Josefa Simici e Nauvu, 1840, mai vei Theodore Gorka

8–14 ni Noveba

Vunau kei na Veiyalayalati 129–132

“Ni da Rawata e Dua na Veivakalougatataki mai Vua na Kalou, E sa Rawa ena Vuku niTalairawarawa”

E dina ga ni bibi me tiko e dua na ituvatuva ni veivakavulici, sa bibi talega meda dau rogoca na Yalo kei na nodra gagadre na lewe ni kalasi. Tarogi ira na lewe ni kalasi se ivakavuvuli cava ena i ka 129–32 iwase e vakaibalebale dina sara vei ira.

Vola na Veika o Vakauqeti Kina

Sureta na Veiwasei

Era sa rairai vulica oti mai na lewe ni kalasi eso na ka ena nodra vulica na wase 129–32 ka semati ki na veiulutaga eso ni kosipeli. Me soli vei ira na madigi me ra wasea na veika era sa vulica, e rawa mo vola e vica vei ira na ulutaga ena vava ni volavola, me vaka na agilosi, na bula vakacerecerei, na talairawarawa, na bula ni Kalou, kei na vakamau tawamudu (o na vola tale beka ga veika tale eso ena vava ni volavola me baleta na ulutaga tale eso). Me ra na taura e vica na miniti na lewe ni kalasi me ra vakasaqara kina e dua na tikina mai na wase eso oqo ka semati ki na dua na ulutaga ka vola na kena idusidusi ena vava ni volavola. Mo ni qai wilika vata vakalasi na veitikina oqori ka veitalanoataka na veika era vakavulica na veitikina yadua me baleta na ulutaga oya.

Vakavulica na iVunau

Vunau kei na Veiyalayalati 130:2, 18–23; 131:1–4; 132:20–25

E inaki ni bula oqo me vakarautaki keda ki na bula cecere.

• E tiko e vuqa na ka eda sega ni kila me baleta na bula cecere se na bula ena matanitu vakasilesitieli—e vuqa e na dredre beka me da na kila rawa na kena ibalebale ena gauna oqo. Ia sa vakatakila mai na Kalou e vica na ivakatakilakila vakamareqeti, ka vuqa vei ira era kune ena Vunau kei na Veiyalayalati 130–32. E rawa ni ra vulica na lewe ni kalasi e dua se rua na idusidusi e cake ka wasea na veivakararamataki vou era sa kunea me baleta na bula cecere, se na matanitu vaka-silesitieli. Ena vakalougatataka vakacava na noda bula ena gauna oqo na noda kila na itukutuku oqo baleta na bula tawamudu?

Vunau kei na Veiyalayalati 130:20–21; 132:5

Na veivakalougatataki e lako mai ena talairawarawa vua na Kalou.

• Vunau kei na Veiyalayalati 130:20–21 kei na 132:5 e rau vakavulica na ivakavuvuli vata ga. Vakayaloqaqataki ira na lewe ni kalasi me ra wilika na itukutuku ruarua ka me ra qai wasea ena nodra vosa vakataki ira, se cava na ivakavuvuli o ya. Sa mai vakaraitaki vakacava na ivakavuvuli oqo ena noda bula? Eda na kunea vakacava na inuinui kei na veivakadeitaki vei Karisito ni da sa talairawarawa tiko ia era sega ni soli mai ena gauna vata ga oya na veivakalougatataki eda namaka? Me baleta na ikuri ni ulutaga oqo, e rawa ni railesuvi vata na vakasama mai na itukutuku nei Elder Dale G. Renlund “Sautu ena Veivakalougatataki” (Ensign se Liaona, Me 2019, 70–73).

Vunau kei na Veiyalayalati 131:1–4; 132:3–25

Na Tamada Vakalomalagi e sa vu ni kena rawa me tawamudu na matavuvale.

