NaValetabu e Kirtland, mai vei Jon McNaughton

27 ni Sepiteba–3 ni Okotova.

Vunau kei na Veiyalayalati 109–110

“Ni sa Nomuni Vale, na Nomuni Vanua Tabu”

Nai ka109 ni iwase kei na110 e vakamacalataka eso na veika bibi duadua ni Veivakalesui mai. Mo vakadeitaki mera wasea na lewe ni kalasi na veika era nanuma ka vakila ni ra vulica na veika a yaco oqo.

Vola na Veika o Vakauqeti Kina

Sureta na Veiwasei

E kaya na Turaga ni “na irogorogo ni vale oqo [na valetabu e Kirtland] ena robota yani na veivanua tani” (Vunau kei na veiyalayalati na 110:10). O na sureti ira na kalasi mera wasea na veika era sa kunea ena nodra vuli ka ra vakila ni dodonu me wasei yani vei ira na tamata e vuravura raraba.

Vakavulica na iVunau

Vunau kei na Veiyalayalati 109; 110:1–10

E vinakata na Turaga me vakalougatataki keda ena Nona vale tabu.

• Na vulici ni 109 ni iwase e dua na madigi vinaka me vukei ira na lewe ni kalasi mera vaqaqacotaka kina na nodra gagadre me ra sokalou ena valetabu. E rawa mo vola ena vava ni volavola na tikina eso e vakamacalataka na veivakalougatataki ni valetabu—me vaka na tikina e 12–13, 22–23, 24–28, 29–32. Era rawa ni digitaka na lewe ni kalasi e dua na tikina me ra wilika ka vakasamataka vakatitobu, yadudua se vakailawalawa, ka wasea vakatikina vei ira na kalasi na veivakalougatataki a vakamacalataka na veitikina oqori. Sa rawa ni ra wasea na lewenilotu era sa lesu mai na valetabu na nodra sotava na veivakalougatataki oqo ena nodra bula.

  E rawa talega mo wilika se lagata vata na “Na Yalo ni Kalou” (Sere ni Lotu, naba 2), ka a lagati ena vakatabui ni valetabu e Kirtland. E rawa mera dusimaka na lewe ni kalasi na veivakalougatataki ni valetabu e vakamacalataki ena sere ka wasea na veika era sa sotava, ka salavata.

• Na ciqomi ni veivakalougatataki ni valetabu ena dau gadrevi kina na solibula. Na cava e vakavulica na Vunau kei na Veiyalayalati 109:5 me baleta na solibula era cakava na Yalododonu taumada me ra tara kina na valetabu e Kirtland ? De vinaka me vakavakarau mai edua me vakamacalataka na solibula eso oqo (raica na “A House for Our God,” Revelations in Context, 169–71). Na solibula cava soti eda cakava meda na ciqoma kina na veivakalougatataki ni valetabu nikua? Sa rawa talega ki na kalasi mera wasea na veika era sotava. Eso nai vakaraitaki ni gauna oqo e rawa ni saravi ena vidio “Sealed Together: The Manaus Temple Caravan” and “Temples Are a Beacon” (ChurchofJesusChrist.org).

• Na vulici ni ivakamacala me baleta na iVakabula ka sa vakaturi cake tale ena Vunau kei na Veiyalayalati 110:1–10 e sa dua na sala cecere me tara cake na noda vakabauti Jisu Karisito. E na rairai vinaka mo na taroga na lewe ni kalasi me ra raica na ivakatakilakila e tiko ena veitikina oqo ka vakasamataka na cava e vakavulica vei keda na ivakatakarakara oqo baleti Jisu Karisito. Na cava beka e matataka na “sa ceuti tu ena koula dina” ? se na domo “me vaka na rorogo ni wai levu”?

  

  Ena mua ruarua ni valetabu e Kirtland e tiko kina na tavata ka nodra na veiliutaki ni matabete.

Vunau kei na Veiyalayalati 110:11–16

Na idola ni matabete ka gadrevi me vakayacori kina na cakacaka ni Kalou sa tiko ena Lotu nikua.

