9–15 agosto

Tzolʼlebʼ ut Sumwank 88

“Xaqab’omaq … rochoch li Dios”

Jo’ aj k’utunel re li evangelio, teneb’anb’il sa’ aab’een xtenq’ankileb’ li komon re naq “te’xk’ut li tzol’leb’ re li awa’b’ejihom chirib’ileb’ rib’ ” ut li “aatin re chaab’il na’leb’ ” (Tzol’leb’ ut Sumwank 88:77, 118). Chirix naq taawotz li musiq’anb’ilat chixk’utb’al chirix Tzol’leb’ ut Sumwank 88, waklesi xch’ooleb’ li komon chixk’utb’al chirib’ileb’ rib’ li neke’xtzol.

Tz’iib’a li nakak’oxla

Xkanab’ankileb’ chi wotzok

Wan naq jun jalam-uuch naru naxtikib’ junaq aatinak. Naru taak’ut junaq xjalam-uuch ruq’ li olivo (malaj taayiib’ xjalam-uuch chiru li pizarron) ut taakanab’eb’ li komon chixwotzb’aleb’ raqal re Tzol’leb’ ut Sumwank 88 li tixtenq’aheb’ chixtawb’al ru k’a’ut naq laj Jose Smith kixk’ab’a’in li k’utb’esinb’il na’leb’ a’in jo’ “xxaq li olivo” … , li esil re tuqtuukilal naxk’e li Qaawa’ choq’ qe” (xjolomil li tasal).

Xk’utb’al li tzolʼlebʼ

Tzol’leb’ ut Sumwank 88:6–50

Li saqen ut li chaq’rab’ neke’chal chaq rik’in li Jesukristo.

• Re xtenq’ankileb’ li komon chixtawb’al ru Tzol’leb’ ut Sumwank 88:6–50, naru taatz’iib’a saqen ut chaq’rab’ chiru li pizarron, ut taak’eheb’ sa’ wiib’ ch’uut. Jun ch’uut te’ril ru Tzol’leb’ ut Sumwank 88:6–13, 40–50 re te’xsik’ k’a’ru natzolman chirix li Jesukristo naq na’oksiman li aatin saqen sa’eb’ li raqal a’in. Li jun ch’uut chik naru te’ril ru li raqal 13–26, 34–42 re te’xsik’ k’a’ru natzolman chirix lix aajelil ru xtaaqenkil lix chaq’rab’. K’a’ru neke’xk’ut chiqu chirix li Kolonel li yaal chirix li saqen ut li chaq’rab’ sa’ li tasal 88? Chan ru naq nokohe’xmusiq’a chi wulak mas wi’chik jo’ a’an?

Tzol’leb’ ut Sumwank 88:62–76, 119–126

Naru nokowulak chixsaqob’resinkil qib’ rik’in lix tojb’al rix li maak kixb’aanu li Jesukristo.

• Lix taqlahom li Qaawa’, “santob’resihomaq eerib’,” na’el wiib’ sut sa’ li tasal 88 (raqal 68, 74). Wi nakaweek’a naq tex’aatinaq chirix k’a’ru naraj naxye a’an, naru taatikib’ rik’in rilb’al sa’ komonil k’a’ru naraj naxye li aatin santob’resink malaj ut rilb’aleb’ junjunq li raqal neke’tawman sa’ “Santob’resink” sa’ li K’utul Raqal reheb’ li Loq’laj Hu. Naru ajwi’ taakanab’eb’ li komon chirilb’al ru Tzol’leb’ ut Sumwank 88:62–76, 119–126 ut te’aatinaq chirix junjunq li patz’om jo’eb’ a’in sa’ ka’kab’il: Chan ru nokowulak chi santob’resiik? K’a’ruheb’ lix yeechi’ihom li Dios neke’qataw sa’eb’ li raqal a’an? Kʼaʼut naq li Qaawaʼ naraj naq saqaq qu? Naru ajwi’ neke’xtaw xsumenkileb’ li patz’om a’an sa’ li raatin li Awa’b’ej Dallin H. Oaks: “Saqob’resinb’il qu xb’aan li jalb’a-k’a’uxlej” (Jolomil ch’utub’aj-ib’ re abril 2019; chi’ilmanq ajwi’ “Xkomon chik li k’anjeleb’aal”).

Tzol’leb’ ut Sumwank 88:77–78, 118–126

Li Qaawa’ naraj naq taqasik’ qanawom rik’in li tzolok ut rik’in li paab’aal.

