Laj Jose Smith sa’ Nauvoo, 1840, xb’aan laj Theodore Gorka

8–14 noviembre

Tzolʼlebʼ ut Sumwank 129–132

“Naq naqak’ul junaq osob’tesink rik’in li Dios, a’an xb’aan ab’ink chiru jun chaq’rab’ ”

Yaal naq aajel ru xkawresinkil li k’a’ru taak’ut, ut aajel ajwi’ ru xk’ulub’ankil li Musiq’ej ut li rajomeb’ ru li komon. Patz’ reheb’ li komon k’a’ruheb’ li na’leb’ xe’xtaw xyaalal sa’eb’ li tasal 129–132.

Tz’iib’a li nakak’oxla

Xkanab’ankileb’ chi wotzok

Eb’ li komon maare xe’xtzoleb’ k’iila k’a’aq re ru sa’eb’ li tasal 129–132 li wankeb’ rilom rik’ineb’ jalan jalanq na’leb’ re li evangelio. Re xk’eeb’aleb’ xhoonal re xwotzb’al li xe’xtzol, naru nakatz’iib’a chiru li pizarron junjunq reheb’ li na’leb’ a’an, jo’ eb’ li anjel, li taqenaqil loq’al, ab’ink, chan ru naq wan li Dios, ut li sumlaak maak’a’ roso’jik (naru ajwi’ nakatz’iib’a jalan chik re xna’ajeb’ jalan chik li na’leb’). Eb’ li komon naru neke’xsik’ junaq raqal sa’eb’ li tasal a’in li wan rilom rik’in jun reheb’ li na’leb’ ut te’xtz’iib’a rajlil li raqal chiru li pizarron. Chirix a’an, naru nekeril ruheb’ li raqal ut tex’aatinaq chirix li neke’xk’ut chirix li junjunq chi na’leb’.

Xk’utb’al li tzolʼlebʼ

Tzol’leb’ ut Sumwank 130:2, 18–23; 131:1–4; 132:20–25

Li yu’am a’in, a’an re xkawresinkil qib’ choq’ re li taqenaqil loq’al.

• Naab’al li k’a’ru ink’a’ naqanaw chirix li taqenaqil loq’al malaj li yu’am sa’ li choxahil awa’b’ejihom—lix k’ihal li na’leb’ chirix a’an maare ink’a’ naru naqataw ru anajwan. A’b’an li Dios ak xk’utb’esihom junjunq li xchaq’al ru na’leb’ chirix, ut naab’aleb’ neke’tawman sa’ Tzol’leb’ ut Sumwank 130–32. Eb’ li komon naru neke’xtzol jun malaj wiib’ oxib’ reheb’ li raqal xe’yeeman rub’elaj ut te’xwotz junaq na’leb’ te’xtaw chirix li taqenaqil loq’al malaj li choxahil awa’b’ejihom. Chan ru naq xnawb’aleb’ li na’leb’ a’in chirix li junelik yu’am narosob’tesi li qayu’am anajwan?

Tzol’leb’ ut Sumwank 130:20–21; 132:5

Eb’ li osob’tesihom neke’chal chaq rik’in li Dios.

• Tzol’leb’ ut Sumwank 130:20–21 ut 132:5 neke’xk’ut li na’leb’ a’an. Waklesi xch’ooleb’ li komon chirilb’aleb’ ru li raqal ut chixyeeb’al, rik’in tz’aqal li raatineb’, k’a’ru li na’leb’ a’an. Chan ru nak’utb’esiman li na’leb’ a’an sa’ li qayu’am? Chan ru naru naqataw qoyb’enihom ut qatuqtuukilal rik’in li Kristo naq noko’ab’in chiru li raatin a’b’an ink’a’ neke’k’ulun li osob’tesihom sa’ junpaat? Re xtawb’al xkomon eena’leb’, naru nekeril ru sa’ komonil li raatin li Elder Dale G. Renlund “Naab’al li osob’tesink” (Jolomil ch’utub’aj-ib’ re abril 2019).

Tzol’leb’ ut Sumwank 131:1–4; 132:3–25

Sa’ xk’ab’a’ li qaChoxahil Yuwa’, eb’ li junkab’al naru neke’wan chi junelik.

