Li na’leb’ re xb’oqb’aleb’ chi tzolok xjuneseb’ ut jo’ junkab’al

A’in junjunq li na’leb’ re aatenq’ankil chixwaklesinkileb’ xch’ool li komon sa’ li tzoleb’aal re te’xtzol li raatin li Dios sa’ kab’l xjuneseb’ ut jo’ junkab’al. Chiwanq sa’ aach’ool naq moko chixjunileb’ ta li komon te’ruuq chixtzolb’aleb’ li loq’laj hu rik’ineb’ lix junkab’al (qayehaq, wankeb’ li komon li neke’wan xjuneseb’, malaj moko komoneb’ ta li wankeb’ sa’ xjunkab’aleb’).

• Kanab’eb’ li komon chixwotzb’al li k’a’ru xe’xk’ul sa’ xtzolb’aleb’ li loq’laj hu sa’ kab’l. Qayehaq, naru taapatz’ reheb’ naq te’xwotz jun li raqal li xnimob’resi xrahomeb’ choq’ re li Jesukristo.

• Patz’ reheb’ li komon naq te’xye k’a’ru yookeb’ chixb’aanunkil re naq taachaab’ilo’q chiruheb’ li tzolok xjuneseb’ malaj sa’ junkab’al. (Neke’tawman li na’leb’ sa’ “Li na’leb’ re xchaab’ilob’resinkil lix tzolb’aleb’ li loq’laj hu aajunes” ut sa’ “Li na’leb’ re xchaab’ilob’resinkil lix tzolb’aleb’ li loq’laj hu jo’ junkab’al” sa’ Kim, Taaqehin—Choq’ reheb’ li komon ut li junkab’al.)

• Kanab’eb’ li komon chixwotzb’al chan ru naq xe’xk’anjelaheb’ li musiq’ejil na’leb’ xe’xk’ul naq yookeb’ chixtzolb’aleb’ li loq’laj hu xjuneseb’ malaj sa’ junkab’al.

• Chiru junjunq k’asal, k’ut chiruheb’ li komon sa’ laa tzoleb’aal eb’ li k’anjeleb’aal yiib’anb’il xb’aan li Iglees re xtenq’ankileb’ li komon chixtzolb’al li evangelio, jo’eb’ li k’anjeleb’aal li neke’tawman sa’ scriptures.ChurchofJesusChrist.org; “Relatos de las Escrituras” li wan sa’ children.ChurchofJesusChrist.org; li aatin choq’ reheb’ li saaj komon sa’ youth.ChurchofJesusChrist.org; eb’ li hu re seminario ut instituto; ut eb’ li video, li chapb’il aatin, ut eb’ li jalam-uuch li wankeb’ sa’ MediaLibrary.ChurchofJesusChrist.org. Naab’al reheb’ li k’anjeleb’aal a’in neke’tawman sa’ li aplicación Biblioteca del Evangelio.

• Chiru junjunq k’asal, ch’olob’ chan ru roksinkil li aplicación Biblioteca del Evangelio re xtzolb’aleb’ li loq’laj hu, ut chan ru xk’eeb’al reetalileb’ li raqal ut xtz’iib’ankil li na’leb’ nakak’ul.

• B’oq junjunq reheb’ li komon chixwotzb’al chan ru neke’xk’ut jun na’leb’ chirix li evangelio sa’ xjunkab’aleb’.