C. C. A. Christensen (1831–1912), Era vakatalei tani mai Jackson County Missouri o ira na Yalododonu, c 1878, tempera ena muslin, 77 ¼ × 113 na idi. Brigham Young University Museum of Art, nodra isolisoli na makubui C. C. A. Christensen, 1970

6–12 ni Sepiteba

Vunau kei na Veiyalayalati 98–101

“Dou Tu Vakadua, mo Dou Kila Ni’u sa Kalou.”

Na mataqali bolebole se veivakatovolei vakacava era dau sotava na lewe ni nomu kalasi? Na mataqali vosa ni ivakasala kei na veivakacegui vakacava ena Vunau kei na Veiyalayalati 98–101 e rawa ni vukei ira?

Vola na Veika o Vakauqeti Kina

Sureta na Veiwasei

Sa rawa mo sureti ira na lewe ni kalasi mera wasea na veika era sa vulica mai na Vunau kei na Veiyalayalati 98–101 ka vukei ira e na dua na veivakatovolei se bolebole era sotava.

Vakavulica na iVunau

Vunau kei na Veiyalayalati 98:1–3, 11–16, 23–30, 37; 101:2–5, 9–16

E rawa ni umani vata mai na noda veivakatovolei meda vinaka kina.

• Na veivakacacani kei na veisaqasaqa eda sotava tiko nikua e rawa ni duidui mai na veika era a sotava na Yalododonu mai Misuri ena 1833, ia na ivakasala ni Turaga ena Vunau kei na Veiyalayalati 98 e sa dei tikoga. Me vukei ira na lewe ni kalasi me ra vuli mai na ivakasala oqo, sa rawa mo vola na veitaro oqo ena papa ni volavola: Na cava na nodra rai na Yalododonu me baleta na veisaqasaqa me vaka e vinakata na Turaga? Na ivakarau cava e vinakata na Turaga me da sotava kina na veivakacacani? E rawa ni ra cakacaka vakailawalawa lalai na lewe ni kalasi mera raica na isau ni taro ena Vunau kei na Veiyalayalati 98:1–3, 11–16, 23–30 ka veitalanoataka na veika era sa vulica. Na dina cava soti eda sa kunea e na rawa ni vukei keda me da tisaipeli vinaka cake i Jisu Karisito? Na itukutuku ena “iKuri ni iVurevure” e rawa ni vakuria na veitalanoa oqo.

• Ena gauna ni veivakatovolei se na veivakacacani, na itukutuku oqo mai na wase 98 kei na101 e rawa ni veivuke: ena vukei keda na Turaga kevaka eda sa tu vakarau me da vakararavi Vua. Me vukei ira na lewe ni kalasi me ra kunea na itukutuku oqo, sa rawa mo vola na ituvatuva ni qaqana ena papa ni volavola ka sureti ira na lewe ni kalasi me ra digitaka e vica me ra wilika: Vunau kei na Veiyalayalati 98:1–3, 11–12, 37; 101:2–5, 9–16. Kerei ira mera wasea na veika era kila ni vakayaloqaqataki ira me ra vakararavi vua na Turaga. Na cava era vakavulica na veitikina oqo me baleta na ivakarau ni noda vakararavi kivua na Turaga? (Raica talega na Linda S. Reeves, “Ciqoma na Veivakalougatataki ni Nomu Veiyalayalati,” Ensign se Liaona, Nove. 2013 118-20)

Vunau kei na Veiyalayalati 101:1–8, 43–62

Na vakamuri na ivakasala ni Kalou ena vukea na noda taqomaki.

• Ena rawa vakacava mo vukei ira na lewe ni kalasi mera raica ka kila na veitaqomaki e yaco mai ni da “vakarorogo ki na domo ni Turaga”? (tikina e 7). E rawa ni o sureta e vica na lewe ni kalasi mera vaka matana taka na vosa vakatautauvata oqo ena Vunau kei na Veiyalayalati 101:43–62 ni wilika tiko e cake e dua tale na lewe ni kalasi. Mo qai wasea na veitaro me vakaoqo: Na cava beka e matataka na veitabana eso ni vosa vakaibalebale oqo? Na cava e vakavuna me ra vakalusia na were ni vaini o ira na dauveiqaravi? Na lesoni cava eda vulica mai na nodra ivakarau na tamata dauveiqaravi? Na cava eda vulica me baleta na Turaga mai na nona ivakarau na tamata turaga? E rawa talega ni veivuke me da veidutaitaka na tikina e 1–8 kei na tikina e 47–51 ka veivosakitaka na sala eda rawa ni “yalodina ka vinaka” ena noda sasaga meda tarai Saioni cake ena noda bula yadudua, ena noda veivale, kei na Lotu.

  

  iTukutuku mai na Ko Karisito kei na Cauravou Vutuniyau, mai vei Heinrich Hofmann.

iKuri ni iVurevure

Na vagolei ni baluda kadua e taura na yalodei va-Karisito.

E vakavulica o Elder Robert D. Hales:

“Eso na tamata era dau nanuma cala ni vakarau me vaka na galu, yalomalua, veivosoti, kei na wasei ni ivakadinadina malumalumu e ivakaraitaki ni malumalumu. Ia me ra ‘lomani [o ira na keda] meca, vosavinaka vei ira sa rulaki [keda], caka vinaka vei ira sa cati [keda], ka masulaki ira sa vakalialiai [keda] ka vakacacani [keda]’ (Maciu 5:44) e ka ni vakabauta, kaukauwa, kei na kena e bibi duadua, na yaloqaqa Vakarisito. …

“Ni da sega ni sauma lesu—noda solia na baluda kadua ka vorata rawa na yalo ni cudru—eda sa tu vata talega kina kei na iVakabula. “Eda vakaraitaka yani Nona loloma, sai koya duadua na kaukauwa ka rawa ni valuta na meca ka saumi ira na noda dauveibeitaki ka sega ni beitaki ira lesu. Oqori e sega ni malumalumu Oya na yaloqaqa va-Karisito” (“Na Yaloqaqa Vakarisito: Na iSau ni Bula Vakatisaipeli,” Ensign se Liaona, Nove. 2008, 72).

Na veivosoti e sega ni veivakadonui.

Elder Kevin R. Duncan e kaya: “Kemuni na taciqu kei na ganequ, yalovinaka ni kakua ni nanuma cala. Na veivosoti e sega ni veivakadonui. Eda sega ni tokona na ivakarau ca se vakatara vei ira na tani mera vakalolomataki keda baleta ni ra sotavi dredre, mosi, se malumalumu. Ia e rawa ni da rawata na kilaka kei na vakacegu e levu cake ni da raica vakarabailevu. … Na veivosoti e dua na ivakavuvuli lagilagi ka veivakabulai. E sega ni gadrevi me da coko ena leqa vakarua. Eda na rawa ni veivosoti” (“Na iLumu Veivakabulai ni Veivosoti,” Ensign se Liaona, Me 2016, 35).

Vakatoroicaketaki na Noda Veivakavulici

Okati ira era bula dredre tiko. Ena so na gauna era na gadreva tu e so na lewe ni kalasi ka ra sotava tiko na dredre mera vakaitavitaki me rawa ni ra vakila ni ra lomani talega. Nanuma mo kerei ira me ra ciqoma e dua na ilesilesi ena lesoni ka tarava, sureti ira mai ki na kalasi, se me na tiko e dua na sala me ra lako mai kina ki Lotu. Kakua ni guce kevaka era sega ni kauwai taumada mai ki na nomu sasaga. (raica na Veivakavulici ena ivakarau ni iVakabula, 8–9).