Li Kristo ut li saaj aj b’ihom, xb’aan laj Heinrich Hofmann

19–25 julio

Tzolʼlebʼ ut Sumwank 81–83

B’ar “k’eeb’il naab’al, naab’al li teneb’anb’il”

Jultikaq aawe naq eb’ li komon neke’wan xmusiq’ejil numsihom naq neke’xtzol li loq’laj hu sa’ kab’l. Rik’in tijok, k’oxla chan ru naru nakawaklesi xch’ooleb’ chixwotzb’aleb’ lix numsihom re te’xwaklesi li raameb’ chirib’ileb’ rib’.

Tz’iib’a li nakak’oxla

Xkanab’ankileb’ chi wotzok

Kanab’eb’ li komon chixsik’b’al ru jun ch’ol aatin sa’eb’ li junjunq chi tasal a’in li naru na’ok choq’ xk’ab’a’eb’ ajwi’ li junjunq chi tasal: Tzol’leb’ ut Sumwank 81, 82, ut 83. K’a’ut naq xe’xsik’ ru li k’ab’a’ej a’an?

Xk’utb’al li tzolʼlebʼ

Tzol’leb’ ut Sumwank 81:5; 82:18–19

Li junjunq qe laa’o tento taqasik’ “xchaab’ilal li qas qiitz’in.”

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxk’e junjunq patz’om re xk’oxlankil rix Tzol’leb’ ut Sumwank 81:5. Eb’ li patz’om a’an naru ajwi’ neke’oksiman re aatinak sa’ li tzolok. Jo’kan ajwi’, naru taawotz jun aanumsihom laa’at b’ar wi’ xaweek’a “xq’unal aametz’ew” ut naq jun komon kixwaklesi aach’ool rik’in lix k’anjel. Eb’ li komon maare wankeb’ xnumsihom ajwi’ chanchan a’an re te’xwotz. Naru ajwi’ teeril li video “Works of God” (ChurchofJesusChrist.org) re xwaklesinkileb’ xch’ool li komon re xtenq’ankil rib’ chirib’ileb’ rib’. Naru ajwi’ taawotz li raatin li Awa’b’ej M. Russell Ballard, li wan sa’ “Xkomon chik li k’anjeleb’aal.”

• Naru taakanab’eb’ li komon chirilb’al ru Tzol’leb’ ut Sumwank 82:18–19 re te’xsik’ li na’leb’ li taatenq’anq reheb’ chixtawb’aleb’ ru li rajom ut li rosob’tesihom li k’anjelak chiruheb’ li qas qiitz’in. Chirix a’an kanab’eb’ chixwotzb’al li te’xtzol. Jo’kan ajwi’, naru teeril li video “Las enseñanzas de Thomas S. Monson: Rescatar a los necesitados” (ChurchofJesusChrist.org). Chan ru naq eb’ li komon sa’ lix teep li Obiisp Monson ke’reetali li nak’utman sa’eb’ li raqal 18–19?

Tzol’leb’ ut Sumwank 82:8–10

“Laaʼin, li Qaawaʼ, wankin chi tenebʼanbʼil naq nekebʼaanu li kʼaʼru ninye.”

• Re xtenq’ankileb’ li komon chixtawb’al ru li chan ru naq xk’eeb’al qach’ool chi ab’ink chiru li Dios naxk’am rib’ rik’ineb’ li osob’tesihom yeechi’inb’ileb’ xb’aan li Dios, naru teeril ru Tzol’leb’ ut Sumwank 1:37–38; 82:10; 130:20–21 sa’ komonil malaj sa’ kok’ ch’uut. K’a’ru neke’xk’ut chiqu li raqal a’in chirix li Qaawa’? Eb’ li komon maare naru te’xye aatin li neke’xch’olob’ chan ru li Qaawa’, rik’in roksinkileb’ li raqal a’an.

• Chirix rilb’al ru li raqal 10, eb’ li komon naru te’aatinaq chirix k’a’ru xyeechi’ihom li Qaawa’ ut chan ru naq li Qaawa’ naxtz’aqob’resi ru li naxyeechi’i. Jun seraq’ li naxwotz li Hermana Virginia H. Pearce sa’ “Xkomon chik li k’anjeleb’aal” naru naxtenq’aheb’ li komon chirilb’al naq li Qaawa’ nokorosob’tesi a’ yaal lix chaab’il na’leb’ a’an, ut ink’a’ junelik jo’ chanru naqaj malaj naqoyb’eni laa’o.

