Dua na iVakarau ni Veivakavulici

Na ituvatuva yadua ena ivola oqo e vakamuria e dua na ivakarau ni veisureti kina veiwasei kei na vakavulici ni ivunau.

Sureta na Veiwasei

Me tiki ni kalasi yadua, sureta na kalasi mera wasea na veivakararamataki kei na ka era sotava ena macawa sa oti ni ra vulica na ivolanikalou vakai ira yadua ka vakamatavuvale ka cakava sara na ka era sa vulica. Vukea na kalasi mera raica ni nodra vuli yadua e taudaku ni kalasi sa ka bibi. Na nodra saumaki mai vakayadudua ena sega walega ni yaco mai ena vuli ena Siga Tabu ia ena veika talega era sotava ena veisiga. Ni ra rogoca vakai ira na lewe ni kalasi na veika era sa dui sotava, era na vakauqeti mera na dui vakasaqara na ka vata oqori.

Sega ni tamata yadua ena wilika na wase ni lesoni yadua, ka so era wilika era na sega ni lomadra mera wasea. Raica na lewe ni kalasi taucoko mera vakila ni ra sa tiki yaga ki na kalasi, se ra wasea e dua na ka se sega.

Vakavulica na iVunau

O iko kei na nomu kalasi mo ni raica matua na ivunau kei Jisu Karisito—na dina tawamudu ni kosipeli—e tiko ena itukutuku ni ivolanikalou e lesi. Ni veivosakitaki na ivunau mai na ivolanikalou, na tikina cava, vosa, veika e sotavi, taro, kei na ikuri ni ivurevure o rawa ni wasea? O na vakayagataka vakacava na ivurevure oqo me vukea na kalasi mera kunea ka kila vinaka na ivakavuvuli ni kosipeli? E rawa vakacava mo vukei ira mera tara cake na nodra vakabauta na Tamada Vakalomalagi kei Jisu Karisito?