2–8 ni Okosita

Vunau kei na Veiyalayalati 85–87

“Mo Dou Tudei ena Vanua Tabu”

Kakua ni yalotaqaya mo tara kece na veitikina—se iwase yadua sara mada ga—ni Vunau kei na Veiyalayalati ena Matawilivola ni Sigatabu. Laiva na Yalo me tuberi iko, ka mo sotava na veika era kunea na lewe ni kalasi ni veiganiti ki na nodra bula.

Vola na Veika o Vakauqeti Kina

Sureta na Veiwasei

E rawa mera dikeva na lewe ni kalasi na Vunau kei na Veiyalayalati 85–87 me baleta e dua na vosa se malanivosa e vaka e bibi vei ira (e dua beka era sa makataka tu ena nodra ivolanikalou). Kerei ira mera vola na nodra vosa se na malanivosa ena vava ni volavola, ka digitaka e lewe vica mera veivosakitaka.

Vakavulica na iVunau

Vunau kei na Veiyalayalati 85:6

Na Yalotabu e dau vosa ena “domo lailai malumu.”

• Ena Vunau kei na Veiyalayalati 85:6, a vakayagataka kina na parofita o Josefa Simici na vosa veivakamacalataki me tukuna kina na sala a vosa kina vua na Yalo. Na cava eda vulica baleta na Yalo Tabu mai na nona ivakamacala? O na taroga beka na lewe ni kalasi mera vakasamataka na gauna e a vosa kina vei ira na Yalotabu—era na vakamacalataka beka vakacava? Era rawa ni ra kunea na ikuri ni ivakamacala eso ena veitiki ni ivolanikalou vakaoqo: Luke 24:32; Mosaia 5:2; Alama 32:28; Ilamani 5:30; Vunau kei na Veiyalayalati 6:22–23; 11:12–13.

• O rawa beka ni vakasamataka e dua na lesoni ivakaraitaki se ivakaraitaki ka na vakavotuya na vakasolokakana lailai, malumu ni Yalotabu? Ena rawa ni o vakatagitaka vakamalua eso na sere ivakatagi vakalou ni ra curu mai ki na loma ni rumu na lewe ni kalasi. E rawa ni ra veivosakitaka na lewe ni kalasi na veika era vakila mai na sere ivakatagi kei na kena dredre mera na rogoca na sere ivakatagi oya kevaka e a so na rorogo vakasausa. Oqo e rawa ni veimuataki ki na dua na veivosaki me baleta na veika dau veivakasesei ena noda bula ka tarovi keda mai na noda rogoca na domo lailai, malua. E rawa ni ra wasea na lewe ni kalasi na veika era cakava me vakalevutaka na nodra vakila na Yalo—eso na ivakasala e rawa ni kune ena “iKuri ni iVurevure.”

Vunau kei na Veiyalayalati 86:1–7

Era sa vasokumuni na yalododonu ena veisiga e muri.

• Na itaviqaravi oqo ena rawa ni vukei ira na lewe ni kalasi mera kila na ivakatakilakila ena vosa vakatautauvata ni witi kei na sila ca: Sa rawa mo vola na malanivosa ivakatakilakila mai na vosa vakatautauvata (me vakataka na “daukaburaki sorenikau,” “sila ca vakaruguta na sila vinaka,” “kadre cake,” kei na “kumuna vata na sila vinaka” [tikina e 2–4, 7]) kei na vakavakadewa eso (me vaka na “ira na iApositolo,” “na Vukitani,” “na Vakalesuimai,” kei na “cakacaka ni kaulotu”) ena veitiki ni pepa duidui ka vakabira ena vava ni volavola. Mera qai cakacaka vata na lewe ni kalasi mera veidutaitaka na ivakatakarakara vata kei na kedra ibalebale, ni ra vakayagataka tiko na veika era sa vulica mai na Vunau kei na Veiyalayalati 86:1–7 (sa rawa talega mera wilika na Maciu 13:37–43). Na cava na vuna e bibi kina me vunauca na Turaga na ivakatakila oqo “vei kemudou na noqu italai”? (tikina e 1). Na itukutuku cava so eda kunea e semati ki na noda veiqaravi kivua na Turaga? (raica talega na tikina e 11).

