C. C. A. Christensen (1831–1912), Keba kei Saioni, c. 1878, tempera ena muslin, 78 × 114 na idi. Brigham Young University Museum of Art, nodra isolisoli na makubui C. C. A. Christensen, 1970

13–19 ni Sepiteba

Vunau kei na Veiyalayalati 102–105

“Ni Oti na Veika Rarawa … Sa Lako Mai na Veivakalougatataki”

Ena nomu vakavakarau mo vakavulica na Vunau kei na Veiyalayalati 102–5, vakarorogo ki na veivakauqeti ni Yalotabu. O koya e rawa ni na liutaki iko ki na ivakavuvuli e sega ni cavuti ena idusidusi oqo, ka na vakalougatataki ira na tamata o vakavulica tiko.

Vola na Veika o Vakauqeti Kina

Sureta na Veiwasei

Me ra vola na lewe ni kalasi e dua na tikina se rua mai na Vunau kei na Veiyalayalati 102–5 era raica ni vakaibalebale vei ira yadua. Oti mera veisoli tikini ni vunau oya vata kei na dua tale na lewe ni kalasi ka veitalanoataka vata na veika era sa vulica mai na veitikina oqo.

Vakavulica na iVunau

Vunau kei na Veiyalayalati 103; 105

Na noda vakatovolei e vakavulica vei keda eso na lesoni yaga sara ka da tubu talega kina.

• Me vaka ni ra vulica na lewe ni kalasi na wase 103 kei na105 ena macawa oqo, e rairai ni ra sa na kunea beka e so na ivakavuvuli ka rawa ni na vukei keda ena gauna eda sotava kina na veivakatovolei kei na veisaqasaqa; me ra wasea na veika era sa kunea. Se e rawa ni o sureti ira me ra vakasaqara na ivakavuvuli e tiko ena Vunau kei na Veiyalayalati 103:5–7, 12, 36; 105:5–6, 9–12, 18–19 (raica talega na “Ikuri ni iVurevure”). Na cava era sa vakatura na ivakavuvuli oqo me baleta na ka meda vakayacora ena gauna eda sotava kina na dredre, se rarawa? De na rawa beka ni ra wasea na lewe ni kalasi na veika era a sotava ena kena a yaco mai na veivakalougatataki ni sa “oti na veivakararawataki,” (Vunau kei na Veiyalayalati na 103:12).

• Kevaka o vakila ni so na itukutuku makawa se na itukutuku me baleta na keba kei Saioni ena yaga sara vakalevu, sa rawa ni o sureta e dua me railesuva e dua vei ira na ivurevure eso oqo ni bera na kalasi ka wasea vakalekaleka na veika era sa vulica: Yalododonu, 1:194–206; “The Acceptable Offering of Zion’s Camp” (Revelations in Context 213–18); se “Domo ni Veivakalesui mai: Keba kei Saioni” (ena ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale). Kevaka e rawa ni da lesuva tale na gauna ka vosa vei ira na keba o Saioni, na cava beka eda na kaya mo vakayaloqaqataki ira kina? Na cava beka era na kaya mai me vakayaloqaqataki keda?

  

  E a tiko na keba kei Saioni ena bati ni Uciwai Lalai ni Siwa, ka taba toka oqo.

Vunau kei na Veiyalayalati 104:11–18

Oi keda yadua sa “ivakatawa ni veivakalougatataki vakavuravura.”

• Me vukea na lewe ni kalasi mera vakaitaukeitaka na ivakavuvuli ena Vunau kei na Veiyalayalati 104:11–18, o rawa ni sureti ira me ra raitayaloyalotaka ni ra sa solia e dua na iyau talei vua e dua me maroroya. Na cava era na kaya vua na nodra itokani? Na cava era na namaka mai vua? Me ra qai wilika na lewe ni kalasi na Vunau kei na Veiyalayalati 104:11–18 me kilai kina na veika e sa solia ena vakanuinui na Turaga vei keda kei na veika sa namaka tu o Koya mai vei keda. Ena tarai keda vakacava na veitikina oqo me baleta na noda nanuma me baleta na vuravura, na noda veivakalougatataki, se na tamata era wavoliti keda?

