20–26 ni Sepiteba

Vunau kei na Veiyalayalati 106–108

“Me sa Tadolavi ko Lomalagi”

Ni o vulica na Vunau kei na Veiyalayalati, 106–8, vakasamataka mada na veika vakayalo era na lako curuma tiko na lewe ni nomu kalasi ni ra vulica tiko na iwase oqo. Ni o vakavakarau mo vakavulici ira, e rawa ni veivuke mo vaqaqa na cava era vakila ni vakaibalebale vei ira ni se bera ni o ni qai sota vata.

Vola na Veika o Vakauqeti Kina

Sureta na Veiwasei

Sureti ira na lewe ni kalasi me ra wasea e dua na tikina mai na vei iwase oqo e vakavulica e dua na ivakavuvuli ka rawa ni vakaqaqacotaka e dua ena nodra veiqaravi vaka-Lotu.

Vakavulica na iVunau

Vunau kei na Veiyalayalati 106;180

Na Turaga a veivakasalataki, veivakayaloqaqataki, ka tokoni ira era sa kacivi me ra veiqaravi.

• Ni ra vulica na lewe ni kalasi na Vunau kei na Veiyalayalati 106 kei na108 ena macawa oqo, e rairai era sa na kunea na veimalanivosa e rawa ni vukei ira era veiqaravi tiko ena veikacivi ni Lotu (raica na ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Vakasamataka mo solia vei ira na lewe ni kalasi na gauna mera vola e na vava ni volavola na veimalanivosa era kunea ena veiwase oqo ka kerei ira me ra wasea na nodra vakasama. Na veika cava soti era sotava ena nodra bula ka na semati se vakaraitaka na veimalanivosa oqo?

Vunau kei na Veiyalayalati 107

Sa liutaka na Turaga na Nona Lotu ena kaukauwa ni matabete.

• E rawa mo tekivuna e dua na veivosaki me baleta na itutu ni matabete ena nomu sureti ira na kalasi mera tuva e dua na ituvatuva ni inaki ni Turaga ena nona solia mai vei keda na parofita, iapositolo kei na iliuliu tale eso ni Lotu. E na rairai vinaka me ra vakuria na lewe ni kalasi na nodra ituvatuva ni oti na wiliki ni Vunau kei na Veiyalayalati 107:18–20. Oti mo qai railesuva na itavi e solia na Turaga vei ira era taura tu na itutu oqo: na Mataveiliutaki Taumada (tikina e 9, 21–22, 65–66, 91–92), iApositolo Le Tinikarua (tikina 23–24, 33–35, 38, 58), Vitusagavulu (tikina e 25–26, 34, 93–97), kei na bisopi (tikina e 13–17, 68–76, 87–88). Na cava e rawa ni da vakayacora meda tutaki ira kina na noda iliuliu ena noda “yalodei, vakabauta, kei na masumasu”? (tikina e 22).

• Eda na sauma vakacava kevaka e dua na itokani sega ni lewenilotu e taroga vei keda, “Na cava na matabete?” se “Na cava soti na idola ni matabete?” Ena tara vakacava na noda isau ni taro na ivakavuvuli e tiko ena “Ikuri ni iVurevure”? Ena rawa talega vei ira na lewe ni kalasi mera raica eso na rai titobu ena Vunau kei na Veiyalayalati 107:1–4, 18–20 (raica talega Tudei ena Vakabauta, 124–28). Ena vukei keda vakacava na matabete meda ciqoma “na veika vuni ni matanitu” kei “na lomalagi me tadola vei [keda]” ? E vukei keda vakacava me “marautaki na noda veimaliwai ka tiko ena iserau ni Kalou ko Tamada, kei Jisu”? (tikina e 19).

Vunau kei na Veiyalayalati 107:27–31, 85

Sa liutaka na Turaga na Nona matanitu ena veimatabose.

• E kaya o Peresitedi M. Russell Ballard, “Au kila ni matabose sa nona sala na Turaga ka sa bulia na ka kecega ena vuravura taucoko ena dua na matabose mai lomalagi” (“Matabose ni Matavuvale,” Ensign se Liaona, Me 2016, 63). E rawa vakacava mo vukei ira na nomu lewenikalasi mera kila na sala mera dau veitalanoa kaya ka veirogoci kina e vale kei na Lotu? Rawa ni o taroga e vica na lewe ni kalasi mera vakavakarau mai mera wasea na veika era sotava e valenilotu se e vale ena nodra bulataka na ivakavuvuli ni veivakasalataki ena Vunau kei na Veiyalayalati 107:27–31, 85 (se tukuni tiko e cake ena itukutuku nei Peresitedi Ballard). Vakasamataka mo sureta na lewe ni kalasi me ra vakavakarau mai ena loma ni macawa me ra mai wasea na veivakasama me baleta na cava e rawa-ka kina edua na matabose. Vakayaloqaqataki ira na lewe ni kalasi me ra taura na ivakavuvuli era sa vulica mai na veivosaki oqo me vukei ira mera gugumatua cake ena nodra vakaitavi ena matabose ni veisiga ni mataka ena vuvale kei na Lotu.

  

  Na veitalanoa ni soqoni vata e dua na sala e vakayacora kina na Turaga na nona cakacaka.

iKuri ni iVurevure

Lewa ni matabete

E vakavulica o Elder Dallin H. Oaks:

“E dau sega ni kena ivakarau meda tukuna na soli ni lewa ni matabete vei ira na marama ni ra kacivi ena Lotu, ia na lewa cava ga o ya? Ni dua na marama—gone se qase—sa tabaki me vunautaka na kosipeli vaka daukaulotu tudei, sa soli vua na lewa ni matabete me vakayacora kina e dua na cakacaka ni matabete. E dina talega oqo ni tabaki e dua na marama me cakacaka ena dua na itutu se me qasenivuli ena dua na isoqosoqo ni Lotu ena veidusimaki nei dua e tu vua na idola ni matabete. Se o cei ga e cakacaka ena dua na itutu se veikacivi mai vua e dua e taura tu na idola ni matabete, e sa vakayagataka tiko na nona ilesilesi ena lewa ni matabete” (“Na iDdola kei na Lewa ni Matabete,” Ensign se Liaona, Me 2014, 51).

E kaya o Peresitedi M.Russell Ballard:

“Na Tamada Vakalomalagi e dau lomasoli ena vuku ni Nona kaukauwa. Eda rawa ni ciqoma taucoko na tagane kei na yalewa na kaukauwa oqo me veivuke ki na noda bula vakai keda. O ira kece era sa vakayacora na veiyalayalati tabu kei na Turaga ka ra rokova na veiyalayalati oqori sa rawa ni ra ciqoma na ivakatakila yadua, mera vakalougatataki ena veiqaravi ni agilosi, mera veitalanoa kei na Kalou, mera rawata na taucoko ni kosipeli, ka me kena ilutua, mera vakaivotavota vata kei Jisu Karisito ena veika kecega e nona na Tamada” (“Men and Women in the Work of the Lord,” New Era, Apr. 2014, 4-5).

Vakatoroicaketaki na Noda Veivakavulici

Vukei ira na vuli voli mera veilaveti vakai ira. “O ira yadua ena nomu kalasi era ivurevure bulabula ni ivakadinadina, raititobu, kei na veika sotavi ena bulataki ni kosipeli. Sureti ira mera veiwasei ka veilaveti cake vakai ira” (Veivakavulici ena iVakarau ni iVakabula,5).