Lako Tiko iVale, mai vei Yongsung Kim

12–18 ni Jiulai

Vunau kei na Veiyalayalati 77–80

“Niu Na Liutaki Kemudou Tiko”

Nanuma tiko ni itaviqaravi eso ena ituvatuva oqo era vakatutu walega. Ni o vulica ena masumasu na Vunau kei na Veiyalayalati 77–80, ena tuberi iko na Yalo mo kila na sala vinaka duadua mo vakavulici ira kina na nomu lewe ni kalasi.

Vola na Veika o Vakauqeti Kina

Sureta na Veiwasei

Eso na lewe ni nomu kalasi ena rawarawa cake mera wasea na nodra vakasama kevaka o kerei ira taumada. Nanuma mo veitaratara kei so vei ira ni vo e vica na siga ni bera na kalasi mo kerea mera na vakavakarau mai me wasea e dua na ka a vakauqeti ira mai na Vunau kei na Veiyalayalati 77–80.

Vakavulica na iVunau

Vunau kei na Veiyalayalati 77

E dau vakatakila na Kalou na Nona veika vuni vei ira era vakasaqara mera kila.

• E rawa ni ra wasea na lewe ni kalasi na vei raititobu era sa kunea me baleta na ivakatakarakara eso e tiko ena ivola ni iVakatakila ena nodra vulica na wase 77 ena macawa oqo. Na veitalanoataki ni isaunitaro eso a ciqoma o Josefa Simici ena rawa ni veimuataki ki na dua na veivosaki me baleta na sala e rawa ni ra vakasaqara kina na kila na lewe ni kalasi ni ra vulica na ivolanikalou. Na cava eda vulica mai na mataqali taro eso a taroga o Josefa? E rawa beka ni ra na lomasoli na lewe ni kalasi me wasea na veika era sotava ni a veimuataki ki na kila cecere cake na nodra vei taro va-kosipeli.

Vunau kei na Veiyalayalati 78:17–19

Ena liutaki keda tiko na Turaga.

• Me tekivutaki kina na veivosaki me baleta na Vunau kei na Veiyalayalati 78:17–19, e rawa mo vakaraitaka na kedra itaba ni ra se gone eso na nomu lewe ni kalasi (kerei ira rawa mera kauta tiko mai na itaba oqori ki na kalasi). Mera vakilakila na kalasi se ocei e tiko ena itaba yadua. O ira na lewe ni kalasi ka kauta mai na itaba e rawa ni ra vakamacalataka na sala era sa veisau kina mai na gauna a tauri kina na itaba oqori. Sa qai rawa ni wilika na kalasi na Vunau kei na Veiyalayalati 78:17–19 ka vakasamataka vakatitobu na taro eso me vakaoqo: Eda sa vakataki ira vakacava na gone lalai kivua na Turaga? Ena sala cava soti e vinakata kina oKoya vei keda meda vakataki ira na gone (raica na Mosaia 3:19), kei na sala cava soti e vinakata oKoya meda tubu kina? Na ivakasala cava e solia oKoya vei keda ena tikina eso oqo me vukea na noda tubu?

  Me vakarabailevutaka na kila ni nomu lewe ni kalasi me baleta na sala e “liutaki [keda] tiko” kina na Turaga (tikina e 18), nanuma mo wasea na itukutuku ena iKuri ni iVurevure.

Vunau kei na Veiyalayalati 79–80

Na kaci meda qarava na Kalou e bibi cake mai na vanua eda veiqaravi kina.

• Eso beka ena nomu kalasi era a vakila taumada na lomabibi me baleta e dua na ilesilesi era a ciqoma mai na tabanalevu se tabana se baleta na vanua era a lesi kina me veiqaravi vaka-daukaulotu. E vica vei ira ena rawa beka ni lomasoli me wasea na veika era sotava. Ena vukei keda vakacava na ivakasala ni Turaga ena Vunau kei na Veiyalayalati 80:3 ena vei ituvaki oqo? Na cava beka na ibalebale ni malanivosa “io mo drau lewa ga”? Se na malanivosa “drau na sega ni lako cala”? Na cava beka e bibi duadua kivua na Turaga me baleta na noda veikacivi? Na raititobu eso nei Elder David A. Bednar ena wase 80 ena nona vosa “Kacivi ki na Cakacaka” ena rawa talega me veivuke (Ensign se Liaona, Me 2017, 68).

• Na ivakatakila eso ena wase 79 kei na 80 a vagolei taumada vei ira na tamata era a kacivi mera vunautaka na kosipeli, ia e tu kina na ivakavuvuli e rawa ni yaga vei keda kece ena noda veiqaravi kivua na Turaga. Me vukei ira na lewe ni kalasi me raica na veivakavuvuli oqo, e rawa mo kerei ira mera vakasamataka ga ni dua na itokani ka se qai curuvou ena Lotu ka se qai ciqoma walega na nona imatai ni lesilesi. Sureti ira na lewe ni kalasi mera vola e dua na ivola ni veitokoni kei na veivakasalataki vua na nodra itokani, ka vakauqeti ira mera cavuvosa mai wase 79 kei na 80 ni ra vakayacora oqori. Mera qai wasea e vica na lewe ni kalasi na ka era a vola.

  

  E marautaka na Turaga ni da qaravi Koya kei ira na tani.

iKuri ni iVurevure

Ena dusimaki keda na Turaga mai vua na Yalo Tabu.

A wasea o Peresitedi Henry B. Eyring e dua na ka sotavi ena nona a masuta na veidusimaki ena dua na vakatulewa bibi sara ka vulica kina me tuberi mai vua na Turaga:

“Au a masulaka, ia ni oti e vica vata na auwa e rairai sega ga ni saumi mai. Ia ni bera ni kida na mataka au sa vakila e dua na ka. Mai na gauna ni noqu gone me yacova mai oqo, au vakila ni sa tarai au tale mai edua na yalo niu sa vaka tale edua na gone. E vaka me sa vakanomodi na noqu uto kei na noqu vakasama. Au a vakila na vakacegu mai vu ni yaloqu.

“Ia au mai kidacala, niu sa vakila niu sa masu tu, “Tamaqu Vakalomalagi, e sega ni bibi na ka au vinakata. Au sa sega ni kauwaitaka na ka au vinakata. Au vinakata me yaco ga na Lomamuni. Oqori ga na ka au vinakata. Ni yalovinaka ni tukuna mai vei au na ka meu cakava.’

“Ena tiki ni gauna o ya au vakila na vakanomodi ni noqu bula au se bera ni vakila vakadua. Sa qai yaco mai na itukutuku, kau vakadeitaka se lako mai vei cei. E matata vinaka sara na ka e dodonu meu cakava. E sega ni yalataki vei au na ka ena kauta mai. E yaco ga mai na veivakadeitaki ni o au e dua na gonelailai ka sa tukuni mai na sala cava ena kauti au ki na ka e vinakata vei au o Koya” (“Me Vaka na Gonelailai,” Ensign se Liaona, Me 2006, 16).

Vakatorocaketaki Noda Veivakavulici

Tekivu ena ivolanikalou. Ni bera ni o gole ki na ivurevure veitokoni, vulica vagumatua ka vakasamataka vakatitobu na ivolanikalou. Oqori ena sureta na Yalotabu me vukei iko mo vakayagataka na veika o a sa vulica ni ko na veivakavulici (raica na Veivakavulici ena iVakarau ni iVakabula, 12).