Adlaw sa Pagkunsad, ni Sidney King

Hulyo 1–7

Mga Buhat 1–5

“Kamo mao Unya ang Akong mga Saksi”

Kon magbasa ka sa Mga Buhat 1–5 ug magtinguha sa giya sa Espiritu, makadawat ka og inspirasyon mahitungod kon unsa nga mga kamatuoran diha sa mga kapitulo ang makatabang sa mga sakop sa imong klase nga mas hingpit nga mosalig sa Espiritu Santo ug mahimong matinud-anong mga saksi ni Ginoong Jesukristo.

Irekord ang Imong mga Impresyon

Dapita ang Pagpaambit

Adunay daghang makahuluganong mga tudling ug mga baruganan diha sa Mga Buhat 1–5. Usa ka mahinungdanong paagi sa pagdiskubre kon hain ang labing bililhon ug importante ngadto sa mga sakop sa imong klase mao ang pagtugot kanila nga mosulti kanimo kon unsa ang ilang nabantayan diha sa ilang pagtuon. Unsaon ninyo sa pagdapit niining matang sa pagpaambit? Mahimong sama kini ka yano sa paghatag kanila og pipila ka minuto sa pagpangita ug sa pagpaambit og usa ka bersikulo gikan sa Mga Buhat 1–5 diin ilang gibati ang tingog sa Ginoo nga nakigsulti ngadto kanila.

Itudlo ang Doktrina

Mga Buhat 1:1–8; 2:37–39; 4:1–16, 31–33

Gigiyahan ni Jesukristo ang Iyang Simbahan pinaagi sa Espiritu Santo.

• Ang pagbasa mahitungod sa mga kasinatian sa mga Apostoles makatabang nga makit-an sa mga sakop sa imong klase kon sa unsang paagi sila makadawat sa gahum ug giya gikan sa Espiritu Santo diha sa ilang mga calling sa Simbahan. Usa ka paagi sa pagribyu sa mga kasinatian diha sa Mga Buhat 1–5 mao ang pagsulat sa pisara og Ang Espiritu Santo makatabang kanako sa akong calling pinaagi sa: ug dayon dapita ang mga sakop sa klase sa pagsiksik sa Mga Buhat 1:1–8; 2:36–39; ug 4:1–16, 31–33, nga mangita sa mga paagi aron mahuman ang sentence. Nganong nagkinahanglan man ang mga Apostoles sa Espiritu Santo?

• Isip usa ka klase, mahimo usab nimong masiksik kon giunsa ni Jesukristo paggiya ang Iyang Simbahan sa atong panahon pinaagi sa Espiritu Santo. Sa pagbuhat niini, mahimo nimong kontakon og sayo ang pipila ka sakop sa klase ug hangyuon sila sa pagribyu sa mga istorya diha sa Mga Buhat 1:1–8; 2:37–39; 4:1–16, 31–33 ug mangandam sa pagpaambit og personal nga mga kasinatian nga susama niadtong sa mga Apostoles. Pananglitan, mahimo silang mopaambit mahitungod sa panahon sa dihang gitabangan sila sa Espiritu Santo sa pagpamatuod bahin sa usa ka baruganan sa ebanghelyo o sa pagtubag og pangutana sa usa ka tawo. Unsay ilang gibuhat sa pagtinguha sa giya sa Espiritu Santo?

Mga Buhat 1:15–26

Ang mga Apostoles ni Jesukristo gitawag sa Dios pinaagi sa pagpadayag.

• Mahimong makatabang kini sa imong klase nga mahibaloan nga ang bag-ong mga sakop sa Korum sa Napulog Duha ka mga Apostoles sa karaang Simbahan gitawag pinaagi sa pagpadayag, sama ra usab karon. Ikonsiderar ang pagdapit sa mga sakop sa klase sa pagpasabut kon sa unsang paagi kaha mahitabo ang pagpili og ipuli alang sa usa ka executive position, sama sa pagtan-aw sa educational background, kasinatian, ug uban pa. Hangyoa sila sa pagtandi niini kon giunsa pagtawag si Apostol Matias diha sa Mga Buhat 1:15–26 (tan-awa usab sa 1 Samuel 16:1–13). Sa unsa kaha nga paagi nga ang kinutlo ni Presidente Gordon B. Hinckley diha sa “Dugang nga mga Kapanguhaan” makadugang ngadto sa panabut sa mga sakop sa klase? (tan-awa usab sa Russell M. Nelson, “Pagpaluyo sa mga Propeta,” Liahona, Nob. 2014, 74–77). Sa unsang paagi nga kining kahibalo makaapekto sa atong pagtuo diha sa mga lider nga gitawag sa Ginoo? Giunsa ninyo pagbaton ang inyong pagsaksi bahin sa modernong mga apostoles ug mga propeta?

