4–10 ni Okotova

Vunau kei na Veiyalayalati 111–114

“Au na Solia Taucoko na Veika me Baleta na Nomu Vinaka”

Ni o wilika na Vunau kei na Veiyalayalati 111–14, vakasamataka na veika dina vakayalo ka vinakata na Turaga mera kila na nomu lewe ni kalasi. Na Yalo Tabu ena vukei iko mo kila se ivakavuvuli cava mo vakanamata kina.

Vola na Veika o Vakauqeti Kina

Sureta na Veiwasei

Vakasamataka mo droinitaka e dua na kato ni iyau vakamareqeti ena vava ni volavola. Me ra vola na lewe ni kalasi ena vavaloaloa na vei tikina mai na wase 111 – 14 era raica kina e dua na ka era nanuma ni “iyau vakamareqeti” (Vunau kei na Veiyalayalati 111:2). Kerei ira na lewe vica me ra wasea na veika era sa kunea ena veitikina oqori.

Vakavulica na iVunau

Vunau kei na Veiyalayalati 111

Na Turaga e rawa “ni tuvanaka na ka kece [meda] vinaka kina.”

• Na ivakasala ni Turaga ena Vunau kei na Veiyalayalati 111 e rawa ni vukei ira na lewe ni nomu kalasi ena gauna era dau leqataka kina na veika vakayago se vakayalo, me vaka ga na kena a vukei Josefa Simici kei na nona kauwai me baleti Saioni. E rawa mo tekivuna e dua na veitalanoa ena iwase oqo ena nodra sureti na lewe ni kalasi me ra tuva ena vavaloaloa na veika era leqataka se na veika era leqataka o ira na tamata era kila. Ni nanumi tiko na leqa eso oqori, me ra qai vakasaqara ena wase 111 na ivakasala kei na veivakacegui e solia kina na Turaga me vukei keda. Rawa ni ra wasea na lewe ni kalasi na sala sa vukei ira kina na iVakabula mera vakabauti Koya kina.

• O ira na lewe ni nomu kalasi era sa na sotava beka na veika a sotava o Josefa — ena nodra a vakila na na veivakadonui ni Turaga dina ga ni ra a “yalowai voli” (Vunau kei na veiyalayalati na 111:1). E vakaraitaka vakacava na veika era sotava na dina e vakavulici ena Vunau kei na Veiyalayalati 111? Me kena ivakaraitaki, na gauna cava beka era a vakila kina ni Turaga “e tuvanaka na ka kece me baleta na [nodra] na vinaka”? (tikina e 11). Na cava beka e vakavulica vei ira na veika era sotavi oqo me baleta na iVakabula kei ira vakataki ira?

Vunau kei na Veiyalayalati 112:3–15, 22

Na Turaga ena liutaki ira era vakasaqara ena yalomalumalumu na Nona lewa.

• Me vukei ira na lewe ni kalasi mera veitalanoataka na cava e vakavulica na iwase112 me baleta na yalomalumalumu, vakasamataka mo wasea na kalasi ki na tolu na ilawalawa. Solia ki na ilawalawa yadua e dua vei ira na taro oqo me vakasamataki vakatitobu ni ra raicalesu na tikina e 3–15 kei na 22: Na cava na yalomalumalumu? Meda yalomalua rawa vakacava? Na veivakalougatataki cava sa yalataki tu vei ira na yalomalumalumu? Solia na gauna mera wasea kina na nodra isau ni taro. O ira na ilawalawa e rawa ni ra raica na ikuri ni veivakararamataki ena wiliki ni itukutuku nei Elder Quentin L. Cook ena “Ikuri ni ivurevure” se na iwasewase ka kena ulutaga na “Yalomalumalumu” ena Vunautaka na noqu kosipeli (tabana e 126–27). Na cava na vuna e gadrevi kina na yalomalumalumu ena cakacaka ni Turaga ?

  

  Kevaka eda sa yalomalua, na Turaga ena tuberi keda ka sauma na noda masu.”

Vunau kei na Veiyalayalati 112:12–26

O ira era sa saumaki vakaidina eyaco me ra sa kilai Jisu Karisito.

