4–10 octubre

Tzolʼlebʼ ut Sumwank 111–114

“Laa’in tintuqub’ chixjunil li k’a’aq re ru choq’ re lee chaab’ilal”

Naq nakawil ru Tzol’leb’ ut Sumwank 111–114, wanqeb’ sa’ aach’ool li musiq’ejil yaal naraj li Qaawa’ naq te’xtaw ru li komon. Li Santil Musiq’ej tatxb’eresi chixnawb’al k’a’ru li na’leb’ tat-aatinaq wi’.

Tz’iib’a li nakak’oxla

Xkanab’ankileb’ chi wotzok

Wi nakawaj, yiib’ xjalam-uuch jun kaxon chiru li pizarron. Eb’ li komon naru neke’xtz’iib’a chiru li pizarron junjunqeb’ raqal re li tasal 111–114 b’ar wi’ xe’xtaw junaq “nimla b’ihomal” choq’ reheb’ (Tzol’leb’ ut Sumwank 11:2). Patz’ reheb’ junjunq li komon naq te’xye li xe’xtaw jo’ b’ihomal sa’eb’ li raqal a’an.

Xk’utb’al li tzolʼlebʼ

Tzolʼlebʼ ut Sumwank 111

Li Qaawa’ naru “tixtuqub’ chixjunil li k’a’aq re ru choq’ re li qachaab’ilal.”

• Li na’leb’ naxk’e li Qaawa’ sa’ Tzol’leb’ ut Sumwank 111 naru naxtenq’aheb’ li komon naq te’chalq xk’a’uxl chirix li k’a’ru re ruchich’och’ malaj re musiq’ej, jo’ chanru naq kixtenq’a laj Jose Smith rik’in lix k’a’uxl chirix Sion. Naru nakatikib’ aatinak chirix li tasal naq nakakanab’eb’ li komon chixtz’iib’ankil chiru li pizarron li k’a’aq re ru nak’ehok xk’a’uxleb’ a’an, malaj xk’a’uxleb’ kristiaan neke’xnaw ru. Chirix a’an, rik’in li k’a’aq re ru a’an, naru neke’xsik’ sa’ li tasal 111 li na’leb’ ut li k’ojob’ank ch’oolej naxk’e qe li Qaawa’ re qatenq’ankil. Eb’ li komon naru neke’aatinak chirix chan ru naq neke’tenq’aak xb’aan li Kolonel naq neke’xpaab’ a’an.

• Maare xnumsihomeb’ ajwi’ li kixnumsi laj Jose, b’ar wi’ ke’reek’a naq neke’k’ulub’aak xb’aan li Qaawa’ us ta wan “xmajelal xna’leb’eb’ ”(Tzol’leb’ ut Sumwank 111:1). Chan ru naq li k’a’ru neke’xnumsi nareetali li yaal neke’k’utman sa’ Tzol’leb’ ut Sumwank 111? Qayehaq, jo’q’e reek’ahomeb’ naq li Qaawa’ “kixtuqub’ chixjunil li k’a’aq re ru choq’ re lix chaab’ilaleb’ ”? (raqal 11). K’a’ru neke’xtzol sa’eb’ li na’leb’ a’an chirix li Kolonel ut chirixeb’ ajwi’ a’an?

Tzol’leb’ ut Sumwank 112:3–15, 22

Li Qaawa’ tixb’eresiheb’ li neke’xsik’ li rajom sa’ tuulanil.

• Re xtenq’ankileb’ li komon chi aatinak chirix li naxk’ut li tasal 112 chirix li tuulanil ch’oolej, naru taak’eheb’ li komon sa’ oxib’ ch’uut. K’e re li junjunq chi ch’uut jun reheb’ li patz’om a’in re te’xtz’il rix naq yooqeb’ chirilb’al ruheb’ li raqal 3–15 ut 22: K’a’ru li tuulanil ch’oolej? Chan ru naru natuulano’ qach’ool? K’a’ru li osob’tesihom neke’yeechi’iman reheb’ li tuulan xch’ool? K’eheb’ xhoonal re naq te’xwotz xsumehomeb’. Eb’ li ch’uut naru neke’xtaw xkomon xnawomeb’ wi te’ril ru li raatin Ii Elder Quentin L. Cook li wan sa’ “Xkomon chik li k’anjeleb’aal” malaj li tasal “La humildad” sa’ Predicad Mi Evangelio (127–128). K’a’ut naq aajel ru li tuulanil ch’oolej re xb’aanunkil lix k’anjel li Qaawa’?

  

  Wi tuulan qach’ool, li Qaawa’ tooxb’eresi ut tixsumeheb’ li qatij.

