Ang Transpigurasyon, ni Carl Heinrich Bloch

Abril 1–14

Mateo 16–17; Marcos 9; Lucas 9

“Ikaw Mao ang Kristo”

Unsa nga mga mensahe ang imong nadungog o nabasa gikan sa labing bag-o nga kinatibuk-ang komperensya nga makasuporta sa doktrina diha niining mga kapitulo? Samtang nagtuon ka, pamalandunga ang mga panginahanglan sa mga sakop sa imong klase ug i-rekord ang bisan unsang mga impresyon nga imong madawat.

Irekord ang Imong mga Impresyon

Awhaga ang Pagpaambit

Usa ka paagi sa pag-awhag sa mga sakop sa klase nga personal nga magtuon sa mga kasulatan ug kauban sa ilang mga pamilya mao ang pagdapit kanila sa pagpakigbahin matag semana kon sa unsang paagi nga ang pagtuon sa mga kasulatan nakapanalangin sa ilang kinabuhi. Sama pananglit, sa unsang paagi nga ang ilang pagtuon niining mga kapitulo nakaimpluwensya sa ilang kasinatian sa kinatibuk-ang komperensya?

Itudlo ang Doktrina

Mateo 16:13–17

Ang pagpamatuod bahin ni Jesukristo moabut pinaagi sa pagpadayag.

• Aduna ba sa mga sakop sa imong klase nga kinahanglang mopasabut ngadto sa usa ka tawo kon giunsa nila pagkahibalo nga ang ebanghelyo tinuod? Diha sa Mateo 16:13–17, unsa may gitudlo sa Manluluwas mahitungod kon sa unsang paagi kita makadawat og pagpamatuod? Mahimo nimong ipakigbahin kon giunsa ni Alma pagbaton sa iyang pagpamatuod (tan-awa sa Alma 5:45–46) o unsay gitudlo sa Ginoo kang Oliver Cowdery mahitungod sa pagpadayag (tan-awa sa DP 6:14–15, 22–23; 8:2–3). Unsa kaha ang gisulti nila ni Pedro o Alma o Oliver Cowdery kon dunay tawo nga nangutana kanila kon giunsa nila pagkahibalo nga ang ebanghelyo tinuod?

• Mahimong dunay mga tawo sa imong klase nga nag-ampo alang sa personal nga pagpadayag apan wala mahibalo kon unsaon sa pag-ila niini kon moabut kini. Si Elder David A. Bednar migamit og duha ka komon nga mga kasinatian gamit ang kahayag aron sa pagtudlo kon unsaon nato pagdawat og pagpadayag; mahimo nimong ipakigbahin ang mga ideya ni Elder Bednar ngadto sa klase (tan-awa sa “Ang Espiritu sa Pagpadayag,” Liahona, Mayo 2011, 87–90). Unsa ang laing mga pagtulun-an o mga istorya sa kasulatan nga mahunahuna sa imong klase nga makatabang sa usa ka tawo nga makaila og personal nga pagpadayag? (Sama pananglit, tan-awa sa 1 Mga Hari 19:11–12; Mga Taga-Galacia 5:22–23; Enos 1:1–8; DP 8:2–3.)

Mateo 16:13–19; 17:1–9

Ang mga yawe sa priesthood gikinahanglan sa atong kaluwasan.

• Sa pagsugod og panaghisgutan mahitungod sa mga yawe sa priesthood, mahimo nga magsulat ka og mga pangutana sama sa mosunod diha sa pisara: Unsa ang mga yawe sa priesthood? Kinsa ang naghupot sa mga yawe? Giunsa paghatag ang mga yawe sa priesthood? Mahimo usab nimong ipakigbahin ang pipila ka pakisayran sa kasulatan nga makatabang sa pagtubag niining mga pangutana, sama sa Mateo 16:19; Doktrina ug mga Pakigsaad 107:18–19; 128:8–11; 132:18–19, 59; ug Joseph Smith—Kasaysayan 1:72. Ang mga sakop sa klase makakita og dugang nga tabang pinaagi sa pag-refer ngadto sa   mensahe ni Elder Neil L. Andersen nga “Gahum sa Priesthood” (Liahona, Nob. 2013, 92–95); o Matinud-anon sa Tinuhoan, 204–205. Tuguti ang mga sakop sa klase og panahon sa pagsiksik sa pangutana nga ilang gusto. Mahimo dayon nilang tudloan ang usag usa kon unsa ang ilang nakat-unan.

