9–15 ni Okosita

Vunau kei na Veiyalayalati 88

“Tauyavutaka … me Vale ni Kalou”

Me vaka e dua na qasenivuli vakosipeli, e sa nomu itavi mo vukea nomu kalasi me “veivakavulici vakai kemudou ena ivakavuvuli ni matanitu” kei na “vosa ni yalomatua” (Vunau kei na Veiyalayalati 88:77, 118). Me ikuri ni kena wasei na veika o sa vakauqeti kina mo vakavulica mai na Vunau kei na Veiyalayalati 88, vakauqeti ira na lewe ni kalasi mera veivakavulici vakai ira ena veika era sa vulica.

Vola na Veika o Vakauqeti Kina

Sureta na Veiwasei

Ena so na gauna e rawa ni uqeta na veiwasei e dua na iyaloyalo. E rawa ni o vakaraitaka na iyaloyalo ni dua na taba ni olive (se droinitaka e dua ena vava ni volavola) ka sureti ira na lewe ni kalasi mera wasea na tikina eso mai na Vunau kei na Veiyalayalati 88 ka vukei ira mera kila vakavinaka na vuna a vakatoka kina na ivakatakila oqo o Josefa Simici me dua na “‘drau ni olive’ … , na itukutuku ni vakacegu ni Turaga vei keda” (ulutaga ni iwase).

Vakavulica na iVunau

Vunau kei na Veiyalayalati 88:6–50

E lako mai vei Jisu Karisito na rarama kei na lawa.

• Me vukea na nomu kalasi mera kila na Vunau kei na Veiyalayalati 88:6–50, sa rawa mo vola ena vava ni volavola na rarama kei na lawa ka wasea na kalasi ki na rua na ilawalawa. Dua na ilawalawa e rawa ni railesuva na Vunau kei na Veiyalayalati 88:6–13, 40–50, ka vakaraica na veika era sa vulica me baleti Jisu Karisito mai na yavu eso ni rarama ena veitikina oqo. Na ikarua ni ilawalawa e rawa ni vakasaqara ena tikina e 13–26, 34–42, ka vakaraica na veika era sa vulica me baleta na bibi ni kena vakamuri na Nona lawa. Na cava era vakavulica vei keda me baleta na iVakabula na dina eso ni rarama kei na lawa ena wase 88 ? Era vakauqeti keda vakacava meda vakataki Koya vakalevu cake?

Vunau kei na Veiyalayalati 88:62–76, 119–26

E rawa ni da vakasavasavataki ena vuku ni Veisorovaki i Jisu Karisito.

• E basika vakarua ena wase 88 (tikina e 68, 74) na ivakaro ni Turaga me da “vakatabui ke[da]”. Kevaka o vakila ni o sa uqeti me veivosakitaki na kena ibalebale, o na rawa ni tekivu ena kena vakadikevi vata na ivakamacala ni vosa na vakatabui se na railesuvi ni so na tikina ka tuvai ena ruku ni “Vakatabui” ena iDusidusi ki na iVolanikalou (scriptures.ChurchofJesusChrist.org). E rawa talega mo sureti ira na lewe ni kalasi mera wilika na Vunau kei na Veiyalayalati 88:62–76, 119–26 ka veivosakitaka na taro eso vakaoqo vata kei na dua na itokani: Eda yaco vakacava meda sa vakatabui? Na yalayala cava so mai vua na Turaga eda kunea ena veitikina oqo? Na cava e vinakata kina na Turaga meda savasava? Era na rawa talega ni raica na isau ni veitaro oqo ena itukutuku nei Peresitedi Dallin H. Oaks “Vakasavasavataki mai na Veivutuni” (Ensign se Liaona, Me 2019, 91–94; raica talega na “iKuri ni iVurevure”).

Vunau kei na Veiyalayalati 88:77–78, 118–26

E vinakata vei keda na Turaga meda vakasaqara na kila ka ena vuli kei na vakabauta.

