Enero 21–27

Juan 1

Among Nakit-an ang Mesiyas

Sa dili pa ka magbasa og bisan unsa nga dugang nga mga materyal, basaha ug pamalandungi ang Juan 1, ug irekord ang mga impresyon nga imong nadawat. Modapit kini sa Espiritu diha sa imong pagpangandam. Ang Dali, Sunod Kanako—Alang sa mga Indibidwal ug mga Pamilya ug ang mosunod nga mga ideya makatabang kanimo nga makapadasig sa mga tawo diha sa imong klase nga makasabut ug makagamit sa doktrina niini nga kapitulo.

Irekord ang Imong mga Impresyon

Awhaga ang Pagpaambit

Aron matabangan ang mga sakop sa klase nga mopakigbahin sa unsay ilang makat-unan, mahimo nimo silang hangyuon sa pagsulat og mga pangutana, mga komentaryo, o mga ideya gikan sa ilang nabasahan diha sa ginunting nga mga papel ug ibutang kini sa usa ka sudlanan. Pagkuha og mga ginunting gikan sa sudlanan aron hisgutan isip usa ka klase.

Itudlo ang Doktrina

Juan 1:1–5

Si Jesukristo anaa na “sa sinugdan uban sa Dios.”

• Gisugdan ni Juan ang iyang pagpamatuod kang Kristo pinaagi sa pagpamatuod bahin sa mga tahas sa Manluluwas sa wala pa Siya matawo. Unsa man ang gitudlo ni Juan mahitungod sa premortal nga Kristo? Nganong importante man nga masayud sa premortal nga mga tahas ni Kristo? Mahimong makatabang ang pagsulat niining mga pangutana diha sa pisara ug hangyoa ang mga sakop sa klase sa pagpangita sa mga tubag diha sa Juan 1:1–5 (tan-awa usab sa Hubad ni Joseph Smith, Juan 1:1–5 [sa Giya ngadto sa mga Kasulatan]) ug sa pamahayag ni Elder James E. Talmage sa “Dugang nga mga Kapanguhaan.” Unsa ang uban pang mga pakisayran sa kasulatan nga mapakigbahin sa mga sakop sa klase nga nagtudlo og dugang mahitungod sa premortal nga Kristo? (Alang sa mga ehemplo, tan-awa sa “Jesukristo” sa Giya ngadto sa mga Kasulatan.) Isip usa ka klase, mahimo usab nimong ribyuhon ang “The Living Christ: The Testimony of the Apostles” (Ensign o Liahona, Abr. 2000, 2).

• Kon ganahan kang mogamit niining mga bersikulo sa paghisgot mahitungod sa mga gilalang sa Ginoo, mahimo nimong basahon ang Juan 1:3 ug ipakita ang mga litrato nga naghulagway sa katahum sa yuta. Dapita ang mga sakop sa klase sa pagpakigbahin kon sa unsang paagi nga ang mga gilalang sa Manluluwas makatabang kanila nga mobati sa Iyang gugma.

Juan 1:1–14

Si Jesukristo mao ang Kahayag.

• Ang pisikal nga kahayag makatabang kanato nga makasabut sa simbolismo sa espiritwal nga kahayag. Unsaon nimo sa paghulagway niini nga simbolismo ngadto sa imong klase? Mahimo nimong palungon ang mga suga sa kwarto ug mopasiga og ispat aron mapakita ang kalainan tali sa kahayag ug kangitngit. Dayon hangyoa ang mga sakop sa klase sa pagpangita sa kada higayon sa pulong nga kahayag diha sa Juan 1:1–14, ug dapita sila sa pagpakigbahin kon sa unsang paagi nga ang Manluluwas ug ang Iyang ebanghelyo nakahatag og espiritwal nga kahayag diha sa ilang kinabuhi. Sa unsang paagi nga ang mga sakop sa klase nakasinati sa Iyang kahayag? Isip kabahin niini nga panaghisgutan, mahimo nimong pabasahon sila og dugang pa mahitungod sa Kahayag ni Kristo diha sa Doktrina ug mga Pakigsaad 84:45–46; 88:11–13, o mahimo nimo silang i-refer sa “Kahayag ni Kristo” sa Giya ngadto sa mga Kasulatan. Sa unsang paagi kita mahimong kahayag sa kalibutan?