• Ang panaghisgutan mahitungod nila ni Pedro ug sa ubang mga Apostoles nga nagdawat sa mga yawe sa priesthood didto sa Bukid sa Transpigurasyon makatabang sa mga sakop sa klase sa paglig-on sa ilang mga pagpamatuod bahin sa pagpahiuli sa mga yawe sa priesthood sa ulahing mga adlaw. Aron makadasig sa maong panaghisgutan, mahimo nimong hangyuon ang katunga sa klase nga magtuon sa Mateo 17:1–9 (tan-awa usab sa outline karong semanaha sa Dali, Sunod Kanako—Alang sa mga Indibidwal ug mga Pamilya) ug ang laing katunga nga magtuon sa Doktrina ug mga Pakigsaad 110. Mahimo dayon silang mopakigbahin sa usag usa sa unsay ilang nakat-unan ug hinumduman ang mga pagkapareha tali sa duha ka istorya.

• Nakasabut ba ang mga sakop sa imong klase kon sa unsang paagi nga ang mga yawe sa priesthood nakapanalangin sa ilang kinabuhi? Aron matabangan sila, mahimo nimo silang dapiton sa pagsiksik, og lista sa mga tawo nga naghupot og mga yawe. Kinsa kining mga tawhana diha sa inyong ward ug stake? Siguro mahimo nimong ilista ang ilang mga ngalan diha sa pisara o dapita ang pipila kanila sa pagpakigsulti ngadto sa klase. Giunsa nila paggamit ang mga yawe sa priesthood nga gihatag ngadto kanila sa pagdumala sa buhat sa priesthood diha sa ilang mga calling? Sa unsang paagi kita napanalanginan pinaagi sa pagserbisyo niining mga lider sa priesthood?

Ang mga yawe sa priesthood mao ang awtoridad sa pagdumala sa paggamit sa priesthood.

Marcos 9:14–30

Kon magtinguha og mas dako nga pagtuo, kinahanglan gayud nga una kitang mohupot ngadto sa pagtuo nga anaa na kanato.

• Si Elder Jeffrey R. Holland migamit sa istorya bahin sa usa ka amahan nga nagtinguha nga maayo ang iyang anak sa pagtudlo kon unsaon nato pagduol ang Ginoo kon atong gibati nga ang atong pagtuo dili igo (tan-awa sa “Nagatuo Ako,” Liahona, Mayo 2013, 93–95). Tulo ka nag-unang mga punto sa iyang pakigpulong nalakip diha sa “Dugang nga mga Kapanguhaan.” Tingali mahimo nimong bahinon ang klase ngadto sa upat ka grupo ug i-assign ang usa ka grupo sa paghisgot sa Marcos 9:14–30 ug ang matag usa sa laing mga grupo sa paghisgot sa usa sa tulo ka obserbasyon ni Elder Holland. Mahimo silang mangita sa mga mensahe niining istorya sa kasulatan nga makatabang kanato nga mapalambo ang atong pagtuo. Ang matag grupo mahimong mopakigbahin sa tibuok klase sa ubang mga ideya nga miabut gikan sa ilang panaghisgutan.

Awhaga ang Pagkat-on diha sa Panimalay

Aron madasig ang mga sakop sa klase nga magtuon sa balay karong semanaha, sultihi sila nga ang sunod nga outline sa Dali, Sunod Kanako—Alang sa mga Indibidwal ug mga Pamilya makatabang kanila ug sa ilang mga pamilya nga makabaton og mas makahuluganon nga Pasko sa Pagkabanhaw. Agig dugang, mahimo nimong isugyot nga ang Dominggo sa Pasko sa Pagkabanhaw tingali usa ka maayong panahon alang kanila sa pagdapit sa dili kaayo aktibo nga mga miyembro o mga higala sa laing tinuohan nga moadto sa simbahan.

