li tzʼalam sa’ Carthage

22–28 noviembre

Tzol’leb’ ut Sumwank 135–136

“A’an xtz’ap chaq lix taqlanb’il k’anjel ut lix b’aanuhom rik’in tz’aqal lix kik’el”

Naq nakawil ruheb’ li tasal 135–136, maare tixk’e aana’leb’ li Santil Musiq’ej li naru naxtenq’aheb’ li komon. Li na’leb’ k’eeb’ileb’ sa’ li tusleb’ aatin a’in naru ajwi’ neke’xk’e xkomon aana’leb’ li maare taawaj roksinkil naq tatk’utuq.

Tz’iib’a li nakak’oxla

Xkanab’ankileb’ chi wotzok

Li na’leb’ a’in naru nak’anjelak re xb’oqb’aleb’ li komon chixwotzb’al xk’a’uxleb’ chirixeb’ li tasal 135–136. Kanab’eb’ chixk’oxlankil naq yookeb’ chi aatinak rik’in junaq komon re li Iglees sa’ li chihab’ 1844 li naxik xk’a’uxl chirix lix kamik laj Jose Smith ut naxik xk’a’uxl chirix li k’a’ raj ru taak’ulmanq rik’in li Iglees. K’a’ raj ru na’leb’ wan sa’eb’ li tasal a’in li naru naxtenq’a li kristiaan a’an?

Xk’utb’al li tzolʼlebʼ

Tzol’leb’ ut Sumwank 135; 136:37–39

Laj Jose ut laj Hyrum Smith ke’xtz’ap lix nawom xch’ooleb’ rik’ineb’ xkik’el.

• Chan ru naq lix mayejeb’ laj Jose ut laj Hyrum Smith “kixtz’ap” lix nawom xch’ooleb’? Eb’ li komon maare naru neke’xtz’il rix li patz’om a’an naq yooqeb’ chirilb’al ru Tzol’leb’ ut Sumwank 135; 136:37–39. Chirix a’an naru neke’xwotz li na’leb’ maare nachal sa’ xk’a’uxleb’. Naru ajwi’ neke’xwotz li reek’ahomeb’ chirix naq laj Jose ut laj Hyrum ke’wan xch’ool chixq’axtesinkil xyu’ameb’ sa’ xk’ab’a’ li yaal. Us ta ink’a’ taapatz’manq qe naq tookamq sa’ xk’ab’a’ li yaal, chan ru naq li qayu’am naru nawan jo’ jun “xtz’apb’al” lix nawom qach’ool?

Tzol’leb’ ut Sumwank 135:3

Laj Jose Smith q’axal wi’chik kixb’aanu choq’ re li qakolb’al chiru yalaq ani chik, ka’ajwi’ li Jesukristo naq’axok re.

• Chan ru naru nakatenq’aheb’ li komon chixtawb’al ru k’a’ru kixb’aanu laj Jose Smith chirix lix kolb’aleb’ a’an? Naru nakatz’iib’a chiru li pizarron: Sa’ xk’ab’a’ li kixk’utb’esi li Qaawa’ rik’in xtz’uumal re laj Jose Smith, laa’in … ut chirix a’an taakanab’eb’ li komon chixk’oxlankil chan raj ru te’xtz’aqob’resi ru li ch’ol aatin. Naru neke’xtikib’ rik’in rilb’al ru Tzol’leb’ ut Sumwank 135:3 re xsik’b’al k’a’ru kixb’aanu laj Jose Smith re qatenq’ankil chixk’ulb’al qakolb’al. K’oxla xkanab’ankileb’ li komon chixwotzb’al li reek’ahomeb’ chirix laj Jose Smith ut chirix li k’a’ru kixk’utb’esi li Qaawa’ rik’in xtz’uumal re a’an.

• Jun chik na’leb’ re xtenq’ankileb’ li komon chixk’oxlankil lix k’anjel laj Jose Smith, a’an xkanab’ankileb’ chixtz’iib’ankil jun ch’ina esil chirix lix kamik, malaj junaq ch’ina esil choq’ re lix muqb’al. Maare nakawaj aatinak chirix k’a’ru kik’ulman malaj lix k’anjel sa’ lix yu’am li naru ajwi’ neke’roksi. K’a’ru neke’xtaw sa’ Tzol’leb’ ut Sumwank 135 li naru ajwi’ neke’roksi? K’a’ raj ru te’xye sa’ li ch’ina esil re lix muqb’al re xtenq’ankileb’ jalan chik kristiaan chixkawob’resinkil lix paab’aaleb’ chirix lix choxahil k’anjel laj Jose Smith?

