Valeniveivesu e Carthage

22–28 ni Noveba

Vunau kei na Veiyalayalati 135–136

O koya “A Dregata na Nona iLesilesi kei na Nona Cakacaka ena Nona Dra”

Ni ko wilika na wase 135–36, na Yalo Tabu e rawa me solia vei iko na vakasama ka rawa ni veivuke vei ira na lewe ni nomu kalasi. Na vakasama ena ituvatuva oqo ena rawa ni vakavurea eso na vakasama e rawa ni o vakayagataka ni o veivakavulici.

Vola na Veika o Vakauqeti Kina

Sureta na Veiwasei

Oqo e dua na sala mera sureti kina na lewe ni kalasi me ra wasea na nodra nanuma me baleta na wase 135–36. Sureti ira mera raitayaloyalotaka mada ni rawa ni ra vosa vua e dua na lewe ni Lotu mai na 1844, e dua e logalogaca tu me baleta na mate nei Josefa Simici ka lomaleqa me baleta na veika ena kauta mai ki na Lotu. Na cava eda rawa ni wasea mai na wase oqo ka rawa ni vukea na tamata oqo?

Vakavulica na iVunau

Vunau kei na Veiyalayalati 135; 136:37–39

Rau sa mai dregata o Josefa Simici kei Hyrum Smith na nodrau ivakadinadina ena nodrau dra.

• A “dregata” vakacava na nodrau ivakadinadina na nodrau solibula o Josefa kei Airame Simici? De vinaka me ra na vakananuma vakatitobu na lewe ni kalasi na taro oqo ni ra raica lesu na Vunau kei na Veiyalayalati 135; 136:37–39. Me ra qai wasea na veivakararamataki era na ciqoma. E rawa talega ni ra wasea na nodra nanuma me baleta na nodrau sa tuvakarau o Josefa kei Airame me rau solia na nodrau bula ena vuku ni dina. Eda na sega beka ni kerei me da mate ena vuku ni dina, ena rawa beka vakacava ni “drega” ni noda ivakadinadina, na noda bula?

Vunau kei na Veiyalayalati 135:3

O Josefa Simici e a levu cake sara na veika e a vakayacora me baleta na noda vakabulai mai vua e dua tale na tamataka vakavo ga o Jisu Karisito.

• E rawa vakacava mo vukei ira na lewe ni kalasi mera kila vakavinaka na veika sa cakava o Josefa Simici me baleta na nodra vakabulai? E rawa ni o vola ena vava ni volavola ena vuku ni veika a vakatakila mai vei Josefa Simici na Turaga, Au ka mo qai sureti ira na lewe ni kalasi me ra vakasamataka na sala me taucoko kina na iyatuvosa oqo. Era na rawa ni tekivu ena nodra vakasaqaqara ena Vunau kei na Veiyalayalati 135:3 me baleta na veika e a vakayacora o Josefa Simici me vukea na noda vakabulai. Vakasamataka mo sureti ira na lewe ni kalasi me ra wasea na nodra nanuma me baleti Josefa Simici kei na veika e vakatakila mai vua na Turaga.

• E dua tale na sala me vukei ira na lewe ni kalasi mera vakasamataka na itavi nei Josefa Simici sai koya mo sureti ira me ra vola ena vukuna e dua na itukutuku lekaleka se veivakacaucautaki ka dau volai me baleta ira na sa takali yani. E na rairai vinaka beka me veitalanoataki ka okati na veika bibi e a yaco se na veika a rawata ena nona bula. Na cava era raica ena Vunau kei na Veiyalayalati 135 e rawa ni ra vakaraitaka? Na cava e rawa ni ra vola ena nodra vosa ni veivakacaucautaki me vukei ira e so me ra vakaqaqacotaki e na nodra vakabauta na ilesilesi vakalou nei Josefa Simici?

