16–22 ni Okosita

Vunau kei na Veiyalayalati 89–92

“iVakavuvuli ka Sala Vata kei na Kena Yalayala”

Ni o vakavakarau mo veivakavulici, nanuma na ivakavuvuli eso a basika vei iko ni o a vulica na wase 89–92 ena macawa oqo.

Vola na Veika o Vakauqeti Kina

Sureta na Veiwasei

Oqo eso na taro ena rawa mo vakayagataka me vakauqeti ira na lewe ni kalasi mera wasea e dua na ka mai na nodra vuli ivolanikalou: Na cava o a wilika ena macawa oqo e vaqaqacotaka na nomu vakabauti Jisu Karisito? ena veikacivi vakaparofita nei Josefa Simici? Cava o a wilika e vukei iko mo kila vakavinaka cake kina na ituvatuva i Tamada Vakalomalagi vei ira na Luvena?

Vakavulica na iVunau

Vunau kei na Veiyalayalati 89

Na Vosa ni Vuku e dua na “ivakavuvuli ka sala vata kei na kena yalayala.”

• E vuqa na tamata era na raica beka na Vosa ni Vuku me vaka ga e dua na lisi ni veika “me caka” kei na kena “me kua.” Me vukei ira na lewe ni kalasi mera vakasamataka vakatitobu na ivakavuvuli ni ivakaro oqo, sureti ira mera vakasaqaqara ena Vunau kei na Veiyalayalati 89 ni ra vakasamataka tiko na taro eso oqo: Na cava a solia kina na Turaga vei keda na Vosa ni Vuku? Na cava e vakavulica vei keda na ivakatakila oqo me baleta na Tamada Vakalomalagi kei na Nona ituvatuva me baleti keda? Ena rawa ni veivuke na itukutuku e tiko ena “iKuri ni iVurevure.” Kevaka o vakila ni na yaga vei ira na lewe ni kalasi, sa rawa mo sureti ira mera lisitaka ena vava ni volavola na ivakarau eso ni tiko bulabula kei na kena e veivakaleqai ka a vakatakila na Turaga ena Vunau kei na Veiyalayalati 89:5–17. Mera qai rawa ni railesuva na “Tiko Bulabula ni Yago kei na Vakasama” ena Me iSakisaki ni iTabagone (25–27) ka vakuria ki na nodra lisi na veika tale eso era sa kunea. Era sa vakayacori beka vakacava na yalayala ena tikina e 18–21 ki na noda bula?

• Oqo e dua tale na sala mera vukei kina na lewe ni kalasi me veivosakitaka na ivakavuvuli eso ena Vosa ni Vuku. Ena rawa ni o wasea na kalasi ki na tolu na ilawalawa ka kerea na ilawalawa yadua me wilika na wase 89, ka vakasaqara na isau ni dua vei ira na taro oqo: Na ivakavuvuli cava so ena rawa ni solia na veivakauqeti vua e dua e sotava tiko na dredre me muria na Vosa ni Vuku? Na ivakavuvuli cava so ena rawa ni vukei keda meda kua ni vakalewai ira era sasaga voli ena dredre mera muria? Na ivakavuvuli cava so ena rawa ni vakacegui keda ni da sotava na leqa ni tauvimate dina ga ni da bulataka tiko na Vosa ni Vuku? Me tiki ni itaviqaravi oqo, sa rawa mo wasea na ka a sotava o Peresitedi Dieter F. Uchtdorf ena nona a vuli tiko me dua na pailate ni ivalu (raica na “Vosota Tikoga,” Ensign se Liaona, Me 2010, 58). Vakauqeti ira na lewe ni kalasi mera vakasamataka e dua na ka era a vakauqeti mera cakava ena gauna ni veivosaki, ka solia vei ira na gauna mera vola na nodra nanuma.

  

  E a vakatakila mai na Kalou na Vosa ni Vuku me vukei ira na Luvena.