• E dina ga nira a vuki eso na iApositolo ena 1837 me ra a vakacacana na Parofita e sa dua na veivakananumi vinaka, se mani vakacava na veikacivi sa tiko vei keda se na levu ni kila me baleta na kosipeli, esa dodonu meda vakila yadudua nida sa saumaki vakaidina. Na wiliki ni ivakasala ni Turaga a solia vei Thomas B. Marsh me vukei koya me vakaduavatataka na kuoramu ni iApositolo Le Tinikarua, e rawa ni solia ki na nomu kalasi na rai me baleta na ibalebale dina ni saumaki. E rairai vinaka me ra wilika na lewe ni kalasi na Vunau kei na Veiyalayalati 112:12–26 ni ra vakasamataka tiko e dua na lewe ni matavuvale se itokani — e dua ka sotava tiko na dredre ena nodra vakabauta. Na dina cava beka mai na veitikina oqo era na via vakadreta na lewe ni kalasi me vukea na tamata oya me taucoko na nona saumaki.? Solia vei ira na lewe ni kalasi na gauna mera vakasamataka vagumatua na cava e rawa ni ra cakava me vaqaqacotaki kina na nodra dui saumaki mai ki vua na Turaga.

iKuri ni iVurevure

Na ivakarau va-Karisito ni yalomalumalumu.

E vakavulica o Elder Quentin L. Cook:

“E ka ni rarawa, ena gauna oqo voleka ni veiwasewase kecega ni bula veimaliwai, eda raica kina na kena mai vakaraitaka wavoki e matada na yalolevu kei na dokadoka ka mai butuki sobu yani na yalomalumalumu kei na qaravitavi vua na Kalou. Sa luluqa mai e levu na bula ni veimaliwai ka sega ni kilai matata na vuna eda mai tiko kina ena vuravura oqo. Na yalomalumalumu dina, ka sa bibi ki na rawati ni inaki ni Turaga kivei keda, e sega soti ni dau laurai.

“E sa ka bibi me kilai matata na titobu ni yalomalumalumu, yalododonu, tuvai ni bula, kei na kilaka nei Karisito, me vaka e vakatakilai ena ivolanikalou. E sa ka lialia me vakawaleni na kena sasagataki vagumatua na ivakarau kei na ituvaki va-Karisito oqo me ka ni veisiga, vakauasivi na yalomalumalumu.

“Ena i ka 23 ni Julai, 1837, na Parofita o Josefa a sotavi Elder Thomas B. Marsh, na Peresitedi ni Kuoramu ni Le Tinikarua. A rarawa taka o Elder Marsh ni a kaciva e rua na lewe ni nona Kuoramu na Parofita me rau gole ki Igiladi ka sega madaga ni tukuna vua. Ni sa sotavi Elder Marsh o Josefa, na mavoa ni yalo e sa biu vakatikitiki, ka sa ciqoma na Parofita e dua na ivakatakila vakasakiti. Ena gauna oqo e sa i ka 112 ni wase ni Vunau kei na Veiyalayalati. E sa soli na idusidusi vakasakiti mai lomalagi me baleta na yalomalumalumu, kei na cakacaka ni kaulotu. Tikina e 10 e vakaoqo, ‘Mo yalomalumalumu; ena tuberi iko ena ligamu na Turaga na nomu Kalou, ka sa solia vei iko na isau ni nomu masu’ [Vunau kei na Veiyalayalati 112: 10; vakaikuritaki]” (“Na Veisiga Tawamudu,” Ensign se Liaona, Nove. 2017, 51 – 52).

Vakatorocaketaki Noda Veivakavulici

Raimatua tiko vei ira na tamata. Na ivakarau ni nomu veimaliwai kei ira na tamata e tautauvata na kena bibi kei na veika o vakavulica vei ira. Ena so na gauna ni da vakatabakidua tikoga ki na soli ni lesoni ena rawa ni tarova na noda vakaraitaka vei ira eda vakavulica tiko ni da lomani ira. Vakasamataka na sala e rawa ni o vakanamata tikoga kina ena ka e bibi duadua” (Veivakavulici ena iVakarau ni iVakabula,6