iVakaruru, mai vei Shaelynn Abel

5–11 ni Jiulai

Vunau kei na Veiyalayalati 76

“Ena Vakaitamera Na Kedra iSau ka Tawamudu Na Nodra Lagilagi”

Me vaka e vuqa na raivotu e volai tu ena ivolanikalou, na raivotu e tiko ena wase 76 a yaco mai ena gauna e rau a “vakasamataka tiko” na ivolanikalou (tikina e 19) o Josefa Simici kei Sidini Rikitoni. E rawa mo ciqoma talega na ivakatakila—oka kina na veidusimaki me baleta na sala mo veivakavulici kina—ni ko vakasamataka vakatitobu na Vunau kei na Veiyalayalati 76.

Vola na Veika o Vakauqeti Kina

Sureta na Veiwasei

Me vukei ira na lewe ni kalasi mera veivosakitaka na veika era sa wilika ena Vunau kei na Veiyalayalati 76, e rawa ni o sureti ira mera raitayaloyalotaka ni dua na itokani mai na dua tale na matalotu e taroga na cava eda vakabauta me baleta na bula ni oti na mate. Na veitikina cava so mai na wase 76 era na wasea vata kei nodra itokani? E rawa talega mera wasea na lewe ni kalasi e dua na ka mai na “Voices of the Restoration: Testimonies of ‘the Vision’” era a taleitaka.

Vakavulica na iVunau

Vunau kei na Veiyalayalati 76

Na veivakabulai e lako mai ena vuku i Jisu Karisito, na Luve ni Kalou.

• E vuqa na tamata, ni ra sa vakasamataka na wase 76, era vakasamataka sara na yavu ni veivakabulai kei na tolu na matanitu ni lagilagi. O na vukei ira vakacava na lewe ni kalasi mera raica ni sa tiki bibi duadua ena ivakatakila oqo na iVakabula o Jisu Karisito? E rawa ni o kerei ira na lewe ni kalasi mera wasea e dua na tikina e kune ena wase 76 e vaqaqacotaka na nodra vakabauti Jisu Karisito. Kevaka era gadreva na veivuke, e rawa ni o dusimaki ira ki na tikina eso me vaka na 1–5, 20–24, 39–43, 69, 107–8.

• Me vukei ira na lewe ni kalasi mera vakasaqara na duidui ena kedra maliwa o ira era taukena na tolu na matanitu ni lagilagi, mo vola ena vava ni volavola na Silesitieli, tikina e 50–70, 92–96; Teresitieli, tikina 71–79, 97; kei na Tilesitieli, tikina 81–90, 98–106, 109–12. E rawa ni ra digitaka na lewe ni kalasi e dua na tiki ni tolu na tikina ka vakasaqara na malanivosa eso e vakamacalataka na veiwekani i Jisu Karisito kei ira na tamata era na taukena na vei matanitu yadua. Na cava e vakatavulica vei keda na veitikina oqo me baleta na bula vakatisaipeli i Jisu Karisito? Eda na vaqaqacotaka vakacava na noda veiwekani vata kei Koya kei na Tamada? E Rau dolele vakacava beka mai kivei keda? Na cava na kena ibalebale mo “gumatua ena ivakadinadina me baleti Jisu”? (tikina e 79.).

  

  E a raica o Josefa Simici na raivotu me baleta na matanitu lagilagi ena dua na rumu me vaka oqo.

Vunau kei na Veiyalayalati 76:5–10, 113–18

Na veika vuni ni Kalou e rawa walega ni “kilai ena kaukauwa ni Yalo Tabu.”

• Ena rairai daumaka vei ira na lewe ni nomu kalasi mera kila ni sega ni lewe ni Lotu kece era a ciqoma vakarawarawa na ivakatakila ena wase 76. Me ivakaraitaki, a kaya o Brigham Young: “Na noqu ivakarau e a vaoqo, ni a yaco taumada mai vei au na Raivotu, e a veibasai saraga ka veisaqasaqa ki na noqu vuli taumada. Au a kaya, Wawa vakalailai. Au a sega ni cata; Ia au a sega sara ni kila vakavinaka.” E vakamacalataka o koya ni a “vakasamataka ka masulaka, ka wilika ka vakasamataka, me yacova na gauna au a kila ka ciqoma kina vakavinaka sara vakataki au” (ena “The Vision,” Revelations in Context, 150). Na cava eda vulica mai na veika a sotava okoya ka rawa ni vukei keda ni vakatakila mai na Kalou na ka e duidui mai na noda kila ena gauna oqo? Na cava e vakavulica vei keda na Vunau kei na Veiyalayalati 76:5–10, 113–18 me baleta na sala eda rawa ni ciqoma kina “na veika vuni ni lewa [ni Kalou]”? (tikina e 10).

Vunau kei na Veiyalayalati 76:50–70, 92–95

E vinakata na Kalou mera marautaka vata kei Koya na Luvena kece sara na lagilagi ni silesitieli.

• Vei ira eso, e rawa ni veivakayalolailaitaki se veivakadrukai mera vakasamataka na veika kece e gadrevi vei keda meda rawata kina na matanitu vakasilesitieli. Vakasamataka na sala mo vukei ira kina na lewe ni kalasi me kunea na inuinui “ena vukui Jisu na dauveivakaduavatataki” (tikina e 69). Me ivakaraitaki, e rawa ni o sureti ira mera wilika na tikina e 50–70 kei na 92–95. Sureti ira mera wasea na sala era na sauma lesu kina e dua a kaya, “Na bulataki ni kosipeli ena vuravura nikua e sa rui dredre; Au sega ni vakabauta ni sa ka yaga sara” se “Au sa sega ga ni vinaka meu rawata na matanitu vakasilesitieli.” Na cava eda rawa ni kaya me vakauqeta se vakayaloqaqataka na tamata oqo?

Vakatorocaketaki Noda Veivakavulici

Vakanamata Vua na iVakabula kei na Nona ivunau. “Dau tarogi iko tikoga ena, ‘Na ivakarau cava ena vukei ira kina na noqu lewe ni kalasi mera tara cake na vakabauti Karisito, veivutuni, cakava ka rokova na veiyalayalati vata kei na Kalou, ka ciqoma na Yalo Tabu ena veika au vakavulica?’” (Veivakavulici ena iVakarau ni iVakabula, 20).