Vulaitubutubu Ena Valeniveivesu Mai Liberty, mai vei Al Rounds

18–24 ni Okotova

Vunau kei na Veiyalayalati 121–123

“Oi Kemuni Na Kalou, Ko Ni Sa Tiko Evei?”

Na sala vinaka duadua ni vakavakarau ni veivakavulica sai koya me wiliki na ivolanikalou, vakasamataki ira na tamata o vakavulica, ka muria na Yalo. Na itaviqaravi eso ena ituvatuva oqo e rawa ni tokona na veivakauqeti o ciqoma.

Vola na Veika o Vakauqeti Kina

Sureta na Veiwasei

Sureti ira na lewe ni kalasi mera digitaka e dua na itukutuku mai na Vunau kei na Veiyalayalati 121–23 ka ra na via wasea vua e dua e sotava tiko na leqa. Me ra vakamacalataka na nodra digidigi.

Vakavulica na iVunau

Vunau kei na Veiyalayalati 121:1–33; 122

Kevaka eda vosota na noda vakatovolei, na Kalou ena laveti keda cake.

• Ena tiko beka eso na lewe ni kalasi ka, ena vuku ni veika dredre, e tautauvata na ka era vakila me vaka e vakaraitaka toka o Josefa Simici ena Vunau kei na Veiyalayalati 121:1–6. Ni wiliki oti vata na tikina eso oqo, sa rawa mo na sureti ira na lewe ni kalasi me ra digitaka ka wasea na itukutuku ena tikina e 7– 33 ka solia vei ira na inuinui kei na vakacegu ena gauna ni nodra vakatovolei. Na cava na ibalebale ni “vosota … rawa ”? (tikina e 8). E vukei keda vakacava na iVakabula meda vosota rawa? Meda veivukei vakacava meda vosota rawa kina?

• Me vukea na lewe ni kalasi mera raica se veivuke vakacava na veivakatovolei me “solia vei [keda] na yalomatua” ka “mo [meda] vinaka cake kina” (Vunau kei na Veiyalayalati 122: 7), e rawa ni o solia vei ira e dua na tiki ni pepa ka kerei ira mera vola edua na veivakatovolei era sa sotava. Ena yasa kadua ni pepa, me qai vola na lewe ni kalasi na vosa “ka e sotavi ” kei na “kena vinaka.” Ena nomuni veitalanoataka vata na Vunau kei na Veiyalayalati 122, vakayaloqaqataki ira na lewe ni kalasi me ra vola e dua na vakasama e tiko vei ira me baleta na “yasa kadua” ni nodra gauna ni vakatovolei: na “ka e a sotavi” se “vinaka” era a rawata kina. Eso na lewe ni kalasi e rawa ni rawarawa vei ira me ra wasea ni veivakatovolei era a sotava e a kauta mai na vinaka vei ira. Ke ka rawa me ra wilika na ka a sotava o Elder Koichi Aoyagi ena “Mo Yalodina Tiko” (Ensign se Liaona, Nove. 2015, 126–28).

Vunau kei na Veiyalayalati 121:34–46

Sa dodonu me da ivalavala dodonu me da rawata kina na “kaukauwa vakalomalagi.”

• E rawa ni ka matalia sara me da vakatautauvatana “na kaukauwa se veivakauqeti” e tomani tikoga ena vuravura vata kei na iwalewale a veivakatavulici kina na Turaga me baleta na vakayagataki ni kaukauwa se veivakauqeti o ya. (raica na Wase 121). Me veivuke ena veivosaki oqo, o rawa ni droinitaka e dua na jati ka rua na kena kolomu ena vava ni volavola ka vakayacani tu ena Kaukauwa Vakavuravura kei na Kaukauwa Vakalomalagi. Sa rawa mera vakalewena na jati na lewe ni kalasi ena vosa kei na veimalanivosa mai na Vunau kei na Veiyalayalati 121:34–46. Ena veisautaka vakacava na veitikina oqo na noda rai me baleta na noda itavi ena noda matavuvale, vaka dauveiqaravi tagane se yalewa, se ena ituvaki tale eso eda nuitaka me da na veivakauqeti kina ki na vinaka vei ira na tani?

