iVakatakara ni Sucu caka ena Kopa kei na iBoroqele, mai vei J. Kirk Richards

20–26 ni Tiseba

Siganisucu

Na iSolisoli Sega ni Vakatautauvatataki rawa ni Luvena Vakalou na Kalou

Mo nanuma tiko ni nodra vuli kosipeli mana duadua na lewe ni kalasi ena yaco ena nodra veivale. Ni o vakarau veivakavulici, vakasamataka na sala e rawa ni vaqaqacotaka kina na nodra vulica vakataki ira se vakamatavuvale na nomu kalasi ni Matawilivola ni Sigatabu.

Vola na Veika o Vakauqeti Kina

Sureta na Veiwasei

Sa vakalougatataki vakacava na lewe ni nomu kalasi era vulica na “Na Karisito sa bula” (ChurchofJesusChrist.org) ena macawa oqo? E rawa ni o wasea na vosa oqo nei Peresitedi Jean B. Bingham, na Peresitedi Raraba ni iSoqosoqo ni Veivukei, ka qai sureti ira na lewe ni kalasi me ra veivosakitaka na veika vata oya era sa sotava: “Niu sa vulica na bula kei na ivakavuvuli i Jisu Karisito ena vakanamata kei na yalodina me rawa niu cavuqaqataka na,‘Na Karisito sa Bula’ sa levu cake na noqu vakavinavinaka kei na loloma vua na noda iVakabula. Na iyatuvosa yadua ni itukutuku vakauqeti oya e koto kina e dua na ivunau ka sa vakavinakataka na noqu kila na Nona itavi vakalou kei na nona cakacaka e vuravura. Na veika au sa vulica ka vakila ena gauna oqo ni vuli kei na vakanananu sa vakadeitaka ni o Jisu vakaidina ‘na rarama, na bula, kei na inuinui kei vuravura’” (“Me Sinai na Nomudou Marau,” Ensign se Liaona, Nove. 2017, 85).

Vakavulica na iVunau

“E sega ni dua tale e a veivakayarayarataki vakalevu cake.”

• E rawa ni ra wilika na lewe ni kalasi na imatai ni parakaravu ni “Na Karisito sa Bula” ka wasea na nodra nanuma me baleta na cava na vuna e bibi cake kina na veivakayarayarataki nei Jisu Karisito mai vei ira na tamata kecega. Na itukutuku cava tale ena “Na Karisito sa Bula” e tokona tu na itukutuku oqo? Sureti ira na lewe ni kalasi me ra wasea se sa vakayarayarataki ira vakacava o Koya. Na vidio “Why We Need a Saviour” (ChurchofJesusChrist.org) e rawa ni tokona na nomudou veivosaki.

• Sa bau yaco beka ena dua na gauna me vakamacalataka kina e dua na lewe ni kalasi vua e dua e duatani nona vakabauta na cava na vuna era dau marautaka kina na Siganisucu? De rawa beka ni ra wasea kina na veika era sa sotava. Se e rawa ni o sureti ira na lewe ni kalasi me ra raitayaloyalotaka ni ra a tarogi vakaoqo mai vua e dua e sega ni matau vei ira na ivakavuvuli va-Karisito. Me da na sauma vakacava na taro oqo? Vakayaloqaqataki ira na lewe ni kalasi me ra railesuva na “Na Karisito sa Bula” ni tiko ena noda vakasama na taro vata oqo. E rawa talega mo ni wilika vata vakalasi na Luke 2:10–14 se lagata e dua na serenilotu ka vakamacalataka na marau ni Siganisucu (me vakataka na “Meda Marau,” Serenilotu, naba 116) ka tukuna na vuna e kauta mai kina na “marau levu na sucu i Karisito.” Na cava eda rawa ni cakava meda “ciqoma kina na [noda] Tui”?

  

  Na Rarama kei Vuravura, mai vei Howard Lyon

“Me vakavinavinakataki na Kalou me baleta na [Nona] isolisoli e sega ni vakatautauvatataki rawa.”

