Na Totoka kei Nauvoo, mai vei Larry Winborg

25–31 ni Okotova

Vunau kei na Veiyalayalati 124

“E Dua na Vale e na Yacaqu”

Me rawa ni kauta mai na Yalotabu na ivakavuvuli ki na noda vakanananu ni da vakavuvuli tiko (raica na Joni 14:26), e dodonu me da vulica vakagumatua taumada ka vakananuma vakatitobu na vei ivakavuvuli oqori.

Vola na Veika o Vakauqeti Kina

Sureta na Veiwasei

Vakasamataka mo sureti ira na lewe ni kalasi mera wasea na veika era kunea ena Vunau kei na Veiyalayalati 124 ka vakavuna me ra vakasamataka e dua na ivakavuvuli ni kosipeli ena dua na sala vou. Na cava beka era a wilika—yadudua se vakamatavuvale—a veisautaka na sala era vakila, vakasama, se bula kina?

Vakavulica na iVunau

Vunau kei na Veiyalayalati 124:15, 20

Sa dau marautaka na Turaga na dina e taucoko.

• Ena wase 124, ea vakacaucautaki Airame Simici kei Joji Mila kina na Turaga ena nodrau dina ka taucoko. Me vukei ira na lewe ni kalasi mera vulica vakatitobu cake na ivakarau oqo, mo na sureti ira mera wilika na Vunau kei na Veiyalayalati 124: 15, 20 ka tugana na veika era sa vulica me baleta na dina ka taucoko mai na veitikina oqo. Na cava soti tale eda vulica mai na ivolanikalou ka tuvai tu ena ruku ni “Dina e Taucoko” ena iDusidusi ki na iVolanikalou (scriptures.ChurchofJesusChrist.org) se mai na itukutuku nei Elder Richard J. Maynes “Na Rawati ni Veivakabauti ni Turaga kei na Nomu Matavuvale”? (Ensign se Liaona, Nove. 2017, 75–77). De ra na rawa ni wasea na lewe ni kalasi na ivakaraitaki ni tamata era kila ka tu vei ira na dina ka taucoko. Na cava e dua kina na ivakarau yaga na dina ka taucoko?

Vunau kei na Veiyalayalati 124:22–24, 60–61

E vinakata na Turaga meda dau kidavaki ira ka ciqomi ira na tani.

• Era rawa beka ni ra vulica na lewe ni nomu kalasi e dua na ka mai na ivakamacala ni Turaga me baleta na Nauvoo House e rawa ni vukei ira ni ra veimaliwai vata kei ira na tamata era sega ni Yalododonu Edaidai se era sa ciri tani mai na Lotu. E rawa beka ni o droinitaka e dua na vale ena vava ni volavola ka sureti ira na lewe ni kalasi me ra vakasaqara ena Vunau kei na Veiyalayalati 124:22–24, 60–61 na vosa e vakayagataka na Turaga me vakamacalataka kina na inaki ni Nauvoo House. Mera qai vola wavokita na vale na vei vosa oya. E vakayagataki vakacava na vei vosa oqo ki na Lotu i Jisu Karisito? Na cava e rawa ni da vakayacora me buli kina na itovo ni veikidavaki vata ga oqo ena noda tabanalevu kei na noda vuvale?

Vunau kei na Veiyalayalati 124:25–45, 55

E vakarota na Turaga me da tara valetabu me rawa ni da ciqoma kina na veicakacaka tabu vakalotu.

• De rawa mera raitayaloyalotaka na lewe ni kalasi ni ra vakaitikotiko e Nauvoo ena 1841 ka cakacaka ena Valetabu e Nauvoo ena gauna a taroga kina e dua na itokani, “Na cava na vuna eda tara tiko ga kina na veivaletabu oqo?” Na cava beka eda na kaya vua na noda itokani oqo? E rawa beka ni ra vakararai vakasama na lewe ni kalasi ena Vunau kei na Veiyalayalati 124:28–30, 37–42, 55. Kevaka eso na lewe ni kalasi era sega ni kila vakavinaka tu na cakacaka vakalotu e tukuni tiko ena veitikina oqo, sa rawa mo vakamacalataka kina na inaki kei na veivakalougatataki ni veicakacaka vakalotu oqo. Raica na temples.ChurchofJesusChrist.org na veituberi me baleta na cava e rawa ni veivosakitaki ena taudaku ni valetabu, kei na iyaloyalo ni valetabu e rawa ni o vakaraitaka ena kalasi.

