Li santil ochoch re Kirtland, xb’aan laj Jon McNaughton

27 septiembre–3 octubre

Tzolʼlebʼ ut Sumwank 109–110

“A’an laa wochoch, xna’aj laa santilal”

Eb’ li tasal 109 ut 110 neke’xch’olob’ junjunqeb’ li loq’laj na’leb’ ke’k’ulman sa’ lix k’ojob’ankil wi’chik li evangelio. K’e reetal naq taakanab’eb’ li komon chixwotzb’al li xe’xk’oxla ut xe’reek’a naq xe’xtzoleb’ li na’leb’ a’an.

Tz’iib’a li nakak’oxla

Xkanab’ankileb’ chi wotzok

Li Qaawa’ kixye naq “taawulaq resil lix na’nookil ru li ochoch a’in [li santil ochoch re Kirtland] toj sa’ jalanil ch’och’ ” (Tzol’leb’ ut Sumwank 110:10). Naru nakakanab’eb’ li komon chixyeeb’al k’a’ruhaq xe’xtaw naq xe’tzolok li neke’xk’oxla naq tento taapuktesimanq reheb’ li kristiaan sa’ chixjunil li ruchich’och’.

Xk’utb’al li tzolʼlebʼ

Tzol’leb’ ut Sumwank 109; 110:1–10

Li Qaawa’ naraj qosob’tesinkil sa’ lix santil ochoch.

• Xtzolb’al li tasal 109 a’an jun xchaq’al ru hoonal re xtenq’ankileb’ li komon chixkawob’resinkil li rajomeb’ chi loq’onink sa’ li santil ochoch. Naru nakatz’iib’aheb’ chiru li pizarron li rajlileb’ junjunq li raqal li neke’aatinak chirixeb’ li rosob’tesihom li santil ochoch, jo’eb’ li raqal 12–13, 22–23, 24–28, 29–32. Eb’ li komon naru neke’xsik’ ru junjunq raqal re te’ril ru ut te’xtz’ileb’ rix, sa’ junjunqal malaj sa’ ch’uut, ut chirix a’an te’xye chi k’osb’il ru li osob’tesihom neke’xch’olob’ li raqal a’an. Eb’ li komon ak okenaqeb’ sa’ li santil ochoch naru neke’aatinak chirix chan ru naq ak xe’xk’ul sa’ xyu’am li osob’tesihom a’an.

  Naru ajwi’ nekeril ru malaj nekeb’icha sa’ komonil “Lix Musiq’ li Dios” (Eb’ li B’ich, 2), li kib’ichaman sa’ li rosob’tesinkil li santil ochoch re Kirtland. Eb’ li komon naru te’xye k’a’ru li rosob’tesihom li santil ochoch neke’yeeman sa’ li b’ich ut te’xwotz junaq xnumsihomeb’ rik’in li osob’tesink a’an, wi naru.

• Chi kok’ aj xsa’, xk’ulb’aleb’ li rosob’tesihom li santil ochoch naraj ru li mayejak. K’a’ru nak’utman sa’ Tzol’leb’ ut Sumwank 109:5 chirixeb’ li mayej ke’xb’aanu laj santil paab’anel najter re xkab’lankil li santil ochoch re Kirtland? Maare ani naru nawulak chi kawresinb’il re taa’aatinaq chirixeb’ li mayej a’an (chi’ilmanq “Una Casa a nuestro Dios,” Revelaciones en Contexto 176–185). K’a’ruheb’ li mayej naqak’e laa’o re xk’ulb’aleb’ li rosob’tesihom li santil ochoch sa’eb’ li kutan a’in? Eb’ li komon maare te’raj raj xwotzb’al xnumsihomeb’. Junjunqeb’ li eetalil reheb’ li kutan a’in neke’tawman sa’eb’ li video “Sellados en el templo: La caravana desde Manaos al templo” ut “Los templos son un faro” (ChurchofJesusChrist.org).

• Xtzolb’al resil lix k’utunik li Kolonel li waklijenaq chi yo’yo, li natawman sa’ Tzol’leb’ ut Sumwank 110:1–10, a’an jun chaab’il hoonal re xkawob’resinkil li qapaab’aal chirix li Jesukristo. Naru nakapatz’ reheb’ li komon naq te’xk’e reetaleb’ li jaljookil ru aatin ut eb’ li eetalil wankeb’ sa’eb’ li raqal a’an, ut te’xk’e reetal k’a’ru neke’xk’ut chiqu chirix li Jesukristo. K’a’ raj ru naru nareetali li “tz’akanb’il rik’in tz’aqal oor”? malaj li “chanchan xyaab’ li k’iila ha’ neke’jub’ub’nak”?

  

  Li junjunq xka’pak’alil li santil ochoch re Kirtland wankeb’ xna’ajeb’ laj jolominel sa’ li tijonelil.

Tzol’leb’ ut Sumwank 110:11–16

Lix laawil li tijonelil, li neke’ajman ru re xb’aanunkil lix k’anjel li Dios, wankeb’ anajwan sa’ li Iglees.

