Chalk re li B’eelomej, xb’aan li xElizabeth Gibbons

15–21 noviembre

Tzol’leb’ ut Sumwank 133–134

“Kawresihomaq eerib’ choq’ re lix k’ulunik li B’eelomej”

B’ar wankeb’ reheb’ li yaal li wankeb’ sa’ Tzol’leb’ ut Sumwank 133–134 li nakak’oxla naq tixtenq’aheb’ li komon? Rik’in tijok, k’oxla li rajomeb’ ru naq yooqat chi tzolok chiru li xamaan a’in.

Tz’iib’a li nakak’oxla

Xkanab’ankileb’ chi wotzok

Naru nakatz’iib’a li aatin ab’ink chiru li pizarron ut taakanab’eb’ li komon chixtz’iib’ankileb’ raqal re Tzol’leb’ ut Sumwank 133–134 chixk’atq, li neke’xk’oxla naq tento te’qab’i sa’ li qakutankil. Kanab’eb’ chixwotzb’al li reek’ahomeb’ chirixeb’ li raqal a’an. (Tenq’aheb’ li komon chi aatinak chirixeb’ li na’leb’ re tzol’leb’ ut ink’a’ li neke’xk’oxla chirix li jolomink tenamit.)

Xk’utb’al li tzolʼlebʼ

Tzol’leb’ ut Sumwank 133:1–19; 37–39

Li Qaawa’ naraj naq taqakawresi qib’ choq’ re li xkab’ xk’ulunik li Qaawa’.

• Chan ru taatenq’aheb’ li komon chixtawb’al ru k’a’ut naq aajel ru xsantob’resinkil qib’ re xtenq’ankileb’ li qas qiitz’in chixkawresinkileb’ rib’ choq’ re li xkab’ xk’ulunik li Kolonel? Naru nakakanab’eb’ li komon chirilb’al ru Tzol’leb’ ut Sumwank 133:1–19, 37–39 ut te’xtz’iib’a wiib’ tusulal: jun reheb’ li na’leb’ naxk’e li Qaawa’ re chan ru taqasantob’resi qib’ ut jun chik chirix chan ru taqakawresi qib’ sa’ li ruchich’och’ choq’ re li xkab’ xk’ulunik li Kolonel. K’a’ru naraj naxye, sa’ musiq’ej, “Elenqex … Babilonia” (raqal 5) ut “chex’eeleliq toj sa’ Sion”? (raqal 12). Re xtawb’al xkomon li na’leb’ chirix li santob’resink-ib’, chi’ilmanq “Santob’resink” sa’ li K’utul Raqal reheb’ li Loq’laj Hu.

Tzol’leb’ ut Sumwank 133:19–53

Li xkab’ xk’ulunik li Qaawa’ sahil ch’oolejilaq choq’ reheb’ li tiikeb’ xk’a’uxl.

• Sa’ xtzolb’aleb’ li loq’laj hu sa’ kab’l, eb’ li komon maare xe’xtaweb’ raqal wan xyaalal choq’ reheb’, li neke’xk’e wi’ xch’ool chiroyb’eninkil li xkab’ xk’ulunik li Kolonel. Kanab’eb’ chixwotzb’aleb’ li raqal a’in. Naru ajwi’ nakakanab’eb’ chirilb’aleb’ li raqal 19–53 sa’ ka’kab’il, re te’xsik’ k’a’ut naq taqoyb’eni li xkab’ xk’ulunik li Jesukristo. Naq eb’ li komon yooqeb’ chixwotzb’al li xe’xtaw, waklesi xch’ooleb’ chi aatinak chirix chan ru naq li Kolonel “kixtojeb’ rix, ut kiriiqaheb’, ut kixk’ameb’ ” (raqal 53). Naru nekeroksi li hoonal a’in re xb’ichankil sa’ komonil junaq li b’ich chirix lix wankilal li Kolonel chi tojok-ix, jo’ “At qaYuwaʼ, chi yaal xqapaabʼ ” (Eb’ li B’ich, 107). B’ar chik wan junaq chik li “b’ich re sahil ch’oolejil li junelik nakana” (raqal 33) li nokoxtenq’a chireek’ankil “xchaab’ilal lix ch’ool aj rahonel li Qaawa’ ”? (raqal 52).

Tzolʼlebʼ ut Sumwank 134

“Eb’ li jolomil tenamit k’ojob’anb’ileb’ xb’aan li Dios choq’ re lix chaab’ilaleb’ li winq.”

