16–22 agosto

Tzolʼlebʼ ut Sumwank 89–92

“Jun na’leb’ li wan xyeechi’ihom”

Naq nakakawresi aawib’ re k’utuk, k’oxlaheb’ li na’leb’ li xe’wulak chawu naq yookat chixtzolb’aleb’ li tasal 89–92 chiru li xamaan a’in.

Tz’iib’a li nakak’oxla

Xkanab’ankileb’ chi wotzok

Arin wankeb’ junjunq patz’om li naru taawoksi re xwaklesinkil xch’ooleb’ li komon chixwotzb’al k’a’ru xe’xtzol sa’eb’ li loq’laj hu: K’a’ru xawil ru chiru li xamaan a’in li kixkawob’resi laa paab’aal chirix li Jesukristo? Ut chirix lix profeetil b’oqb’al laj Jose Smith? K’a’ru xawil ru li xatxtenq’a chixtawb’al ru chi us lix k’uub’anb’il na’leb’ li qaChoxahil Yuwa’ choq’ reheb’ li ralal xk’ajol?

Xk’utb’al li tzolʼlebʼ

Tzolʼlebʼ ut Sumwank 89

Li Aatin re Chaab’il Na’leb’ a’an “jun na’leb’ li wan xyeechi’ihom.”

• Maare naab’aleb’ li kristiaan te’ril li Aatin re Chaab’il Na’leb’ jo’ jun siir k’a’aq re ru “naru” ut “inka’ naru.” Re xtenq’ankileb’ li komon chi k’oxlak chirixeb’ li na’leb’ wankeb’ sa’ li ch’olob’ank a’an, kanab’eb’ chirilb’al ru Tzol’leb’ ut Sumwank 89 rik’ineb’ li patz’om jo’ a’in sa’ xk’a’uxleb’: K’a’ut naq li Qaawa’ kixk’e chaq qe li Aatin re Chaab’il Na’leb’? K’a’ru naxk’ut chiqu li k’utb’esinb’il na’leb’ a’in chirix li qaChoxahil Yuwa’ ut lix k’uub’anb’il na’leb’ choq’ qe? Maare us rilb’al li na’leb’ wan sa’ “Xkomon chik li k’anjeleb’aal.” Wi nakak’oxla naq maare us choq’ reheb’ li komon, naru taakanab’eb’ chixtz’iib’ankil chiru li pizarron li chaab’il b’aanuhom ut li ink’a’ chaab’il kixye li Qaawa’ sa’ Tzol’leb’ ut Sumwank 89:5–17. Chirix a’an naru te’ril ru “Li kawilal sa’ tib’elej ut sa’ musiq’ej” sa’ Choq’ re Xkawilaleb’ li Saaj (25–27), ut te’xtz’iib’a xkomoneb’ li k’a’aq re ru te’xtaw. Chan ru naq ak xtz’aqob’resiik ru sa’ li qayu’am li yeechi’inb’il sa’eb’ li raqal 18–21?

• Li na’leb’ a’in naru naxtenq’aheb’ li komon chi aatinak chirixeb’ li na’leb’ re li Aatin re Chaab’il Na’leb’. Naru taak’eheb’ li komon sa’ oxib’ ch’uut ut taapatz’ reheb’ li junjunq chi ch’uut naq te’ril ru li tasal 89 re te’xsik’ xsumenkil jun reheb’ li patz’om a’in: K’a’ru li na’leb’ li naru naxwaklesi xch’ool anihaq li ch’a’aj chiru xpaab’ankil li Aatin re Chaab’il Na’leb’? K’a’ru li na’leb’ li naru nokoxtenq’a re naq ink’a’ tooraqoq aatin chirix anihaq ch’a’aj chiru xpaab’ankil? K’a’ru li na’leb’ li naru naxk’ojob’ qach’ool naq maare wan qayajel us ta naqayu’ami li Aatin re Chaab’il Na’leb’? Jo’ xkomon li ch’ina k’anjel, naru taawotz lix numsihom li Awa’b’ej Dieter F. Uchtdorf naq kitzolok jo’ aj ch’e’ol so’sol ch’iich’ (chi’ilmanq “Continuemos con paciencia,” Liahona, mayo 2010, 58). Waklesi xch’ooleb’ li komon chi k’oxlak chirix k’a’ruhaq xe’reek’a naq te’xb’aanu, ut k’e xhoonaleb’ chixtz’iib’ankil lix k’a’uxleb’.

  

  Li Dios kixk’utb’esi li Aatin re Chaab’il Na’leb’ re xtenq’ankileb’ li ralal xk’ajol.

