Au sa Raica na Luve ni Tamata ni Tu ena Ligai Matau ni Kalou, mai vei Walter Rane

23–29 ni Okosita

Vunau kei na Veiyalayalati 93

“Ciqoma na Taucoko ni Nona iSerau”

O ira na tamata o vakavulica era luvena tagane kei na yalewa vakayalo ka taleitaki na iTubutubu Vakalomalagi ka tu na kedra inaki vakalou. Ni oti nomu na vulica na Vunau kei na Veiyalayalati 93, na cava beka o vakauqeti kina mo vakayacora mo vukei ira mera tubu cake ena “rarama kei na dina”? (tikina e 36).

Vola na Veika o Vakauqeti Kina

Sureta na Veiwasei

Vola ena papanivolavola ena Vunau kei na Veiyalayalati 93, o Jisu Karisito e sureti keda meda Sureti ira na lewe ni kalasi me ra vakatura na sala eso era rawa ni vakacavara kina na iyatuvosa oya.

Vakavulica na iVunau

Vunau kei na Veiyalayalati 93

Eda sokalou vua na Kalou na Tamada kei na Luvena, o Jisu Karisito.

• Ena nodra vulica na Vunau kei na Veiyalayalati 93, era sa kunea beka kina na lewe ni kalasi e vuqa na dina me baleta na Tamada Vakalomalagi kei Jisu Karisito. Kerei ira na lewe ni kalasi me ra wasea na veika era sa kunea. E rawa talega mo wasea vaka ilawalawa na kalasi ka solia ki na ilawalawa yadua e vica na tikina mera vulica vata. Me qai wasea na ilawalawa yadua ki na kalasi na veika era sa vulica me baleta na “ivakarau mo dou qaravi koya kina ka kilai koya dou sa qarava ” (tikina e 19).

Vunau kei na Veiyalayalati 93:1–39

Eda rawa ni “ciqoma kina na taucoko ni [Kalou], ka me vakalagilagi.”

Eda na ciqoma na rarama ni Kalou ena noda muria na Nona ivakaro ka vuli mai Vua.

• Na Vunau kei na Veiyalayalati 93 e tiko kina e vuqa na dina me baleta na keda ituvaki tawamudu kei na vanua eda rawa ni yacova ni da luvena na Kalou. Eso beka na lewe ni kalasi era sa na kunea eso na dina oqo ena nodra vulica tiko na wase 93 mai vale (raica na ituvatuva ena macawa oqo ena Lako Mai, mo Muri Au—Me Baleta na Tamata Yadua kei na Matavuvale). O ira sa vakakina sa rawa ni ra wasea na veika era sa kunea, ka rawa ni o ni kunea vata vakalasi na dina tale eso. E rawa vakacava ni na vakaimawe na vei dina oqo ki na sala eda veimaliwai kina kei ira na tamata era tu wavoliti keda—se ki vei keda vakaikeda?

• Oqo e dua tale na sala me vulici kina na keda ituvaki tawamudu kei na keda inaki : e rawa ni ra wilika vata na lewe ni kalasi na tikina e 24 ka vola ena vava ni volavola na tolu na ulutaga na keda ituvaki ena gauna oqo, na keda ituvaki ena veigauna sa oti, kei na keda ituvaki ena veigauna sa bera mai. E rawa ni o qai wasea na kalasi ki na tolu na ilawalawa ka kerea na ilawalawa yadua me ra vakasaqara ena Vunau kei na Veiyalayalati 93:6–39, na dina me baleta na gauna oqo, na gauna sa oti, se na gauna mai muri. Mera na qai vola na veika era sa kunea na ilawalawa yadua ena ruku ni ulutaga. Ena veivakauqeti vakacava na dina eso oqo ki na digidigi eda dau vakayacora?

Vunau kei na Veiyalayalati 93:40–50

Eda sa vakaroti me da “vakavulici ira vakavinaka na lewe ni noda matavuvale.”

• Na ivakaro me da “vakavulici ira vinaka na lewe ni noda vale” (tikina 43) e sega ni baleta na tuvai ni kovate, kei na loqi ia e baleta na veivakatavulici—kei na vuli—“na rarama kei na dina” (tikina e 42). De rawa me ra wasea na lewe ni kalasi se ra sa vakamuria tiko vakacava na ivakasala oqo. Na cava eso na bolebole era sotava? Na dina se na ivakavuvuli cava ena Vunau kei na Veiyalayalati 93 e rawa ni veivuke?

• Me tiki ni nomuni veivosakitaka na tikina oqo, me ra wilika na lewe ni kalasi e so na vei wase ni tukutuku nei Peresitedi Henry B. Eyring “Nai Tikotiko e Vakaicili kina na Yalo ni Turaga” (Ensign se Liaona, Me 2019, 22–25) ka wasea eso na raititobu me baleta na dina e tiko ena Vunau kei na Veiyalayalati 93:40–50. (raica na vakatutu e tiko ena “iKuri ni iVurevure”).

iKuri ni iVurevure

“Raica ni ra sa gugumatua ka cakacaka vakaukauwa mai vale.”

E a vakatavulica o Elder David A. Bednar:

“E tiko ena noqu valenivolavola e dua na droini totoka ni dua na loga ni witi. Na droini oqo e dua na ivakasokumuni ni veimataqali iboro yadudua—ke mera a tu vakayadudua tu e na sega ni taleitaki se veivakauqeti sara. E dina, kevaka o tu volekata na laca, na ka ga o na rawa ni raica sa ikoya na umaroka dromodromo, wainikoula kei na masikuvui sega ni veiwekanitaki rawa ka sabalia na kena irairai. Ia, ni o ni toso vakamalua tani mai na laca, sa tekivu me ra veiwaki na vei tiki ni iboro ka basika e dua na loga ni witi totoka. Era cakacaka vata e vuqa na vei barasi ni iboro yadudua, me basika kina e dua na droini totoka ka vakasakiti.

“Na masu vakamatavuvale yadudua, na gauna yadudua ni wili ivolanikalou vakamatavuvale, na lotu vakamatavuvale yadudua era sa barasi ni iboro yadudua ena laca ni yaloda. E sega ni dua vei ira me na veivakauqeti sara se me na daunanumi tu ga. Ia me vaka ga ni ratou mai veicurumaki vinaka yani na iboro dromodromo na koula kei na roka ni qele ka mai buli rawa kina e dua na cakacaka vakasakiti,sa vaka talega kina ni da vakayacora tudei e so na veika lalai e sa rawa ni muataki ki na dua na bula vakayalo levu sara. ‘O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere’(V&V 64:33). Na vakaivakarau sa dua na ivakavuvuli bibi ni da vakadavora na yavu ni dua na cakacaka cecere ena noda dui bula yadua kei na noda gugumatua ka veinanumi ena noda dui vuvale” (“Gugumatua ka dau Kauwai Vakalevu Cake e Vale,” Ensign se Liaona, Nove. 2009, 19 – 20).

Vakatoroicaketaki na Noda Veivakavulici

Vakaraitaka na loloma. “Se cava ga na nomu vakatagedegede ni bula, na nomu lomani ira o vakavulica e rawa ni o vakaraitaka e na nomu vakacaucautaki ira vakaidina, nomu kauwaitaka na nodra bula, vakarogoci ira vakamatua, vakaitavitaki ira ena lesoni, veiqaravi vei ira, se kidavaki ira ena loloma ni ko raici ira” (Veivakavulici ena iVakarau ni iVakabula, 6).