• E vuqa na dina me baleti Jisu Karisito kei na Nona Veisorovaki a vakatakilai mai vei Josefa Simici—na dina ka a cau ki na nodra vakabulai na tagane kei na yalewa. Me vukei ira na lewe ni kalasi mera kila na cau eso oqo, e rawa ni o vakaraitaka e dua na iyaloyalo i Jisu Karisito ka kerei ira e vica na lewe ni kalasi me ra wasea e dua na tikina taleitaki me baleti Jisu Karisito mai na ivolanikalou ka vakatakilai mai vei Josefa Simici: ena iVola i Momani, na Vunau kei na Veiyalayalati, kei na Mataniciva Talei. Ena vukei keda vakacava meda kila vakavinaka ka toro voleka yani vua na iVakabula na vei ivolanikalou oqo? Ena cau vakacava na dina e tiko ena veitikina oqo ki na noda vakabulai?

Vunau kei na Veiyalayalati 136

E rawa ni da ciqoma na lewa ni Turaga ni da muria na nona ivakasala.

• iTuvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakatututaka me ra vakasaqara na lewe ni kalasi na ivakasala ena Vunau kei na Veiyalayalati 136 ka na rawa ni vukei ira mera veisautaka e dua na veivakatovolei medua na gauna vakayalo. E rawa ni o kerei ira na lewe ni kalasi me ra wasea e dua na ivakasala era sa kunea. E rawa talega ni o kerei ira mera vakasaqara e na wase oqo na ivakasala e rawa ni vukei keda meda ciqoma rawa kina na lewa ni Turaga ena gauna oqo, me vaka ga na kena a vukei ira na Yalododonu ena nodra “ilakolako ki na Ra” (tikina 1).

  

  iTikotiko ni Vula i Batabata, mai vei Greg Olsen

• E rawa ni na vakavu lasa vei ira na nomu kalasi me ra cakava e dua na ivolakabi me vaka na kena e kunei ena mekasini ni Lotu me baleta e dua na tikina ena wase e 136. Ni ra cakacaka yarua se yadudua, e rawa ni ra tekivu na lewe ni kalasi ena nodra vakasaqara e dua na dina ka veilauti vei ira. Me ra qai cakava e dua na ivolakabi rawarawa ka vakaraitaka na dina oqo, ka a vakatavulici ena yabaki 1847, ka se rawa ni vukei keda tikoga nikua.

iKuri ni iVurevure

Sere kei na ivakatagi e veisemati

Ni lagati na serenilotu oqo se saravi na vidio e rawa ni sureta na Yalo Tabu se vakauqeta na veitalanoai me baleta na cakacaka ni Parofita o Josefa Simici kei na nodra solibula na Yalododonu era a muri koya mai.

“Dua na Turaga Vutugu” (sere ni Lotu, naba 16). Ena nona a tiko voli e na valeniveivesu mai Carthage o Josefa Simici, e a kerei Joni Teila me lagata na sere ni Lotu oqo.

“Dokai Koya” (Sere ni Lotu, naba 15; na vidio, www.thetabernaclechoir.org/videos/praise-to-the-man-mormon-tabernacle-choir). A volai na qaqa ni sere ni Lotu oqo me ivakananumi kei Josefa Simici.

“Ka Talei, Ka Talei” (Sere ni Lotu, naba 17; na vidio, www.thetabernaclechoir.org/videos/come-come-ye-saints-mormon-tabernacle-choir).

“Faith in Every Footstep” (vidio, www.thetabernaclechoir.org/videos/faith-in-every-footstep).

Vakatoroicaketaki ni Noda Veivakavulici

Vakadinadinataka na iVunau Dina Sa rawa ni o wasea na nomu ivakadinadina me baleta na ivunau ni dina ena gauna taucoko ni lesoni, sega walega ni qai wasei e mua ni lesoni. Ni o kitaka vakakina, ena vakadeitaka na Yalo Tabu na dina ni ivunau e yalodra o ira o vakavulica. (Raica na Veivakavulici ena iVakarau ni iVakabula,21