Tzol’leb’ ut Sumwank 112:12–26

Li ani tz’aqal jalajenaqeb’ xch’ool neke’wulak chixnawb’al ru li Jesukristo.

• Naq junjunqeb’ li apostol sa’ 1837 ke’xka’pak’ali ru li profeet a’an jun chaab’il jultikahom naq a’ yaal k’a’ru li qab’oqb’al ut jo’ k’ihal naqanaw chirix li evangelio, tento taqayal qaq’e chixjalb’al qach’ool sa’ junjunqal. Rilb’al ru li na’leb’ kixk’e li Qaawa’ re laj Thomas B. Marsh re xtenq’ankil chixjunajinkil lix Molameb’ li Kab’laju naru naxk’e xna’leb’eb’ li komon chirix k’a’ru naraj naxye li jalok ch’oolej. Eb’ li komon maare naru neke’ril ru Tzol’leb’ ut Sumwank 112:12–26 rik’in xjultikankil junaq reheb’ lix junkab’al malaj ramiiw; anihaq li maare wan xch’a’ajkilal rik’in lix paab’aal. K’a’ruheb’ li yaal sa’eb’ li raqal a’an te’xjultika raj li komon re li kristiaan a’an re xtenq’ankil chixjalb’al xch’ool chi tz’aqal re ru? K’e xhoonaleb’ chixtz’ilb’al rix k’a’ru naru neke’xb’aanu re xkawob’resinkil lix jalajikeb’ xch’ool chiru li Qaawa’.

Xkomon chik li k’anjeleb’aal

Li chaab’ilal re li tuulanil ch’oolej.

Li Elder Quentin L. Cook kixye:

“A’ut, sa’ li qakutan haye’ sa’ chixjunileb’ lix tasalil li tenamit, naqil li terq’usink-ib’ ut li q’etq’etil chi k’utinb’ileb’ chiru chixjunileb’ ut li tuulanil ut li teneb’ank-ib’ chiru li Dios chi se’enb’ileb’. Lix k’ihaleb’ li tenamit anajwan sachsookeb’ ut ink’a’ neke’xtaw ru k’a’ut naq wanko sa’ xb’een li ruchich’och’ a’in. Moko rajlal ta natawman li tz’aqal tuulanil, li jwal aajel ru re xtz’aqob’resinkil li rajom li Qaawa’ choq’ qe.

“Aajel ru xtawb’al ru lix nimal lix tuulanil, lix tiikilal, lix nawom, ut chan ru xch’ool li Kristo jo’ yeeb’il resil sa’eb’ li loq’laj hu. Mem ru li ani naxkub’si x’aajelil ru li yalok q’e chi rajlal re xyu’aminkil li na’leb’ re Kristo a’in wulaj wulaj, ut aajel wi’chik ru li tuulanil. …

“Sa’ li 23 xb’e li po julio, 1837, li Profeet aj Jose kixch’utub’ rib’ rik’in li Elder Thomas B. Marsh, Awa’b’ej re lix Molameb’ li Kab’laju. Li Elder Marsh ra xch’ool xb’aan naq li Profeet ak kixb’oqeb’ wiib’ reheb’ lix molam chi xik sa’ Inglaterra chi ink’a xb’een kixpatz’ re. Naq laj Jose yoo chi aatinak rik’in li Elder Marsh, ke’xkanab’ chixjunil li rahil eek’ahom, ut li Profeet kixk’ul jun xnimal ru k’utb’esinb’il na’leb’. Anajwan nawb’il ru jo’ li tasal 112 re li Tzol’leb’ ut Sumwank. Naxk’e jun b’eresink q’axal chaab’il chalenaq chaq sa’ choxa li wan rilom rik’in li tuulanil ut li k’anjel re jultikank aatin. Li raqal 10 naxye, “Tuulanaq aach’ool; ut li Qaawa’ laa Dios tatxb’eresi chawuq’, ut tixk’e xsumenkil ru laa tij” [Tzol’leb’ ut Sumwank 112:10; tiqb’il xkawil li aatin]” (“Li junelikil wulaj wulaj,” Jolomil ch’utub’aj-ib’ re octubre 2017).

Xchaab’ilob’resinkil li qak’utum

K’e aach’ool chixtenq’ankileb’ li kristiaan. “Juntaq’eet x’aajelil ru li nakab’aanu reheb’ rik’in li na’leb’ nakak’ut chiruheb’. Wan naq li qak’a’uxl chirix chan ru xk’utb’al jun na’leb’ nokoxram chixk’utb’al li qarahom choq’ reheb’ li ani tzolb’ileb’ qab’aan. … K’oxla chan ru tatruuq chixb’aanunkil li k’a’ru q’axal aajel ru” (Li k’utuk jo’ li Kolonel, 6).