Kivei Kemuni Kece na Tagane Lewenilotu Bula Kilikili, mai vei Emma Allebes

6–12 ni Tiseba

Na Yavu ni Vakabauta kei na Ai Vakaro Raraba 1 kei na 2

“Keimami Vakabauta”

Ena yalomasumasu wilika na Yavu ni Vakabauta kei na Ai Vakaro Raraba 1 kei na2, ka vakasaqara na veivakauqeti ni Yalotabu ni ko tuvanaka e dua na vuli vakaibalebale vei ira na lewe ni kalasi ena Sigatabu.

Vola na Veika o Vakauqeti Kina

Sureta na Veiwasei

O rawa ni sureti ira na lewe ni kalasi mera vakacavara na itukutuku oqo: “Au marau ni’u wilika na ivolanikalou ena macawa oqo baleta”

Vakavulica na iVunau

Na Yavu ni Vakabauta

Na Yavu ni Vakabauta e tiko kina na ivakadei dina ni kosipeli vakalesui mai.

• Sai koya oqo e dua na sala me ra vukei kina na lewe ni kalasi me ra wasea na veika era sa kunea ni vakaibalebale vakalevu ena Yavu ni Vakabauta: O rawa ni vola kina na naba 1 ki na 13 ena vava ni volavola ka kerei ira na lewe ni kalasi me ra vola tikiva toka na naba e dua na ka era sa vulica mai na kena yavu ni vakabauta. Na duidui cava e kauta mai na dina oqo ena noda veimaliwai vata kei ira na noda iTubutubu Vakalomalagi kei Jisu Karisito? De vinaka me ra wasea na lewe ni kalasi na sala sa vakavinakataka kina na Yavu ni Vakabauta na nodra vulica na kosipeli ka vukea na nodra wasea na kosipeli vei ira na tani.

Yavu ni Vakabauta 1:9; Ai Vakaro Raraba 1 kei na 2

Na Lotu i Jisu Karisito e dusimaki mai na ivakatakila.

• Na cava e bibi kina vei keda na kena tomani tikoga mai na ivakatakila ? Sureti ira na lewe ni kalasi me ra wasea na nodra nanuma me baleta na taro oqo. Me ra veitalanoataka talega na lewe ni kalasi na sala e veiwekani kina na ivakavuvuli ni kena tomani tiko na ivakatakila kei na Ai Vakaro Raraba 1 kei na 2. (Na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale e vakaturi kina na ivurevure yaga ka veiwekani kei na ivakatakila oqo.) Na cava eda vulica mai na Ai Vakaro Raraba 1 kei na 2 me baleta na nodra itavi na ivakatakila ena kena tuberi na Lotu? (raica tale ga Yavu ni Vakabauta 1:9 kei na itukutuku mai vei Peresitedi Gordon B. Hinckley ena “Ikuri ni ivurevure”). Na ivakaraitaki cava tale ni tomani tikoga ni ivakatakila e rawa ni ra vakasamataka na lewe ni kalasi? E vakayarayarataka vakacava ka vukea na noda taracake na matanitu ni Tamada Vakalomalagi na vei ivakatakila oqo?

• Vakasamataka mo sureti ira na lewe ni kalasi me ra railesuva na Ai Vakaro Raraba 1 kei na 2 ka me ra wasea na veika eso mai na ivakatakila oqo, ka me na rawa kina ni vukea e dua ka sasaga tiko me ciqoma e dua na veisau ni lawatu ka sa qai soli tikoga mai oqo, na ivakatakila, se na ivakavuvuli ni Lotu. Era sa vulica vakacava na lewe ni kalasi me ra vakararavi vua na Kalou ena nodra sasaga tiko me ra taura vinaka e dua e dua na ka me baleta na Lotu? A sa vakaukauwataki vakacava na nodra vuli ena macawa oqo na nodra vakabauta ni Turaga e liutaka tiko na Nona Lotu? Ena rawa me veivuke na itukutuku nei Peresitedi Dieter F. Uchtdorf ena “iKuri ni iVurevure”.