  

  Ang Manluluwas ug ang Iyang ebanghelyo naghatag og espiritwal nga kahayag.

• Tungod kay ang Juan 1:1–14 gisulat sa simbolikanhong pinulongan, mahimong lisud kini sabton. Usa ka paagi sa pagtabang sa mga sakop sa klase nga makasabut sa pagpamatuod ni Juan mao ang pagdapit kanila sa paghimo og lista sa gibalik-balik nga mga pulong diha niining mga bersikulo ug ang pagpakigbahin sa unsay gitudlo sa matag usa mahitungod sa Manluluwas.

• Ania ang usa ka paagi sa pagpaapil sa mga sakop sa klase niining mga bersikulo: I-display ang pipila ka litrato (lakip na sa usa gikan sa outline karong semanaha sa Dali, Sunod Kanako—Alang sa mga Indibidwal ug mga Pamilya) nga nagpakita sa mga aspeto sa kinabuhi ug balaanong misyon ni Jesukristo. Dapita ang mga sakop sa klase sa pagsiksik sa Juan 1:1–14, nga mangita sa mga pulong nga magsilbing mga ulohan alang sa mga litrato.

Juan 1:35–51

Makabaton kita sa atong kaugalingong pagsaksi sa Manluluwas ug dayon sa pagdapit sa uban nga “umari kamo ug makita ninyo.”

• Sa Juan 1, ang pagdapit nga “umari kamo ug makita ninyo [umari ka ug tan-awa]” kaduha makita (tan-awa sa mga bersikulo 39, 46). Mahimong kita walay kahigayunan nga makita ang Manluluwas sa pisikal nga paagi sama sa paagi sa pagkakita nila ni Andres ug Natanael, apan makatubag kita sa samang pagdapit. Mahimo nimong pangutan-on ang mga sakop sa klase kon unsa kaha ang gipasabut sa “umari kamo ug makita ninyo” sa atong panahon ug sa pagpakigbahin sa ilang kaugalingong mga kasinatian sa pagbaton og pagpamatuod sa Manluluwas.

• Sa pagsugod og panaghisgutan mahitungod niining mga bersikulo ikonsiderar ang paghangyo sa mga sakop sa klase sa pagpakigbahin og mga istorya kon giunsa nila sa pagpahibalo ang ebanghelyo ni Jesukristo ngadto sa uban. Kinsa ang ilang gidapit nga “umari kamo ug makita ninyo”? Unsa ang atong makat-unan gikan nila ni Andres ug Felipe mahitungod sa pagpakigbahin sa atong mga pagpamatuod bahin ni Kristo?

• Usahay ang mga tawo dili mopakigbahin sa ebanghelyo tungod kay ang pagbuhat sa ingon makahadlok o komplikado. Ang mga istorya diha sa Juan 1:35–51 nagpakita nga ang pagpakigbahin sa ebanghelyo mahimong yano ra ug natural. Mahimo nimong ipabasa sa mga sakop sa klase kining mga bersikulo ug pahisguti kon unsaon nila paggamit niini aron tabangan ang usa ka tawo kinsa mahadlok nga mopakigbahin sa ebanghelyo. Mahimo nilang gamiton ang kinutlo ni Elder Neil L. Andersen diha sa “Dugang nga mga Kapanguhaan” alang sa mga ideya. (Tan-awa usab sa video nga “Good Things to Share” sa LDS.org.)

Awhaga ang Pagkat-on diha sa Panimalay

Aron maawhag ang mga sakop sa klase nga magtuon sa Mateo 3, Marcos 1, ug Lucas 3, mahimo nimo silang hangyuon sa paghunahuna og usa ka tawo nga gusto nilang tabangan nga madala ngadto kang Kristo. Sultihi sila nga niining mga kapitulo mabasahan nila ang mahitungod sa usa ka propeta kansang misyon mao ang pag-andam sa mga tawo nga modawat sa Manluluwas.

Dugang nga mga Kapanguhaan

Juan 1

Si Jesukristo kauban na sa Langitnong Amahan sa sinugdanan.