• K’a’ru naqatzol sa’ Tzol’leb’ ut Sumwank 82:8–10 chirix k’a’ut naq li qaChoxahil Yuwa’ naxk’eheb’ qe lix taqlahom? Eb’ li komon maare naru te’xsik’ li na’leb’ sa’eb’ li raqal a’an re xtenq’ankil junaq ramiiweb’ malaj ralaleb’ li naxk’oxla naq eb’ li taqlahom a’aneb’ ramleb’ (chi’ilmanq ajwi’ li video “Benditos y felices son aquellos que guardan los mandamientos de Dios,” ChurchofJesusChrist.org). Malaj ut, naru te’xwotz xnumsihomeb’ li natenq’an reheb’ chirilb’aleb’ li taqlahom jo’ osob’tesihom.

Xkomon chik li k’anjeleb’aal

Li tz’aqal paab’ank.

Li Awa’b’ej M. Russell Ballard kixk’ut:

“Sa’ li qatzolomil, wankeb’ naab’al li qateneb’ankil, li qak’a’uxl, ut li qab’oqb’al. A’b’anan, wankeb’ li k’anjel li tento te’wanq jo’ xch’oolil li qakomonil sa’ li Iglees. “Jo’kan ut,” chan li Qaawa’, “tiikaqat chi paab’ank; chatxaqliiq sa’ li opiis li kinxaqab’ choq’ aawe; k’e xtenq’ankileb’ li q’uneb’ xmetz’ew, taqsi li uq’ej li nalukta ut k’e xmetz’ew li xb’een aqej li maak’a’ xmetz’ew” [Tzol’leb’ ut Sumwank 81:5; tiqb’il xkawil li aatin].

“A’an a’in li Iglees naq yoo chi k’anjelak! A’an a’in li tz’aqal paab’ank! A’an a’in li tz’aqal evangelio naq naqatenq’a, naqawaklesi, ut naqakawob’resiheb’ li wankeb’ sa’ rajb’al ru sa’ musiq’ej ut sa’ tib’elej! Xb’aanunkil a’in naraj naq taqula’aniheb’ ut taqatenq’aheb’ [chi’ilmanq Santiago 1:27], re naq lix nawomeb’ xch’ool ut xpaab’aaleb’ chirix li qaChoxahil Yuwa’ ut li Jesukristo ut lix tojb’al rix li maak te’k’ojlaaq chi kaw sa’ raameb’ ” (“Eb’ li chaq’al ru maatan re li Dios,” Jolomil ch’utub’aj-ib’ re abril 2018).

Li Qaawa’ nokorosob’tesi jo’ chanru xchaq’alil ru xna’leb’ a’an.

Li Hermana Virginia H. Pearce, li kiwan choq’ komon sa’ li Jolomil Awa’b’ejil reheb’ li Saaj Ixq, ki’aatinak chirix jun ixq li nawan xk’a’uxl chirixeb’ li ralal elenaqeb’ sa’ li chaab’il b’e. Kixk’ojob’ jun xjayalihom aajel ru, a’an li xik chi kok’ aj xsa’ sa’ li santil ochoch, ut kireek’a naq li Qaawa’ taaroxloq’i li mayej a’an rik’in xjalb’al li raameb’ li ralal. Li ixq kixye:

“Chirix lajeeb’ chihab’ chi wulak sa’ li santil ochoch ut tijok chi kok’ aj xsa’, naraho’ inch’ool chixyeeb’al naq eb’ li walal ink’a’ neke’jala xk’a’uxl. …

“A’b’an laa’in xinjala. Jalanin chik. … Xinkanab’ xk’oxlankil jo’q’e nawaj li ajb’il inb’aan, ut naru nawoyb’eni li Qaawa’. … Xjala li woyb’enihom. Sa’ xna’aj royb’eninkil naq eb’ li walal te’jalaaq, nawoyb’eniheb’ li k’iila q’unil uxtan nink’ul, ut ninb’antioxin chi numtajenaq xb’aaneb’ a’an. … Li Qaawa’ naxb’aanu lix k’anjel chi sachb’a-ch’oolejil, ut ninnumta rik’in li tuqtuukil li naxq’ax ru chixjunil li k’a’ru tawb’il ru” (sa’ “Prayer: A Small and Simple Thing,” At the Pulpit, 2017, 288–289).

Xchaab’ilob’resinkil li qak’utum

K’e xb’oqb’aleb’ li saaj chi tz’aqonk sa’ li tzolok. K’e xhoonaleb’ li saaj chixtzolb’aleb’ rib’ chirib’ileb’ rib’. Rab’inkileb’ lix nawom xch’ooleb’ ut xnumsihomeb’ chirib’ileb’ rib’ naru nak’anjelak chi nim sa’ xyu’ameb’. Wi na’ajman ru, tenq’aheb’ li saaj chixkawresinkileb’ rib’ re k’utuk ut k’ut chiruheb’ k’a’ru naraj naxye li k’utuk jo’ li Kolonel (chi’ilmanq Li k’utuk jo’ li Kolonel, 27–28).