Ang Nawala nga Anak, ni Liz Lemon Swindle

Mayo 6–12

Lucas 12–17; Juan 11

“Pangalipay Kamo uban Kanako, kay Hingkaplagan Ko ang Akong Karnero nga Nawala”

Sugdi ang imong pagpangandam pinaagi sa mainampuong pagtuon sa Lucas 12–17 ug Juan 11. Unsa nga “karnero nga nawala” sa imong klase ang mahunahunaan? Gamita ang Dali, Sunod Kanako—Alang sa mga Indibidwal ug mga Pamilya ug kining outline samtang magtinguha ka sa giya sa Ginoo kon unsaon pagtubag sa labing maayong paagi ang mga panginahanglan sa mga sakop sa klase, bisan kon wala sila magtambungan sa klase.

Irekord ang Imong mga Impresyon

Awhaga ang Pagpaambit

Ang paggamit usa ka importante nga bahin sa pagkat-on, busa dapita ang mga sakop sa klase sa pagpakigbahin kon giunsa nila pagpili sa pagsunod sa butang nga ilang nakat-unan gikan sa mga kasulatan karong semanaha.

Itudlo ang Doktrina

Lucas 14:15–24

Walay pangatarungan nga paigo alang sa pagsalikway sa ebanghelyo.

• Aron matabangan ang mga sakop sa klase sa pagtuon sa sambingay sa dakong kumbira, mahimo nimo silang dapiton ngadto sa usa ka imaginary nga party nga imong ipahigayon. Tuguti sila nga mopakigbahin sa pipila ka rason nganong makatambong sila o dili. Basaha ang Lucas 14:15–24 nga magdungan, ug hisguti ang mga rason nga gihimo sa mga tawo sa dihang gidapit sila ngadto sa kumbira nga nagrepresentar sa mga panalangin sa ebanghelyo. Unsa nga mga rason ang gihimo sa mga tawo karon sa kapakyas sa pagdawat sa mga pagdapit sa Manluluwas nga modawat sa mga panalangin sa Langitnong Amahan? Tingali ang mga sakop sa klase mahimong mopakigbahin sa mga panalangin nga ilang nadawat sa dihang mihimo sila og mga sakripisyo nga gikinahanglan sa pagsunod sa piho nga mga baruganan sa ebanghelyo.

Lucas 15

Mahimo natong pangitaon kadtong nawala ug maglipay uban sa Amahan kon mobalik sila.

• Unsaon nimo sa pagdasig kadtong imong tudloan sa pagpangita sa mga tawo kinsa “nawala” tungod kay sila walay mga panalangin sa ebanghelyo ug modapit kanila sa pagbalik? Mahimo nimong dapiton ang mga sakop sa klase sa paghunahuna og kadali mahitungod sa “nawala nga karnero” nga ilang nailhan ug dayon sa pagbasa sa Lucas 15:1–7 nga maghunahuna nianang tawhana. Unsa ang nadasig nilang buhaton sa pagtabang nianang tawhana uban sa kasensitibo ug gugma? Ang istorya ni Presidente Thomas S. Monson diha sa “Dugang nga mga Kapanguhaan” o sa pakigpulong ni Elder Mervyn B. Arnold nga “Motabang sa Pagluwas: Mahimo Nato Kini” (Liahona, Mayo 2016, 53–55) mahimong makatabang niining panaghisgutan.

• Makatabang ba sa mga sakop sa klase nga makasabut sa mga paagi nga ang usa ka tawo mahimong mawala? Ikonsiderar ang pag-assign og mga grupo sa mga sakop sa klase sa usa sa tulo ka sambingay diha sa Lucas 15 nga tun-an. Unsay gisugyot sa mga sambingay kon unsaon nato sa pagpaningkamot nga makit-an kadtong kinsa nawala? Unsa nga mga pulong diha sa Lucas 15 ang nagpadayag kon unsay gibati sa Langitnong Amahan mahitungod niadtong kinsa nawala?