• Na ivakasala a solia na Turaga me veivuke ena tauyavutaki ni “koronivuli ni parofita” e Katiladi (tikina e 137) ena rawa ni vukea na nomu kalasi ena nomu sasaga mo “veivakavulici vakai kemudou ena ivakavuvuli ni matanitu” (tikina e 77). Ena rawa ni o vaqaqara ena tikina e 77–78 kei na 118–26 ka veivosakitaka na sala mo cakava kina nomu kalasi me dua na “vale ni vuli” (tikina e 119). E rawa mera vola na lewe ni kalasi eso na “lawa ni kalasi” se na ivakavuvuli e yavutaki ena veitikina oqo ka na dusimaki kina na nomu vuli ena kalasi. E rawa talega ni o kerei ira na lewe ni kalasi mera wasea na sala era sa saga tiko kina mera bulataka na ivakavuvuli oqo ni ra “vakasaqara na kila ka” (tikina e 118).

  

  E rawa me vanua ni vuli vakayalo na noda itikotiko.

Vunau kei na Veiyalayalati 88:119

Na valetabu e sa vale ni Kalou.

• Kevaka e rawa, vakaraitaka e dua na iyaloyalo ni valetabu e voleka duadua ena vava ni volavola, ka sureta na kalasi mera vola tikiva ga na vosa eso mai na tikina e 119 e vakayagataki me vakamacalataka na vale ni Turaga. Sureti ira mera wasea na veika era sa sotava ka vakaraitaka na sala e veisotari kina na valetabu kei na ivakamacala yadua. E rawa talega mo veivosakitaka na sala e rawa ni dusimaka kina na noda bula ena tikina oqo.

iKuri ni iVurevure

Vakasavasavataki mai na veivutuni.

A vakavulica o Peresitedi Dallin H. Oaks:

“Na veivutuni e tekivu kei na noda iVakabula, ka sa ka ni reki, ka sega ni icolacola. …

“Meda vakasavasavataki mai na noda ivalavala ca ena veivutuni, sa dodonu meda biuta laivi ka vakatusai ira vua na Turaga kei ira na Nona turaganilewa vakayago ni gadrevi (raica na Vunau kei na Veiyalayalati 58:43). Ea vakatavulica talega o Alama ni dodonu meda ‘kauta mai na cakacaka ni yalododonu’ (Alama 5:35). Ko ira kece oqo e tiki ni veisureti wasoma ni ivolanikalou me lako mai vei Karisito.

“E gadrevi meda vakayagataka na sakaramede ena Siga ni vakacecegu yadudua. Ena cakacaka vakalotu oya eda veiyalayalati kina ka ciqoma na veivakalougatataki ka na vukei keda meda gumatua ki na cakacaka kei na gagano eso ka tarovi keda mai na vinaka taucoko ka sureti keda kina na noda iVakabula meda rawata (raica na Maciu 5:48; 3 Nifai 12:48). Ni da sa ‘vakuwai [keda] mai na veika kecega sa sega ni vakalou ka lomana na Kalou ena [noda] igu, vakasama, kei na [noda] kaukauwa kecega,’ sa na qai rawa meda ‘vakataucokotaki kina ena vukui Karisito’ ka da ‘vakatabui’ mai na Nona dra sa livi ka ‘yaco kina meda tabu ka savasava sara’ (Moronai 10:32–33). Sa dua dina na yalayala! Sa dua dina na cakamana! Sa dua dina na veivakalougatataki oqo!” (“Vakasavasavataki mai na Veivutuni,” Ensign se Liaona, Me 2019, 92).

Vakatorocaketaki Noda Veivakavulici

Vaqara na ivurevure me tokona na ivakavuvuli. Me ikuri ni vakatutu era tiko ena ituvatuva oqo, sa rawa ni o vakaraica na vidio ni Lotu, sere kei na ivakatagi, se na cakacaka ni liga me vakavulici kina na ivakavuvuli e tiko ena Vunau kei na Veiyalayalati 88. (Raica na Veivakavulici ena iVakarau ni iVakabula, 17–18.)