Ug Gabii Kadto, ni Benjamin McPherson

Hunyo 10–16

Mateo 26; Marcos 14; Lucas 22; Juan 18

“Dili Sumala sa Akong Pagbuot, Kondili sa Imo”

Basaha ang Mateo 26; Marcos 14; Lucas 22; ug Juan 18, ug pamalandunga ang mga hunahuna ug mga impresyon nga mosantup sa imong hunahuna. Unsa nga mga mensahe ang kinahanglang makat-unan sa mga sakop sa imong klase?

Irekord ang Imong mga Impresyon

Awhaga ang Pagpaambit

Dapita ang mga sakop sa klase sa pagpakigbahin og butang nga ilang nakat-unan karong semanaha nga nakatabang nila nga makakita og dugang nga kahulugan diha sa sakrament. Unsa may ilang gibuhat ug sa unsang paagi kini nakaapekto sa ilang kasinatian sa pag-ambit sa sakrament?

Itudlo ang Doktrina

Mateo 26:26–29; Lucas 22:19–20

Ang sakrament usa ka oportunidad aron kanunayng mahinumdom sa Manluluwas.

• Nganong gipasiugdahan man sa Manluluwas ang sakrament? Nganong moambit man kita sa sakrament kada semana? Unsa ang posible nga mga tubag nga makita sa mga sakop sa klase diha sa Mateo 26:26–29; Lucas 22:7–20; Doktrina ug mga Pakigsaad 20:75–79; ug Matinud-anon sa Tinuhoan, 215–17? Sama pananglit, ang Matinud-anon sa Tinuhoan nagtudlo nga ang sakrament nagpasidungog sa sakripisyo ni Kristo, nga mituman sa balaod ni Moises. Mahimo usab nimong basahon ang mga pag-ampo sa sakrament isip usa ka klase ug hangyuon ang mga sakop sa klase sa pagtino sa mga pakigsaad nga atong himoon isip kabahin sa ordinansa. Unsaon nato pagtabang ang laing tawo nga makasabut kon unsa ang kahulugan niining mga pasalig? Sa unsang paagi nga ang atong pag-apil sa sakrament makaapekto sa mga pagpili nga atong himoon sa tibuok semana?

  

  Kon moambit kita sa sakrament, mobag-o kita sa atong mga pakigsaad.

• Ang mga sakop sa klase mahimong makabenepisyo tungod sa pagkadungog sa mga ideya sa usag usa kon unsaon paghinumdom ang Manluluwas atol sa sakrament ug sa tibuok semana (tan-awa sa DP 6:36–37). Tingali mahimo nimo silang dapiton sa pagpakigbahin kon unsay nakatabang nila ug sa ilang mga pamilya sa paghinumdom sa Manluluwas ug sa pagtuman sa ilang mga pakigsaad. Unsa nga mga bersikulo gikan sa basahunon karong semanaha ang makapalambo sa atong balaang pagtahud alang sa sakrament? Alang sa ubang mga hunahuna kon unsaon paghinumdom ang Manluluwas, tan-awa sa Gerrit W. Gong, “Kanunay nga Mohinumdom Kaniya,” Liahona, Mayo 2016, 108–11.

• Kini nga panaghisgutan mahimong usa ka maayong oportunidad sa pagtuon uban sa mga sakop sa klase sa simbolismo sa sakrament. Sa unsang paagi nga kining mga simbolo makatabang kanato aron maka-focus sa Manluluwas atol sa ordinansa? Unsa man ang gitudlo niining mga simbolo mahitungod Kaniya ug sa atong relasyon ngadto Kaniya?

• Sa katapusan sa inyong panaghisgutan mahitungod sa sakrament, mahimo nimong hatagan ang mga sakop sa klase og pipila ka gutlo sa pagpamalandong ug sa pagsulat kon unsay ilang gibati nga dinasig nga buhaton aron sa pagpangandam alang sa sakrament sunod semana. Sa pagdugang ngadto sa diwa niini nga kasinatian, ikonsiderar ang pagtugtog og himno sa sakrament samtang ang mga sakop sa klase mamalandong.

Mateo 26:36–46

Mahimo kitang mas Kristohanon kon pilion nato ang pagtugyan sa atong kabubut-on ngadto sa kabubut-on sa Amahan.

