Valetabu e Katiladi, mai vei Al Rounds

30 ni Okosita–5 ni Sepiteba

Vunau kei na Veiyalayalati 94–97

“Me Baleta na Vakabulai kei Saioni”

Na sala cava beka mo veivakauqeti vakavinaka sara kina vei ira na lewe ni kalasi me ra gadreva me ra ciqoma na veivakalougatataki e yalataki ena Vunau kei na Veiyalayalati 94–97?

Vola na Veika o Vakauqeti Kina

Sureta na Veiwasei

De rawa mera wasea na lewe ni kalasi e dua na ka era kunea ena Vunau kei na Veiyalayalati, 94–97. ka a vakauqeti ira me ra dau lako vakawasoma ki na valetabu. Se e rawa ni ra wasea eso tale na itukutuku ka a vakauqeti ira ena nodra wilika na iwase eso oqo.

Vakavulica na iVunau

Vunau kei na Veiyalayalati 95:8; 97:10–17

Sa dau vakalougatataki ira na nona tamata na Kalou ena valetabu.

• Mo vakayagataka vakacava na dina eso e vakavulici ena Vunau kei na Veiyalayalati 95 kei na97 me vakauqeti ira na lewe ni kalasi me ra vakasaqara vakagumatua na veivakalougatataki ni valetabu? Dua na sala o ya me biu e dua na iyaloyalo ni valetabu ena lomadonu ni papa ni volavola ka kerei ira na lewe ni kalasi mera wasea na nodra nanuma ena vuna e dusimaki ira kina na nona Yalododonu na Turaga me ra tara valetabu. Sa rawa mera vakasaqara na lewe ni kalasi e vica na isau ni taro mai na Vunau kei na Veiyalayalati 95:8; 97:10–17 ka vola na veika era kunea ena vava ni volavola wavokita na iyaloyalo ni valetabu. (E rawa ni ra kunea eso na ikuri ni kena isau ena “Na Cava na Vuna era Tara Valetabu kina na Yalododonu Edaidai,” [temples.ChurchofJesusChrist.org].) Sa mai yaco vakacava na inaki oqo ki na nomu bula? Na sala cava eda rawa ni vakayacora kina me tiki bibi ni noda bula na valetabu?

• E vakarautaka tu na Lotu e vuqa na ivurevure ka vakavulica na veika me baleta na valetabu. Vakasamataka na sala e rawa ni o vakayagataka kina eso vei ira me vakabulabulataka na veivosaki vakalasi me baleta na Vunau kei na Veiyalayalati 95 kei na97 ka vakauqeti ira na lewe ni kalasi mera vakasaqara vakagumatua na veivakalougatataki ni valetabu. Me kena ivakaraitaki, ni se bera na kalasi mo sureti ira e vica na lewe ni kalasi me ra railesuva na ivurevure eso ena temples.ChurchofJesusChrist.org se Temples of The Church o Jesus Christ of Latter Day Saints (digitaki na ilavelave ni Ensign se Liaona, Okot. 2010). Kerei ira na lewe ni kalasi oqo mera vakavakarau mera mai wasea e dua na ka era sa vulica ka tokona na ivakavuvuli ena wase 95 kei97.

  Kevaka o vakavulici ira na itabagone, sa rawa ni o sureti ira me ra wilika na “Making the Temple a Part of Your Life” (ena Temples of The Church of Jesus Christ of Latter-day Saints, 77–78) ka wasea na sala era vakaliuca kina ena nodra bula na valetabu.

  Na video e rua “Two Apostles Lead a Virtual Tour of the Rome Italy Temple” kei na “Temples” (ChurchofJesusChrist.org) ena rawa ni vukei ira era sa vakavakarau tiko me ra lako ki na valetabu.

  E rawa talega mo ni lagata vata e dua na serenilotu me baleta na valetabu ka veivosakitaka na veika e vakavulica (raica na ituvatuva ni ulutaga ena Sere ni Lotu).

Vunau kei na Veiyalayalati 97:8–9

Eda rawa ni ciqomi mai vua na Turaga.