• Me vukei ira na lewe ni kalasi me ra kila vakavinaka cake “na sala … [sa] lewa na Turaga me veivakarautaka kina vei ira na [Nona] Yalododonu ”(Vunau kei na Veiyalayalati 104:16), sa rawa mo wasea na vidio “The Labor of His Hands” (ChurchofJesusChrist.org). Yavutaki mai na veika eda sa vulica mai na vidio oqo kei na Vunau kei na Veiyalayalati 104:11–18, na sala cava e vakayagataka na Turaga me veiqaravi kina vei ira na nona Yalododonu? Sa rawa talega mo wasea na itukutuku oqo mai vei Peresitedi Marion G. Romney: “Na Turaga … e rawa me taqomaki ira [na dravudravua] ka sega ni da veivuke kina kevaka e nona inaki me vakakina. … Ia e gadrevi meda sotava na veivaka vakaoqo; ni sai koya duadua ga oqo eda na vulica kina meda veikauwaitaki vakaikeda, meda susuga kina e lomada na loloma va-Karisito kei na gagadre me rawa kina vei keda me da lesu tale ki na nona iserau” (“Living Welfare Principles,” Ensign, Nove. 1981, 92). Solia vei ira na lewe ni kalasi e vica na miniti me ra vola kina na nodra nanuma me baleta na sala e rawa ni ra vukei kina me ra veiqaravi vei ira na tani ena nona sala na Turaga.

iKuri ni iVurevure

Na kaukauwa veivakasavasavataki ni veivakatovolei.

E vola kina vakaoqo o Elder Orson F. Whitney: “E sega ni maumau na mosi eda vakararawataki kina, se veivakatovolei eda sotava. E vakavulici keda, me vakatorocake taki kina na keda ituvaki me vaka na vosota, vakabauta, yaloqaqa, kei na yalomalumalumu. Na veika kece eda sotava ena rarawa kei na veika kece eda vosota, vakabibi na noda taura ena vosota, e tarai cake kina na noda itovo, vakasavasavataka na lomada, ena vakalevutaka na yaloda, ka vakavuna meda yalo malumalumu ka dauloloma, ka kilikili meda vakatokai meda luve ni Kalou … ka sa ikoya na rarawa kei na veivakararawataki, oca kei na dredre, eda vulica kina ni da lako mai ki ke me da rawata na ka ka na vakavuna meda vakataka na Tamada kei na Tinada mai lomalagi” (ena Spencer W. Kimball, Faith Precedes the Miracle [1972], 98).

E kaya o Elder David A. Bednar: “Ena so na gauna ena noda bula yadua, eda na sureti meda tayabe tu ena noda dui Keba kei Saioni. Ena duidui na gauna ni veisureti, kei na mataqali veivakataotaki eda na rawa ni sotava ena ilakolako oqo ena duidui. Ia na noda lomasoli tikoga ka tudei tiko ki na kaci tawa levei rawa oqo ena kena i tinitini ga ni na vakarautaki kina vei keda na isau ni taro oqo ‘Ko cei e to vata kei na Turaga?’” (“On the Lord’s Side: Lessons from Zion’s Camp,” Ensign, Jiul 2017, 35).

Vakatoroicaketaki na Noda Veivakavulici

Cakacaka vata kei na lewe ni matavuvale. “Baleta ni sa usutu na itikotiko ena kena bulataki ka vulici na kosipeli, na nomu sasaga mo vakaqaqacotaka e dua na lewe ni kalasi ena mana sara ni ko cakacaka vata kei na [nona] … lewe ni matavuvale eso” (Veivakavulici ena iVakarau ni iVakabula, 8–9).