• Ke’k’utb’esiman naab’al li yaal chirix li Jesukristo ut lix tojb’al rix li maak rik’in laj Jose Smith—eb’ li yaal li neke’tenq’an sa’ xkolb’aleb’ chixjunileb’ li winq ut li ixq. Re xtenq’ankileb’ li komon chixk’eeb’aleb’ reetal li yaal a’an, naru nakak’ut jun xjalam-uuch li Jesukristo ut taakanab’eb’ junjunq li komon chixwotzb’al li raqal mas nawulak chiruheb’ chirix li Jesukristo sa’eb’ li loq’laj hu li k’utb’esinb’ileb’ rik’in laj Jose Smith: lix Hu laj Mormon, li Tzol’leb’ ut Sumwank, malaj li Q’ol Nim Xtz’aq. Chan ru naq eb’ li loq’laj hu a’an nokohe’xtenq’a chixtawb’al ru li Kolonel ut chi nach’ok rik’in a’an? Chan ru naq eb’ li yaal wankeb’ sa’eb’ li raqal a’an neke’tenq’an chiqakolb’al?

Tzolʼlebʼ ut Sumwank 136

Naru naqab’aanu li k’a’ru naraj li Qaawa’ naq naqataaqe li na’leb’ naxk’e.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nayeeman naq eb’ li komon naru te’xsik’eb’ li na’leb’ sa’ Tzol’leb’ ut Sumwank 136 li naru te’tenq’anq reheb’ chixjalb’al ru jun yale’k jo’ jun musiq’ejil numsihom. Naru taapatz’ reheb’ li komon naq te’xwotz junaq na’leb’ xe’xtaw. Naru ajwi’ nakapatz’ reheb’ naq te’ril ru li tasal re xsik’b’aleb’ li yehom li naru nokohe’xtenq’a chixb’aanunkil li naraj li Qaawa’ sa’ li qakutankil, jo’ naq kixtenq’aheb’ laj santil paab’anel “sa’ lix b’eenikeb’ sa’ rokeb’aal li saq’e” (raqal 1).

  

  Winter Quarters, xb’aan laj Greg Olsen

• Maare taawulaq raj chiruheb’ li komon xyiib’ankil junaq jalam-uuch jo’ li neke’tawman sa’eb’ li hu re li Iglees chirix jun reheb’ li raqal re li tasal 136. Maare sa’ ka’kab’il malaj chi junjunqal, naru neke’xtikib’ rik’in rilb’aleb’ ru li raqal re xsik’b’al junaq reheb’ li raqal li taawulaq chiruheb’. Chirix a’an naru neke’xyiib’ jun ch’ina jalam-uuch li tixk’ut chan ru naq li yaal a’an, li kik’utman sa’ 1847, toj naru nokoxtenq’a sa’ li kutan a’in.

Xkomon chik li k’anjeleb’aal

B’ich wan rilom

Xb’ichankileb’ li b’ich a’in malaj rilb’aleb’ li video naru naxb’oq li Santil Musiq’ej malaj naru naxmusiq’a jun aatinak chirix lix k’anjel li profeet aj Jose Smith, ut lix mayejeb’ laj santil paab’anel li toj ke’xb’aanu li k’anjel chirix a’an.

“Jun winq nebʼaʼ aj numel bʼe” (Eb’ li B’ich, 17). Naq wan chaq sa’ li tz’alam sa’ Carthage, laj Jose Smith kixpatz’ re laj John Taylor naq tixb’icha li b’ich a’an.

“Nimanbʼilaq li kiʼilok re Jehova” (Eb’ li B’ich, 16; www.thetabernaclechoir.org/videos/praise-to-the-man-mormon-tabernacle-choir). Li raatinul li b’ich a’an kitz’iib’aman choq’ re roxloq’inkil laj Jose Smith.

“Chalqex, chalqex aj santil paabʼanel” (Eb’ li B’ich, 18; www.thetabernaclechoir.org/videos/come-come-ye-saints-mormon-tabernacle-choir).

“Fe en cada paso” (video, www.thetabernaclechoir.org/videos/faith-in-every-footstep).

Xchaab’ilob’resinkil li qak’utum

Wotz xnawom aach’ool chirix li yaalil tzol’leb’. Naru nakawotz lix nawom aach’ool chirix li tzol’leb’ sa’ chixjunil li tzolok, moko ka’a’jwi’ ta sa’ xraqik. Naq taab’aanu, li Musiq’ej tixxaqab’ xwankil lix yaalalil li tzol’leb’ sa’ xch’ooleb’ li ani tzolb’ileb’ aab’aan. (Chi’ilmanq Li k’utuk jo’ li Kolonel, 21.)