Vakalesui Mai, mai vei Liz Lemon Swindle

26 ni Jiulai–1 ni Okosita

Vunau kei na Veiyalayalati 84

“Na Kaukauwa ni Bula Vakalou”

Na cava o na cakava mo sureti ira kina na lewe ni kalasi mera wasea na veika era sa vulica ena Vunau kei na Veiyalayalati 84?

Vola na Veika o Vakauqeti Kina

Sureta na Veiwasei

Sureti ira na lewe ni kalasi mera wasea vata kei na dua tale na lewe ni kalasi e dua na dina era kunea ena wase 84 ka a vakauqeti se vukei ira mera kila vakavinaka cake na matabete ni Kalou. Qai sureta e lewe vica mera wasea ena kalasi.

Vakavulica na iVunau

Vunau kei na Veiyalayalati 84:1–5, 17–28, 31–42

Eda rawa kece ni rawata na kaukauwa ni matabete kei na veivakalougatataki ni Kalou.

• E tekivuna na Turaga na “ivakatakila ni matabete” oqo (Vunau kei na Veiyalayalati 84, ulutaga ni iwase) ena veivakavulici ni na tara e dua na valetabu e Saioni (raica na tikina e 1–5). Ena rawa vakacava mo vukei ira na lewe ni kalasi mera kila vakavinaka na isema e tiko ena kedrau maliwa na inaki tabu ni valetabu kei na matabete? Ena rawa ni o tekivu ena nomu vola e dua na taro ena vava ni volavola me vaka Na cava so na inaki ni matabete? ka qai sureti ira na lewe ni kalasi mera vakaraica na isau ni taro ena Vunau kei na Veiyalayalati 84:17–28, 31–42. E vukea vakacava me sotava na inaki eso oqo na valetabu kei na cakacaka vakalotu ni valetabu?

• Me vukei ira na lewe ni kalasi mera kila vinaka na kaukauwa e rawa ni kauta mai na matabete ena nodra bula, o na rawa ni sureti ira mera wilika na Vunau kei na Veiyalayalati 84:17–28 ka vakasamataka se na vakacava na duidui ni nodra bula ke sega na matabete ni Kalou. Vakauqeti ira mera wasea na vuna era vakavinavinakataka kina na matabete, vata kei na veika era sa sotava ena kaukauwa ni matabete—ena nodra matavuvale, na veikacivi, se na bula yadua. Eda na rawata vakacava na kaukauwa ni matabete?

• Na bubului kei na veiyalayalati ni matabete (raica na Vunau kei na Veiyalayalati 84:31–42) esa baleti ira vakatabakidua era sa tabaki ki na dua na itutu ni matabete. Ia e vuqa na veivakalougatataki sa yalataki tu ena veitikina oqo sa vakarautaki tu vei keda kece. Mera raica na lewe ni kalasi na sala e vakavotukana kina na yalayala oqo kivei ira, o rawa ni sureti ira mera wilika na tikina e 33–42 ka veivosakitaka na sala eso eda rawa ni “ciqoma” kina na matabete (tikina e 35.), ira na italai ni Turaga, kei na Turaga. Sa rawa talega mera wilika na itukutuku ena “iKuri ni iVurevure” me vakaraica na cava meda cakava meda ciqoma kina na veivakalougatataki ni matabete. Ena rawa beka ni o vukei ira na lewe ni kalasi mera vakasamataka na ka e rawa ni okati ena “ka kecega sa tu vei [Tamada]” (tikina e 38), me vaka na Nona itovodei eso kei na mataqali bula e dau taleitaka oKoya. Na cava tale e vakauqeti keda me baleta na veitikina kei na itukutuku eso oqo?

  

  E vakalougatataki ira kece na luve ni Kalou na vei cakacaka vakalotu ni matabete.

Vunau kei na Veiyalayalati 84:61–88

Na Turaga ena tokoni ira era qaravi Koya.

• Dina ga ni vagolei na veitikina oqo vei ira era “lako yani ka vunautaka na kosipeli oqo ni matanitu” (tikina e 80), e vuqa na ivakavuvuli era tu kina e rawa ni kovuta e dua ga e qarava tiko na Kalou. Ena rawa ni o solia ki na lewe ni kalasi yadua e dua na tiki ni Vunau kei na Veiyalayalati 84:61–88 mera wilika ka kerei ira mera wasea vata kei na dua tale na lewe ni kalasi na veika era sa vulica ka na rawa ni kovuta e dua ga e qarava na Turaga. E rawa ni ra digia na lewe ni kalasi e dua na tikina talei se eso na veitikina mera vuli cavuqaqataka se vakaraitaki tu ena vanua eso era na rawa ni raica kina ena veisiga. Na yalayala cava so era taleitaka sara vakalevu? Na cava eda na rawa ni wasea mai na veitikina oqo me vakauqeti ira na daukaulotu tudei ena gauna oqo se o ira era vakavakarau tiko mera veiqaravi?

iKuri ni iVurevure

Eda rawa kece ni rawata na ka kece e tu vei Tamada.

E a vakavulica o Peresitedi M. Russell Ballard: “O ira kece era sa cakava na veiyalayalati tabu kei na Turaga ka ra rokova na veiyalayalati oqori sa rawa ni ra ciqoma na ivakatakila yadua, mera vakalougatataki ena veiqaravi ni agilosi, mera veitaratara kei na Kalou, mera rawata na taucoko ni kosipeli, ka me kena ilutua, mera vakaivotavota vata kei Jisu Karisito ena veika kecega e tu vei Tamada” (“Men and Women and Priesthood Power,” Ensign, Sept. 2014, 32).

A vola na imatai ni mataveiliutaki ni iSoqosoqo ni Veivukei e Salt Lake ena 1878: “Eda vakila na vakavinavinaka levu dina ni ena Nona veivakalougatataki na Tamada Vakalomalagi, o keda, na Nona vada eda kacivi meda dau‑cakacaka‑vata kei ira na ganeda ena kena tarai cake na matanitu ni Kalou e vuravura, ena kena vukei me tara na Valetabu, me rawa ni da ciqoma kina na veivakalougatataki ni veigauna oqo ka tawamudu. Ena veicakacaka vakalotu kece e ciqomi ena Vale ni Turaga, e tu kina na yalewa e yasai tagane, me baleti ira ruarua na bula kei na mate, ni vakaraitaka tiko ni sa sega ni tu duaduaga na tagane ka me tu tani na yalewa se me tu duaduaga na yalewa ka me tu tani na tagane ena Turaga” (Mary Isabella Horne, Elmina S. Taylor, kei Serepta M. Heywood, “To the Presidents and Members of the Relief Society of Salt Lake Stake of Zion, Greeting!” Woman’s Exponent, 15 ni Jan. 1878, 123).

Vakatorocaketaki ni Noda Veivakavulici

Yavutaka nomu veivakavulici ena ivunau. Raica me vakanamata na veivosaki ni nomu kalasi ena yavu ni ivakavuvuli ena ivolanikalou. O na rawa ni cakava oqo ni o kerei ira na lewe ni kalasi mera wilika na ivolanikalou ka qai wasea na dina era sa kunea, vakakina na veika era sa sotava ni ra bulataka tiko na dina eso oqori. (Raica na Veivakavulici ena iVakarau ni iVakabula, 20–21.)