• Ang ehemplo sa Manluluwas sa pagtugyan ngadto sa kabubut-on sa Amahan makatabang sa mga sakop sa imong klase kon kinahanglan nilang mobuhat sa samang butang. Sa pagsugod og panaghisgutan, mahimo nimong dapiton ang matag sakop sa klase sa pagpakigbahin og panahon sa dihang gitugyan nila ang ilang kaugalingon ngadto sa butang nga ilang nahibaloan nga gusto sa Dios nga ilang buhaton. Unsa may nakapaaghat kanila sa pagbuhat niadtong mga butanga? Dapita ang klase nga magbasa sa Mateo 26:36–42 ug mamalandong nganong ang Manluluwas andam nga motugyan sa Iyang kabubut-on ngadto sa kabubut-on sa Iyang Amahan. Sa unsang paagi nga ang pagtugyan sa atong kabubut-on ngadto sa Dios sa katapusan makapanalangin kanato?

• Sa pagtuon sa baruganan sa pagtugyan ngadto sa Dios, mahimo nimong hangyuon ang katunga sa klase sa pagbasa sa Mosiah 3:19 ug ang laing katunga sa pagbasa sa 3 Nephi 9:20. Unsay gitudlo niining mga bersikulo kon unsay gipasabut sa mahimong manunuton ngadto sa Dios? Unsaon man nato sa pagnunot? Ang mga sakop sa klase mahimong makapamalandong kon unsaon nila sa pagtugyan sa ilang kabubut-on ngadto sa Dios sa umaabut nga semana. Ang pamahayag gikan ni Elder Neal A. Maxwell diha sa “Dugang nga mga Kapanguhaan” mahimong makadugang usab sa inyong panaghisgutan.

Mateo 26:20–22, 31–35

Kinahanglan gayud natong susihon ang kaugalingon natong kinabuhi sa pagtino kon sa unsang paagi magamit ang mga pulong sa Ginoo ngari kanato.

• Nakadungog kita og daghang mga leksyon sa ebanghelyo sa atong kinabuhi, apan usahay makatintal nga maghunahuna nga kadtong mga leksyon kasagaran magamit sa ubang mga tawo. Usa ka panaghisgutan mahitungod sa Mateo 26 makatabang kanato nga mabuntog kining kalagmitan. Sa pagsugod og panaghisgutan, mahimo nimong bahinon ang klase ngadto sa mga parisan ug hangyoa ang usa ka tawo sa matag parisan sa pagbasa sa Mateo 26:20–22 samtang ang lain mobasa sa mga bersikulo 31–35. Dapita sila sa pagtandi sa mga tubag sa mga disipulo niining duha ka istorya. Unsa nga mga leksyon ang atong makat-unan kon giunsa paggamit sa mga disipulo ang mga pulong sa Manluluwas ngadto sa ilang kaugalingon? Aron makakat-on pa og dugang, tan-awa ang pagpasabut ni Presidente Dieter F. Uchtdorf ngadto sa Mateo 26:21–22 diha sa iyang mensahe nga “Ako Ba, Ginoo?” (Liahona, Nob. 2014, 56–59).

Mateo 26:36–46

Si Jesukristo mipahigayon og walay kinutuban nga Pag-ula alang kanato.

• Ikonsiderar ang pagdapit sa mga sakop sa klase sa pagpakigbahin og mga ideya nga ilang nakita mahitungod sa Pag-ula ni Jesukristo diha sa ilang personal o pamilya nga pagtuon.

• Ang Mateo 26 naghulagway kon unsay nahitabo sa Getsemani, apan nakasabut ba ang mga sakop sa imong klase sa kamahinungdanon niini diha sa ilang kinabuhi? Aron matabangan sila, mahimo nimong isulat diha sa pisara ang mga pangutana sama sa Unsay nahitabo didto sa Getsemani? ug Nganong importante man kini ngari nako? Ang mga sakop sa klase mahimong magtrabaho nga tagsa-tagsa o sa ginagmay nga mga grupo aron makita ang mga tubag diha sa Mateo 26:36–46; Alma 7:11–13; ug Doktrina ug mga Pakigsaad 19:16–19. Mahimo usab nilang makita ang mga tubag diha sa mensahe ni Elder C. Scott Grow nga “Ang Milagro sa Pag-ula” (Liahona, Mayo 2011, 108–10).