• Na cava eda vulica mai na Vunau kei na Veiyalayalati 97: 8 me baleta na ibalebale ni noda ciqomi mai vua na Turaga? E duatani vakacava oya mai na sala eda dau vakasaqara kina na veiciqomi e vuravura? Na veivakalougatataki cava sa yalataki tu ena tikina e 9 vei ira era sa ciqomi mai vua na Turaga? Sa rawa ni ra railesuva talega na lewe ni kalasi na itukutuku nei Elder Erich W. Kopischke “Ciqomi Tu Mai Vua na Turaga” (Ensign se Liaona, Me 2013,104–6) ka wasea na kena a vukei ira mera kila vakavinaka na veitikina oqo. Na itukutuku e tiko ena “iKuri ni iVurevure” e okati kina na veisureti nei Elder Kopischke meda vakasaqara na nona veiciqomi na Turaga ena noda bula.

Vunau kei na Veiyalayalati 97:18–28

O Saioni “ko ira na yalosavasava.”

• Me ra vukei na lewe ni nomu kalasi me vakasamataka se cava na Saioni, sa rawa ni o vola ena vavaloaloa Na cava na Saioni? ka sureti ira me vaqara na kena isau ena Vunau kei na Veiyalayalati 97:19 kei na 21 (raica talega na Mosese 7:18; Gospel Topics, “Zion,” topics.ChurchofJesusChrist.org). Ena veivuke beka me veivosakitaki na ivakarau e vukei keda kina na iVakabula me da “yalosavasava.” Na cava eda sa vakauqeti kina me da cakava me da tarai Saioni cake ena noda bula? ena noda tabanalevu se tabana? ena noda itikotiko?

  

  Na kena tarai cake na valetabu e Katiladi a vakavuna me vakalevutaki kina na “savasava ni yalodra”na Yalododonu

• A veivakatavulici na Turaga me baleti Saioni ni oti na nona vakaroti ira taumada na Yalododonu me ra tara e dua na valetabu “me baleta na vakabulai kei Saioni” (raica na Vunau kei na Veiyalayalati 97:12,18–28). Na cava e tiki bibi kina ni tarai cake kei Saioi na valetabu? Sa vakataucokotaki vakacava ena noda gauna oqo na yalayala ni Turaga me baleti Saioni ena tikina 18–28 ?

iKuri ni iVurevure

Ciqomi Tu mai Vua na Turaga

Ni vosa tiko me baleta na “iwalewale rawarawa” e vakavuvulitaki ena Vunau kei na Veiyalayalati 97:8, e vakavulica kina o Elder Erich W. Kopischke:

“Na vakasaqarai kei na rawati ni veiciqomi ni Turaga ena vakavurea na kila-ka ni da sa digitaki ka vakalougatataki mai Vua. Ena vakatosoicake taki na noda nuidei ni sa liutaki keda o Koya ka dusimaki keda vakadodonu. Na Nona loloma veivueti ena vakatakilai vakaidina ena vu ni lomada, ena noda bula, kei ira na noda matavuvale.

“Au sureti kemuni mai na vuniyaloqu mo ni vakasaqara na nona veiciqomi na Turaga ka marautaka na Nona veivakalougatataki sa yalataki tu. Ni da vakamuria na iwalewale rawarawa e sa vakotora na Turaga, ena yaco me da kila ni da sa ciqomi mai Vua, se cava ga na ituvaki ni noda bula, noda itutu, se na noda malumalumu vakayago”(“naCiqomi tu mai vua na Turaga,” Ensign se Liaona, Me 2013, 106).

Vakatoroicaketaki na Noda Veivakavulici

Mo na kilai ira o vakavulica tiko. Na tamata vakayadua o vakatavulica e tiko na nodra dui vakaraitaki ni bula talei, na nodra dui rai, kei na nodra dui taledi. Masulaka mo kila se na veivakalougatataki vakacava ki na kalasi raraba na nodra cau na tamata yadua. (Raica na Veivakavulici ena iVakarau ni iVakabula,7.)