Mga Buhat 2:22–47; 3:13–26; 4:5–12

Madawat nato ang mga panalangin sa Pag-ula samtang magsunod kita sa unang mga baruganan ug mga ordinansa sa ebanghelyo.

• Sa unsang paagi nga kadtong inyong tudloan makakita og gahum ug kahulugan sa yano nga mga kamatuoran nga gitudlo nila ni Pedro ug Juan (hugot nga pagtuo diha kang Jesukristo, paghinulsol, bunyag, ang gasa sa Espiritu Santo, ug paglahutay hangtud sa katapusan)? Usa ka paagi tingali mao ang pagsiksik sa kaimportante niining mga baruganan ug mga ordinansa, usahay nagpasabut ngadto sa doktrina ni Kristo (tan-awa sa 2 Nephi 31). Mahimo kang magdala og lima ka poster ngadto sa klase ug isulat diha sa ibabaw sa matag poster ang usa sa mosunod nga mga aspeto sa doktrina ni Kristo: Hugot nga Pagtuo diha kang Jesukristo, Paghinulsol, Bunyag, Gasa sa Espiritu Santo, Paglahutay hangtud sa Katapusan. Bahina ang klase ngadto sa lima ka grupo, ug hatagi ang matag grupo og usa sa mga poster. Dapita ang mga grupo sa pagribyu sa depinisyon sa hilisgutan diha sa ilang poster sa Giya ngadto sa mga Kasulatan o Isangyaw ang Akong Ebanghelyo. Dayon makaribyu sila sa mga pagtulun-an ni Pedro diha sa Mga Buhat 2:22–47; 3:13–26; ug 4:5–12 ug isulat diha sa ilang mga poster ang mga ehemplo sa gi-assign ngadto nila nga hilisgutan gikan sa mga kasulatan. Sa unsang paagi nga kining mga baruganan ug mga ordinansa sa ebanghelyo makatabang kanato nga makabaton sa mga panalangin sa Pag-ula sa Manluluwas? Unsa ang mga tahas niining mga baruganan ug mga ordinansa diha sa plano sa Langitnong Amahan bahin sa kaluwasan?

• Mahimo nimong hangyuon ang pipila ka full-time, bag-o lang miuli, o mga ward missionary sa paggahin og pipila ka minuto sa pagpasabut kon giunsa nila pagtudlo ang uban mahitungod sa doktrina ni Kristo gamit ang leksyon 3 sa Isangyaw ang Akong Ebanghelyo. Nganong ang doktrina ni Kristo mao man ang nag-unang mensahe sa atong mga misyonaryo? Sa unsang paagi nga ang tawo nga nabunyagan ug nakadawat na sa gasa sa Espiritu Santo makapadayon sa paggamit sa doktrina ni Kristo?

Mga Buhat 2:37–47

Ang Espiritu Santo modasig kanato sa paglihok sa unsay atong nakat-unan.

• Samtang magtuon ang mga sakop sa klase sa mga kasulatan diha sa panimalay ug dungan diha sa klase matag semana, mahimong mobati sila kanunay nga “gisakitan sila sa kasingkasing” (Mga Buhat 2:37). Mahimong mobati ka nga nadasig sa pagtabang kanila nga mopadayon pa og gamay pinaagi sa pagpangutana, “Unsa may among pagabuhaton?” (Mga Buhat 2:37). Basaha og dungan ang Mga Buhat 2:37–47, nga magdapit sa mga sakop sa klase sa pagsiksik alang sa mga butang nga gibuhat niining grupo sa 3,000 ka tawo isip resulta sa pagdapit ni Pedro. Mahimo usab silang mopaambit sa mga paagi nga milihok sila sa inspirasyon gikan sa ilang pagtuon sa pulong sa Dios. Dayon mahimo kang magreserba og panahon sa katapusan sa klase alang sa matag tawo nga pangutan-on ang ilang kaugalingon sa pangutana nga “Unsa may among pagabuhaton?” ug irekord ang ilang mga impresyon.

