O Josefa a raica na tamana, tinana, kei tacina ena matanitu silesitieli (na raivotu nei Joseph Smith ni matanitu vaka-silesitieli, Robert Barrett).

29 ni Noveba–5 ni Tiseba

Vunau kei na Veiyalayalati 137–138

“Na Raivotu ni Nodra Vueti na Mate”

A vakatavulica o Peresitedi Dallin H. Oaks: “Eda rawa ni vakataroga lo voli e dui lomada me baleta na ituvaki ni vuravura ni Yalo. Ia me da kakua ni vakavulica se vakayagataka me ivunau vakadonui na veika e sega ni veisotari kei na yavu ni ivunau vakadonui” (“Nuitaka na Turaga,” Ensign se Liaona, Nove. 2019, 28). Vakadeitaka ni yavutaki na nomuni veivosaki ena ivolanikalou kei na nodra vosa na parofita.

Vola na Veika o Vakauqeti Kina

Sureta na Veiwasei

Era tu e vuqa na veivakauqeti vakaivunau dina ka ra kunei ena Vunau kei na Veiyalayalati 137–38. Sureti ira na lewe ni kalasi me ra tuva eso vei ira. Qai solia e vica na miniti mo ni railesuva vata vakalasi na nodra lisi ka veitalanoataka na vuna e bibi kina na dina eso oqori. E dua beka sa bau vulica e dua na ka mai na wase oqo e a sega tu ni kila e liu?

Vakavulica na iVunau

Vunau kei na Veiyalayalati 137; 138:32–37

Na tamata yadua e na donumaka na madigi me digitaka na lagilagi vakasilesitieli.

• E vuqa vei keda eda kila eso kara a sega ni donumaka na madigi me ra ciqoma na kosipeli ena bula oqo—oka kina o ira era a mate ni ra se gone lalai. Sureti ira na lewe ni kalasi me ra wasea e dua na dina era kunea ena wase 137 ka vukei ira mera kila deivaki na ituvatuva ni Kalou baleti ira na tamata oqo. Na dina cava soti eda kunea ena Vunau kei na Veiyalayalati 138: 32–37 ka na kuria na noda kila na ituvatuva ni Kalou? Sa rawa me ra na wasea na lewe i kalasi na nodra nanuma me baleta na Tamada Vakalomalagi, na Nona yavu ni veivakabulai, kei na Veisorovaki i Jisu Karisito. Na itukutuku e tiko ena “iKuri ni iVurevure” ena veivuke ki na veivosaki oqo.

Vunau kei na Veiyalayalati 138:1–11, 25–30

Noda wilika ka vakasamataka vakatitobu na ivolanikalou ena vakarautaki keda meda ciqoma na ivakatakila.

• Na veika e sotavi Josefa F. Simici ka vakamacalataki tiko ena Vunau kei na Veiyalayalati 138:1–11, 25–30 ena vukei keda me da vakarautaki keda ena ciqoma ni ivakatakila. Ke ka, mera cakacaka vata na lewe ni kalasi me ra vakaraitaka mai na veika era sa vulica me baleta na ivakatakila mai na veitikina oqo. E rawa ni o tarogi ira na lewe ni kalasi me ra wasea na kena sa veivakarautaki vei ira na ciqomi ni ivakatakila kei na wiliki kei na vakananumi vakatitobu ni ivolanikalou (raica na Josefa Simici—Ai Tukutuku 1:11–12).

• E vakamacalataka na itukutuku nei Peresitedi M. Russell Ballard “Na Raivotu ni Nodra Vueti na Mate” (Ensign se Liaona, Nove. 2018, 71–74) na “gauna ni bula ni vakavakarau nei Joseph F. Smith me ciqoma na ivakatakila vakasakiti oqo [Vunau kei na Veiyalayalati 138].” Kevaka era wilika na lewe ni nomu kalasi na itukutuku nei Peresitedi Ballard ena macawa oqo, vakayaloqaqataki ira mera wasea na veika era vakauqeti kina. Ke sega, e rawa mo ni wilika vata vaka kalasi e vica na tiki ni itukutuku oya . Na cava e sa vakauqeti keda me baleta na bula nei Peresitedi Smith kei na nona itovo ni bula? Na cava eda rawa ni vulica mai na ivakaraitaki oqo?

