Re chixjunileb’ li komon winq re li Iglees li k’ulub’ejeb’, xb’aan li xEmma Allebes

6–12 diciembre

Ebʼ lix Raqalil li Paabʼaal ut li Awa’b’ejil Yehom 1 ut 2

“Laa’o naqapaab’ ”

Ileb’ ru Eb’ lix Raqalil li Paab’aal ut eb’ li Awa’b’ejil Yehom 1 ut 2 rik’in tijok, ut k’e aach’ool chixsik’b’al xb’eresihom li Santil Musiq’ej re xk’uub’ankil aana’leb’ re naq taawanq xyaalal laa k’utum choq’ reheb’ li komon sa’ li domingo.

Tz’iib’a li nakak’oxla

Xkanab’ankileb’ chi wotzok

Naru taapatz’ reheb’ li komon naq te’xtz’aqob’resi ru li ch’ol aatin a’in: “Nasaho’ inch’ool naq xwileb’ ru li loq’laj hu chiru li xamaan a’in xb’aan naq …”

Xk’utb’al li tzolʼlebʼ

Eb’ lix Raqalil li Paab’aal

Sa’ Eb’ lix Raqalil li Paab’aal wankeb’ li yaal aajeleb’ ru sa’ li evangelio li k’ojob’anb’il wi’chik.

• A’in jun na’leb’ re xtenq’ankileb’ li komon chixwotzb’al li na’leb’ wan xyaalal choq’ reheb’ xe’xtaw sa’eb’ lix Raqalil li Paab’aal: Naru nakatz’iib’aheb’ li ajl 1 toj sa’ 13 chiru li pizarron, ut taapatz’ reheb’ li komon naq te’xtz’iib’a chixk’atqeb’ li ajl k’a’ruhaq xe’xtzol sa’ lix raqalil li paab’aal a’ yaal li rajlil. Chan ru naq eb’ li yaal a’an neke’xjal li qawanjik rik’ineb’ li qachoxahil na’ qayuwa’ ut li Jesukristo? Eb’ li komon maare naru neke’xwotz chan ru naq eb’ lix Raqalil li Paab’aal neke’xchaab’ilob’resi li tzolok neke’xb’aanu chirix li evangelio malaj chan ru neke’tenq’aak chixwotzb’al li evangelio rik’ineb’ li ras riitz’in.

Eb’ lix Raqalil li Paab’aal1:9; Awa’b’ejil Yehom 1 ut 2

Lix Iglees li Jesukristo nab’eresiman rik’in li k’utb’esinb’il na’leb’.

• K’a’ut naq aajel ru choq’ qe li k’utb’esinb’il na’leb’? Kanab’eb’ li komon chixwotzb’al li reek’ahomeb’ chirix li patz’om a’an. Eb’ li komon naru ajwi’ neke’aatinak chirix chan ru naq li na’leb’ re li k’utb’esinb’il na’leb’ li toj yoo chi k’ulmank wan rilom rik’ineb’ li Awa’b’ejil Yehom 1 ut 2. (Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al wankeb’ na’leb’ chirixeb’ li k’utb’esinb’il na’leb’ a’an.) K’a’ru naqatzol sa’eb’ li Awa’b’ejil Yehom 1 ut 2 chirix lix k’anjel li k’utb’esinb’il na’leb’ sa’ xb’eresinkil li Iglees? (chi’ilmanq ajiw’ Eb’ lix Raqalil li Paab’aal 1:9 ut li raatin li Awa’b’ej Gordon B. Hinckley li wan sa’ “Xkomon chik li k’anjeleb’aal”). B’ar chik wan reetalil li k’utb’esinb’il na’leb’ naru neke’xye li komon? Chan ru neke’k’anjelak li k’utb’esinb’il na’leb’ a’an sa’ li qayu’am ut nokohe’xtenq’a chixxaqab’ankil li rawa’b’ejihom li qaChoxahil Yuwa’?

• Naru taapatz’ reheb’ li komon naq te’ril wi’chik ruheb’ li Awa’b’ejil Yehom 1 ut 2, ut te’xwotz k’a’ruhaq li naru naxtenq’a anihaq li wan xch’a’ajkilal re xk’ulub’ankil junaq ak’il na’leb’, k’utb’esinb’il na’leb’, malaj tzol’leb’ re li Iglees. Chan ru naq eb’ li komon xe’xtzol xkanab’ankileb’ rib’ sa’ ruq’ li Dios naq nach’a’ajko’ chiruheb’ xk’ulub’ankil junaq na’leb’ re li Iglees? Chan ru naq li xe’xtzol chiru li xamaan a’in xkawob’resi lix paab’aaleb’ chirix naq li Qaawa’ naxb’eresi lix Iglees? Li raatin li Awa’b’ej Dieter F. Uchtdorf li natawman sa’ “Xkomon chik li k’anjeleb’aal” naru natenq’an.

