Sa Yaco mai na Tagane sa qai Vakawati, mai vei Elizabeth Gibbons

15–21 ni Noveba

Vunau kei na Veiyalayalati 133–134

“O koya, mo dou vakarautaki kemudou ena nona lako mai na Tagane sa qai Vakawati;

Dina cava e tiko ena Vunau kei na Veiyalayalati 133 – 34 o vakila e na vukea vakalevu na nomu kalasi? Vakasamataka ena masumasu na nodra gagadre ni o vulica tiko ena macawa oqo.

Vola na Veika o Vakauqeti Kina

Sureta na Veiwasei

Sa rawa mo vola na vosa vakarorogo ena vava ni volavola ka sureti ira na lewe ni kalasi me ra vola tikiva na tikina eso mai na Vunau kei na Veiyalayalati 133–34 era vakabauta ni dodonu me da vakarorogo kina ena gauna oqo . Kerei ira mera wasea na vuna era sa digitaka kina na veitikina oqori. (Vukei ira na lewe ni kalasi me ra vakanamata ki na ivakavuvuli vakaivunau ka sega ni rai vakapolitiki.)

Vakavulica na iVunau

Vunau kei na Veiyalayalati 133:1–19; 37–39

E vinakata na Turaga meda vakavakarau ki na iKarua ni Nona Lesu mai.

• O na vukei ira vakacava na nomu kalasi me ra kila na vuna e bibi kina me da vakasavasavataki keda me rawa ni da vukei ira eso ena nodra vakarautaki ira ki na iKarua ni Nona Lako Mai na iVakabula? E rawa ni o sureti ira na lewe ni kalasi me ra railesuva na Vunau kei na Veiyalayalati 133:1–19, 37–39 ka cakava e rua na lisi: imatai me volai kina na ivakasala ni Turaga me baleta na noda vakasavasavataki keda kei na dua tale na ivakasala ni kena vakarautaki na vuravura ena nona lesu mai na iVakabula. Na cava e kena ibalebale, ena rai vakayalo, me ra “lako tani mai Papiloni” (tikina e 5) kei na “dro ki Saioni”? (tikina e 12). Eso tale na ka me baleta na ibalebale ni veivakasavasavataki, raica na “Veivakasavasavataki” ena iDusidusi ki na ivolanikalou (“scriptures. ChurchofJesusChrist.org”).

Vunau kei na Veiyalayalati 133:19–53

Na iKarua ni Lesu Mai ena ka rekitaki vei ira na Yalododonu.

• Ena nodra vulica na ivolanikalou e vale, era na kunea beka na lewe ni nomu kalasi na veimalanivosa vakaibalebale ena wase oqo, ka vakavuna me ra nanamaki ki na iKarua ni Nona Lako mai na iVakabula. Sureti ira me ra wasea na veimalanivosa oqo. Sa rawa talega mo sureti ira na kalasi me ra vakasaqaqara vakaisa ena tikina e 19–53 mera raica kina na vuna me ra nanamaki kina ena iKarua ni Lesu mai i Jisu Karisito. Ni ra wasea na lewe ni kalasi na veika era kunea, vakayaloqaqataki ira me ra vakaraitaka na sala sa “vakabulai ira ka [tauri] ira, ka keveti ira” (tikina 53) kina na iVakabula. Oqo e rawa ni dua na madigi vinaka mera lagata vata kina e dua na serenilotu me baleta na kaukauwa veivueti ni iVakabula, me vaka na “Savior, Redeemer of My Soul” (Hyms, naba 112). Na sere cava soti tale eso “ ni reki tawamudu” (tikina 33) ena vukei keda me da vakila na “yalo loloma ni [noda] Turaga”? (tikina e 52).

Vunau kei na Veiyalayalati 134

“A tauyavutaka na Kalou na veimatanitu me yaga vua na tamata.”

