Yookin chirilb’al li K’ajolb’ej xaqxo sa’ xnim uq’ li Dios, xb’aan laj Walter Rane

23–29 agosto

Tzolʼlebʼ ut Sumwank 93

“Teek’ul xkomon lix tz’aqalil ru”

Eb’ li kristiaan nakatzoleb’ a’aneb’ xchaq’al ru musiq’ejil ralal ut rab’in li choxahil na’b’ej yuwa’b’ej, ut nim li k’a’ru naru neke’wulak wi’. Chirix xtzolb’al Tzol’leb’ ut Sumwank 93, k’a’ru nakaweek’a naq tento taab’aanu re xtenq’ankileb’ chi k’iik sa’ “li saqen ut li yaal”? (raqal 36).

Tz’iib’a li nakak’oxla

Xkanab’ankileb’ chi wotzok

Tz’iib’a chiru li pizarron: Sa’ Tzol’leb’ ut Sumwank 93, li Jesukristo kixk’e qab’oqb’al chi … Patz’ reheb’ li komon naq te’xye chan raj ru te’xtz’aqob’resi ru li ch’ol aatin.

Xk’utb’al li tzolʼlebʼ

Tzolʼlebʼ ut Sumwank 93

Naqaloq’oni li Dios Yuwa’b’ej ut li Jesukristo, li Ralal.

• Naq xe’xtzol Tzol’leb’ ut Sumwank 93, eb’ li komon maare xe’xtaw naab’aleb’ li yaal chirix li qaChoxahil Yuwa’ ut li Jesukristo. Kanab’eb’ li komon chixwotzb’al li k’a’ru xe’xtaw. Naru ajwi’ nakak’eheb’ sa’ kok’ ch’uut ut taak’e reheb’ li junjunq chi ch’uut junjunqeb’ li raqal re naq te’xtzol sa’ komonil. Chirix a’an, li junjunq chi ch’uut naru chixwotzb’al li xe’xtzol chirix “chan ru loq’onink, ut… k’a’ru naqaloq’oni” (raqal 19).

Tzol’leb’ ut Sumwank 93:1–39

Naru “naqak’ul xkomon lix tz’aqalil ru [li Dios], ut taanimaaq qaloq’al.”

Naqak’ul lix saqen li Dios a’ yaal chan ru neke’qapaab’ lix taqlahom ut nokotzolok chirix a’an.

• Sa’ Tzol’leb’ ut Sumwank 93 wankeb’ naab’al li yaal chirix li qachoxahilal ut li qajunelikil chaab’ilal jo’ ralal xk’ajol li Dios. Maare junjunqeb’ li komon xe’xtaweb’ li yaal a’an naq xe’xtzol li tasal 93 sa’ kab’l (chi’ilmanq li tusleb’ aatin re li xamaan a’in sa’ Kim, taaqehin—Choq’ reheb’ li komon ut li junkab’al). Li ani xe’xb’aanu a’an naru neke’xwotz li xe’xtaw, ut laa’ex sa’ komonil naru neketaweb’ jalaneb’ chik li yaal. Chan ru naq eb’ li yaal a’an nokohe’xtenq’a chi wank sa’ xyaalal rik’ineb’ li wankeb’ chiqasutam—malaj qik’in ajwi’?

• A’in jun na’leb’ re tzolok chirix li qachoxahilal ut li qajunelikil chaab’ilal: eb’ li komon naru neke’ril ru sa’ komonil li raqal 24 ut te’xtz’iib’a chiru li pizarron oxib’ li na’leb’: Chan ru wanko, Chan ru xoowan, ut Chan ru toowanq. Chirix a’an naru nakak’eheb’ sa’ oxib’ ch’uut ut taapatz’ reheb’ li junjunq chi ch’uut naq te’xsik’eb’ li yaal sa’ Tzol’leb’ ut Sumwank 93:6–39 chirix chan ru wanko, chan ru xoowan, ut chan ru toowanq. Eb’ li komon naru te’xtz’iib’a rub’el a’ yaal b’ar wan reheb’ li oxib’ chi na’leb’ li xe’xtaw. Chan ru naq eb’ li yaal a’an nokohe’xtenq’a sa’ li naqasik’ ru xb’aanunkil?

Tzol’leb’ ut Sumwank 93:40–50

Nokotaqlaak “chixtuqub’ankil ru li qochoch laa’o.”