Vunau kei na Veiyalayalati 87:2, 6, 8

E dau kunei na vakacegu ena “vanua tabu.”

Na valetabu sa dua na vanua tabu eda rawa ni vakila kina na loloma ni Kalou.

• Me vukei ira na lewe ni kalasi mera kila na kena gadrevi meda “tudei ena vanua tabu,”o na rairai tekivu ena nomu sureti ira mera vola eso na bolebole eda dau sotava edaidai. Era na rawa ni kunea eso na ivakaraitaki ena Vunau kei na Veiyalayalati 87:2, 6. O qai rawa ni veivosakitaka na sala ena rawa ni veivuke kina ena bolebole oqo na veisureti ni Turaga ena tikina e 8 . Na vei taro vaka oqo ena rawa ni veivuke:

  Na cava e bibi kina me baleta na vosa “tudei” ena tikina oqo?

  Na cava e vakavuna e dua na vanua me tabu?

  Na cava e rawa ni tosoya e dua na tamata mai na dua na vanua tabu?

  Eda na vakadeitaka vakacava ni da na sega ni toso?

• Ena rawa beka ni ra lomasoli na lewe ni kalasi mera wasea vakai ira na ivakaraitaki eso ni “vanua tabu” kei na cava era tabu kina (ena rawa mo vakaraitaka ni dua na vanua tabu e sega walega ni dua na vanua vakayago). Na vidio “Standing in Holy Places” (ChurchofJesusChrist.org) e rawa ni solia na ikuri ni vakasama eso. Ni ra veiwasei tiko, vakauqeti ira mera veivosakitaka na vuna e tabu kina vei ira na veivanua oqori. Era vukei keda vakacava meda kune vakacegu ena loma ni gauna dredre oqo na veivanua tabu oqori?

iKuri ni iVurevure

Vakaraica “e dua na gauna malua ka vakanomodi ena veisiga yadua.”

E a solia na ivakasala oqo o Sisita Vicki F. Matsumori, e dua na daunivakasala e liu ena Mataveiliutaki Raraba ni Lalai: “Baleta ni sa dau vakamacalataki vakawasoma ni Yalo me dua na domo lailai, e … sa rui ka bibi me tiko e dua na gauna ni vakadirorogo ena noda bula. Sa vakasalataki keda na Turaga ‘mo dou tiko lo, mo dou kila niu sa Kalou’ [Same 46:10]. Kevaka eda vakarautaka e dua na gauna ni vakadirorogo ena veisiga yadua ena noda sega ni vakasosani ena retioyaloyalo, kompiuta, qito ni vidio, se iyaya vakalivaliva, eda vakatara ki na domo lailai oqori e dua na gauna donu me vakarautaka na ivakatakila vakayadua kei na vakasolokakana kamikamica ni veidusimaki, veivakadeitaki, ka vakacegui keda.” (“Nodra Vukei na Tani Me Ra Vakila na Vakasolokakana ni Yalotabu,” Ensign se Liaona, Nove. 2009, 11).

Vakatorocaketaki Noda Veivakavulici

Vakavakarau ena nomu nanumi ira tiko na tamata. “Raica me dusimaka na nomu [vakavakarau] na nomu kilai ira vinaka na tamata o vakavulica. … O ira na qasenivuli sa Vakarisito e sega ni dua tikoga na ivakarau se iwalewale era cakava; era sa yalataka mera vukei ira na tamata mera tara cake nodra vakabauti Jisu Karisito” (Veivakavulici ena iVakarau ni iVakabula, 7).