Karisito kei na Cauravou iLiuliu Vutuniyau, mai vei Heinrich Hofmann.

19–25 ni Jiulai

Vunau kei na Veiyalayalati 81–83

Kivei “Koya Sa Soli Vakalevu Vua Ena Gadrevi Vakalevu Mai Vua”

Mo nanuma tiko ni ra sa vakila tiko na veika vakayalo na nomu lewe ni kalasi ena nodra vulica na ivolanikalou mai vale. Vakasamataka ena masumasu na sala mo vakauqeti ira mera wasea na veika era sotava mera veilaveti kina vakai ira.

Vola na Veika o Vakauqeti Kina

Sureta na Veiwasei

Sureti ira na lewe ni kalasi mera digia e dua na malanivosa mai na iwase eso oqo ka na rawa ni dua na iulutaga vinaka me baleta na iwase yadua: Vunau kei na Veiyalayalati 81, 82, kei na 83. Na cava era digitaka kina na iulutaga eso oqori?

Vakavulica na iVunau

Vunau kei na Veiyalayalati 81:5; 82:18–19

E dodonu meda vakasaqara yadua meda “vukea na weka[da].”

• Na ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakatura na taro eso me vakasamataki vakatitobu me baleta na Vunau kei na Veiyalayalati 81:5. Oqo era rawa talega ni ra taro vinaka ni veivosaki ki na nomu kalasi. Vakasamataka talega mo wasea e dua na ka o a sotava ka vakila kina ni o “malumalumu” ia a qai laveti se vaqaqacotaki iko na nona veiqaravi e dua. Ena tu beka na nodra veika sotavi e tautauvata na lewe ni kalasi vakai ira mera wasea. E rawa talega mo sarava na vidio “Works of God” (ChurchofJesusChrist.org) me vakauqeti ira na lewe ni kalasi mera veiqaravi vakai ira. E rawa talega mo wasea na itukutuku nei Peresitedi M. Russell Ballard ena “iKuri ni iVurevure.”

• Vakasamataka mo kerei ira na lewe ni kalasi mera vulica na Vunau kei na Veiyalayalati 82:18–19, ka vakaraica na ivakavuvuli eso ena vukei ira mera kila na inaki kei na veivakalougatataki ni veiqaravi vei ira na tani. Qai laivi ira mera wasea na veika era vulica. E rawa talega mo vakaraitaka na vidio “Teachings of Thomas S. Monson: Rescuing Those in Need” (ChurchofJesusChrist.org). Era a vakaraitaka vakacava na lewe ni tabanalevu i Bisopi Monson na ka e vakavulica na tikina e 18–19 ?

Vunau kei na Veiyalayalati 82:8–10

“Koi au, na Turaga, au sa vauci ni dou muria na noqu vosa.”

• Me vukei ira na lewe ni kalasi mera kila na veiwekani ni talairawarawa lomasoli kei na veivakalougatataki yalataki ni Kalou, sa rawa mo wilika vata se vakailawalawa lalai na Vunau kei na Veiyalayalati 1:37–38; 82:10; 130:20–21 . Na cava e vakavulica vei keda na veitikina eso oqo me baleta na Turaga? Ena rawa beka ni ra vola na lewe ni kalasi na vosa eso e vakamacalataka na Nona itovodei, e yavutaki ena veitikina oqo.

• Ni ra wilika oti na tikina e 10., e rawa ni ra veitalanoataka na lewe ni kalasi me baleta na veika sa yalataka vei keda na Turaga kei na sala sa maroroya tu kina na Turaga na Nona yalayala. Na italanoa nei Sisita Virginia H. Pearce e kune ena “iKuri ni iVurevure” e rawa ni vukei ira na lewe ni kalasi mera raica ni Turaga e dau vakalougatataki keda me vaka na Nona vuku ga, ka sega ena sala eda dau vinakata se namaka kina e veigauna.

