Tzʼalam saʼ Liberty sa’ xraqik li hab’alq’e, xb’aan laj Al Rounds

18–24 octubre

Tzolʼlebʼ ut Sumwank 121–123

“At Dios, bʼar wankat laaʼat?”

Li rilb’aleb’ ru li loq’laj hu, xk’oxlankileb’ li komon, ut ab’ink chiru li Musiq’ej a’aneb’ chaab’il na’leb’ re xkawresinkil aawib’ re k’utuk. Eb’ li kok’ k’anjel sa’ li tusleb’ aatin a’in naru naxtz’aqob’resi ru laa musiq’ejil na’leb’.

Tz’iib’a li nakak’oxla

Xkanab’ankileb’ chi wotzok

Patz’ reheb’ Ii komon naq te’xsik’ ru jun li na’leb’ sa’ Tzol’leb’ ut Sumwank 121–123 li te’xwotz raj rik’in anihaq yoo chixnumsinkil rahilal. Kanab’eb’ chixwotzb’al k’a’ut naq xe’xsik’ ru li na’leb’ a’an.

Xk’utb’al li tzolʼlebʼ

Tzol’leb’ ut Sumwank 121:1–33; 122

Wi naqakuy chi us lix yalb’al qix, li Dios tixtaqsi qaloq’al chi taqe’q.

• Maare junjunqeb’ re li komon, xb’aan xyalb’aleb’, wankeb’ reek’ahom jo’ li kireek’a laj Jose Smith li kixye sa’ Tzol’leb’ ut Sumwank 121:1–6. Chirix rilb’aleb’ ru li raqal a’an sa’ komonil, naru taapatz’ reheb’ li komon naq te’xsik’ ut te’xwotz li na’leb’ wankeb’ sa’eb’ li raqal 7–33 li naxk’e royb’enihomeb’ ut xk’ojob’ankileb’ xch’ool sa’eb’ lix yalb’al rix. K’a’ru naraj naxye “xkuyb’al chi us” (raqal 8)? Chan ru nokoxtenq’a li Kolonel chi kuyuk chi us? Chan ru naru naqatenq’a qib’ chiqib’il qib’ chi kuyuk chi us?

• Re xtenq’ankileb’ li komon chixk’oxlankil chan ru naq eb’ lix yalb’al qix naru “te’xk’e qana’leb’ ” ut “te’wanq choq’ re qachaab’ilal” (Tzol’leb’ ut Sumwank 122:7), naru nakak’e reheb’ jun setel li hu ut taapatz’ reheb’ naq te’xtz’iib’a jun yale’k-ix xe’xnumsi. Chixjunpak’al li hu, naru te’xtz’iib’a li aatin “na’leb’ ” ut “chaab’ilal.” Naq nekex’aatinak sa’ komonil chirix Tzol’leb’ ut Sumwank 122, waklesi xch’ooleb’ chixtz’iib’ankil yalaq k’a’ru na’leb’ taachalq sa’ xk’a’uxleb’ chirix lix “junpak’alil” lix yalb’aleb’ rix: li “na’leb’ ” xe’xtaw malaj li “chaab’ilal” xe’xk’ul. Maare junjunqeb’ li komon te’raj xch’olob’ankil chan ru naq xe’tenq’aak xb’aan lix yalb’aleb’ rix re xk’ulb’al xchaab’ilaleb’. Malaj naru neke’ril ru lix numsihom li Elder Koichi Aoyagi li natawman sa’ “Chatkanaaq saʼ laa bʼe” (Jolomil ch’tub’aj-ib’ re octubre 2015).

Tzol’leb’ ut Sumwank 121:34–46

Tento naq tiikaqo re taaruuq taqak’ul lix “wankilal li choxa.”

• Maare us raj aatinak chirix chan ru naq jalan rokisinkil li “wankilal ut li teneb’ank” sa’ li ruchich’och’ rik’in chan ru kixye li Qaawa’ naq tento taa’oksimanq li wankilal ut li teneb’ank (chi’ilmanq li tasal 121). Re eetenq’ankil chixb’aanunkil li aatinak a’an, naru taayiib’ jun li kaaxukuut chi jachb’il sa’ xyi chiru li pizarron ut k’eheb’ jo’ xk’ab’a’: Xwankilal li ruchich’och’ ut Xwankilal li choxa. Eb’ li komon naru neke’xtz’aqob’resi ru li kaaxukuut rik’ineb’ aatin ut ch’ol aatin re Tzol’leb’ ut Sumwank 121:34–46. Chan ru neke’xjal qana’leb’ li raqal a’an chirixeb’ li qateneb’ankil sa’ li qajunkab’al, jo’ aj ilol komon, malaj sa’ jalan chik hoonal b’ar wi’ naqaj xtenq’ankil anihaq?