• Mai “Na Karisito sa Bula,” era cavuta na iApositolo ni iVakabula e “isolisoli” mai vei Tamada Vakalomalagi. Me vukea nodra vulica eso tale na ka me baleta na isolisoli oqo, e rawa ni o vola ena papa ni volavola Mai vei Jisu Karisito, sa solia mai vei keda na Kalou na isolisoli ni … ka sureti ira na lewe ni kalasi me ra vakatura na sala me taucoko kina na iyatuvosa oqo, ka yavutaki ena ka era sa wilika ena “Na Karisito sa Bula” kei na itukutuku nei Peresitedi Russell M. Nelson ena “IKuri ni iVurevure.” Eda na ciqoma vakacava na isolisoli eso oqo? Sa rawa mo sureti ira na lewe ni kalasi mera digitaka e dua vei ira na isolisoli oqo ka cakacaka me ra ciqoma vakataucoko na isolisoli o ya.

iKuri ni iVurevure

Na iLoloma e solia na iVakabula.

Ni vosa ena gauna ni Siganisucu, a tuva o Peresitedi Russell M. Nelson e va na isolisoli e solia tu na iVakabula vei ira kece era sa tuvakarau me ra ciqoma:

“Matai, sa solia o Koya vei iko kei au na ivakarau tawayalani ni loloma. O ya e oka kina na ivakarau ni lomani ira na tawalomani kei ira ka sega walega ni sega ni lomani iko ia era vakalialiai ka vakacacani iko.

“Ena veivuke ni iVakabula, sa rawa ni da vulica meda loloma me vakataki Koya.

Nai karua ni solisoli sa solia vei iko na iVakabula oya meda rawa ni veivosoti. Mai na Nona Veisorovaki vakalou, sa rawa ni o vosoti ira na vakamavoataki iko ka ra na rairai sega ni kauwaitaka na nodra vakacacani iko.

“Ai katolu ni solisoli ni iVakabula oya na veivutuni. E sega ni dau kilai vakamata tu na isolisoli oqo. Sa isolisoli vakasakiti na veivutuni. E sa dua na ivalavala meda kakua ni rerevaka. E sa isolisoli kivei keda meda ciqoma ena reki ka vakayagataka—mokota saraga—ena veisiga ni da saga meda vakataka cake na noda iVakabula.

“Ai kava ni solisoli mai vua na noda iVakabula e sa dua vakaidina na yalayala—sa iyalayala ni bula tawamudu. Na bula tawamudu esa mataqali ka ivakarau ni bula e bulataka na Tamada Vakalomalagi kei na Luvena Dau Lomani. Ni solia vei keda na Tamada na bula tawamudu, sa kaya dina tiko o Koya, “Kevaka o sa digitaka mo muria na Luvequ—ke sa nomu gagadre mo yaco mo vakataki Koya vakalevu cake—ena yaco na gauna ko na bula me vaka keirau sa bula ka vakatulewa ena vuravura kei na matanitu eso me vakataki keirau.

“Ena kauta mai vei keda na va na isolisoli vakasakiti oqo na reki vakaitamera ni da ciqoma. Era sa vakayacori rawa na kena lako sobu mai o Jiova me lako mai ki vuravura me vaka na gonelailai o Jisu” (“Four Gifts That Jesus Christ Offers to You” [Lotu ni Siganisucu ni Mataveiliutaki Taumada, 2 ni Tise., 2018], broadcasts.ChurchofJesusChrist.org).

Vakatorocaketaki Noda Veivakavulici

Vakarautaki iko vakayalo. “Na veivakatavulici kaukauwa ni kosipeli e sega ni kena ibalebale walega na vakarautaki ni lesoni ia meda vakarautaki keda. O ira na qasenivuli mana ni kosipeli — ni se bera ni ra vakasamataka mera vakatawana na gauna ni kalasi — vakanamata ki na kena vakasinaiti na yalodra ena Yalo Tabu” (veivakavulici ena ivakarau ni iVakabula, 12).