Ato Siyang Simbahon, ni Dana Mario Wood

Enero 14–20

Lucas 2; Mateo 2

Nanganhi Kami Aron sa Pagsimba Kaniya

Sa dili pa ka magbasa sa mga ideya niini nga outline, tun-i ang Lucas 2 ug Mateo 2, ug irekord ang imong espiritwal nga mga impresyon. Makatabang kini kanimo nga makadawat og pagpadayag kon unsaon pagtubag ang mga panginahanglan sa imong klase sa labing maayo nga paagi.

Irekord ang Imong mga Impresyon

Awhaga ang Pagpaambit

Unsaon nimo pag-awhag ang mga sakop sa klase sa pagpakigbahin sa ilang mga ideya ug mga kasinatian samtang nagtuon sila niining mga kasulatan sa indibidwal nga paagi ug kauban ang ilang mga pamilya? Bisan kon posible nga pamilyar sila sa istorya bahin sa pagkatawo sa Manluluwas, mahimo silang makabaton kanunay og bag-ong espiritwal nga mga ideya. Ikonsiderar ang pagdapit og pipila ka sakop sa klase sa pagpakigbahin og mensahe nga ilang nakit-an sa Lucas 2 o Mateo 2 nga nakapatandog kanila sa bag-ong paagi.

Itudlo ang Doktrina

Lucas 2:1–38; Mateo 2:1–12

Dunay daghang saksi sa pagkatawo ni Kristo.

• Ang direkta nga mga istorya bahin sa mga nagsimba diha sa Lucas 2 ug Mateo 2 makatabang sa mga sakop sa imong klase sa pagpamalandong sa mga paagi nga ilang mapakita ang ilang gugma alang sa Manluluwas. Ribyuha ang tsart diha sa outline karong semanaha sa Dali, Sunod Kanako—Alang sa mga Indibidwal ug mga Pamilya. Ang ubang mga tawo sa imong klase mahimong adunay mapakigbahin nga mga ideya gikan niini nga kalihokan, o mahimo nimong buhaton ang kalihokan isip usa ka klase. Nganong importante man nga kining mga saksi ni Kristo nagagikan sa nagkalain-laing kahimtang sa kinabuhi? Unsaon nato sa pagsunod sa ilang mga ehemplo?

• Sa wala pa mosimba kining mga saksi sa batang Kristo, gipangita nila Siya. Aron matabangan ang mga sakop sa klase nga makakat-on gikan sa ilang ehemplo, mahimo nimong isulat diha sa pisara ang mosunod nga mga ulohan: Mga Magbalantay sa Karnero, Ana, Simeon, ug Mga Mago. Dapita dayon ang mga sakop sa klase sa pagsiksik sa Lucas 2 ug Mateo 2 ug isulat diha sa pisara kon unsay gibuhat niining mga tawhana sa pagtinguha sa Manluluwas. Unsa may gisugyot niining mga istorya mahitungod sa pipila ka paagi nga atong matinguha si Kristo?

  

  Ang mga magbalantay sa karnero nahimong pipila sa unang mga saksi bahin sa pagkatawo sa Manluluwas.

• Ang usa ka object lesson makapadasig ba sa mga sakop sa imong klase sa paggahin og luna diha sa ilang kinabuhi alang sa Manluluwas? Ikonsiderar ang mosunod nga ideya: Pagdala og jar ngadto sa klase ug, human dungan nga maribyu ang Lucas 2:7, hangyoa ang mga sakop sa klase sa pagpuno sa jar og nagkadaiyang mga butang nga nagrepresentar sa mga paagi sa atong paggahin sa atong panahon. Kon mapuno na ang jar, dapita ang usa ka tawo nga sulayan sa pagsukip og usa ka hulagway sa Manluluwas. Unsay gisugyot niining analohiya mahitungod sa paggahin og luna alang kang Kristo diha sa atong kinabuhi? Unsay atong mahimo sa lahi nga paagi sa paggahin og luna alang Kaniya? Ang pamahayag ni Presidente Thomas S. Monson sa “Dugang nga mga Kapanguhaan” mahimong makatabang sa pagtubag niining pangutana.

Mateo 2:13–23

Ang mga ginikanan mahimong makadawat og pagpadayag sa pagpanalipod sa ilang mga pamilya.