  

  Wilford Woodruff, mai vei H. E. Peterson.

iKuri ni iVurevure

“Na Yalo ni Kalou a tiko e kea.”

A veiqaravi voli vaka dua na lewe ni kuoramu ni iApositolo Le Tinikarua o Peresitedi Gordon B. Hinckley ena gauna a ciqomi kina ivakatakila e tukuni tiko ena Aivakaro Raraba 2 . Ena vica na yabaki e muri a sa qai vakamacalataka na veika a sotava:

“E dua na draki rokovi ka vakatabui e a sobura mai na loma ni rumu. Vei au, au vakila ni vaka e tadola mai e dua na sala mai na itikotiko vakaturaga mai lomalagi ki vua na parofita ni Kalou ka a tekiduru, ka vakatakekere voli ka tomani koya voli ko iratou na Tacina. A tiko e kea na Yalo ni Kalou. Ia ena kaukauwa ni Yalo Tabu a votu mai vua na parofita ko ya e dua na veivakadeitaki ni sa dodonu na ka e a masulaka voli, ni sa yaco mai na gauna, sa na vakatikori yani na veivakalougatataki ni matabete vei ira na tagane bula kilikili ena veivanua kecega se cava ga na nodra itutu vaka kawa.

“Na tamata yadua ena iwirini oya, ena kaukauwa ni Yalo Tabu, sa vakila na ka vataga oya.

“Sa dua na gauna vakanomodi ka cecere. E sega ni dua na domo vakayago me bau rogo. Ia sa vakasolokakana ena veivakadeitaki ki na neitou vakasama kei na yalo i keitou na domo ni Yalotabu” (“Priesthood Restoration,” Ensign, Okot. 1988, 70).

“Sa itovo matau tu me tiko na vakatataro.”

E kaya o Peresitedi Dieter F. Uchtdorf na veika oqo kivei ira era vakatitiqataka tiko na itukutuku makawa ni Lotu se na ivunau:

“Sa itovo matau tu me tiko na vakatataro—na sorenikau lailai ni veivaqaqai yalodina e sa dau buroro vakawasoma ka matua yani me dua na dina levu ni kila-ka. E tiko eso na lewe ni Lotu, ena dua na gauna, era a vakananuma vakabibi kina e so na taro dredre ka drakidrakiti eso. E dua na inaki ni Lotu oya me bucini ka vakabulabulataki na sorenikau ni vakabauta—ena so mada ga na qele veinuku ni vakatitiqa kei na veilecayaki. Na vakabauta sa ikoya na vakanuinuitaki ni ka e sega ni rairai, ia e ka dina.

“O koya gona, kemuni na taciqu kei na ganequ lomani—kemuni na noqu itokani talei—yalovinaka sara, vakatitiqataka taumada na nomu vakatitiqa eso ni bera ni o vakatitiqataka na nomu vakabauta. Me da kakua ni vakatara na vakatitiqa me vesuki keda ka tarovi keda mai na loloma vakalou, vakacegu, kei na isolisoli ka lako mai ena vakabauta na Turaga o Jisu Karisito” (“Mai, Tomani Keimami,” Ensign se Liaona, Nove. 2013, 23; raica talega ,” naStand Forever” mai vei Lawrence E. Corbridge, [Brigham Young University devotional, 22 ni Janu., 2019], speeches.byu.edu).

Vakatoroicaketaki na Noda Veivakavulici

E sa rawa ni da kaya “Au sega ni kila.” Me vaka ni sa dodonu mo vakayacora na nomu vinaka duadua mo sauma kina na nodra taro na nomu lewe ni kalasi me baleta na kosipeli, na Turaga e sega ni namaki iko mo kila na veika kece. Ni o sega ni kila mo na sauma vakacava e dua na taro, tukuna vakakina. Qai dusimaki ira na nomu lewenikalasi kina ivunau sa vakatakilai tu, ka wasea na ivakadinadina ni dina ni veika o sa kila. (Raica na Veivakavulici ena iVakarau ni iVakabula, 24.)