13–19 ni Tiseba

Na Matavuvale: Ai Vakaro ki Vuravura Raraba

“Na Matavuvale sa iTakele ni Nona iTuvatuva na Dauveibuli”

Ni ko vulica tiko “Na Matavuvale: Ai Vakaro ki Vuravura Raraba” ena macawa oqo, vakasamataka na dina ena tokoni ira na lewe ni kalasi ena nodra sasaga me ra vaqaqacotaka na nodra itikotiko kei na matavuvale.

Vola na Veika o Vakauqeti Kina

Sureta na Veiwasei

Me ra vakayaloqaqataki ira na lewe ni kalasi me ra wasea na veika era sa vulica mai na nodra vuli ena ivakaro ni matavuvale, e na rawa ni o kerei ira mera digitaka e dua na parakaravu ka vakalekalekataka ena dua na iyatuvosa na veika e vakavulica na parakaravu oya.

Vakavulica na iVunau

“Na matavuvale sa itakele ni nona ituvatuva na dauveibuli.”

• E kilai na Lotu me baleta na nona dau vakabbibitaka na matavuvale, ka sa vakatakila na ivakaro ni matavuvale na inaki vakaivunau ni kena vakabibitaki. . Me vakauqeta na nodra veitalanoa baleta na ka oqo, sa rawa mo na sureti ira na lewe ni kalasi me ra raitayaloyalotaka ni dua e tarogi ira na cava na vuna e vakabibitaka kina vakalevu na Lotu na matavuvale. Na dina cava mai na ivakaro eda rawa ni wasea me sauma nona taro na tamata o ya?

• Na vuna sa rui bibi kina na na ivakaro ni matavuvale ni sa vakadeitaka dina tale na dina eso sa bololaki tiko ena noda gauna oqo. Na dina cava soti ena ivakaro e vukei keda me da kakua ni vakacalai ena vakasama lasu baleta na matavuvale ena vuravura nikua? Ena vakaimawe vakacava ki na digidigi eda vakayacora na dina eso oqo? Na itukutuku oqo nei Elder Dallin H. Oaks ena “iKuri ni iVurevure” ena rawa ni veivuke vakacava ena kena saumi na taro oqo.

  

  Me ra susuga cake na itubutubu na luvedra ena loloma kei na buladodonu.

“Ena qai kune na marau ena bula vakamatavuvale ni sa yavutaki ena ivakavuvuli ni Turaga o Jisu Karisito.”

• Ni veitalanoataki na veivakavuvuli e tiko ena parakaravu ono kei na vitu ni ivakaro ni matavuvale e rawa ni vukei ira na lewe ni nomu kalasi me ra kune marau vakalevu ena nodra veimaliwai vakamatavuvale. Vakasamataka mo tuva ena vava ni volavola na veivakavuvuli oqo ka sureti ira na lewe ni kalasi me ra digitaka e dua na ivakavuvuli me ra veivosakitaka yarurua. Sa rawa mera vakayagataka na veiitaro vaqo me dusimaki kina na nodra veivosaki: Na ivakaraitaki cava ni ivakavuvuli oqo eda sa raica ena bula ni matavuvale? Ena vakavuna vakacava na bula mamarau ena noda veimatavuvale na bulataki ni ivakavuvuli oqo? Ena veivuke vakacava na bulataki ni veivakavuvuli oqo me itakele kina ni bula vakamatavuvale na iVakabula? Na ivolanikalou cava e rawa ni vukea na noda matavuvale me ra kila vakavinaka cake na ivakavuvuli oqo? (Me ra kunea na lewe ni kalasi na ivolanikalou ena nodra vakayagataka na Topical Guide se iDusidusi ki na iVolanikalou [scriptures.ChurchofJesusChrist.org].) Mera na qai wasea na isa yadua ki na kalasi na veika era sa kunea.

  Vakabibitaka se cava ga na ituvaki ni noda matavuvale ena gauna oqo, eda rawa ni segata me da tara e dua na matavuvale tawamudu ena yavu ni iVakabula kei na nona kosipeli.