• Na cava eda vulica mai na Vunau kei na Veiyalayalati 82:8–10 me baleta na vuna e solia kina vei keda na ivakaro eso na Tamada Vakalomalagi? Ena rawa beka ni ra kunea na lewe ni kalasi eso na raititobu ena tikina eso oqo mera vakayagataka me vukea e dua na itokani se dua na gone e nanuma tiko ni dau veiyalani na ivunau (raica talega na vidio “Blessed and Happy Are Those Who Keep the Commandments of God,” ChurchofJesusChrist.org). Se ena rawa ni ra wasea na veika era sa sotava ka vakavulica vei ira mera raica na ivunau me ka ni veivakalougatataki.

iKuri ni iVurevure

Na lotu savasava.

A vakavulica o Peresitedi M. Russell Ballard:

“Ni da sa bula vakatisaipeli, sa tu e vuqa na gagadre, kauwai, kei na ilesilesi. Ia, eso na itaviqaravi e dodonu me tiko ena uto ni noda lewena na Lotu. ‘Ia,’ a vakarota na Turaga, ‘mo yalodina tiko ga; mo tudei ena ilesilesi au sa kacivi iko kina; mo vukei ira sa malumalumu, laveta cake na liga sa wadamele, ka vakaukauwataka na duru sa malumalumu’ [Vunau kei na Veiyalayalati 81:5; vakuri ena matanivola kala].

“Oqo na Lotu sa cakacaka tikoga! Oqo na lotu savasava! Oqo na kosipeli ena kena inaki dina ni da vukea, laveta, ka vakaukauwataki ira sa vakaleqai tu vakayalo ka vakayago! Ni caka oqo sa na gadrevi meda sikovi ira ka vukei ira [raica na Jemesa 1:27], me yaco na nodra ivakadinadina ni vakabauta na Tamada Vakalomalagi kei Jisu Karisito kei na Nona Veisorovaki me teivaki e yalodra” (“Isolisoli Mareqeti Mai Vua na Kalou,” Ensign se Liaona, Me 2018, 11).

E vakalougatataki keda na Turaga ena Nona sala veivakurabuitaki vakai Koya.

A talanoataka o Sisita Virginia H. Pearce, a lewe eliu ni Mataveiliutaki Raraba ni Goneyalewa, me baleta e dua na marama ka lomaleqataki ira na luvena era lakosese. A biuta okoya e dua na takete namaki ni talevi wasoma ni valetabu ka a yalodei ni na rokova na solibula matalia oqo na Turaga ena kena veisautaki na yalodratou na luvena. A ripotetaka na yalewa oqo:

“Ni oti e tini na yabaki ni kena talevi vakalevu cake na valetabu kei na dau masu tikoga, e ka ni rarawa meu kaya ni sega ga ni veisau na nodratou digidigi na luvequ. …

“Ia, o au sa vakakina. Au sa dua tani tale na marama. … Au sa solia yani na iyalayala ni noqu gauna, ka’u sa rawa kina ni waraka na Turaga. … Sa veisau na noqu nanamaki. Mai na noqu a namaka tiko me ratou veisau na luvequ, ia oqo au sa namaka ga na yalololoma wasoma oqo ka’u sa vakasinaiti kina ena vakavinavinaka ena vukudra. … E dau cakacaka na Turaga ena veisala talei, ka’u sa vakasinaiti vakaidina sara ena vakacegu e uasivita na ka kecega e kilai rawa” (ena “Prayer: A Small and Simple Thing,” At the Pulpit [2017], 288–89).

Vakatorocaketaki Noda Veivakavulici

Sureti ira na itabagone mera sa tiki ni nomu lesoni. Solia vei ira na madigi mera veivakavulici vakataki ira. Na nodra rogoca vakai ira na nodra ivakadinadina se na veika sotavi e rawa ni veivakauqeti sara. Kevaka e gadrevi, vukei ira na itabagone mera vakavakarau me veivakavulici, ka vakaraitaka vei ira na kena ibalebale mera veivakatavulici ena ivakarau ni iVakabula (raica na Veivakavulici ena iVakarau ni iVakabula, 27–28).