• Ang mga sakop sa imong klase mahimong makabenepisyo sa pag-focus diha sa mga pulong ug mga aksyon sa magulang nga anak diha sa sambingay sa anak nga nawala. Tingali mahimo silang magsulat og alternatibong panapos sa sambingay diin ang kinaiya sa magulang nga anak ngadto sa iyang igsoon lahi. Unsa man ang gitudlo kanato sa tambag sa amahan diha sa sambingay kon unsay angay natong bation niadtong kinsa nawala ug niadtong kinsa mibalik sa ebanghelyo? (Tan-awa usab sa pamahayag ni Elder Jeffrey R. Holland diha sa “Dugang nga mga Kapanguhaan.”) O mahimo nimong hangyuon ang mga sakop sa klase sa paghunahuna nga sila ang amahan diha niining sambingay. Unsa ang dugang nga tambag ang ilang ihatag sa magulang nga anak aron makatabang kaniya nga maglipay sa pag-uswag o kalampusan sa uban?

Juan 11:1–46

Si Jesukristo mao ang Pagkabanhaw ug ang Kinabuhi.

• Samtang magbasa sila mahitungod sa pagbuhi pag-usab kang Lazaro karong semanaha, aduna bay nakit-an ang mga sakop sa imong klase nga nakapalig-on sa ilang pagtuo nga si Jesukristo mao ang Anak sa Dios ug ang gisaad nga Mesiyas? Dapita sila sa pagpakigbahin kon unsa ang ilang nakit-an. Unsa ang ubang mga kasinatian nga nakaugmad sa ilang pagtuo diha ni Jesukristo? Mahimo nimong ipasabut nga sa panahon niining milagro, si Lazaro wala mabanhaw apan gibuhi pagbalik ngadto sa pagka-mortal.

  

  Si Jesukristo Mihilak, ni James Tissot

• Usa ka paagi sa pagsusi sa Juan 11:1–46 mao ang paghangyo sa mga sakop sa klase nga magpuli-puli sa pagbasa sa mga bersikulo ug sa pagdapit kanila sa paghunong kon makakita sila og ebidensya sa pagtuo diha ni Jesukristo. Hangyoa sila sa paghisgot kon unsay ilang nakit-an. Sa unsang paagi nga ang mga pagsulay ug mga kahuyang makapalig-on sa atong pagtuo diha Kaniya?

• Laing paagi sa pagbasa niining istorya mao ang pag-assign og pipila ka sakop sa klase sa pagkonsiderar sa mga panglantaw sa mga tawo nga nalambigit—sama sa Manluluwas, sa mga Apostoles, nila ni Marta, Maria, ug Lazaro. Unsa ang atong makat-unan gikan sa matag usa kanila? Unsa ang atong makat-unan mahitungod sa Manluluwas gikan sa Juan 11:33–35? Nganong importante man nga mahibalo niining mga butanga mahitungod Kaniya?

Awhaga ang Pagkat-on diha sa Panimalay

Aron maawhag ang mga sakop sa klase nga magbasa sa Mateo 19–20; Marcos 10; ug Lucas 18, mahimong mangutana ka og sama sa “Unsay inyong bation kon nagtrabaho kamo sa tibuok adlaw ug gibayaran og sama sa usa ka tawo nga nagtrabaho lang og usa ka oras?” Sultihi sila nga dunay sambingay diha sa basahunon sa sunod semana nga nagsugyot kon sa unsang paagi nga kini gikonsiderar nga makiangayon.

Dugang nga mga Kapanguhaan

Lucas 12–17; Juan 11

“Nakit-an gyud ko nimo.”