Dugang nga mga Kapanguhaan

Mateo 16–17; Marcos 9; Lucas 9

Ang mga kapangulohan sa auxiliary modawat sa gidelegar nga awtoridad.

“Ang tanang mga organisasyon sa auxiliary sa ward ug stake naglihok ubos sa direksyon sa bishop o presidente sa stake, kinsa naghupot sa mga yawe sa pagdumala. Ang mga presidente sa auxiliary ug ang ilang mga magtatambag dili makadawat og mga yawe. Makadawat sila og gidelegar nga awtoridad aron makalihok sa ilang mga calling” (Handbook 2, 2.1.1).

Tulo ka obserbasyon nga makatabang kanato nga makabaton og dugang nga pagtuo.

Human misaysay og usab sa istorya nga makita diha sa Marcos 9:14–29, si Elder Jeffrey R. Holland nagtudlo:

“Ang unang obserbasyon kabahin niini nga asoy mao nga kon mag-atubang og hagit sa pagtuo, ang amahan mopahayag pag-una sa iyang kalig-on ug dayon moila sa iyang limitasyon. Ang iyang inisyal nga deklarasyon positibo ug walay pagduha-duha: ‘Nagatuo ako.’ Moingon ko sa tanan nga nangandoy og mas lig-on nga pagtuo, hinumdumi kining tawhana! Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. … Panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo. … Ang gidak-on sa inyong pagtuo o sa inyong kahibalo dili mao ang importante—kondili ang kaligdong nga inyong gipakita ngadto sa inyong pagtuo ug sa kamatuoran nga inyo nang nahibaloan.

“Ang ikaduha nga obserbasyon usa ka kalahian sa nahauna. Kon moabut ang problema ug mga pangutana, ayaw sugdi ang inyong pagpangita sa pagtuo pinaagi sa pagsulti kon unsay wala ninyo, mosangpot lang kini sa inyong ‘pagkawalay pagtuo.’ … Wala ko magsulti ninyo nga magpakaaron-ingnon nga dunay pagtuo nga wala kaninyo. Naghangyo ko ninyo nga magmatinud-anon sa pagtuo nga anaa na kaninyo. … Kinahanglan mas prangka kamo sa inyong mga pangutana sigon sa gikinahanglan ninyo; ang kinabuhi adunay daghan niini sa usa ka butang o sa lain. Apan kon kamo ug ang inyong pamilya gusto nga maayo, ayaw itugot nga kini nga mga problema mobabag sa pagtuo nga mohimo og milagro. …

“Katapusang obserbasyon: kon ang pagduha-duha o kalisud moabut, ayaw kahadlok sa pagpangayo og tabang. Kon gusto kita sa mapainubsanon ug matinuoron nga paagi sama niini nga amahan, matabangan kita. Ang kasulatan mipasabut sa ingon niana nga tinguha isip ‘tinuod nga katuyoan,’ gisundan sa ‘uban sa hingpit nga katuyoan sa kasingkasing, sa walay pagpakaaron-ingnon ug walay pagpanglimbong sa atubangan sa Dios’ [2 Nephi 31:13]. Akong ipamatuod nga agig tubag niana nga balik-balik nga matang sa pagpangamuyo, ang Dios mopadala og tabang gikan sa pikas bahin sa tabil sa paglig-on sa atong pagtuo” (“Nagatuo Ako,” Liahona, Mayo 2013, 93–94).

Pagpalambo sa Atong Pagtudlo

Pangutana og mga pangutana nga makadapit og pagpamatuod. Ang pagpangutana nga makaawhag sa mga sakop sa klase sa paghatag sa ilang mga pagpamatuod mahimong usa ka epektibong paagi sa pagdapit sa Espiritu. Sama pananglit, kon maghisgot sa Mateo 16:13–17, mahimo nimong ipangutana, “Unsa ang inyong nakat-unan mahitungod sa Manluluwas nga nakapalig-on sa inyong pagpamatuod bahin Kaniya isip Manluluwas?” (Tan-awa sa Pagtudlo sumala sa Pamaagi sa Manluluwas, 32.)