• Me vukei ira na lewe ni kalasi me ra vuli mai na Vunau kei na Veiyalayalati 134, sa rawa mo biuta na veitaro vakaoqo ena dua na koniteina se ena vava ni volavola: Na cava e vinakata na Kalou me yaga kina na matanitu vei ira na luvena? Na cava e dodonu me da vakayacora kevaka e veisaqasaqa na lawa vakalomalagi kei na lawa vakavuravura? Na cava soti na noda itavi kei na ilesilesi vaka lewenivanua? Sureti ira na lewe ni kalasi mera digitaka e dua na taro ka vakayagataka na wase 134 me buli kina e dua na kena isau. Vakayaloqaqataki ira na lewe ni kalasi me ra kakua ni dau vosa me baleta e dua na ile se na nodra nanuma vakapolitiki.

• Na galala mo “sokalou vakacava, na vanua, se na cava [eda] gadreva” (Yavu ni Vakabauta 1:11) e dua na madigi e vinakata na Turaga vei ira na tamata kecega. Kevaka o nanuma ni na yaga ki na kalasi me veivosakitaki na ivakavuvuli ni galala vakalotu, vakasamataka mo ni wilika vata na Vunau kei na Veiyalayalati 134:4, 7, 9. Na cava era vakavulica vei keda na veitikina oqo me baleta na itavi ni dua na matanitu ena kena taqomaki na galala vakalotu? Me da na tugana vakacava na galala vakalotu vei ira na tani ka vakakina vei kei keda? E rawa ni ra kunea na lewe ni kalasi na vakasama me veivuke ena saumi ni taro oqo ena “Ikuri ni ivurevure.”

iKuri ni iVurevure

Na vatunitutu ni galala vakalotu.

E vakavulica o Elder Robert D. Hales:

“E va na vatunitutu ni galala vakalotu e dodonu vei keda na Yalododonu Edaidai me da vakararavi kina ka taqomaka.

“iMatai na galala me da vakabauta. E sega ni dodonu me vosabeci, vakacacani, se bololaki mai vei ira na tamata yadua, se matanitu e dua ena vuku, ni ka e vakabauta me baleta na Kalou.

Na ikarua ni vatunitutu ni galala vakalotu sai koya na galala me da wasea na noda vakabauta kei na veika eda vakadinata vei ira tale eso. Ni da itubutubu, daukaulotu tudei, ka lewenilotu daukaulotu, eda vakanuinui ki na galala vakalotu me rawa kina ni da vakavulica na nona ivunau na Turaga ena noda veimatavuvale ka vakakina ki vuravura raraba.

Na ikatolu ni vatunitutu ni galala vakalotu sai koya na galala me tauyavutaki na isoqosoqo vakalotu, e dua na lotu, ka sokalou ena yalogalala kei ira tale eso. Na ikatinikadua ni yavu ni vakabauta e tukuna, “Keimami vakabauta ni dodonu me soli na galala me da dui qarava kina na Kalou Kaukauwa me vaka na dodonu ni tamata yadua, ia me soli ena galala oqori me dui lewa kina na ivakarau ni nodra lotu, na vanua me ra sokalou kina kei na kalou me ra lotu vua.”

“Na ikava ni vatunitutu ni galala vakalotu sai koya na galala me da na bulataka na noda vakabauta—galala mai na cakacakataki ni vakabauta sega walega e vale kei na valenilotu ia ena veivanua raraba eso” (“Maroroi na Galala ni Digidigi, Taqomaki na Galala Vakalotu,” Ensign se Liaona, Me 2015, 112).

Vakatoroicaketaki ni Noda Veivakavulici

Vakatavuvulitaka na “vuna.” “Ia, kevaka era kila [na lewe ni kalasi] na ituvatuva tawamudu nei Tamada Vakalomalagi me baleta na nodra bulamarau na Luvena, sa yaco me makare cake na inaki ni ivakavuvuli ni kosipeli kei na ivakaro ka vakauqeti vakalevu cake na talairawarawa” (Veivakavulici ena iVakarau ni iVakabula, 20).