Vakayagataki ni Lako Mai, Mo Muri Au—Baleta na Matawilivola ni Siga Tabu

Vakarau mo Veivakavulici ena Matawilivola ni Siga Tabu

Na vuli yadudua kei na matavuvale e vale me usutu ni vuli kosipeli. Oqo e ka dina vei iko kei ira o vakavulica. Ni ko vakarau mo veivakavulici, tekivuna ena nomu gauna vata kei na ivolanikalou. Na vakavakarau bibi duadua vei iko ena yaco ni o lako mai vei Karisito, vakasaqara na ivolanikalou ka segata na veivakauqeti ni Yalo Tabu.

NaLako Mai, Mo Muri Au—Baleta na Tamata Yadua kei na Matavuvale sa dua na tiki bibi ni nomu vuli vakai iko kei na nomu vakavakarau mo veivakavulici. Ena vukea nomu rawata e dua na kilaka titobu ena ivakavuvuli vakaivunau e kunei ena ivolanikalou. Ena rawa talega mo vakauqeti ka sureti ira na lewe ni kalasi mera vakayagataka na Lako Mai, Mo Muri Au—Baleta na Tamata Yadua kei na Matavuvale me laveti cake kina na nodra dui vulica yadua ka vakamatavuvale na ivolanikalou (mo vukei kina, raica na “Vakasama me Baleta na Vakayaloqaqataki ni Vuli ni Tamata Yadua kei na Matavuvale” ena ivurevure oqo). Ni ko cakava, nanuma mo raici ira vakabibi na lewe ni kalasi e dredre vei ira mera tokona ka vuli ivolanikalou vakamatavuvale kei na lotu vakamatavuvale.

Ni ko vakavakarau tiko, o na nanuma ka vakauqeti baleti ira o vakavulica tiko, ena tarai cake vakacava na nodra vakabauta na Tamada Vakalomalagi kei Jisu Karisito mai na ivakavuvuli ni ivolanikalou, kei na sala mo vakauqeti ira kina me ra raica ka kila na veivakavuvuli oqori ena nodra vulica na ivolanikalou me baleti ira vakataki ira.

Vakatutu ni Vuli

Ni o vakavakarau tiko mo veivakavulici, o na rairai rawata na ikuri ni veivakauqeti ena nomu vadikeva na ituvatuva ena ivurevure ni vuli oqo. Kakua ni raica na veivakasama oqo me idusidusi muri vakamatailalai ia me ra sa vakatutu ga ni kena vakayadrati na nomu veivakauqeti. O kila tiko na lewe ni nomu kalasi, ka na yaco mo kilai ira vinaka cake sara ni dou sa vuli vata ena kalasi. E kilai ira talega na Turaga, ka na vakauqeti iko ena sala vinaka duadua mo vukea na kalasi mera yavutaki cake ena vulici ni kosipeli era cakava tiko mai vale.

E vuqa na ivurevure tale eso sa rawa ni o vakayagataka ena nomu vakavakarau, oka kina na vakasama mai na Lako Mai, Mo Muri Au — Baleta na Tamata Yadua kei na Matavuvale kei na mekasini ni Lotu. Na ikuri ni ivakamacala me baleta oqo kei na ivurevure tale eso, raica na iwase ka kena ulutaga na “iKuri ni iVurevure” ena ivurevure oqo.

Eso na Ka Me Nanumi Tiko

• Ni o qasenivuli, sa nomu itavi bibi mo tokona, vakayaloqaqataka, ka tara cake na vuli kosipeli ni kalasi ena nodra itikotiko. Ena gauna era sega beka kina ni dau vuli kosipeli e veigauna mai vale eso na lewe ni kalasi, ena rawa ni o cakava na veisau lelevu ena nodra vakayaloqaqataki mera cakava na nodra itikotiko me itakele ni vuli kosipeli.

• Na nodra saumaki na lewe ni kalasi ki na kosipeli i Jisu Karisito ena titobu cake ni ra sa kila vinaka ka bulataka na ivunau dina. Vakayaloqaqataki ira mera vola ka cakacakataka na veivakauqeti ni Yalo Tabu vei ira.

• Na veivakavulici e sega walega ni veivakasalataki, ia e levu cake sara mai na kena liutaki e dua na veivosaki. Sa tiki ni nomu ilesilesi mo vakayaloqaqataka mera vakaitavi ia me veilaveti ka yavutaki tiko ena ivolanikalou. Sa dodonu talega mo wasea na vakasama veivakauqeti o a ciqoma ni o vulica na ivolanikalou.

• Mo nanuma tiko ni ra sa vakila tiko na veika vakayalo na nomu lewe ni kalasi ena nodra vulica na ivolanikalou mai vale. E rawa ni o tokona na nodra vuli ivolanikalou ena nomu vakarautaka vei ira na madigi me ra wasea na veika era vulica tiko mai vale kei na sala sa veivakayarayarataki tiko kina ena nodra bula.

• E vinakata na Tamada Vakalomalagi mo qaqa ena nomu itavi vaqasenivuli. Sa vakarautaka tu o Koya e vuqa na ivurevure me vukei iko mo qaqa, okati kina na soqoni ni matabose ni qasenivuli. Ena vei soqoni oqo ena rawa mo veitalanoataka kina kei ira eso tale na qasenivuli na vei bolebole o sotava tiko. E rawa talega ni o veitalanoataka ka vakatovotovotaka na ivakavuvuli eso ni veivakavulici va-Karisito.

• Era na vuli vinaka na tamata ni soli na madigi mera veivakavulici. Ena so na gauna, mo vakatara vei ira na lewe ni kalasi kei ira na itabagone, mera vakavulica e dua na tiki ni lesoni. Me yavutaki na lewa oqo ena nodra gagadre kei na gumatua na lewe ni kalasi. Ke o sa sureta e dua na lewe ni kalasi me veivakavulici, taura na gauna mo vukei koya me vakavakarau ena kena vakayagataki na vakasama e tiko ena ivurevure oqo vakakina ena Lako Mai, Mo Muri Au—Baleta na Tamata Yadua kei na Matavuvale. Nanuma tiko ni ko sa kacivi mo qasenivuli, sa nomu itavi na veika me vakavulici ena kalasi.

• Na ivurevure ni vuli oqo e oka kina na vakavulici ni ituvatuva ni veimacawa ena loma ni yabaki. Ena vei-Sigatabu ni sega ni vakayacori na Matawilivola ni Sigatabu, na matavuvale ena tomana tiko me wilika na Vunau kei na veiyalayalati e vale me vaka na ituvatuva e tuvai koto ena Lako Mai, Mo Muri Au—Me Baleta na Tamata Yadua kei na Matavuvale. Sa rawa mo digia mo levea na lesoni ka lutu ena dua na macawa ni sega ni vakayacori na Matawilivola ni Sigatabu, se o me vulici kina na mai na lesoni vata ena dua ga na kalasi.