  

  Wilford Woodruff, xb’aan laj H. E. Peterson

Xkomon chik li k’anjeleb’aal

“Lix Musiq’ li Dios kiwan aran.”

Li Awa’b’ej Gordon B. Hinckley yoo chaq chi k’anjelak jo’ komon sa’ lix Molameb’ li Kab’laju chi Apostol naq kik’utb’esiman li na’leb’ li tz’iib’anb’il sa’ li Awa’b’ejil Yehom 2. K’iila chihab’ chik chirix a’an, kixseraq’i a’an:

“Sa’ li na’ajej a’an q’axal loq’ ut sant li ki’eek’aman. Chanchan ta wi’ naq kiteeman raj junaq li b’e re aatinak rik’in li choxahil k’ojleb’aal ut lix profeet li Dios li natz’aaman chi wiq’wo ut chi sutb’il xb’aaneb’ li ras riitz’in. Lix Musiq’ li Dios kiwan aran. Ut rik’in lix wankilal li Santil Musiq’ej, li profeet kireek’a naq li yoo wi’ chi tijok chaab’il, naq ak xwulak li hoonal, ut naq eb’ li xchaq’al ru rosob’tesihom li tijonelil tento te’k’eemanq reheb’ chixjunil li winq k’ulub’ejeb’, maak’a’ naxye aniheb’ xxe’ xtoonal.

“Chixjunileb’ li winq sa’ li siram a’an ke’reek’a ajwi’ a’an rik’in xwankilal li Santil Musiq’ej.

“K’a’jo’ xq’unil ut xsahil li hoonal a’an. … Eb’ li qaxik maajun xyaab’ kuxej ke’rab’i. A’b’an lix yaab’ xkux li Musiq’ej kihasb’ak chi tz’aqal sa’ qak’a’uxl ut sa’ qach’ool” (Priesthood Restoration,” Ensign, octubre 1988, 70).

“Ak re naq neke’wan qapatz’om.”

Li Awa’b’ej Dieter F. Uchtdorf kixye li na’leb’ a’in reheb’ li wankeb’ xkab’ rix xch’ool chirix li resilal malaj lix tzol’leb’ li Iglees:

“Ak re naq neke’wan qapatz’om—li iyaj re li chaab’il xkab’ rix ch’oolej nak’i ut naniman toj reetal naq nawulak jo’ kawil nawom. Moko k’iheb’ ta li komon li ink’a’ ta raj xyalomeb’ xq’e rik’in junaq nim ut ch’a’ajkil patz’om. Jun reheb’ li rajom li evangelio a’an xch’olaninkil li riyajil li paab’aal—us ta nim li li xkab’ rix ch’oolej ut li sachik ch’oolej. Li paab’aal a’an royb’eninkil li k’a’aq re ru ink’a’ na’ilman a’b’an tz’aqal yaal.

“Jo’kan ut ex raarookil was wiitz’in—ex wamiiw—ninpatz’ eere, xb’een chiwiib’anq eech’ool chirix lix kab’ rix eech’ool rub’elaj lee paab’aal. Maajun wa taqak’ulub’a naq lix wiib’al rix ch’oolej tooxk’e chi preexil ut tixram chiqu li rahok, li tuqtuukilal ut eb’ li choxahil maatan neke’chal rik’in li paab’aal chirix li Qaawa’ Jesukristo” (“Vengan, únanse a nosotros,” Liahona, noviembre 2013, 23; chi’ilmanq ajwi’ Lawrence E. Corbridge, “Stand Forever” [aatin yeeb’il sa’ li Universidad de Brigham Young, 22 enero, 2019], speeches.byu.edu).

Xchaab’ilob’resinkil li qak’utum

Us ajwi’ xyeeb’al, “ink’a’ ninnaw.” Us ta tento taayal aaq’e chixsumenkil lix patz’omeb’ li komon chirix li evangelio, li Qaawa’ ink’a’ naroyb’eni naq taanaw chixjunil. Naq ink’a’ taanaw chan ru xsumenkil k’a’ruhaq, ye naq ink’a’ nakanaw. Aatinan chirix li tzol’leb’ k’utb’esinb’il ut wotz xnawom aach’ool chirix li k’a’ru nakanaw. (Chi’ilmanq Li k’utuk jo’ li Kolonel, 24.)