• Re xtenq’ankileb’ li komon chixtawb’aleb’ ru lix laawil li tijonelil ke’xq’axtesi laj Moises, laj Eliyah, ut laj Elias re laj Jose Smith ut laj Oliver Cowdery sa’ li santil ochoch re Kirtland, naru nakakanab’eb’ chirilb’al ru ut aatinak chirix li ch’ol aatin natawman sa’ “Xkomon chik li k’anjeleb’aal,” sa’ junjunqal malaj sa’ ch’uut. K’a’ut naq aajeleb’ ru li laaw a’an sa’ li qayu’am anajwan? Naru ajwi’ nakapatz’ reheb’ li junjunq chi komon naq te’xsik’ ru junaq reheb’ li profeet ke’k’ehok re li laaw a’an— laj Moises, laj Eliyah, ut laj Elias—ut te’tzoloq chirix a’an sa’ li K’utul Raqal reheb’ li Loq’laj Hu. K’a’ru neke’xk’ut chiqu lix yu’ameb’ li profeet a’an chirixeb’ li laaw ke’xq’axtesi? Li na’leb’ a’in naru nak’amok sa’ jun aatinak chirix li k’a’ru naroyb’eni li Qaawa’ naq taqab’aanu anajwan naq eb’ li laaw a’an wankeb’ arin sa’ li ruchich’och’.

Xkomon chik li k’anjeleb’aal

Eb’ li laaw neke’xk’e li wankilal re xb’aanunkil lix k’anjel li Dios.

Li Elder Quentin L. Cook kixye:

“Wi naqak’oxla rix lix na’aj ut lix nimal, li santil ochoch re Kirtland moko nim ta ru. A’b’an li k’a’ru naraj naxye choq’ reheb’ li winqilal, lix toch’om nawan chi junelik. Eb’ li najteril profeet ke’xk’ojob’eb’ wi’chik lix laawil li tijonelil choq’ re li junelikil k’ojob’anb’il k’anjel re li kolb’a-ib’ sa’ lix evangelio li Jeskristo. A’in kixk’am chaq jun xnimal sahil ch’oolej choq’ reheb’ li komon tiikeb’ xch’ool.

Eb’ li laaw a’in neke’xk’e li “wankilal chalen chaq taqe’q” [Tzol’leb’ ut Sumwank 38:38] reheb’ li choxahil teneb’ahom li wankeb’ choq’ tz’aqal rajom li Iglees. Sa’ lix chaq’al ru kutan a’an re Paswa ke’k’ojob’aman wi’chik oxib’ li laaw sa’ li santil ochoch re Kirtland:

“Xb’een, laj Moises kixk’utb’esi rib’ ut kixq’axtesiheb’ li laaw re xch’utub’ankileb’ wi’chik laj Israel sa’ xkaajachalil chaq li ruchich’och’, a’an li k’anjel re jultikank aatin.

“Xkab’, laj Eliyah kixk’utb’esi rib’ ut kixq’axtesiheb’ li laaw re lix k’oxlajik li evangelio re laj Abraham, li naxk’am ajwi’ chaq lix k’oxlajik wi’chik li sumwank re laj Abraham. [chi’ilmanq Abraham 2:8–11]. Li Awa’b’ej Russell M. Nelson kixk’ut naq li rajomeb’ li laaw re li sumwank a’an xkawresinkileb’ li komon choq’ re li rawa’b’ejihom li Dios [chi’ilmanq “Convenios,” Liahona, noviembre 2011, 88]. …

“Rox, laj Elias kixk’utb’esi rib’ ut kixq’axtesiheb’ li laaw re li wankilal re li tz’apok sa’ junajil sa’ li k’ojlajik a’in, a’an li k’anjel re li resilal li junkab’al ut eb’ li k’ojob’anb’il k’anjel re li santil ochoch, li naxk’e lix kolb’aleb’ li yo’yo ut eb’ li kamenaq” (“Kawresi aawib’ chixk’ulb’al li Dios,” Jolomil ch’utub’aj-ib’ re mayo 2018).

Xchaab’ilob’resinkil li qak’utum

K’e xb’oqb’al li Musiq’ej naq nakatk’utuk. “Li taqenaqil rajb’al chixjunil naxb’aanu jun aj k’utunel re li evangelio—rajlal patz’om, rajlal raqal sa’eb’ li loq’laj hu, rajlal k’anjel—a’an re xb’oqb’al li Musiq’ej re nimob’resink paab’aal ut re xb’oqb’aleb’ chixjunil chi chalk rik’in li Kristo. … Li loq’laj b’ich, eb’ li loq’laj hu, li raatineb’ li profeet sa’ roso’jikeb’ li kutan, xyeeb’al resil aarahom ut lix nawom aach’ool, ut xhoonalil li k’oxlak sa’ ch’anch’ookilal naru te’xb’oq lix wanjik li Musiq’ej” (Li k’utuk jo’ li Kolonel, 10).