• K’a’ raj ru taqaye re junaq qamiiw li tixpatz’, “K’a’ut naq li junkab’al ut sumlaak jwal aajel ru sa’ lee iglees?” Eb’ li komon naru neke’xk’oxla chan raj ru te’xsume li patz’om a’an rik’in rilb’al ru Tzol’leb’ ut Sumwank 131:1–4; 132:3–25; malaj li raatin li Elder Dieter F. Uchtdorf sa’ “Xkomon chik li k’anjeleb’aal.” Chan ru naq eb’ li yaal a’an neke’xjal chan ru naq nokowan sa’ li qayu’am?

  

  Li wank sa’ junkab’al naru nakana chi junelik rik’ineb’ li k’ojob’anb’il k’anjel re li santil ochoch.

Tzol’leb’ ut Sumwank 132:1–2, 29–40

Li sumlaak rik’in numenaq jun li sum aatin ka’ajwi’ k’ulub’anb’il wi li Dios naxtaqla.

• Wi eb’ li komon wankeb’ xpatz’om chirix li sumlaak rik’in numenaq jun li sum aatin, tenq’aheb’ chirilb’al naq laj Jose Smith ut xkomoneb’ chik aj santil paab’anel ke’wan ajwi’ xpatz’om. Waklesi xch’ooleb’ chixtawb’al k’a’ru kixpatz’ laj Jose re li Qaawa’ sa’ Tzol’leb’ ut Sumwank 132:1 ut li sumehom kixk’ul sa’eb’ li raqal 29–40 (chi’ilmanq ajwi’ Jakob 2:27, 30). Re xtenq’ankileb’ li komon chixtzolb’al chan ru naru neke’xtaw xsumenkileb’ lix patz’om chirix li evangelio, naru nekeril ru sa’ komonil “Cómo responder preguntas sobre el evangelio” sa’ topics.ChurchofJesusChrist.org. Eb’ li komon maare naru neke’xwotz chan ru neke’xsik’ xsumenkileb’ li patz’om chirix li evangelio ut chan ru neke’kana chi paab’ank us ta ink’a’ neke’xtaw xsumenkileb’ lix patz’om.

Xkomon chik li k’anjeleb’aal

Li junkab’al a’an “tz’aqal li wanjik sa’ choxa.”

Li Awa’b’ej Dieter F. Uchtdorf kixye:

“Ninb’antioxi naq wankin sa’ jun li iglees li naxk’e xloq’al li sumlaak ut li junkab’al. Eb’ li komon sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan nawb’ileb’ ru sa’ chixjunil li ruchich’och’ xb’aan xkawilal lix sumlajikeb’ ut lix junkab’aleb’. Laa’in ninpaab’ naq a’in sa’ xk’ab’a’ li loq’laj yaal k’ojob’anb’il wi’chik xb’aan laj Jose Smith, naq li sumlaak ut li junkab’al tento raj taawanq chi junelik. Li junkab’al maawa’ yal junaq k’anjeleb’aal re naq sahaq toowanq sa’ li ruchich’och’, li taatz’eqmanq moqon naq toowulaq sa’ choxa. A’an b’an tz’aqal li wanjik sa’ choxa. A’an reetalil li choxahil wank ut xjalam-uuch lix junelikil junkab’al li Dios.

“A’b’anan, jun kawil sumlaak ut junkab’al ink’a’ nak’ulman yal rik’in naq wanko choq’ komon sa’ li Iglees. K’anjelak naraj, chi rajlal ut chi k’oxlanb’il. Li tzol’leb’ chirix li junelikil junkab’al tento tooreek’asi chixk’eeb’al qach’ool chixkolb’al ut chixchaab’ilob’resinkil li qasumlajik ut li qajunkab’al” (B’antiox reheb’ li neke’kolok,” Jolomil ch’utub’aj-ib’ re abril 2016).

Xchaab’ilob’resinkil li qak’utum

K’uub’ li tzoleb’aal re taa’eek’amanq li Musiq’ej. Waklesi xch’ooleb’ re taawanq li chaab’ilal, li rahok, ut li oxloq’ink chirib’ileb’ rib’ re naq chixjunileb’ sa te’reek’a sa’ xwotzb’al li k’a’ru xe’xk’ul sa’ xyu’am, lix patz’omeb’, ut lix nawomeb’ xch’ool” (Li k’utuk jo’ li Kolonel, 15).