• Re xtenq’ankileb’ li komon chi tzolok sa’ Tzol’leb’ ut Sumwank 134, naru nakak’eheb’ patz’om jo’eb’ a’in sa’ jun li sek’ malaj chiru li pizarron: Chan ru naraj li Dios naq te’tenq’aaq li ralal xk’ajol xb’aaneb’ li jolomil tenamit? K’a’ru tento taqab’aanu wi eb’ li ruchich’och’il chaq’rab’ neke’xka’pak’ali ru li choxahil chaq’rab’? K’a’ruheb’ li qak’anjel ut qateneb’ankil sa’ li qatenamit? Patz’ reheb’ li komon naq te’xsik’ ru junaq reheb’ li patz’om ut te’roksi li tasal 134 re xsik’b’al xsumenkil. Tz’aama reheb’ li komon naq ink’a’ te’aatinaq chirix junaq li ch’uut aj jolominel tenamit.

• Li wank chi ach’ab’anb’il a’ yaal “b’ar, ut k’a’ru naqaloq’oni” (Eb’ lix Raqalil li Paab’aal 1:11), a’an jun osob’tesihom naraj xk’eeb’al li Qaawa’ reheb’ chixjunil. Wi nakak’oxla naq naru natenq’an li aatinak chirix li paab’ank chi ach’ab’anb’il, k’oxla rilb’al ru Tzol’leb’ ut Sumwank 134:4, 7, 9 sa’ komonil. K’a’ru neke’xk’ut chiqu li raqal a’in chirix lix k’anjeleb’ li jolomil tenamit sa’ li paab’ank chi ach’ab’anb’il? Chan ru naru naqak’utb’esi li paab’ank chi ach’ab’anb’il chiruheb’ li qas qiitz’in ut choq’ qe ajwi’ laa’o? Eb’ li komon naru neke’xtaw xkomon lix na’leb’eb’ re xsumenkil li patz’om sa’ “Xkomon chik li k’anjeleb’aal.”

Xkomon chik li k’anjeleb’aal

Xukil kawil pek re li paab’ank chi ach’ab’anb’il.

Li Elder Robert D. Hales kixk’ut:

“Wan kaahib’ li pek kaaxukuut re li paab’ank chi ach’ab’anb’il li tento taqak’ojob’ wi’ qib’ ut taqakol rix jo’ aj Santil Paab’anel sa’ Roso’jikeb’ li Kutan.

“Li xb’een a’an li paab’ank chi ach’ab’anb’il. Maa’ani taawech’e’q raj rix, taarahob’tesiiq, malaj taasak’e’q xb’aan yalaq ani malaj laj jolominel tenamit, xb’aan li napaab’an chirix li Dios. …

“Li xkab’il pek kaaxukuut re li paab’ank chi ach’ab’anb’il a’an li ach’ab’aak re xwotzb’al li qapaab’aal ut li naqapaab’ rik’ineb’ li qakomon. … Jo’ yuwa’b’ej, misioneer, ut komon misioneer sa’ li Iglees chapchooko rik’in li paab’ank chi ach’ab’anb’il re xk’utb’al lix tzol’leb’ li Qaawa’ sa’ li qajunkab’al ut sa’ chixjunil li ruchich’och’.

“Li roxil pek kaaxukuut re li paab’ank chi ach’ab’anb’il a’an li ach’ab’aak re xk’uub’ankil junaq li ch’uut re paab’ank, jun li iglees, ut loq’onink sa’ tuqtuukilal rik’ineb’ li komon. Sa’ xjunlajuhil lix Raqalil li Paab’aal naxye, “Laa’o naqaye naq wan li qak’ulub’ xloq’oninkil li Nimajwal Dios jo’ chanru naxtaqla tz’aqal li reek’ob’aal li qach’ool, ut naqak’e xk’ulub’eb’ chixjunil li winq chixb’aanunkil chi jo’kan, maak’a’ naxye chan ru, b’ar, ut k’a’ru neke’xloq’oni.” …

“Li xkaahil pek re li paab’ank chi ach’ab’anb’il a’an li ach’ab’aak re xyu’aminkil li qapaab’al—li ach’ab’aak re xk’anjelankil li qapaab’aal moko ka’aj ta wi’ sa’ li qochoch malaj li iglees, jo’kan ajb’an wi’ sa’ li tenamit” (“Xk’uulankil lix taql ch’oolej, xkolb’al rix li paab’ank chi ach’ab’anb’il,” Jolomil ch’utub’aj-ib’ re abril 2015).

Xchaab’ilob’resinkil li qak’utum

Taakʼut li “k’a’ut.” “Wi neke’xtaw ru lix junelikil k’uub’anb’il na’leb’ li qaChoxahil Yuwa’ choq’ re xsahileb’ xch’ool li ralal xk’ajol a’an, saqen chik sa’ xk’a’uxleb’ li rajb’aleb’ li xb’eenil na’leb’ ut li taqlahom, ut naniman li rajomeb’ chi paab’ank” (Li k’utuk jo’ li Kolonel, 20).