  

  Josefa Simici ena Valetabu mai Nauvoo, mai vei Gary E. Smith

Vunau kei na Veiyalayalati 124:45–55

Na Turaga ena vakalougatataki ira era sasagataka mera talairawarawa ki na nona ivakaro.

• Era a vakaroti me ra tara e dua na valetabu ena yasayasa vaka-Jekesoni o ira na Yalododonu ia era a “vakataotaki mai vei ira na nodra meca” (Vunau kei na veiyalayalati na 124:51). Ena veitikina e 49–55, ka a tavaka kina na Turaga na ituvaki oqo, e rawa ni na tiko kina nai itukutuku ni veivakadeitaki vei ira na tamata era na vinakata mera talairawarawa ki na ivakaro ni Kalou, ia sa tarovi na nodra vakayacora vakakina ena vuku ni matavuvale se na ituvaki tale eso. E rawa beka ni o wilika na veitikina oqo kei ira na lewe ni kalasi ka kerei ira mera vakasamataka eso na ituvaki ka ra tu kina na tamata era na sega beka ni rawa me ra vakayacora na nodra dui gagadre ni buladodonu ena vuku ni ituvaki ni bula era sega ni rawa ni lewa. Na ivakasala cava beka eda sa kunea ena veitikina oqo ka na rawa ni vukea e dua ena ituvaki vakaoqo? Na cava e vakatavulica vei keda na veitikina oqo me baleta na talairawarawa?

Vunau kei na Veiyalayalati 124:91–92

E rawa ni na dusimaki keda na Turaga ena noda veivakalougatataki vakapetiriaki.

• Ena yaga beka ki na lewe ni nomu kalasi e dua na veitalanoa me baleta na peteriaki kei na veivakalougatataki vakapeteriaki? Rawa ni o tekivu ena nomu sureti ira na lewe ni kalasi me ra wilika na Vunau kei na Veiyalayalati 124:91–92, me ra vakasaqara na cava e a kacivi kina o Airame Simici me vakayacora. Qai rawa ni o vola ena vava ni volavola na cava kei na cava na vuna ka sureti ira na lewe ni kalasi me ra wilika na “Veivakalougatataki Vakapeteriaki” (Tudei ena Vakabauta, 111–13) me vaqarai kina na cava na veivakalougatataki vakapeteriaki kei na cava na vuna era sa ka yaga kina. Ena vakavakarau vakacava e dua na tamata me ciqoma na nona veivakalougatataki vakapeteriaki? Vakasamataka mo sureta e vica na tamata era sa ciqoma na nodra veivakalougatataki ni peteriaki mera wasea na vuna era sa vakavinavinakataka kina. (Veivakananumi vei ira mera kua ni wasea na veika sa rui vuni se tabu ka tiko ena nodra veivakalougatataki.) Eda na vakaraitaka vakacava ni da vakamareqeta na noda veivakalougatataki vakapeteriaki?

Vakatoroicaketaki na Noda Veivakavulici

Masulaki ira na nomu lewe ni kalasi. Masulaka na yacadra o vakavulica tiko O na rawa ni masu mo kilamatata na nodra gagadre ka mo kila na cava mo vakavulica me rawa ni sotavi kina na gagadre oqori. E rawa talega ni o kerea na Tamada Vakalomalagi me “vakarautaka na yalodra” (Alama 16:16) me ra ciqoma na dina o na vakavulica. (See Teaching in the Savior’s Way, 6.)