Vunau kei na Veiyalayalati 90:1–17

Na Mataveiliutaki Taumada e taura tu “na idola ni matanitu.”

• Na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakatura mera vakasaqara na lewenilotu ena Vunau kei na Veiyalayalati 90:1–17 mera vulica kina me baleta na Mataveiliutaki Taumada. Ena rawa ni o kerei ira na lewe ni kalasi mera wasea na veika era sa vulica e vale mai na itaviqaravi oqo, se rawa ni o vakasaqara na veitikina oqo vaka dua na kalasi. Ena rawa talega ni ra vakaraica na lewe ni kalasi na malanivosa eso ena “Mai Rogoca Na Domo Ni Parofita” (Sere ni Lotu, naba 12) se dua tale na sere me baleti ira na parofita ka semati ki na ivakavuvuli e tiko ena veitikina oqo. Sa vukei iko vakacava na veiqaravi ni Mataveiliutaki Taumada mo kilai Tamada Vakalomalagi kei Jisu Karisito?

Vunau kei na Veiyalayalati 91

“E vakatakila na ka dina na Yalo.”

• Ena vuravura nikua, eda sa sotava tu na itukutuku eso ka tu kina “e vuqa na ka … era ka dina” kei na “vuqa na ka … e sega ni dina” (tikina e 1–2). Sureti ira na lewe ni kalasi mera raica na wase 91 me baleta na ivakasala me baleta na Apokirifa ka na rawa ni vukea nodra raica vakamatata na dina ena itukutuku eso era sotava. Na ivakaraitaki cava e rawa ni ra wasea ena sala e vukei ira kina na Yalo mera kila ni dina?

iKuri ni iVurevure

Na Vosa ni Vuku.

A vakavulica o Peresitedi Boyd K. Packer:

“Na Vosa ni Vuku e a ‘soli me ivakavuvuli ka sala vata kei na kena yalayala’ [Vunau kei na Veiyalayalati 89:3]. Na vosa o ya na ivakavuvuli ena ivakatakila e sa ka bibi sara. Na ivakavuvuli e dua na dina qaqaco, e dua na lawa, e dua na lewa e rawa ni o taurivaka me tuberi iko ena vakatulewa. Vakararaba e sega ni dau volai vakamatailalai na ivakavuvuli. Oqori e biuti iko kina mo galala mo kunea na nomu sala ena dua na dina qaqaco, e dua na ivakavuvuli, me nomu iyaqa.

“Era dau vola mai na lewenilotu ka taroga kevaka e saqata na Vosa ni Vuku na ka oqo se ka oya. Sa kilai levu tu ni ti, kofi, yaqona ni valagi kei na tavako era veisaqasaqa kaya. E se sega ni se volai vakamatailalai vakalevu cake. Ia, eda vakavulica ga na ivakavuvuli vata kei na veivakalougatataki sa yalataki tu. Sa vuqa na veika ni veivakatotogani, veivakabobulataki ka rawa ni gunuvi se mamai se ceguvi se culai era vakamavoataka ruarua na yago kei na yalo ka sega ni tukuni tu ena ivakatakila. …

“Rokova na ivakavuvuli ni Vosa ni Vuku ka o na ciqoma na veivakalougatataki sa yalataki tu” (“The Word of Wisdom: The Principle and the Promises,” Ensign, May 1996, 17–18).

Vakatorocaketaki ni Noda Veivakavulici

Wasei wasoma nomu ivakadinadina. Na nomu ivakadinadina, rawarawa ka dina baleta na dina eso vakayalo sa rawa me ka ni veivakauqeti kaukauwa vei ira o vakavulica. E sega ni gadrevi me maqosa se balavu na nomu ivakadinadina. Ena rawa, me ivakaraitaki, ni dua na ivakadinadina rawarawa ni veivakalougatataki o a sa ciqoma mai na bulataki ni Vosa ni Vuku. (Raica na Veivakavulici ena iVakarau ni iVakabula, 35.)