• Usa ka leksyon gikan sa bihaye nila ni Jose ug Maria ngadto sa Ehipto mao nga ang Ginoo makahatag og pagpadayag sa pagtabang sa mga ginikanan sa pagpanalipod sa ilang mga pamilya gikan sa peligro. Aron sa pag-awhag og panaghisgutan bahin niini nga punto, ikonsiderar ang pagdapit sa mga sakop sa klase sa paglista diha sa pisara sa pipila ka peligro nga giatubang sa mga pamilya karon. Unsa ang atong makat-unan gikan sa Mateo 2:13–23 kon unsaon sa pagpanalipod sa atong mga pamilya ug sa atong kaugalingon gikan niining mga peligro? Sa unsang paagi nga ang personal nga pagpadayag makatabang kanato sa pagpanalipod sa atong mga pamilya o sa ubang mga minahal sa kinabuhi gikan sa peligro? Unsa nga tambag ang gihatag sa mga propeta ug mga apostoles aron sa pagtabang kanato sa pagpanalipod sa atong mga pamilya?

• Isip kabahin niining panaghisgutan, mahimo nimong dapiton ang mga sakop sa klase sa pagpanganta og dungan sa “Home Can Be a Heaven on Earth,” Hymns, nu. 298, o laing awit mahitungod sa mga pamilya. Unsay gitudlo sa awit kon unsa ang mahimo sa mga ginikanan aron magpakabuhi nga takus sa pagpadayag aron magiyahan ang ilang mga pamilya?

Lucas 2:40–52

Bisan sa batan-on pa, naka-focus si Jesus sa pagbuhat sa kabubut-on sa Iyang Amahan.

• Ang istorya bahin ni Jesus nga nagtudlo didto sa templo sa dihang Siya nag-edad lamang og 12 anyos mahimong gamhanan gayud ngadto sa kabatan-onan kinsa naghunahuna mahitungod sa kontribusyon nga ilang mahimo ngadto sa buhat sa Dios. Mahimo nimong bahinon ang klase ngadto sa mga parisan nga magbasa og dungan sa Lucas 2:40–52 (tan-awa sa ideya gikan sa Hubad ni Joseph Smith nga makita diha sa Giya ngadto sa mga Kasulatan ). Ang matag parisan mahimong mokabat og pipila ka minuto sa pagpakigbahin sa usag usa sa unsay makapadasig kanila mahitungod niini nga istorya. Unsa ang atong mga oportunidad nga ipakigbahin ang unsay atong nahibaloan mahitungod sa ebanghelyo? Unsa nga mga kasinatian ang atong mapakigbahin?

• Kon nagtudlo ka og mga hamtong, kini nga istorya mahimong usa ka oportunidad sa paghisgot kon unsaon pagtabang sa kabatan-onan nga makab-ot ang ilang potensyal. Ang usa ka tawo mahimong mo-summarize sa istorya diha sa Lucas 2:40–52, ug ang klase mahimong maghisgot kon sa unsang paagi nga kining mga panghitabo makaimpluwensya sa paagi sa ilang pagtan-aw sa kabatan-onan sa Simbahan. Unsa nga mga oportunidad ang atong mahatag sa kabatan-onan aron moapil sa paghimo “[sa] buluhaton sa Amahan” sama sa gibuhat ni Jesus? (Lucas 2:49). Kanus-a kita nahingangha sa espiritwal nga ideya nga gipakigbahin sa usa ka batan-on o bata? Kining mga pulong gikan ni Presidente Henry B. Eyring mahimong madugang ngadto niini nga panaghisgutan: “Kon ang naghupot sa Aaronic Priesthood mamulong, … kanunay kong makapaabut nga akong madungog ang pulong gikan sa Dios. Panagsa ra kaayo ko nga masagmuyo ug kanunayng mahingangha” (“Nga Siya Mamahimo nga Lig-on Usab,” Liahona, Nob. 2016, 77).

• Unsay gitudlo sa Lucas 2:40–52 kanato mahitungod kon unsa si Jesus sa dihang batan-on pa siya? Ang sundanan sa personal nga paglambo nga gisugyot diha sa Lucas 2:52 mahimong makapaawhag og panaghisgutan bahin sa unsay atong gibuhat aron mas mahisama kang Kristo. Mahimo nimong isugyot nga ang mga sakop sa klase mamalandong kon sa unsang paagi sila naglambo diha sa kaalam (sa intelektwal nga paagi), gidak-on (sa pisikal nga paagi), kahimuot sa Dios (sa espiritwal nga paagi), ug sa kahimuot sa uban (sa sosyal nga paagi). Mahimo pa gani sila nga magtakda og mga tumong sa usa o dugang pa niining mga butanga.