• Re aatinak chirix li na’leb’ ut eb’ lix chaq’al ru osob’tesihom wankeb’ sa’ Tzol’leb’ ut Sumwank 121:45–46 naru nakak’eheb’ li komon sa’ ch’uut ut taapatz’ reheb’ li junjunq chi ch’uut naq te’ril ru ut te’aatinaq chirix junaq li ch’ol aatin wan sa’eb’ li raqal a’an, jo’ “li saq ruhil na’leb’ chirutz’u’uji rajlal laa k’oxlahom” malaj “chanchan li k’ajob’ chalen chaq sa’ choxa.” Naru neke’xsik’ k’a’ru naraj neke’xye li aatin, neke’rileb’ ru li raqal sa’eb’ li loq’laj hu li wan rilomeb’ rik’ineb’ li na’leb’, ut neke’aatinak chirix k’a’ru naraj neke’xye li ch’ol aatin a’an choq’ reheb’. Maare junjunqeb’ li ch’uut te’raj xyiib’ankil xjalam-uucheb’ re reetalinkil lix ch’ol aatineb’. Kanab’eb’ li junjunq chi ch’uut chixwotzb’al k’a’ru xe’xtzol.

Tzol’leb’ ut Sumwank 122:8–9

Li Jesukristo xkub’e rub’el chixjunil li k’a’aq re ru ut nokoxkawob’resi sa’eb’ lix yalb’al qix.

• Xtawb’al ru naq li Jesukristo “xkub’e rub’el chixjunil” naru naxkawob’resi xch’ooleb’ li komon chixsik’b’al a’an. Eb’ li raqal a’in reheb’ li loq’laj hu neke’tenq’an chixch’olob’ankil k’a’ru naraj naxye li ch’ol aatin a’an: Isaias 53:3–4; Hebreos 2:17–18; 1 Nefi 11:16–33; Alma 7:11–13. Eb’ li komon naru neke’ril ruheb’ li raqal, rochb’een Tzol’leb’ ut Sumwank 122:8, re xsik’b’al k’a’ruhaq li tixnimob’resi xpaab’aaleb’ chirix naq naru neke’tenq’aak xb’aan li Jesukristo sa’eb’ lix yalb’al rix. Naru ajwi’ neke’xtaw xna’leb’eb’ sa’eb’ li b’ich chirix li Kolonel, jo’ “Bʼar wan xhiilal li waam?”(Eb’ li B’ich, 67).

• Li ch’ol aatin wan sa’ “Xkomon chik li k’anjeleb’aal” naxch’olob’ chi us wi’chik chan ru naq li Kolonel xkub’e rub’el chixjunil. Maare nakataw junaq na’leb’ re xk’utb’esinkil chan ru naq, wi wanko “rub’el” junaq k’a’aq re ru aal, nokokana “sa’ jun na’ajej tz’aqal re ru re xwaklesinkil.” Chan ru nokoxtenq’a sa’eb’ lix yalb’al qix xnawb’al naq li Kolonel xkub’e rub’el chixjunil?

  

  Li Jesus naxtaw ru li qarahilal. Ink’a’ chi’uxmanq li nawaj laa’in, a’b’an laa wajom laa’at, xb’aan laj Walter Rane.

Xkomon chik li k’anjeleb’aal

Li Jesukristo xkub’e rub’el chixjunil.

Li Awa’b’ej Dallin H. Oaks kixk’ut, “Wankeb’ k’iila millon reheb’ laj paab’anel li neke’tijok chiru li Dios naq tixwaklesiheb’ chaq sa’ lix ch’a’ajkilaleb’. Laj Kolol qe xk’utb’esi naq a’an “kikub’e rub’el chixjunil li k’a’aq re ru” (Tzol’leb’ ut Sumwank 88:6). Jo’ kixye li Elder Neal A. Maxwell, “Rik’in naq “kikub’e rub’el chixjunil,” a’an naxtaw ru ut ak kixk’ul chixjunil rahilal eek’anb’il xb’aaneb’ li winq” [Ensign, noviembre 1997, 23]. Naru naqaye naq rik’in naq kikub’e rub’el chixjunil, a’an xaqxo b’ar naru chiqawaklesinkil ut chixk’eeb’al li metz’ew naqaj ru re xkuyb’al qach’a’ajkilal” (“K’eeb’il qametz’ew xb’aan lix tojb’al rix li maak xb’aan li Jesukristo,” Jolomil ch’utub’aj-ib’ re octubre 2015).

Xchaab’ilob’resinkil li qak’utum

Musiq’anb’il laa b’oqb’al. Jo’ aj k’utunel, b’oqb’ilat xb’aan li Qaawa’ re rosob’tesinkileb’ li ralal xk’ajol. A’an naraj naq tatnume’q chi uub’ej, ut jo’ naq k’ulub’ejaqat choq’ re lix tenq’, tixk’e aawe li k’utb’esinb’il na’leb’ nakawaj ru (chi’ilmanq Li k’utuk jo’ li Kolonel, 5).