  

  Josefa F. Simici, mai vei Albert E. Salzbrenner.

Vunau kei na Veiyalayalati 138:12–60

Na cakacaka ni veivakabulai e tomani tikoga ni oti na mate.

• Me vukea na nodra raica na dina ena 138:12–60, sa rawa mo vakarautaka vei ira e vica na taro me baleta na vuravura ni yalo ka sa saumi tu ena veitikina oqo. Me vaka beka oqo: Na cava a vakayacora voli na iVakabula ena nona a tiko voli ena vuravura ni Yalo? O cei na nona italai na Turaga, kei na cava na nodra itukutuku? E rawa ni ra digitaka na lewe ni kalasi e dua se vica vata na taro oqo ka cakacaka vakailawalawa me ra vakasaqara na kena isau. Me ra qai veiwaseitaka na dina era sa kunea. Na veisau cava soti era kauta mai na dina oqo ki na noda bula?

• Na cava eda na kaya vua e dua na tamata ka vakataroga, “Na cava ena yaco ni da sa mate?” Na cava eda na rawa ni wasea mai na Vunau kei na Veiyalayalati 138:12-60 ka rawa ni veivuke ena kena saumi na taro oqo? (raica talega na Alama 40:11–15).

iKuri ni iVurevure

Nona ituvatuva na Kalou e vakarautaka e dua na sala me ra ciqoma kina na kosipeli na Luvena kece.

E vakavulica o Peresitedi Henry B. Eyring:

“E dua wale sara na iwase lailai ni luve ni Kalou era rawata ena bula oqo me ra kila taucoko na ituvatuva ni Kalou, vata kaya na veivakadonui ki na cakacaka vakalotu ni matabete kei na veiyalayalati ka vakavuna me cakacaka vakataucoko ena noda bula na veisorovaki ni iVakabula.

“Eso beka ena sega ni dodonu vei ira oqo. E rawa ni ra raica sara me ivakadinadina ni sa sega ni dua na ituvatuva, sega na ka e gadrevi vakatabakidua me baleta na veivakabulai—era nanuma kina ni na sega ni na vakayacora e dua na Kalou dodonu, ka dauloloma e dua na ituvatuva me baleti ira walega e dua na iwase lailai ni Luvena. E so ena rairai vakabauta ni sa navuca taumada na Kalou o cei soti na Luvena ena vakabula o Koya ka vakarautaka vei ira na kosipeli, ka ra sega saraga ni ‘digitaki’ o ira ka sega ni rogoca na kosipeli.

“Ia o iko kei au e daru sa kila, ni vakalesui mai ni dina vua na Parofita o Josefa Simici, e vakaraitaka ni tuvatuva ni Kalou e sa uasivi ka dodonu vakalevu cake sara mai na kena oya. Sa vakarau tu na Tamada Vakalomalagi me vakasokomuna ka vakalougatataka taucoko na Nona matavuvale. Ni kila tu o Koya ni so vei ira era na sega ni digitaka me ra vakasoqoni vata mai, na Nona ituvatuva e sa solia kina vei ira yadua na Luvena na madigi me ra ciqoma se vakasuka na nona veisureti” (“Vakasoqoni Ira Vata na Matavuvale ni Kalou,” Ensign se Liaona, Me 2017, 20–21).

Vakatoroicaketaki Noda Veivakavulici

Vakayagataka na Nodra Vosa na Parofita “Na ivolanikalou kei na nodra vosa na parofita kei na iapositolo ena gauna oqo era ivurevure ni dina eda vakavulica. Ena veimadigi kece sara o donumaka, vakauqeti ira o vakavulica mera rai ga ki na vosa ni Kalou mera tuberi kina” (Veivakavulici ena iVakarau ni iVakabula, 21