Si Elder James E. Talmage nagtudlo: “Nga ang Pulong mao si Jesukristo, kinsa kauban sa Amahan [sa] sinugdanan ug kinsa Siya Mismo nakabaton og mga gahum ug ranggo sa pagka-Dios, ug nga Siya mianhi sa kalibutan ug mipuyo uban sa katawhan, gipamatud-an gayud. Kining mga pamahayag gisuportahan sa usa ka pinadayag nga gihatag ngadto ni Moises, diin gitugutan siya nga makita ang daghan sa mga gilalang sa Dios, ug madungog ang tingog sa Amahan kalabut sa mga butang nga nahimo na: ‘Ug pinaagi sa pulong sa akong gahum, Ako milalang kanila, kinsa mao ang akong Bugtong Anak, nga puno sa grasya ug kamatuoran’ [Moises 1:32, 33]” (Jesus the Christ, 3rd ed. [1916], 10).

Mahimo natong dapiton ang uban nga “umari kamo ug makita ninyo.”

Si Elder Neil L. Andersen nagtudlo:

“Gitudloan kita sa Manluluwas unsaon sa pagpakigbahin ang ebanghelyo. Ganahan ko sa istorya ni Andres, nga nangutana, ‘Rabbi, diin ka magpuyo?’ [Juan 1:38]. Si Jesus mahimo ra untang motubag sa dapit nga Iyang gipuy-an. Apan miingon hinoon Siya kang Andres, ‘Umari kamo ug makita ninyo’ [Juan 1:39]. Sa akong hunahuna miingon ang Manluluwas, ‘Umari kamo ug makita ninyo dili lang taga diin ko apan ang akong pagpuyo. Umari kamo ug makita ninyo si kinsa Ako. Umari ug batia ang Espiritu.’ Wala kita mahibalo sa tanan bahin nianang adlawa, apan nahibalo kita nga dihang nakita ni Andres ang iyang igsoon nga si Simon, miingon siya, ‘Gikahibalag namo … ang Kristo’ [Juan 1:41].

“Ngadto sa nagpakita og interes sa atong pag-istoryahanay, masunod nato ang ehemplo sa Manluluwas pinaagi sa pagdapit kanila nga ‘umari kamo ug makita ninyo.’ Ang uban modawat sa atong pagdapit, ug ang uban dili. Duna kitay nailhan nga gidapit sa makadaghan una pa modawat sa imbitasyon nga ‘umari kamo ug makita ninyo.’ Hunahunaon sab nato ang atong mga kauban kaniadto nga wa na kaayo nato igkita, sa pagdapit kanila sa pagbalik ug ikakita pag-usab. …

“Sa tiggamitan og internet ug cellphone, dunay bag-ong mga paagi sa pagdapit sa uban nga ‘umari kamo ug makita ninyo.’ Ipakigbahin nato ang atong gituohan sa internet isip kabahin sa atong pagpakabuhi” (“Usa Kini ka Milagro,” Liahona, Mayo 2013, 79).

Ang musika makatudlo usab kanato bahin ni Kristo.

Ikonsiderar ang paggamit sa himno nga “For the Beauty of the Earth,” Hymns, nu. 92, samtang maghisgot ka sa tahas sa Manluluwas isip Tiglalang (tan-awa sa Juan 1:3). Mahimo usab nimong gamiton ang video nga “For the Beauty of the Earth” sa mormontabernaclechoir.org.

Pagpalambo sa Atong Pagtudlo

Tabangi ang mga tigkat-on nga ipahisama ang mga kasulatan ngadto sa ilang kaugalingon. Ang samang pagdapit nga gihatag ni Kristo ngadto sa Iyang mga disipulo—nga umari kamo ug makita ninyo—makatabang niadtong imong tudloan nga magtinguha sa pagsunod sa Manluluwas. Awhaga ang mga tigkat-on sa paggamit sa mga baruganan nga makita diha sa mga kasulatan ngadto sa ilang kaugalingong kinabuhi ug sa pagdapit sa uban sa pagbuhat sa samang butang. (Tan-awa sa 1 Nephi 19:23; Pagtudlo sumala sa Pamaagi sa Manluluwas, 21.)