• Me vukei ira na lewe ni kalasi me ra kila deivaki na idola ni matabete eratou a solia ko Mosese, Ilaisa, kei Ilaija vei Joseph Smith kei Oliver Cowdery ena valetabu e Kirtland, e rawa mo sureti ira mera wilika ka veivosakitaka yadudua se vakailawalawa.na itukutuku ena “Ikuri ni iVurevure,” Na cava era bibi kina na vei idola oqo ki na noda bula? E rawa talega ni o kerei ira yadua na lewe ni kalasi mera digitaka e dua na parofita, ka ratou a solia na idola —ko Mosese, Ilaisa, kei Ilaija— ka vulica na veika baleti koya mai Bible Dictionary se iDusidusi ki na ivolanikalou. Na cava e vakavulica vei keda na nodra bula na parofita oqo me baleta na idola era a solia? Oqo ena muataki ki na dua na veivosaki me baleta na veika e namaka na Turaga meda vakayacora nikua ni sa tiko e vuravura na vei idola oqo.

iKuri ni iVurevure

Na idola e vakarautaka na kaukauwa kei na lewa me baleta na cakacaka ni Kalou.

E vakavulica o Elder Quentin L. Cook:

Na vanua e tiko kina kei na kena levu ni Valetabu e Kirtland, a sega soti ni kilai. Ia me baleta na kena yaga ki na kawatamata, sa veivakarautaki tawamudu dina. Era sa vakalesuya na parofita ni gauna makawa na idola ni matabete me baleta na cakacaka vakalotu tawamudu ni veivakabulai ni kosipeli i Jisu Karisito. Sa yaco kina me ra vakasinaiti ena reki na lewenilotu yalodina.

Era sa vakarautaka na idola oqo ‘na kaukauwa mai lomalagi’ [Vunau kei na Veiyalayalati 38:38] ena vuku ni ilesilesi vakalou ka yavutaki tiko kina na i naki taumada ni Lotu. Ena Siga ni Mate totoka o ya ena Valetabu e Kirtland, a vakalesui mai kina e tolu na idola.

“Nai Matai, a rairai mai o Mosese ka mai solia na idola ni nodra vakasokumuni na Isireli mai na yasai vuravura e va, o ya na cakacaka ni kaulotu.

“Nai Karua, a rairai mai o Ilaisa ka mai solia na idola ni itabagauna ni kosipeli i Eparama, sa oka kina na vakalesui mai ni veiyalayalati vaka-Eparama [raica na Eparama 2:8–11]. E vakavulica kina o Peresitedi Russell M. Nelson ni inaki ni idola ni veiyalayalati sai koya me ra vakarautaki ira kina na lewe ni lotu ki na matanitu ni Kalou [raica na “Veiyalayalati,” Ensign se Liaona, Nove. 2011, 88.]. …

“Nai Katolu, a rairai mai o Ilaija ka mai solia na idola ni kaukauwa ni veivauci ni itabagauna oqo, o ya na cakacaka ni tuva kawa kei na cakacaka vakalotu veisosomitaki ni valetabu ni nodra vakabulai na bula kei ira na mate” (“Vakarau mo Sotava na Kalou,” Ensign se Liaona Me 2018, 114–15).

Vakatoroicaketaki Noda Veivakavulici

Sureta na Yalotabu ki na Nomu Veivakavulici. “Na inaki cecere ni ka kece e cakava e dua na qasenivuli ni kosipeli—na taro kece, na ivolanikalou kece, na itaviqaravi kece—o ya mena sureta na Yalotabu me tarai cake na vakabauta ka sureta na tamata kece mera gole mai vua na Karisito. Na sere ivakatagi vakalou, na ivolanikalou, nodra vosa na parofita edaidai, na vakaraitaki ni loloma kei na ivakadinadina, kei na veigauna ni vakanananu vakatitobu sa rawa kece me sureta mai na Yalotabu. ” (Veivakavulici ena iVakarau ni iVakabula,10).