“Keimami sa kacivi kemuni kina na lewenivanua nuitaki … mo ni tutaka na veika oqo ka a caka me maroroya ka vaqaqacotaka na matavuvale.”

• O na vukei ira vakacava na nomu lewe ni kalasi mera kila vakavinaka na nodra itavi mera tutaka na dina ena ivakaro ni matavuvale? Me tekivutaki na veivosaki, sa rawa me veivosakitaki na cava era vulica na lewe ni kalasi mai na iulutaga ni ivakaro. Na cava na ivakaro? Eratou sa vakadonui beka vakacava na Mataveiliutaki Taumada kei na Matabose ni iApositolo Le Tinikarua me ratou veivakaroti ki vuravura raraba me baleta na matavuvale? Sa rawa me ra vola na lewe ni kalasi na ka era nanuma me usutu ni itukutuku ni ivakaro (vakayaloqaqataki ira me ra cavuqaqataka na malanivosa eso ni ivakaro). Oti me ra qai veivosakitaka na sala me ra vakatetea kina na itukutuku oqo ena nodra itikotiko se na matanitu. Na itukutuku nei Sister Bonnie L. Oscarson “Dautaqomaka na iVakaro ni Matavuvale” e umani tu kina na ivakaraitaki e rawa ni o railesuva vata vakalasi (Ensign se Liaona, Me 2015, 14–17). Sa rawa talega mo sarava na vidio “Defenders of the Faith” (ChurchofJesusChrist.org).

iKuri ni iVurevure

Na Matavuvale ena iTuvatuva ni Kalou

E vakavulica o Elder Dallin H. Oaks:

“O ira na Yalododonu Edaidai ka ra kila na ituvatuva ni veivakabulai ni Kalou e tiko vei ira na rai rabailevu duatani me vukei ira me ra raica na inaki ni ivakaro ni Kalou, na kena sega ni dau veisau na nona cakacaka vakalotu vakakina na itavi bibi ni iVakabula, o Jisu Karisito. Ena vueti keda mai na mate na Veisorovaki ni noda iVakabula, ka ke da veivutuni, ena vabulai keda mai na ivalavala ca. Ena rai vaka o ya, o ira na Yalododonu Edaidai era sa kila tu na veika me ra vakaliuca ka ra sa vakalougatataki ena kaukauwa me ra na lako curuma kina na dredre kei na mosi ena sotavi ena bula oqo.

“Dodonu me ra vakamuria na matavuvale na yavu ni kosipeli me baleta na bula tawamudu kei na bula vakacerecerei e tiko ena ivakaro ni 1995, ‘Matavuvale: Ai Vakaro ki Vuravura Raraba.’ Na veika e cauraka, e duidui sara mai na so, na veika vakalawa, na ivakarau, kei na ile ni vuravura eda bula tiko kina. Ena gauna oqo, na duidui e laurai votu sai koya na bula vata ka sega ni vakamau, vakamau vakamataqali vata, kei na susugi cake ni gone ena mataqali veiwatini vaka oya. O ira era sega ni vakabauta se vakanuinui kina bulatawamudu era sa vagolei sara ga kina veika vakavuravura ka nanuma ni ivakaro ni matavuvale e dua ga na itukutuku walega ka na ganita me na veisautaki. Ena kena veibasai, na Yalododonu Edaidai e vakadeitaka ni vakamacalataka na ivakaro ni matavuvale ni mataqali veimaliwai vakamatavuvale e rawa ni yaco kina na tiki bibi ni noda veivakatorocaketaki tawamudu” (“Na iTuvatuva kei na ivakaro,” Ensign se Liaona, Nove. 2017, 29).

Vakatorocaketaki Noda Veivakavulici

Bulataka na kosipeli ena yalomu taucoko. E vakavulica o Peresitedi Boyd K. Packer, “Na kaukauwa ena yaco mai ni sa cakava taucoko o qasenivuli na ka me vakavakarau kina, sega walega ni lesoni yadua, ia na veiyaloni tiko ni nona bula kei na Yalo” (Boyd K. Packer, Teach Ye Diligently [1975], 306).