Bisan pa man nga gidakop ug gidagmalan, maisugong gisangyaw ni Pedro ang ebanghelyo.

Mga Buhat 3; 4:1–21; 5:12–42

Samtang kita napuno sa Espiritu Santo, makapaambit kita sa ebanghelyo sa walay kahadlok.

• Ang istorya bahin nila ni Pedro ug Juan nga maisugong mipamatuod ni Jesus makapadasig sa imong klase nga dili mahadlok kon unsay gihunahuna sa uban samtang gipaambit nila ang ilang pagsaksi sa ebanghelyo. Unsa may nakapadayeg sa mga sakop sa klase mahitungod sa kaisug nila ni Pedro ug Juan diha sa Mga Buhat 3; 4:1–21; ug 5:12–42? Unsa ang relasyon tali sa pagdawat sa gasa sa Espiritu Santo ug sa atong abilidad nga maisugong mopamatuod? Ang mga istorya bahin niining mga kapitulo gi-drama diha sa mga video nga “Peter Preaches and Is Arrested,” “Peter and John Are Judged,” ug “Peter and John Continue Preaching the Gospel” (LDS.org). Ang mga sakop sa klase mahimo usab nga dunay mga kasinatian nga ipaambit diin sila, o ang tawo nga ilang nailhan, maisugong nanalipod o mipamatuod sa ebanghelyo.

Awhaga ang Pagkat-on diha sa Panimalay

Hangyoa ang mga sakop sa klase sa paghunahuna kon unsay ilang reaksyon kon nahibalo sila nga ang pagsunod sa ebanghelyo moresulta sa ilang kamatayon. Sultihi sila nga diha sa Mga Buhat 6–9 mabasahan nila ang mahitungod sa usa ka tawo nga andam nga mamatay alang sa iyang gituohan.

Dugang nga mga Kapanguhaan

Mga Buhat 1–5

Ang pagtawag sa usa ka sakop sa Napulog Duha.

Si Gordon B. Hinckley mipaambit sa mosunod nga mga ideya mahitungod sa proseso sa pagtawag og bag-ong Apostol: “Ang pamaagi talagsaon sa simbahan sa Ginoo. Walay pagtinguha alang sa katungdanan, walay pagpanlimbong alang sa posisyon, walay pagpangampanya sa pagtuboy sa hiyas sa usa ka tawo. Itandi ang pamaagi sa Ginoo ngadto sa pamaagi sa kalibutan. Ang pamaagi sa Ginoo hilum, usa kini ka pamaagi sa kalinaw, wala kini pagkuha og dakong pagtagad o gastuhanan. Wala kini kaugalingong interes o pasigarbo o ambisyon. Ubos sa plano sa Ginoo, kadtong adunay responsibilidad sa pagpili og mga opisyales gidumala sa usa ka mahinungdanong pangutana: ‘Kinsa man ang gusto sa Ginoo?’ Adunay mahilum ug mahunahunaon nga pagtimbang-timbang. Ug adunay dakong panginahanglan sa pag-ampo aron makadawat og kumpirmasyon sa Balaang Espiritu nga ang pagpili husto” (“God Is at the Helm,” Ensign, Mayo 1994, 53).

Pagpalambo sa Atong Pagtudlo

Salig sa imong mga lider. “Ang imong mga lider sa priesthood ug auxiliary gusto nga motabang kanimo nga magmalampuson. Pangayo sa ilang tambag samtang maningkamot ka sa paglambo isip usa ka magtutudlo ug samtang mamalandong ka sa mga panginahanglan sa imong mga gitudloan” (Pagtudlo sumala sa Pamaagi sa Manluluwas, 5).