

Xchaab’ilob’resinkil li qak’utum

Wulak jo’ jun aj k’utunel jo’ li Kristo. Naru taawoksiheb’ li patz’om re tz’ilok-ix li wankeb’ sa’ li perel 37 sa’ Li k’utuk jo’ li Kolonel re xtzolb’al chan ru naru nakatk’utuk jo’ li Kolonel.