• Li taqlahom re “xtuqub’ankil ru laa wochoch laa’at” (raqal 43) moko naraj ta naxye xtuqub’ankil xna’aj li sek’ malaj xna’aj li t’ikr, naraj b’an naxye xk’utb’al—ut xtzolb’al—“li saqen ut li yaal” (raqal 42). Eb’ li komon maare naru neke’xye chan ru naq neke’xyal xb’aanunkil a’an. K’a’ru li ch’a’ajkilal neke’xtaw? K’a’ruheb’ li yaal malaj li na’leb’ neke’tawman sa’ Tzol’leb’ ut Sumwank 93 naru neke’tenq’an?

• Sa’ li aatinak chirixeb’ li raqal a’an, eb’ li komon naru neke’ril ru xcha’al li raatin li Awa’b’ej Henry B. Eyring “Jun ochoch b’ar wi’ nawan lix Musiq’ li Qaawa’ ” (Jolomil ch’utub’aj-ib’ abril 2019) ut te’xwotz k’a’ruhaq li na’leb’ wan rilom rik’ineb’ li yaal neke’tawman sa’ Tzol’leb’ ut Sumwank 93:40–50. (Chi’ilmanq ajwi’ li aatin sa’ “Xkomon chik li k’anjeleb’aal.”)

Xkomon chik li k’anjeleb’aal

“Xk’eeb’al reetal naq te’xyal xq’e ut te’tenq’anq sa’ ochoch.”

Li Elder David A. Bednar kixk’ut:

“Sa’ lin oficiin wan jun xchaq’al ru xjalam-uuch li trigo. Li b’on chiru li jalam-uuch chanchan naq yal juch’inb’ileb’—maak’a’ raj neke’xk’ut wi ta jachinb’ileb’ ta raj ru. Naq tatnach’oq chiru li jalam-uuch, taawil naq chanchan yal juch’inb’il rik’in li b’on q’an, lemtz’, ut café li chanchan naq yal maak’a’ aj-e. A’b’anan, naq tatnajto’q chi timil timil chiru li jalam-uuch, chixjunileb’ li juch’ul a’an neke’xch’utub’ rib’, ut sa’ komonil neke’xk’utb’esi jun xchaq’al ru ru taq’a b’ar wi’ wan li trigo. A’aneb’ k’iila juch’ul chanchan naq yal maak’a’eb’ aj-e li neke’xjunaji rib’ re xk’utb’esinkil jun xchaq’al ru jalam-uuch.

“Chixjunjunqal li tijok jo’ junkab’al, chixjunjunqal li hoonal re xtzolb’aleb’ li loq’laj hu jo’ junkab’al, ut chixjunjunqal li q’ojyin re junkab’al yoo chixb’onb’al lix jalam-uuch li qaam. Li junjunq k’anjel xjunes rib’ maare ink’a’ nak’utun chi q’axal chaab’il malaj taajultikamanq. A’b’an jo’ naq li junjunq chi b’onol neke’xjunaji rib’, nak’utman k’a’ruhaq q’axal chaab’il, xb’aanunkil rajlal li kok’ k’anjel taaruuq chixk’eeb’al chi k’utmank li musiq’anb’il b’aanuhom q’axal chaab’il. “Jo’kan ut, mexlub’ sa’ xb’aanunkil li us, xb’aan naq yookex chixk’eeb’al xk’ojob’ankil jun xnimal ru k’anjel. Ut rik’in k’a’ru ka’ch’in na’el chaq li k’a’ru xnimal li ru” (Tzol’leb’ ut Sumwank 64:33). Li yalok q’e a’an jun chaab’il na’leb’ re xk’ojob’ankil xxe’ jun nimla k’anjel sa’ li qayu’am chiqajunjunqal ut re naq taqayal qaq’e ut tootenq’anq sa’ li qochoch” (“Más diligentes y atentos en el hogar,” Liahona, noviembre 2009, 19–20).

Xchaab’ilob’resinkil li qak’utum

K’ut li rahok. “A’ yaal jo’ li wankat wi’, naru nakak’ut li rahok choq’ reheb’ li ani tzolb’ileb’ aab’aan rik’in xwaklesinkileb’ xch’ool rik’in jun chaab’il aatin, xpatz’b’al reheb’ k’a’ru yoo chi k’ulmank sa’ xyu’ameb’, rab’inkil chi us li neke’xye, xk’eeb’aleb’ xhoonal chi aatinak sa’ li tzolok, k’anjelak chiruheb’, malaj yal xk’eeb’al xsahileb’ xch’ool naq nakawileb’ ” (Li k’utuk jo’ li Kolonel, 6).