• Li na’leb’ kixk’e li Qaawa’ re xkojob’ankil li “tzoleb’aal reheb’ li profeet” aran Kirtland (raqal 137) naru naxtenq’aheb’ li komon sa’ lix k’anjeleb’ “chixk’utb’al chirib’ileb’ rib’ li tzol’leb’ re li awa’b’ejihom” (raqal 77). Maare naru teerileb’ ru li raqal 77–78 ut 118–126 ut tex’aatinaq chirix chan ru naq li tzoleb’aal a’anaq jun “rochochil li tzolok” (raqal 119). Eb’ li komon naru te’xtz’iib’a junjunqeb’ li “tusulal re li tzoleb’aal” malaj na’leb’ rik’in roksinkileb’ li raqal a’an, re naq te’xb’eresi li tzolok sa’ li tzoleb’aal. Naru ajwi’ taakanab’eb’ li komon chixch’olob’ankil chan ru naq neke’xyal roksinkileb’ li na’leb’ a’an sa’ “xsik’b’al xnawomeb’ ” (raqal 118).

  

  Li qochoch naru nawulak jo’ jun na’ajej re tzolok sa’ musiq’ej.

Tzol’leb’ ut Sumwank 88:119

Li santil ochoch a’an rochoch li Qaawa’.

• Wi naru, k’e xjalam-uuch jun santil ochoch chiru li pizarron, ut kanab’eb’ li komon chixtz’iib’ankil chixk’atq a’an li aatin wan sa’ li raqal 119 li na’oksiman jo’ xch’olob’ankil li rochoch li Qaawa’. Kanab’eb’ chixwotzb’al xnumsihomeb’ li tixk’ut chan ru naq li santil ochoch naxk’ul rib’ rik’ineb’ li ch’ol aatin neke’oksiman jo’ xch’olob’ankil a’an. Jo’kan ajwi’, naru tex’aatinaq chirix chan ru naq li raqal a’an naru naxb’eresi li qayu’am.

Xkomon chik li k’anjeleb’aal

Saqob’resinb’il qu xb’aan li jalb’a-k’a’uxlej.

Li Awa’b’ej Dallin H. Oaks kixk’ut:

“Li jalok k’a’uxlej natikla rik’in li qaKolonel, ut a’an jun sahil ch’oolejil, moko iiq ta. …

“Re toosantob’resiiq xb’aan li jalba’-k’a’uxlej, tento taqakanab’eb’ li qamaak ut taqach’olob’eb’ chiru li Qaawa’, ut chiru ajwi’ lix raqol aatin sa’ ruchich’och’ wi na’ajman ru (chi’ilmanq Tzol’leb’ ut Sumwank 58:43). Laj Alma kixk’ut naq tento “taquuchini k’anjel re tiikilalal” (Alma 5:35). Chixjunil a’in naxk’am rib’ rik’in li b’oqok naka’sutiman sa’eb’ li loq’laj hu naq toochalq rik’in li Kristo.

Aajel ru naq taqak’ul li loq’laj wa’ak rajlal hilob’aal kutan. Sa’ li k’ojob’anb’il k’anjel a’an naqab’aanuheb’ li sumwank ut naqak’uleb’ li osob’tesink li toohe’xtenq’a chi numtaak sa’ xb’een chixjunileb’ li b’aanuhom ut li ajom li neke’ramok qe chixk’ulb’al lix tz’aqalil qe qu li nokoxb’oq li Kolonel chixk’ulb’al (chi’ilmanq Mateo 5:48; 3 Nefi 12:48). Naq “naqatz’eqtaana choq’ qe chixjunil li moko us ta, ut naqara li Dios chi anchal qametz’ew, qak’a’uxl ut qakawilal,” rik’in a’an naru toowanq “chi tz’aqal qe qu rik’in li Kristo,” ut chi “santob’resinb’ilo” sa’ xk’ab’a’ lix hoyonik lix kik’el, re naq too’ok “chi sant, chi maak’a’ qatz’ajnil” (Moroni 10:32–33). Nimla yeech’i’ihom a’in! Nimla sachb’a-ch’oolej a’in! Nimla osob’tesink a’in!” (“Saqob’resinb’il qu xb’aan li jalb’a-k’a’uxlej,” Jolomil ch’utub’aj-ib’ re abril 2019).

Xchaab’ilob’resinkil li qak’utum

Sik’eb’ li k’anjeleb’aal li te’xxaqab’eb’ xwankil li raqal chi na’leb’. Jo’ xtz’aqob’eb’ li na’leb’ sa’ li tusleb’ aatin a’in, naru nakasik’eb’ video, b’ich, malaj jalam-uuch re li Iglees re xk’utb’aleb’ li na’leb’ neke’tawman sa’ Tzol’leb’ ut Sumwank 88. (Chi’ilmanq Li k’utuk jo’ li Kolonel, 17–18.)