Tzol’leb’ ut Sumwank 90:1–17

Rik’in li Xb’eenil Awa’b’ejil wankeb’ “lix laawil li awa’b’ejihom.”

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nayeeman naq eb’ li komon te’ril Tzol’leb’ ut Sumwank 90:1–17 re tzolok chirix li Xb’eenil Awa’b’ejil. Maare naru taakanab’eb’ li komon chixwotzb’al li xe’xtzol sa’ kab’l naq xe’ril ru a’an, malaj ut naru teerileb’ ru li raqal a’an sa’ komonil. Eb’ li komon naru ajwi’ te’xsik’ ch’ol aatin sa’ “Xyaab’ xkux jun li profeet ab’i” (Eb’ li B’ich, 11) malaj junaq chik li b’ich chirixeb’ li profeet li wankeb’ rilom rik’in li naxk’ut li raqal a’an. Chan ru naq lix k’anjel li Xb’eenil Awa’b’ejil nakatxtenq’a chixnawb’aleb’ ru li qaChoxahil Yuwa’ ut li Jesukristo?

Tzolʼlebʼ ut Sumwank 91

“Li Musiq’ej naxk’utb’esi li yaal.”

• Sa’ li ruchich’och’ anajwan, wanko chirilb’aleb’ esil li “wankeb’ chi sa’ li yaaleb’ ” ut “k’iila na’leb’ li wankeb’ chi sa’ li moko yaaleb’ ta” (raqal 1–2). Kanab’eb’ li komon chixsik’b’al xna’leb’eb’ sa’ li tasal 91 chirix li hu Dewterokanoniko li tixtenq’aheb’ chixk’eeb’al reetal li yaal sa’eb’ li esil te’ril. K’a’ruheb’ li eetalil naru te’xwotz chirix chan ru naq neke’tenq’aak xb’aan li Musiq’ej chixk’eeb’al reetal li yaal?

Xkomon chik li k’anjeleb’aal

Li Aaatin re Chaab’il Na’leb’.

Li Awa’b’ej Boyd K. Packer kixk’ut:

“Li Aatin re Chaab’il Na’leb’ “k’eeb’il choq’ jun na’leb’ li wan xyeechi’ihom” (Tzol’leb’ ut Sumwank 89:3). Li aatin na’leb’ mas aajel ru sa’ li k’utb’esinb’il na’leb’ a’in. Xb’aan naq jun na’leb’ a’an jun li yaal nakana, jun chaq’rab’, jun tusulal li naru na’oksiman jo’ jun aj k’amol b’e re sik’ok-u. Eb’ li na’leb’ moko junelik ta neke’ch’olob’aman ru. Xb’aan a’an naq ach’ab’anb’ilat chixsik’b’al aab’e rik’in jun li yaal li nakana, jo’ jun na’leb’ re eetalink.

“Wankeb’ li komon nokohe’xtz’iib’a re xnawb’al wi junaq k’a’aq re ru naxq’et li Aatin re Chaab’il Na’leb’. Nawb’il naq li te, li kape ut eb’ li ha’ neke’kaltesin ut li may moko us ta roksinkileb’. Us ta moko ch’olob’anb’il ta chi tz’aqal re ru. Neke’k’utman b’an li na’leb’ a’an rochb’eeneb’ li osob’tesihom yeechi’inb’ileb’. “Wankeb’ naab’al li k’a’aq re ru ink’a’ neke’yeeman sa’ li k’utb’esinb’il na’leb’ li naru ruk’b’al, xtoq’ininkil, malaj xjiq’b’al, li neke’k’aytesin ut neke’xrahob’tesi ajwi’ li qatib’el ut li qamusiq’. …

“Oxloq’ihomaq li na’leb’ re li Aatin re Chaab’il Na’leb’ ut teek’uleb’ li osob’tesihom yeechi’inb’ileb’ ” (“La Palabra de Sabiduría: El principio y las promesas,” Liahona, julio 1996, 18–19).

Xchaab’ilob’resinkil li qak’utum

Ch’olob’ lix nawom aach’ool chi kok’ aj xsa’. Wi nakaye xyaalaleb’ li yaalil na’leb’ chi anchal aach’ool, k’a’jo’ naq taaruuq chi wank xwankil sa’ xch’ooleb’ li ani tzolb’ileb’ aab’aan. Ink’a’ na’ajman ru naq utz’u’ujinb’il laa waatin malaj naq najt tat-aatinaq. Naru naq a’anaq jun ch’ina nawom ch’oolej reheb’ li osob’tesihom aak’ulum xb’aan xyu’aminkil li Aatin re Chaab’il Na’leb’. (Chi’ilmanq Li k’utuk jo’ li Kolonel, 35.)