• E dua na sala me ra veivosakitaka kina na ivakasala kei na veivakalougatataki vakasakiti ena Vunau kei na Veiyalayalati 121:45–46 o ya me wasei na kalasi vaka ilawalawa, ka kerea na ilawalawa yadua me ra vulica ka veivosakitaka e dua na malanivosa mai na veitikina oqo, me vaka “me vakaiukukutaki tikoga na nomudou vakanananu ena i valavala savasava” se “me vaka na tegu sa lutu mai lomalagi.” Sa rawa mera raica mada na ibalebale ni vosa, wilika na ivolanikalou veisemati mai na ivakamacala ka toka e ra, ka me ra qai veivosakitaka na ibalebale ni malanivosa. Eso vei ira na ilawalawa era na gadreva beka me ra droinitaka na iyaloyalo e tukuna tiko na nodra malanivosa. Kerea na ilawalawa yadua mera wasea ki na kalasi na veika era sa vulica.

Vunau kei na Veiyalayalati 122:8–9

O Jisu Karisito sa lako sobu mai ki ra sara ka vakaqaqacotaki keda ena noda vakatovolei.

• Na kilai vakamatata ni o Jisu Karisito “sa lako sobu … mai ki ra sara” e rawa ni solia vei ira na lewenikalasi na nuidei mera rai ki vua. Oqo na ikuri ni ivolanikalou e vakamacalataki tiko kina na ibalebale ni malanivosa oqo: Aisea 53:3–4; Iperiu 2:17–18; 1 Nifai 11:16–33; Alama 7:11–13. Sa rawa me ra wilika na lewe ni kalasi na veitikina oqo, vata kei na Vunau kei na Veiyalayalati 122: 8, ka vakasaqara e dua na ka me tara cake na nodra vakabauta ni o Jisu Karisito e rawa ni vukei ira ena nodra gauna ni veivakatovolei. Era rawa talega ni ra kunea na veivakauqeti ena sere ni Lotu me baleta na iVakabula, me vaka na “Meu Gole Tu Kivei?” (Sere ni Lotu, naba 71).

• Na itukutuku e tiko ena “Ikuri ni iVurevure” e vakuria na rai titobu me baleta na ivalavala ni nona siro sobu mai ki ra sara na iVakabula. Sa rawa mo vakasamataka e dua na sala e rawa ni o vakaraitaka kina ni nomu tiko e “ruku ni” dua na iyaya bibi e biuti keda “vakavinaka meda laveta[kina].” Sa veivuke vakacava ki na noda sotava na veivakatovolei na noda kila tu ni iVakabula a lako sobu mai ki ra sara?

  

  E kila vaka vinaka tu o Jisu na noda rarawa. Me Kakua ni Yaco na Noqu Lewa, Me Yaco Ga na Nomuni, mai vei Walter Rane

iKuri ni iVurevure

O Karisito e a siro sobu ki na ruku ni ka kecega.

E vakatavulica o Peresitedi Dallin H. Oaks, “E milioni vakamilioni na tamata dau rerevaka na Kalou era masuta na Kalou me ra laveti tani mai na nodra vakararawataki. Na noda iVakabula e sa vakatakila mai ni a ‘lako sobu mai ki ra sara’ (V&V 88:6). Me vaka e vakavuvulitaka o Elder Neal A. Maxwell, ‘Ni sa “lako sobu mai ki ra sara,’ Sa kila kina vakavinaka sara vakataki koya, na taucoko ni rarawa vakatamata.’ [Ensign, Nov. 1997, 23]. E rawa beka ni da kaya ni nona sa lako sobu mai ki ra sara, sa toka kina o Koya ena dua na itutu vinaka me laveti keda kece ka solia vei keda na kaukauwa eda gadreva me da vosota kina na noda vakararawataki”(“Vakaukauwataki ena vuku ni Veisorovaki i Jisu Karisito,” Ensign or Liaona, Nov. 2015, 64).

Vakatoroicaketaki Noda Veivakavulici

Na nomu sa kacivi sa yaco ena veivakauqeti. Ena nomu i tutu vaka-qasenivuli, o sa kacivi mai vua na Turaga mo vakalougatataki ira na Luvena. E vinakata o koya mo gugumatua, ni o bula kilikili kaya na nona veivuke, ena solia vei iko na ivakatakila o gadreva (raica na Veivakavulici ena ivakarau ni iVakabula, 5).