Si Presidente Thomas S. Monson mipakigbahin sa mosunod niya nga kasinatian samtang nagserbisyo isip bishop: “Akong gitiman-an usa ka Dominggo sa buntag nga si Richard, usa sa among mga priest nga panagsa ra nga motambong, karon wala na usab motambong sa miting sa priesthood. Akong gibiyaan ang korum ubos sa pagbantay sa adviser ug mibisita sa panimalay ni Richard. Ang iyang inahan miingon nga siya nagtrabaho sa lokal nga garahian nga moayo sa mga sakyanan. Ako nagdrayb padulong sa garahian aron sa pagpangita ni Richard ug nangita bisan asa apan wala gyud makakita kaniya. Sa kalit lang, ako nakadawat og inspirasyon sa pagli-li sa ubos sa karaan nga lungag sa grasa nga nahimutang sa kilid sa building. Gikan sa kangitngit ako nakakita og duha ka mga nagsiga nga mata. Ako nakadungog kang Richard nga miingon, ‘Nakit-an gyud ko nimo, Bishop! Mosaka na ko.’ Samtang si Richard ug ako nag-istoryahanay, siya akong giingnan kon unsa kami ka mingaw kaniya ug nagkinahanglan kaniya. Ako nakakuha og pasalig gikan kaniya nga siya motambong na og mga miting. … [Sa kaulahian], si Richard miingon nga ang nakapausab sa iyang kinabuhi mao kadtong higayon nga siya nakit-an sa iyang bishop nga nagtago sa lungag sa grasa ug mitabang kaniya nga mobalik sa pagka-aktibo” (“Asukal nga Rimulatsa [Sugar Beets] ug ang Bili sa Kalag,” Liahona, Hulyo 2009, 4–5).

Nagkat-on gikan sa laing nawala nga anak.

Si Elder Jeffrey R. Holland mihimo niining obserbasyon mahitungod sa magulang nga igsoon sa nawala nga anak:

“Kini nga anak wala kaayo nasuko nga miuli ang igsoon apan siya nasuko nga ang iyang mga ginikanan nalipay nga kini miuli. Mibati nga wala mahatagi og bili ug tingali medyo nalooy sa kaugalingon, kining buotang anak—ug siya talagsaon ka buotan—nakalimot sa makadiyot nga bisan sa usa ka higayon wala siya makasinati og kahugaw o kasagmuyo, kahadlok o kasilag sa kaugalingon. Nakalimot siya sa makadiyot nga ang matag baka sa ranso iyaha na ug mao usab ang tanan nga mga kupo diha sa kabinet ug matag singsing sa hunos. Nakalimot siya sa makadiyot nga ang iyang pagkamatinud-anon nagantihan ug kanunay nga pagagantihan.

“Dili, siya kinsa aduna sa halos tanang butang, ug kinsa tungod sa iyang kakugihan, sa talagsaong paagi nakaangkon niini, nagkulang sa usa ka butang nga mohimo unta kaniya nga hingpit nga tawo sa Ginoo nga siya hapit na nga mahimo. Kinahanglan pa siya nga mopalambo og kapuangod ug kalooy, sa halapad nga panglantaw aron makita nga kining mipauli dili usa ka kaaway. Kini mao ang iyang igsoon nga lalaki. Samtang ang iyang amahan nangamuyo kaniya nga motan-aw, mao kini ang namatay ug karon nabuhi. Mao kini ang nawala ug karon nakaplagan” (“The Other Prodigal,” Ensign, Mayo 2002, 63).

Pagpalambo sa Atong Pagtudlo

Pagtabang sa usa. Sama sa magbalantay sa karnero diha sa sambingay sa Manluluwas (tan-awa sa Lucas 15:4), “makapakita ka og kabalaka niadtong wala motambong sa imong klase. Ang imong mga oportunidad sa pagtudlo ug pagdasig sa mga sakop sa klase ug sa pagtabang kanila nga moduol kang Kristo mopadayon lapas sa klasehanan ug lapas pa niadtong nagtambong sa inyong pormal nga mga leksyon” (Pagtudlo sumala sa Pamaagi sa Manluluwas, 8).