Awhaga ang Pagkat-on diha sa Panimalay

Aron makatabang sa mga sakop sa klase nga makaandam sa paghisgot sa Juan 1 sunod semana, hangyoa sila sa pagtimaan sa matag dapit diha sa kapitulo diin ang usa ka tawo nagpamatuod bahin ni Jesukristo.

Dugang nga mga Kapanguhaan

Lucas 2; Mateo 2

Ang pormula sa pagtinguha kang Kristo.

Si Presidente Thomas S. Monson nagtudlo:

“Ang pormula sa pagpangita kang Jesus kanunay gayud nga pareha ra—ang kinasingkasing ug sinsero nga pag-ampo sa usa ka mapainubsanon ug putli nga kasingkasing. …

“Sa dili pa kita malampusong makapahigayon og personal nga pagpangita kang Jesus, kinahanglan gayud nga una natong andamon ang panahon alang kaniya sa atong kinabuhi ug luna alang Kaniya sa atong kasingkasing. Niining busy nga mga adlaw daghan ang adunay panahon alang sa golf, panahon alang sa shopping, panahon alang sa trabaho, panahon alang sa pagdula—apan walay panahon alang ni Kristo.

“Nindot nga mga panimalay ang mipuno sa yuta ug naghatag og mga luna nga kakan-an, mga luna nga kakatulgan, mga kadulaan, mga luna nga katahian, mga luna nga katan-awan og telebisyon, apan walay luna alang ni Kristo.

“Aduna ba kitay kahasol sa tanlag samtang nahinumdom sa iyang kaugalingong mga pulong: ‘Ang mga milo adunay kalubloban, ug ang mga langgam sa kalangitan adunay kabatugan; apan ang Anak sa tawo walay dapit nga kapahulayan sa iyang ulo.’ (Mat. 8:20.) O mibati ba kita nga naulawan kon mahinumdom kita, ‘Ug iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan, kay wala na may luna alang kanila sa balay nga abutanan.’ (Lucas 2:7.) Wala nay luna. Wala nay luna. Wala nay luna. Mao na gayud kini kaniadto.

“Samtang gipahigayon nato ang atong personal nga pagsiksik alang ni Jesus, nga inabagan ug giniyahan sa baruganan sa pag-ampo, mahinungdanon nga aduna kitay klaro nga konsepto bahin niya kinsa atong gitinguha. Ang mga magbalantay sa karnero sa karaang panahon nagtinguha sa batang Jesus. Apan atong gitinguha si Jesus ang Kristo, ang atong Magulang nga Igsoon, ang atong Tigpataliwala ngadto sa Amahan, ang atong Manunubos, ang Tigpasiugda sa atong kaluwasan; siya kinsa diha na sa sinugdanan uban sa Amahan; kinsa midala nganha sa iyang kaugalingon sa mga sala sa kalibutan ug sa ingon andam nga mamatay aron magpakabuhi kita hangtud sa kahangturan. Kini ang Jesus nga atong gitinguha” (“The Search for Jesus,” Ensign, Dis. 1990, 4–5).

Artwork bahin sa pagkatawo ni Kristo.

Ikonsiderar kon sa unsang paagi nga ang artwork makapalambo sa inyong panaghisgutan mahitungod sa pagkatawo ni Kristo. (Alang sa mga ehemplo, tan-awa sa Libro sa mga Hulagway sa Ebanghelyo o history.lds.org/exhibit/birth-of-christ.)

Pagpalambo sa Atong Pagtudlo

Ilakip ang mga tigkat-on nga wala magtuon sa mga kasulatan diha sa panimalay. Bisan kon ang ubang mga sakop sa klase mahimong wala makabasa sa Lucas 2 ug Mateo 2 sa wala pa ang klase, mahimo gihapon silang mopakigbahin og makahuluganong mga ideya samtang dungan kamong magtuon diha sa klase. Siguroa nga ang tanang sakop sa klase adunay mga oportunidad sa pag-apil ug pagtampo ngadto sa panaghisgutan.