• Na cava e rawa ni da tukuna vua e dua na itokani ka vakataroga, “Na cava e bibi kina ena nomu lotu na vakamau kei na matavuvale ?” E rawa ni ra vakasamataka na lewe ni kalasi me ra na sauma na taro oya ena nodra wilika na Vunau kei na Veiyalayalati 131: 1–4; 132: 3–25; se na veimalanivosa nei Elder Dieter F. Uchtdorf ena “Ikuri ni ivurevure.” E vakaimawe vakacava ena noda bula na dina eso oqo?

  

  Na veiwekani vakamatavuvale e rawa me vakatawamudutaki ena cakacaka vakalotu ni valetabu.

Vunau kei na Veiyalayalati 132:1–2, 29–40

Na vakamau me vica kina na watina e dua e sa vakadonui mai vua na Kalou ena gauna ga e vakarota kina o Koya.

• Kevaka era taro na lewe ni kalasi me baleta na vakamau me levu kina na watina e dua, vukei ira mera kila ni a tu talega na nodra vakatataro o Josefa Simici kei ira na Yalododonu taumada Vakayaloqaqataki ira mera vakaraica na taro e a taroga o Josefa vua na Turaga ena Vunau kei na Veiyalayalati 132: 1 kei na kena isau a ciqomi mai na tikina e 29–40 (raica talega na Jekope 2:27, 30). Me ra vukei o ira na lewe ni kalasi mera vulica na sala era rawa ni raica kina na isau ni nodra taro va-kosipeli, ena rawa ni veivuke mera raicalesu vata na “Saumi Taro va-Kosipeli” ena topics.ChurchofJesusChrist.org. Ke rawa e vinaka me ra wasea na lewe ni kalasi na nodra vakasaqara na isau ni taro va-kosipeli kei na nodra yalodina tikoga dina ga ni so na gauna e sega ni saumi mai na nodra taro.

iKuri ni iVurevure

Na matavuvale “e sa ituvatuva vakalomalagi.”

E vakavulica o Peresitedi Dieter F. Uchtdorf:

“Au vakavinavinaka niu lewena e dua na lotu e vakabibitaka na bula vakawati kei na matavuvale. Era kilai na lewe ni Lotu i Jisu Karisito ni Yalododonu Edaidai e vuravura taucoko ni tiko kina eso na bula vakawati kei na matavuvale uasivi duadua o rawa ni raica. Au vakabauta ni vakavuna oqori, ena dua na tikina, na dina vakasakiti a vakalesui mai vei Josefa Simici ni inaki ni vakawati kei na matavuvale sa ikoya me tawamudu. E sega ni inaki walega ni matavuvale me taladrodro kina na veika eso e vuravura oqo ka na biu laivi ni da sa yaco ki lomalagi. Ia, era sa ivakarau vakalomalagi. Rau sa ivoqa ni ivakarau vakasilesitieli ka vakatotomuria na matavuvale tawamudu ni Kalou.

“Ia na bula vakawati qaqa kei na isema vakamatavuvale era sega ni dau yaco baleta ga ni da lewe ni Lotu. E gadrevi kina na cakacaka vakainaki e veigauna. Na ivakavuvuli ni matavuvale tawamudu e dodonu me vakauqeti keda meda vakayacora kina na noda sasaga uasivi duadua me vakabulai ka vakavutuniyautaki na noda bula vakawati kei na matavuvale” (“Veivakacaucautaki vei Ira Era Veivakabulai,” Ensign se Liaona, Me 2016, 77).

Vakatoroicaketaki Noda Veivakavulici

Vakatubura e dua na buturara taqomaki. “Vakayaloqaqataka [ira na lewe ni kalasi] mera vukea na nomu tauyavutaka e dua na ituvaki e dodonu, e veilomani, ka veidokai ka me ra vakila vakayadua ni sa rawa ni ra mai wasea kina na veika era sotava, na vei taro e so, kei na soli ivakadinadina” (Veivakavulici ena iVakarau ni iVakabula,15).