• Diha sa Basahon ni Mormon, gitawag ni Jacob ang Pag-ula ni Jesukristo nga “walay kinutuban nga pag-ula” (2 Nephi 9:7). Aron matabangan ang mga sakop sa klase nga makasabut kon unsay kahulugan niini, mahimo nimong ipakigbahin ang mga pagtulun-an ni Presidente Russell M. Nelson diha sa “Dugang nga mga Kapanguhaan” ug hangyoa ang mga sakop sa klase sa paglista og mga paagi nga ang impluwensya sa sakripisyo sa Manluluwas gikonsiderar nga walay kinutuban. Mahimo usab nilang basahon ang mosunod nga mga kasulatan ug idugang diha sa ilang lista: Mga Hebreohanon 10:10; Alma 34:10–14; Doktrina ug mga Pakigsaad 76:24; ug Moises 1:33. Unsaon man nato sa pagpakita sa atong pasalamat alang sa unsay nahimo sa Manluluwas alang kanato?

Awhaga ang Pagkat-on diha sa Panimalay

Aron madasig ang mga sakop sa klase nga magpadayon sa pagbasa, mahimo nimo silang pangutan-on kon unsa ang pito ka butang nga gisulti ni Jesus samtang diha pa Siya sa krus. Sultihi sila nga ilang mahibaloan kon unsay gisulti sa Manluluwas pinaagi sa pagbasa sa Mateo 27; Marcos 15; Lucas 23; ug Juan 19.

Dugang nga mga Kapanguhaan

Mateo 26; Marcos 14; Lucas 22; Juan 18

Pagtugyan sa atong kabubut-on ngadto sa Amahan.

Si Elder Neal A. Maxwell nagtudlo: “Kon itugyan ninyo ang inyong kabubut-on ngadto sa Dios, inyong gihatag Kaniya ang bugtong butang nga inyoha gayud nga mahatag Kaniya nga matawag og inyo gayud. Ayaw dugaya ang pagpangita sa altar o pagbutang sa gasa gikan sa inyong kabubut-on diha niini!” (“Mahinumdom Kon Unsa ka Maloloy-on ang Ginoo,” Liahona, Mayo 2004, 46).

Ang walay kinutuban nga Pag-ula.

Si Presidente Russell M. Nelson nagtudlo:

“Ang Pag-ula [ni Jesukristo] walay kinutuban—walay katapusan. Wala usab kini kinutuban diha sa pagluwas sa tanang katawhan gikan sa walay katapusan nga kamatayon. Wala kini kinutuban diha sa hilabihan Niya nga pag-antus. Wala kini kinutuban sa panahon, mitapos sa nag-una nga sundanan sa pagsakripisyo og hayop. Wala kini kinutuban sa gidak-on—kinahanglan kining pagahimuon sa usa ka higayon alang sa tanan. Ug ang grasya sa Pag-ula modangat dili lang sa walay kinutubang gidaghanon sa katawhan, apan ngadto usab sa walay kinutubang gidaghanon sa mga kalibutan nga Iyang gilalang. Wala kini kinutuban sa bisan unsang tawhanong pangsukod o mortal nga panabut.

“Si Jesus lamang ang makahalad sa ingon nianang walay kinutuban nga pag-ula, gumikan kay gipakatawo Siya sa mortal nga inahan ug imortal nga Amahan. Tungod nianang lahi nga katungod sa pagkatawo, si Jesus mao ang walay kinutuban nga Nilalang” (“The Atonement,” Ensign, Nob. 1996, 35).

Si Presidente Heber J. Grant nagtudlo: “Wala lamang moanhi si Jesus isip kinatibuk-ang gasa, mianhi Siya isip indibidwal nga halad. … Alang sa matag usa kanato Siya namatay didto sa Kalbaryo ug ang Iyang dugo moluwas kanato nga dunay kondisyon. Dili isip mga nasud, mga komunidad o mga grupo, apan isip mga indibidwal” (“A Marvelous Growth,” Juvenile Instructor, Dis. 1929, 697).

Pagpalambo sa Atong Pagtudlo

Tan-aw pinaagi sa panan-aw sa Dios. Paningkamot sa pagtan-aw sa mga sakop sa imong klase sama sa pagtan-aw sa Dios kanila, ug ang Espiritu mopakita kanimo sa ilang balaanong bili ug potensyal. Sa pagbuhat nimo niini, giyahan ka diha sa imong mga paningkamot sa pagtabang kanila (tan-awa sa Pagtudlo sumala sa Pamaagi sa Manluluwas, 6).